الطبعة العاشرة لدورة الرقي بمدبرة منزل مثالية - الصفحة 96

it's me · 2012-12-16, 09:18

ماشي مشكل حاولي معاه بالاك تجيب نتيجة و الاولاد قوليلهم باباكم تعبان برك من الضغط تع الخدمة هذا مكان اذا تحبي نعطيلك رقم الطبيب هذاك

وفاء سعاد · 2012-12-16, 09:19

مينة واش حوالك راكي لاباس

وفاء سعاد · 2012-12-16, 09:21

منى ربي تعيشى ابعتيلي الرقم بلاكش يجعل على يدو الشفاء بالرغم من انه راح عند الطبيب بلاكش اسمه سعدون مارانيش متاكدة وقالو راك ماعندك والو الاعصاب ملاح كلشى مليح

نافلة · 2012-12-16, 09:24

اقتباس:

المشاركة الأصلية كتبت بواسطة minnnaaa

صباح الخيرات على احلى لبنات
اللهم بك اصبحنا وبك امسينا وبك نحيا وبك نموت واليك النشور

صباح الخير مينا كيراكي ان شاء الله تكوني شفتي ماماك طمنيني كيراها دايرة و احوالها ان شاء الله بخير

وفاء سعاد · 2012-12-16, 09:32

مرسي منى راهو وصلنى الرقم راني درك نروح ندير الميناج والغداء وابني راهو ناض هو اللي يحكم الميكرو من فضلكم ماتنساونيش من الدعاء بنية شفاء زوجي

سمراء الدنيا · 2012-12-16, 09:32

اقتباس:

المشاركة الأصلية كتبت بواسطة it's me

سموووورتي توحشتك وشراكي
معليه الحبيبة ربي معاك بصح قوليلي دار باباك وين؟

دار اهلي في عين الصفراء
و هنا ما عندي حتى واحد و نظل انا ولادي غير في الدار ندورو
هاذاك علاه نستناو العطل باه نروح نفوجو حتى اهلو هو يسكنو تم

نافلة · 2012-12-16, 09:34

اقتباس:

المشاركة الأصلية كتبت بواسطة وفاء سعاد

منى ربي تعيشى ابعتيلي الرقم بلاكش يجعل على يدو الشفاء بالرغم من انه راح عند الطبيب بلاكش اسمه سعدون مارانيش متاكدة وقالو راك ماعندك والو الاعصاب ملاح كلشى مليح

عزيزتي وفاء كيما قاتك منى خاصو يروح عند طبيب نفساني و يداوم عليه مبصح خاصو شوية صبر حالتو شوية طول المهم ديريلو الكوراج وزيدي وقفي معاه وما تفقدوش الامل لكل داء دواء و ما تعمروش راسكم بهدرت الناس و ما تمليش من الهدرة مع ولادك في كل مرة شرحيلهم و فهميهم بلي يجي نهار الفرج و اصمدي و شدي في مولانا و دعي ربي يعاونك و قوي قلبك بالذكر و يوم الفرج قريب ان شاء الله

سمراء الدنيا · 2012-12-16, 09:35

ميينا صباح الخير كي صبحت

وفاء ربي يكون معاك و لازم توقفي مع اب ولادك
و العلم راه مطور و ان شاء الله تلقي الحل عند هاذاك الطبيب
الله يجازيك بخير منى و يسقملك السعد

نافلة · 2012-12-16, 09:36

منى واش شريتي كي روحتي للسوق

Minnnaaa · 2012-12-16, 09:37

يسال عليكم الخير يا وجوه الخير
حبيبتي منى ربي يسخر ويكمللك بالخير وبصحتك تتهني بيهم ان شاء الله
حبيبتي وفاء ربي يقدرك ويشافي مولا دارك راني حاسة بيك حبيبتي وبنتك عندها الحق مالازمش الناس يدخلو عليك هاكا فالليل ويزيدو يهولو الحالة في وضع كيما هذا يليق الهدوء وثم الهدوء وعلاحساب هدرتك مولا دارك يقري وربي يكون في عونه راه ضغط التعليم كبير ومايديرش غير التوسويس يدير كثر من هاك وزيدي عاونيه بينك بينه بالقران واذكار التحصين وما تحسسيهش بلي راه مريض قلشيه من باب الاحسان للزوج باش ما يزيدش يتقلق وربي يشافينا ويشافيه حبيبتي
حبيباتي سمورة وطيمة كيراكم؟ ان شاء الله بيك وشكرا على الذكار
انا راني بخير والحمد لله رحت الجمعة لدارنا (لعقوبة للي مازالو ما راحو)وتلاقيت مع اختي فالدار ودرنا لمة مراها ليكم كاملين
ليلوشة العزيزة جا الميقري ولا مازال؟ غير خبرينا باش نمدولك اذن بالغياب هاهاها ايه راني جيت طليت على لبنات بالشفا عليهم وهدرت معاك بردت جني بصح ما بغيتيش تقوليلي الميقري شا يخددم وقعدتي تتلفيلي فالهدرة ربي يسامحك ما نشفكش
مريومة كيراكي حبيبتي توحشناك

سمراء الدنيا · 2012-12-16, 09:38

اقتباس:

المشاركة الأصلية كتبت بواسطة فاطمة بشار

عزيزتي في ما يخص موضوع العطلة حاولي تتحدثي مع زوجك واكيد عندك تاثيرات عليه...

الف الف شكر ليك يا فطيمة لعزيزة رانا كثرنا عليك بهمومنا
و نوعدك ان شاء الله من اليوم راح نوقف مع المهدي حتى يستوعب دروسه
و المفاوضات نتاع العطلة من اليوم رايحة تبدا

it's me · 2012-12-16, 09:38

اقتباس:

المشاركة الأصلية كتبت بواسطة سمراء الدنيا

دار اهلي في عين الصفراء
و هنا ما عندي حتى واحد و نظل انا ولادي غير في الدار ندورو
هاذاك علاه نستناو العطل باه نروح نفوجو حتى اهلو هو يسكنو تم

وين جات هاذي عين الصفرا؟؟
اصبري حنونة و زيدي كثريلو المعاني و الدلال بش يخليكم تروحو

نافلة · 2012-12-16, 09:40

سمراء راني عاودت درت الخبز العربي و هذ المرة تنفخلي و جا شباب
مبصح كي حليتو جاتني جيها رقيقة وجيهة شويةغليظة واش نورمال ولا لا؟

it's me · 2012-12-16, 09:41

اقتباس:

المشاركة الأصلية كتبت بواسطة فاطمة بشار

سمراء راني عاودت درت الخبز العربي و هذ المرة تنفخلي و جا شباب

مبصح كي حليتو جاتني جيها رقيقة وجيهة شويةغليظة واش نورمال ولا لا؟

اييييه بصحتك تبانلي نورمال و ضرك تزيد تقولك سمورة

Minnnaaa · 2012-12-16, 09:41

اقتباس:

المشاركة الأصلية كتبت بواسطة فاطمة بشار

صباح الخير مينا كيراكي ان شاء الله تكوني شفتي ماماك طمنيني كيراها دايرة و احوالها ان شاء الله بخير

ربي يخليك حبيبتي
واه شفتها ومليت عينيا بشوفتها وحكيتلها عليكم حتى لي راها تعرف كل وحدة باسمها وتسلم عليكم كاملين
والله لقيتها مريضة شويا بصح كي عمرنا عليها الدار انا واختي واولادنا ريحت شويا