يوميات عضوة - الصفحة 9

ام عبودة · 2014-02-23, 13:54

السلااام عليكم ما شاااء الله عليكم.راكم في القمة
خياتي حبيت نحط معكم برنامج بصح رانا متفاهمين مع الاخت سمراء على دورة مع بداية مارس وجدوا ارواحكم
كيفاش الدورة ؟؟؟؟
في اربع اسابيع تاع الشهر كل اسبوع نخصصه لجزء من البيت ونهار الخميس والجمعة تقريبا عطلة والشغل اللي ما كملش ايام الاسبوع نكمله في اليومين اوكيي
والله ما يكمل الشهر وحتى البيت كله منظف عميقااااا انا صراحة ما عنديش بيت كامل بصح استفدت كثيرا من غرف النوم والمطبخ
المهم نرورح نراجع ومن بعد نولي

نخله. · 2014-02-23, 14:06

ام عبوده فكرة البرنامج هايله كي يبدى خبرينا ننضمو للمجموعه

ياسمين الما من الاحسن تغسلي بيه كامل الجسم ان تفنينت ماب البرد وغسلت اطرافي ووجهي برك

وتقراي 3 مرات فاليوم ولازم الما اللي تقري عليه تكمليه ما تخلي منو والو وبالاك يروح فالمجيريات راكي رح تنضري حاولي تلميه في اناء وتسقسبيه مثلا

نهى سطاوالي ربي يعينك ما اصعب الدخول بعد الامومه بروفيتي من ساعة الرضاعه بزاف اللي تروحلهم ما يعرفوهاش

وربي يعينك على التنقل راني مجرباتو

ابداي من ذرك خبي فالكراطن الحوايج اللي ما تحتاجوهمش كيما لبسة تع الصيف لماعن تع الحطات والعرضات خلي غير النيسيسار مم الصالون رفديه اللي يجيك قولو رح نتقلك عذرك معاك هكا مكاش للي يطول عليك و يديرونجيك هههههههههه شريره

نخله. · 2014-02-23, 14:10

انا بعد ما خليتكم صباح فرزت شوي زريعه وما كملتهاش طيبت الخبز تاعي جا ولدي وغديت الاطفال و جا الالب تغدا وراح غسلت الماعن جبدت الحوايج ملماشينه ونشرتهم

توضيت وقريت سورة البقره من بعد اذن الظهر صليت وطبقت حوايح ..........كل يون الغسيل والتطباق بصح نحدد او نكوي مره بالاسبوع نجمعهم ونحدد مره وحده

نريح شوي ونطيب مسمن اللس عجنتو صباح من بعد نروح للوالده وبالاك نروح كاش ما نشري ماعن زبونه جات سلكتني صباح ودراهم الكروشي كامل نديرهم ماعن ههههههههه

نخليكم ونغمض شوي رح نموت متعب سلام

ام عبودة · 2014-02-23, 15:06

نخولة استحفظي شوي على روح راكي في الشهور الولى من الحمل والحركة بزاف تعبك
حبيت نسقصيك بنتي الصغيرة قداش عمرها
نهى الله يعينك العقوبة لينا هنههه
النهى اكيد الانتقال الى منزل جديد متعب ولازملو المعاونة اذا قدرت ماماك تجي ماذابيك تحرسلك على الصغار وانت شوفي شغلك على خاطر وحدك نظن صعيبة
وغير بشوي ويا رب عتبة مربوحة تشوفي عليها الربح والخير والصحة كل ما تتمناي

ام عبودة · 2014-02-24, 10:40

صباااحكم همة ونشاااط
واش راكم. راكو متفاهمين عليا. هههههههههههه
رجعت هربتووووووو ههههههه
المهم اليوم نظت على الستة توضيت وصليت وحفظت شوي من سورة البقرة
زوجي ما كانش
فيقت الاولاد وبعثتهم الى المدرسة كلمت امي لقيتها مريضة شوي قلت بلاك نروح من بعد اذا كتب ربي
وراني رايحة نوجدلها حاجة حلوة
الدار صبحت نظيفة غير طبقت الحوايج المغسولة ومسحت المرايا والتليفيزيون ونظمت الغرف وشمست الحالة راهو الجو يقطع روووووووووعة
عملت تقسير للرجلين وشربت دوايا تاع الحساسية الله يعافيكم منها
بدلت حوايج ماهر ورايحة نغسلهم. وهو راح خرج مع عمو
الفطور ما عنديش العجوز متكلفة بيه وبلاك العشاء نتعشى في
ارنا اذا كتب ربي
تهلاووو في ارواحكم
ننروح نوجد الحاجة الحلوة باااااي
ونهاااركم مبرووووك يا رب

ياسمين1990 · 2014-02-24, 11:46

السلام عليكم
صباح الخير على الكل
اهلا اختي ام عبودة لاباس على الوالدة ان شاء الله ربي يشفيها ويعافيها

نخله. · 2014-02-24, 13:05

صباح النووووووووووووور هههههههههرانا في لعشيه الصوالح بزلف ماقدرتش نحل الصباح

ام عبوده بنتي صغيره عمرها عام و4 شهر ماكنتش معوله نحنل ربي كتب سبحانو

فكرتيني في الرجلين انا لوكان ما نقسرهم كل ماندوش يرجعو كارثه يعني تقريبا كل يومين نديرلهم حمله

و كاين حاجه نسيتها في يومياتي واللي هي لي ماسك بما اني نحب المواد الطبيعيه كل ما يخرج زوجي صباح ندير حاجه لوجهي اللي كاينه مره ياوورت مرة فرماج مرة غاسول مرات زيت لوز او زيتون على حساب الحاجه

يامس رحت لوالده ماطولتش عندها لقينها رح تخرج و رحنا شرينا شوي ماعن عدي مده ما رحتش تسوقت دخلت 3 محلات او 4 تعبت ماقدرتش نكمل ورجعت كاو للدار مزيا لعشا طايب صليت ودرت سورة يس سمعتها انا ولادي ورقدت بكري

فطنت على 12 لقيتهم تعشاو ورقدو غطيتهم وبدلت للصغار الحوايج ولقيت لكوزينه مقلوبه ماقدلاتش خليتها للصباح وكملت نومي

الصباح توضيت صليت غسلت ماعن الليل وجدت لفطور بمسمن البارح فيقت الغاشي لبيو وراحو ودت غدايا وشوي كارنتيته الحوايج فالماشينه فتحت الدارتتهوى فرزت خفيف خفيف الوقت اليوم ماكفانيش جاوقت الغدا زوجي بعثلي فال***** مش رح يجي بيناتنت فرحت لاني مالحقتش نتحف روحي

الولاد ماحبوش يتغدو عجبتهم الكارنتيتا وراح ولدي للمدرسه علقت الحوايج ينشفو غلقت الابواب والنوافذ و توضيت وجيت نضرب عليكم طله

منبعد نقرا البقرة نصلي الظهر و راني حابه ندي غمضه حتى يسرح وليدي واذا جا زوجي بكري ممكن نروح نقص شعري تعبني طولو وبدا ينقص الكثافه

في امان الله

وبشر الصابرين · 2014-02-24, 13:57

بارك الله فيك

يعطيك الصحة

نخله. · 2014-02-24, 16:03

ام عبوده طمنينا على الوالده

انا ما قدرتش نقرالبقره راني نسمع فيها وليدي رجع بكري ملمدرسه وجاب صحابو عرضهم على قرنطيطه درتها ن مودا معاه كاسكروط دارولي فوضى فالحوش هههههههههه

ماقريت قرآن ما رقدت كنت نعس فيهم هذا وين راحو

عيدة نور الهداية · 2014-02-24, 20:49

مساء الخير
ان شاء الله يكون الجميع بخير
توحشتكم بزاف بزاف
اليوم من 8 صباحا حتى لل 5 تع العشية باش دخلت للدار وانا في الثانوية مع التلاميذ ............تعبت بزاف ................كوصلت للدار صليت الاوقات لي فاتتني ........ومن شدة التعب رقدت مباشرة منظتش حتى على الساعة 19.20 صليت المغرب ولقيت الوالدة موجدا العشا تعشيت معاها ...............والان راني مع الانترنات
برنامجي كارثي ....................كرهت كرهت كرهت ..............................ذوكا خطرش رقدت العشيا منقدرش نرقد بكري لازم نسهر وغدوا نصبح خدامة
الله يبعد عليكم حالتي الكارثية

نهى اسطاوالي · 2014-02-24, 21:18

وانا اليوم شغل الدار صفر على عشرة نضت على السابعة صباحا نوضت ولادي مساكن غاضوني واش ندير الطفلة نديها نديرلها الفاكسا والابن نحطو عند سبفتي تسكن قريبة لي وزوجي خدام المهم درتلها الفاكسا ومريت على زوجة خالي طمنت عليها ووليت عند سلفتي هزيت وليدي ورجعت للدار ماكفانيش نطيب الغذا قليت بطاطا وشفلور وحار تغذينا وطاح وليدي رقد مسكين وبنتي قاعدة نعسلها في الحمى الحمد لله هذي الساعة راهي مليحة المهم بعد العصر طيبت الحليب والقهوة ورحت فرزت الغرفة نتاعي وفتحت الخزانة تاع ابني لميتلو كااااااامل قش الصيف وحطيتو في الكابات راني بديت نلم القش بالشوية وقلت لزوجي يجيبلي كراطن باه نحط فيهم المواعن لي مانحتاجهمش كي لحقت 6 رحت نطيب العشا درت لوبيا خضراء باللحم ورميت فيها بطاطا وزرودية واش نقولكم الريحة تهبل هههههه حوحو يشكر روحو طيبت العشا وراني نستنى في الزوج يجيني دايما على 9 اتهلاو في رواحكم سلااااااااااااااااااام

ام عبودة · 2014-02-24, 21:48

يا سلاااااااااااااام فرحتووني
نخولة راكي عارفة علاه سولتك على العمر تاع بنتك
على خاطر انا ولدي ماهر عنده عامين ما بغاش يتعلملي على الحيبوسة هههههمرضني وقتو ماشي منظم راوية عام نحيتلها الكوش وعبودة عامين
المهم اللى جابها ربي مرحبا بيها ويتربى في عزكم المهم استحفظي على روحك
عيدة مرحبا حاولي تسمي موسقى هادئة للنوم وادا كان قران يكون احسن والله يكون في عونك قبيل وانا في دارنا لحقت اختي استادة في المتوسطة وتحظر في الدكتوراه تاعها في الجامعة ن الفرحة بينا لعبت الاولاد ودرستهم ومن بعد مع المغرب طاحت كاااااااو غاظتني التلاميد حاقرينهاشايفينها غير صغيرة في العمر ولاتاي هههههههههههه
نهى الله يعينك حتى ولد خويا لقيتو داير الفاكساوما عليش كاين حوايج اسثنائية مثل المرض مش مشكل المهم تكوني واقفة
لميييييييييييييييس مرحبا بيك معنا
لبنات الوالدة كانت فراش الصباح كلمتها وقلتها واش راني ندير في ديك الساعة والله غير ناظت من الفراش تقضي والله غالب ماكانش المعاونة زوجة اخي مع ولدها تبات قاعدة من الحمى واختي عندها دراسة بالجامعة تكمل في الماستر والاخرى التعليم منا والدكتوراه منا والصغيرة في المتوسطة تقرا والله من فرحة لبلي راني جايتها ناظت تخمل وتخيلو واش قالتلي يا بنتي حمزتيني والدار كانت مقلبة حبيت نعاونها لقيتها كملت رحت غير القايلة وعملتلها تارت بالفريز والكيوي فرحت بيها وتعشيت مرقة زيتون ودجاج محمر وسلطة وديسير اليوم احلى يوم كي تطمنت عليهم رقدت عبودة وراوية حاكمتها السعلة بالدراع شربت دوائها ورقدت وميمي عند جدو يلعب مابغاش يجي يرقد وانا راني معاكم راني

ياسمين1990 · 2014-02-24, 22:01

سلام عليكم اخواتي بارك الله فيكم ويعطيكم الصحة
ما شا ء الله الله يبارك
اختي نخلة منكذبش عليك زعمة بديت البارح في الرقية قرأت سورة البقرة في الصباح وكملت باقي الرقية
وقمت ببعض الاعمال الخفيفة طيبت الفطور ومسحت مدخل الدار ودورة المياه اكرمكم الله طيبت الغداء بالجلبانة والزرودية والبطاطة واللحم غسلت الماعن وفي المساء طيبت الكسرة للعشاء مع اكلة شعبية خاصة بالجهة من بعد نهدرلكم عليها وكان يوما على العموم مقبول
اما اليوم فكان كارثة مقدرت نخدم حتى حاجة ومزاجي متقلب مقدرتش نقراء سورة البقرة ولا الرقية
نضت الصباح صليت طيبت الفطور فطروا الاولاد وراحوا يقراو والزوج راح لخدمتو من بعد مقدرت نخدم حتى حاجة لغداء بقى من البارح زدتلهم البيض مع الكاشير والفرماج مقلي يحبوه لولاد بعد الظهر خدمت شوية في بساط ومزال مكملتوش المهم منيش راضية على نفسي خاصتا اني مدرتش رقية اليوم
وجسمي كامل مكسر والجبال على راسي ربي يقدر الخير

ياسمين1990 · 2014-02-24, 22:23

مساء الخير ام عبودة الحمد لله على سلامة الام ورب يحفظها ويبارك فيها
شفتي واش صاير فيا كنت مترددة لاني معنديش خدمات ايجابية نفيد بها الاخوات ومن بعد قلت نكتب واش كاين حتى يجي النهار لنحط فيه تطبيقات نفرح بها نفسي والاخوات الان كل وحدة وظروفها ان شاء الله

ام عبودة · 2014-02-24, 23:03

ياسمين ماشاااااااااااااء الله عليك راكي عجبتني
لازم تقتنعي بعملك ولو كان قليل المهم نحيه من الطريق فهمتني شوفي انا الايوم نمدلك واجب وغدوة حليه
ههههههههههههههههههههههههههههههههههههههههههههههه
قبل ما ترقدي اقراي المعودات اسمحيلي راه ما نعرفش نكتب بالكلافي على خاطر التابليت تاعي طاح شحنها النقطة تاع الدال ما كانش افهيميني مليح هههههههههههههههههههه
وحطي في بالك غدوة عندك عمل لازم تقومي بيه
واعتبري الغد يوم جديد ورايح يفوت يفوت لازم تقظي فيه حاجة
المهم نوظي مع الصلاة توضي وصلي اقراي الادكار والاستغار بزاااف لانه والله العظيم سر النشاط واجعيله طول اليوم غير تكرهي من العمل استغفري بزاف
من بعد ابداي اشغالي الازمة قولي في نفسك اولادي وابوهم غاليين عليا يارب وفقني واعطيني الطاقة باش كي يرجعو يصيبو الدار تبرق والغداء مشخش قبل منتصف النهار كملي كل صوالحك وحاولي تاخدي دوش وماكياج خفيف بخري البيت او عطريهاستقبليهم بحب وحنان
*والله يا ابليس ماتلقى بلاصة في داري * هههههه هده قوليها في قلبك ومن بعدخصصي وقت لحفظ او قراة سورة البقرة وصلاة الظهر ثم ارتاحي شوي في القيلولة وادا ما رقدتيش روحي للمطبخ اعملي حاجة حلوة للقوة المساء وربي يحليلك الايام
ادا كفاك الوقت مارسي هواية تحبيها قبل ما يلحق وقت المراجعة للاولاد ومن بعد خليهم وروحبي الى المطبخ وجدي العشاء
ارجعي لاولادك كملي معاهم وجدي مائده العشاء تعشاو رقدي الاولاد واسهري مع الزوج ممكن تحكيلو واش صاير فيك او واش راه في راسك يعاونك احسن منا وفي الخير اكتبيلي واش عملت وراني ما نكلمكش حتى الغد في اليل ههههههههههههههه
وعلا بالي بيك شاطرة وفحلة وهنيني في الواجب وادا ما عجباتكش نقطة من هدا العمل قوليلي تناقشو فيها