رمضان على الابواب يا ربات البيوت

[سمراء الدنيا]

عزيزاتي و حبيباتي راني ختمت يوم الجمعة و دعيت ليكم كامل ..(اللهم تقبل منا) ...........و ان شاء الله رايحة نبدا التلاوة من اول و جديد ........ و نحاول نختم قبل لا يكمل شعبان ..... عندي 3 احزاب بعد الفجر و 3 احزاب نقسمهم على باقي اليوم

[oum radja]

تابع الاطباق الرمضانية

طاجين البصل بالزبيب
هاذا الطاجين يجمع بين الطعم المالح و الحلو و الحامض في نفس الوقت و عنده بنة خاصة
تقدري تديريه في الطاجين المغربي تاع الطين كيما تقدري تديريه في الكوكوط
تجيبي قطعة لحم من الافضل خروف ويكون صغير يعني يطيب بالخف
ديري شوية زيت و تقلي فيه اللحم تاعك مع حبة بصل مرابية
شوية ملح وسكينجبير و زعفران وفلفل كحل
بلا ما ننسى عود صغير قرفة
نواصلو عملية القلي حتى يتحمر اللحم ويذبل هاذاك البصل
نجيبو كمية من البصل 5 او 6 حبات و نقطعوهم دوائر
و نديروهم فوق اللحم
نزيدو عليه حبة طماطم مرابية و بلا ما نديرو الماء و على نار خفيفة
نغلق الكوكوط او نغطي الطاجين و نأكد انقص النار
و نخليه يطيب
ما تخافوش راه كاين الماء تاع البصل و الطماطم
من بعد30 د افتحي عليه وشوفي اذا ناقصاته حاجة
و تكوني موجدا الزبيب تاعك من الافضل يكونو الحبات كبار ديري مقدار كاس وديري مغرف ماشي مملوؤة تاع سكر وخليه يتجمر
و تاكلوه بالصحة و الهنا

بانسبة للسهرات
تفضلو هاذ الرابط

https://www.djelfa.info/vb/showthread...D3%C8%E6%D3%C9

عندي فقط ملاحظة صغيرة
في هاذ الموضوع درت الصور الاصلية للوصفة على خاطر الكارت ميموار تاعي كانت فاسدا بالصح الوصفة جربتها عدة مرات و مضمونة و هااااااااااااااايلة وتنفع لسهرات رمضان
و تقدرو تديرو نصف المقادير

[سمراء الدنيا]

بارك الله فيك عزيزتي ام رجاء ........ راكي قايمة بالواجب كما ينبغي يعطيك الصحة ....
باينين اطباق هايلين ما عرفت واش نطبق واش نخلي
شكرا جزيلا .على اثراء الموضوع

[ام منيب]

ام رجاء انت تحفة وياقوتة نادرة

[سمراء الدنيا]

السلام عليكم و رحمة الله و بركاته اليوم بغيت نقتارح عليكم بعض التحليات لشهر رمضان
تحلية بالفرماج لام خديجة

jتحلية بالكرمال و الكاكاو

تيراميسو

ياوورت منزلي

مثلجات ام رامي

صلاد فروي بالياوورت

الفلون

[oum radja]

تابع الاطباق الرمضانية
بسطيلة باللوز و الدجاج
نظرا لطلب الاخت ام منيب حبيت نشرح طريقة صنع البسطيلة
نحتاج الى

اوراق ديول من النوع الجيد
كمية من اللوز تقدري تشري قيمة 10 الاف
سكر ارطب
قرفة مطحونة
اطراف تاع دجاج
كمية من البصل 3 او 4حبات متوسطين
التوابل عندنا الملح,الزعفران,سكينجبير,رند وفلفل كحل
حبات بيض 5 او 6

ديري الدجاج يتقلى في 2مغارف زيت مع التوابل اللي ذكرتهم و زيدي عليه البصل مقطع جوانح و كاس ماء و خليهم يطيبو
حضري اللوز بنزع القشور و حمصيه في شوية زيت و اطحنيه متوسط ديري له مغرف سكر ارطب وقرصة قرفة انا ما نحبش نكثر
كي طيب الدجاج فتتيه و خليه
و المرقة خليها تعقد مليح و زديلها البيض نحي منو 2صفار تحتاجيهم من بعد
حركي البيض مليح حتى يطيب و طفي النار
الان كلش راه واجد
جيبي الصينية او المول تاعك دائري او مستطيل
ادهنيه بالسمن و حطي ورقة ديول في القاع و4 او 5ورقات نصها في القاع و النصف الاخر برا ادهنيهم مليح بالسمن
دري الطبقة الاولى اللي هي الدجاج المفتت و غطيه بورقة ديول
الطبقة الثانية خليط البصل و البيض لازم ما يكون ناشف و تجي البسطيلة تاعك ناشفة ماي يكون جاري و تترخف البسطيلة
وديري و رقة ديول
والطبقة الثالثة اللوز و السكر ما تكثريش و القرفة ورشي بشوية ماء زهر بلا ما تعجني الخليط
في الاخير لمي اطراف الديول اللي كانت برا
اذا تخايفي تتحل لك لصقي بشوية بيض و ادهني بالسمن
و ديري ورقة ديول من فوق باش تغطي بيها و دخليها مليح في الحواشي
ادهني بشوية سمن و من بعد اطليها بصفار البيض اللي كنتي خليتيه و دخليها للفرن اللي كنتي شعلتيه من قبل
طيبيها من تحت و من بعد حمريها من فوق
كي تخرجيها رشيها بالسكر ارطب باستعمال مصفاة و زينيها بخطوط القرفة
و شهية طيبة





ملاحظة
اذا كنتو باغيين اديرو بسطيلات صغار اي فردية
جيبو غرفية ديرو فيها ورقة ديول والحشو ديروه بنفس الترتيب بلا ما نفصلو بين الطبقات بالديول وكي نكملو نلمو هاذيك الورقة تاع الديول ونغطو بورقة اخرى يعني نستعملو 2 ورقات برك و هاذا هو شكلها


الغرفية فقط بالش نظبطو الشكل
نتمنى انو الشرح يكون مفهوم و اللي بغات تستفسر على اي حاجة
اختكم ام رجاء في الخدمة

[ام امجد14]

ام رجاء يعطيك ما تتمناى راكى فحححححححححححححححححححححححلة

[*أم كوثر*]

متابعة باهتمام بارك الله فيك

[بنت الجزاير الغالية]

اللهم إجعل ماتبقى من أيام شعبان جابرة للقلوب ،
ساترة للعيوب ، ماحية للذنوب ، مفرجة للكروب ..
اللهم إن شوقنا لشهرك قد زاد ،
فيارب لا تحرمنا وأحبتنا من صيامه وقيامه ..
اللهم بلغنا رمضان لا فاقدين ولا مفقودين ..
أجاب الله لكم الدعاء ، وأبعد عنكم البلاء ،
ورفع شأنكم في الأرض والسماء .

[oum radja]

امين يارب العالمين

[نبض الفؤاد]

امين يا رب العالمين

[mariana1]

بارك الله فيك وفيت وكفيت جعلها الله في ميزان حسناتك.

[oum radja]

تابع الاطباق الرمضانية

طريقتي في تحضير ميني تارت مالحين

بالنسبة للعجينة ديري عبر فرينة ومعاه نصف العبر زبدة
حبة بيض, 2 حبات فرماج,شوية ملح,معدنوس مقطع رقيق,بودرة ثوم اذا كان عندك يعطيها بنة هايلة و شوية فلفل كحل
بسسي الفرية بالزبدة و زيديها الفرماج
زيدي البيضة و التوابل و من بعد لمي الخليط بماء بارد حتى تتحصلي على عجينة طرية بلا ما تعجنيها
غلفيها ببلاستيك وديريها في الثلاجة و اجبديها وقت الاستعمال
وجدي لي مول تاعك و تحلي العجينة رقيقة شوية و ترفديها بالرولو و تحطيها فوق لي مول و ابداي تساوي فيهم
اثقبيهم بالفرشيطة ودخليهم للفرن غير حساب ما العجينة تشد روحها و ما تخليهاش تحمار يعني نص طياب
في هاذ المرحلة تقدري ديريهم في علبة و تجمديهم الى حين الاستعمال
و الان نجو للحشو هنا تقدري تنوعي يعني اذاكان عندك كفتة ولا دجاج طيبيهم او حتى يكونو باقيين من الليلة الماضية
فتتي الدجاج ولا الكفتة او حتى طون زيديلهم شوية معدنوس مقطع وحظري ما يسمى ب
l'apareil a quiche
اي ضربي البيض حسب الكمية اللي عندك تاع التارت و ديري فيها 2مغارف كرام فراش من الاحسن و اذا ما عندكش ديري بتي سويس واذا ما كانش ديري حليب و ملح وفلفل كحل
عمري التارت تاعك بالحشو اللي وجدتيه وفرغي عليه شوية من خليط البيض بلا ما تكثري على خاطر البيض يطلع في الطياب
وفي الاخير ديري الفرماج ودخليها للفرن قبل وقت الافطار غير حساب ما يطيب البيض و يذوب الجبن واجبديهم سخونين مع الاذان باش تاكلوهم مع الحريرة او الشوربة
و شهية طيبة

[oum radja]

هاذي افكار ممكن تفيد في تزيين السفة

[شوشو 11]

ما شاء الله ام رجا كفيت ووفيت
يعطيك الصحة راك موسوعة ومنك نتعلم
بنت الجزائر دعاؤك رائع .....اللهم اااامين