طريقة أكيدة لتصبحي ربة بيت سعيدة

[arwa alaa]

صباح الخيرر عليكم

[فرحة العمر]

السلام عليكم وصباح الخير على وجوه الخير
كيما العادة الجانب الديني تم ولله الحمد اما التجمل غسلت وجهي ورطبت فقط وجدت لفطور لبنتي وعجوزتي برك زوجي خرج وانا نائمة وبإذن الله ناوية للغداء ندير حاجة خفيفة ونسيق الديار إذا قدرت نخرج للبلكونة وللعشاء رايحة ندير محاجب
ماسك الكركم مايصفرش الوجه ما تخافيش ديري ملعقة صغير كركم مع 2ملاعق ياغورت ولا حليب ولا لبن انا حاليا راني نديرو مع لبن صومام ماحبوش يشربوهلي وانا يضرني قلت نديرو في وجهي أحسن ما نرميه بعد ما تقشري وجهك والتقشير يكون مرتين في الأسبوع برك حطي الماسك لأطول فترة ممكنة انا نديرو لمدة ساعة ومن بعد كي نحيه بحركات دائرية واغسلي وجهك بصابونتك ولا بالغاسول وإذا خفتي زيدي إمسحي بمزيل المكياج ورطبي وجهك بمرطبك الخاص انا نستعمل نيفيا سوفت الماسك ديريه يوميا انا بشرتي مختلطة وانتي جربي وشوفي وتقدري ديريه مع العسل الطبيعي انا العسل ماعنديش
ونشكركم على كلماتكم والله شجعتوني إني نظم روحي أكثر وأكثر
سؤال برك انا حامل في الخامس ونوض نصلي الفجر ونعاود نرقد للثامنة وندير قيلولة لمدة ساعة هل نومي طبيعي ولا راني كسولة

[ام شمسو محمد]

أصبحنا و أصبح الملك لله رب العالمين .
صباحكم برباحكم أم صفصف . أم متين ، سيي ،رندا ، أروى آلاء ، فرحة االعمر و كل الفرااااشااااات .
أم متين كلامك حق و نقلك موضوعي و موفق ، تلقاي نساء يعتبرو رجاالهم مجرمين و ما علابالهمش بلي هوما اللي متسبببيين في هذا الإجرام بسلوكاتهم اللي تفتتقد للذكااء و الأنوثة و اللياقة و الرقي و الأدب و كل ما ذكرتي أم متين .
بمناسبة حديثكم الصباحي الناعم على الجمااال وش رايكم نديرو دورة تجمييييييل منزلي بالموازاة مع نشاطنا اليومي ،نعتننيو ببشرتنا و شعرنا و جسمنا و نصححو كل مفاهيمنا على الجمااال و التجمييييل .
لي عودة بإذن الله .

[Sii]

صباح الانوار فرحة العمر بوركت على الاجابة ان شاء الله نجرب الماسك
ربي يتمم حملك على خير وعافية اما بالنسبة للنوم متخميش فالكسل لانك حامل وتحتاجي للنوم فنامي كما تقدري المهم راكي ديري في واجباتك الدينية واشغالك المنزلية على اتم وجه يومك موفق

[Sii]

صباح الفل ام شمسو الحبيبة
انا دائما معك في كل شي تقترحيه

[أريج13]

صباح المحبة و النشاط
صباح النور سي ،فرحة العمر ،رندة ،ام صفصف، ام متين ، اروى الاء
صباح النور ام شمسو شكرا على الفكرة نحن معك باذن الله
يوم موفق لكن فراشات و ادامكن الله محلقات

[فرحة العمر]

السلام عليكم
راني رجعت بعدما خلصت أشغالي سيقت وصليت الضحى ووجدت الغداء ورحت لعند جارتي مديت لولادها يشريولي الخبز ماقدرتش نخبز لاني نفضت غرفة عجوزتي والله حسيتو رايح يخرج قبل وقتو
وضرك راني نشرب في قهوتي ونسمع في فيديو عن تنظيم الوقت إذا حبيتو نعطيلكم إسم القناة فيها فيدوهات رائعة انا استفدت منها بزاف
وبالتوفيق للجميع

[رندة.]

مرحبا بكل الفراشات الشاطرات
رانا معاك أم شمسو في موضوع الجمال والعناية بالبشرة
فرحة العمر ربي يعينك والنوم حاجة عادية للمرأة الحامل. حاولي ماتعبيش روحك كي تتعبي حبسي ربي ورحمته

[ام تينة]

السلام عليكم

فكرة رائعة اختي ولنتحدت كل يوم عن جزء من الجسم وكل واحدة تعطي خلكاتها وتدبيراتها المجربة
متلا اليوم الاول هو اليوم العالمي للشعر

اليوم التاني هو اليوم العالمي للبشرة وهكدااااااااااا

[فرحة العمر]

فكرة رائعة أختي أم شمسو انا نهارات اللي ندير فيهم ماسكات ونهتم بروحي نحس روحي أنثى خاصة إذا جاوني ضيوف على فجئة ولقاوني باهيوشة والله نحس روحي ملكة أصلا العناية بالنفس تزيد الثقة بالنفس
حاليا راني مدايرة جدول للعناية بنفسي وراني ناوية ندير جدول للعناية بنفسي في النفاس مع اللي نزيد في رمضان لازم كي نخلص بإذن الله الربعين نكون مختلفة
أدعيولي نقدر برك لاني رايحة نفس في داري وانا اللي رايحة نخدم
طولت عليكم سامحوني

[رندة.]

السلام عليكم ورحمة الله وبركاته
ام متين شكرا على النصائح الي قدمتيهم بخصوص اتيكيت العلاقة بين الزوجين
كل ما نقرا نقطة نقول هاذي مهمة حتى وصلت في الاخير انهم كامل مهمين. يعطيك الصحة

[الفجر القادم]

مساء النور و البركات لكل الفراشات الجميلات و الله اشتقت اليكن،رجعت الى البيت و قلت اتواصل مع احلى اخوات،ان شاء الله تكونوا بخير كلكن.
بوركت اختي ام متين و الله موضوع قيم و قد استفدنا منه جعله الله في ميزان حسناتك.
اختي ام شمسو نحن دائما معك في اي فكرة تقترحينها،ساتابع معكن ان شاء الله و لكني ساغيب قليلا لاننا بصدد التحضير في دار ختاني حماتي وشيخي راهم رايحين للعمرة الاسبوع القادم ان شاء الله.
سلامي الحار للجميع و بالتوفيق لكن.

[Sii]

السلام عليكم ورحمة الله وبركاته
في صباح درت الروتين الصباحي ووجدت الغداء
درت التنظيف الاسبوعي للثلاجة وزدا معاها ادراج الخضر و بدون القمامة اعزكم الله
ورا لغدا وجدت مسكوتشو وعيطت لعجوزتي ولبنات جاو شربنا قهوة وتاي هوما روحو وانا غسلت الاواني و حطيت لعشا يطيب وجيت نطل عليكم
اختي فرحة عمر راني جربت ماسك لقلتيلي عليه درتو ساعة صباح كي كنت نقضي فاشغالي كما غسلتو في الاول لقيت وجهي احمر بزاف خلعت مي من بعد تنحاتلي لحمورة عجبتني نتيجتو ان شاء الله نعتمدو

[فرحة العمر]

السلام عليكم
انا وجدت عجينة المحاجب والصلصة مازالي غير نطيب قلت يقرب الزوج يجي ونطيب لانو امو تتعشا بكري
الأخت سي الحمد لله كي عجباتك النتيجة وإذا حبيتي ممكن تستعملي الكمون والحليب للتقشير ثاني مليح انا نديرو هو وساعات كي نضرح ندير مقشر جاهز و متنسايش البخار مرة في الأسبوع ولا أسلوعين انا مانديروش نتخنق وعندي الحساسية على هذي مانديروش نمسح وجهي بقطنة فيها ماء دافئ يكون مغلى فيه الإكليل والنعناع أحسن من لاشيء وإذا حبيتي ممكن نحطلك طريقتي في العناية بنفسي

[Sii]

رايحة نجرب تقشير تاع الكمون لانو انا ايضا تقريبا نستعمل غير التقشير الجاهز
اكيد اختي الحبيبة لكان منثقلش عليك تكتبيلي برنامجك وجزاك الله كل خير
بصحتكم المحجوبة بالصحة والهنا على قلبكن