موضوع مميز الجزء الثالث من وصفات حراير واش طيبتي اليوم - الصفحة 9

idron0 · 2016-03-09, 16:31

قاطوالمهينةhiba beba

لبنات شوفو هادا القاطو كيما لي داراتو الاخت ام حبوبة موضوع انا نديرو نفسو نفس المقادير برك انا ندير حبة بيض وحدة ,

المهم حبيت نمدلكم شوية استيس باسكو كيما قالت حبوبة قاطو هآآآآآايل بنتو روعة و كامل لي يذوقو يطلب الوصفة بون انا يطلبوهلي نديرو ماشي غير الوصفة خخخخخ راجلي اولهم مدمن عليه و حباباتي لي عندها مناسبة نديرهولها حتى الالمان و طلبوه خخخ لهدا من كثرة ما نديرو اخترعت طريقة لتسهيل العمل يعني الطريقة تاع حبوبة هي الاصلية بصح ولات تعييني باسكو لعجينة بزاف ديليكات باش نرفدها للسنيوة مرات تتقطع و نبقى نعاود و نعاود دونك وليت ندير بابيي المنيوم ندير فيه كمية كبيرة يعني طبقة فرينة و نحط لعجينة نحلها ديراكت فوقو تقطعي الالمنيوم على حساب البلاطو تاع الفور كي تحليها مليح حطيه فوق البلاطو بالمقلوب و دخيله للفور هكدا بالمقلوب انا عندي زوج بلاطوات و بحبة بيض تجيني 4طبقات دونك ندير 2يطيبو كي يطبو نكون وجدت 2 لخرين نكمل ليه ليه و ندير لاكرام عادي و نقطع الحواف نرحيهم نديرهم من فوق و مرات ندير خطوط بالشوكولا
المهم ان شاء الله نكؤن فدتكم على خاطر شفت بزاف الاخوات يسقسو عليه
ان شاء الله برك حبوبة الحبوبة ما تزعفش عليا.

كيما قلتلكم الوصفة و المقادير نفسهم تاع ام حبوبة
https://www.djelfa.info/vb/showthread.php?t=1930847

إضغط هنا لرؤية الصورة بحجمها الطبيعي.

نحضرو اولا العجينة

إضغط هنا لرؤية الصورة بحجمها الطبيعي.

هدا الكاس لي عبرت بيه

إضغط هنا لرؤية الصورة بحجمها الطبيعي.

هنا كيما قلتلكم اقلبو البلاطو و قصو الالمنيوم على حسابو

إضغط هنا لرؤية الصورة بحجمها الطبيعي.

وهنا الصور توضح الطريقة كيفاش تحلو لعجينة

إضغط هنا لرؤية الصورة بحجمها الطبيعي.

حاولو تحلوها على كامل الالمنيوم لي قيستوه على حساب البلاطو

إضغط هنا لرؤية الصورة بحجمها الطبيعي.

في نفس الوقت رشو الحلال بالفرينة باش ما يلصقش
و الكريات الاخريات لآآازم يتغطاو لانو ادا ضربهم لهوا راح ييبسو و يتشققو كي تحلوهم

إضغط هنا لرؤية الصورة بحجمها الطبيعي.

كي يطيبو خلوهم يبردو تماما باش تنحوهم من الالمنيوم لانو العجينة تكون طرية بزاف و كي تبرد تقساح و تقدرو تتحكمو فيها

إضغط هنا لرؤية الصورة بحجمها الطبيعي.

نوجدو لاكرام ثم نحطها فوق الطبقات حاولو ما توصلوش لاكرام للحواف لانو راح نقصوهم

إضغط هنا لرؤية الصورة بحجمها الطبيعي.

نقصو الحواف بلعقل لانو راح تكون تتكسر بلخف ثم نرحوهم و نرشهم فوق القاطو

إضغط هنا لرؤية الصورة بحجمها الطبيعي.

ملاحظة : هدا لعبر قطعلي 25 حبة.
القاطو خبيه في الثلاجة مايقعدش برا علاجال الكريمة وكي تبغي تاكليه اجبديه بدقايق من قبل
بغيت نشكر الاخت هيبة على تسهيل الطريقة للبنات فقط نزيد نبينلكم هو من الاحسن قبل مانطيبوه نقطعوه على حساب شكل البلاطو باش الطبقات يجو كيفكيف ومانقطعوهش وهو طايب لانو يكون يابس ويخسرله الشكل لانو كي نديروله الكريمة ويريح يعاود يطرا.

idron0 · 2016-03-09, 19:14

لحميس انا هي رزيقة

هي طريقة عجايز من عند يما ربي يحفظها بصح هايلة. بعد متشوي الفلفلة تاعك و تنقيها قطعيها و حطيها في مقلة مع طماطم مقشرة و مقطعة هي ايضا و معصورة من الماء نتاعها (لكل 3 فلفلات متوسطة مثلا ندير طماطماية متوسطة) مع ملح و شوية فقط زيت . طبعا ممكن تزيدي الحار مشوي هو ايضا . ثم شعلي عليهم النار تكون متوسطة و كي تشوفي الطماطم بدات تطيب جيبي ملعقة خشبية و هرسي كل الخليط بالملعقة شغل راكي تعبزي بالفرشيطة ....و هو فوق النار عبزي و خلطي حتى تشوفيه ولا خليط متجانس و نشف من الماء تاعو . لازم ينشف. ثم نحيه من المقلة و فرغيه في طبسي و زيدي عليه زيت الزيتون على حسب الرغبة .

idron0 · 2016-03-09, 21:35

زعلوكة تاع البيدنجال ام رحاب

تشوي البيض انجال وحبات تاع فلفل الحلو و2 حبات طماطم كي اتشويهم حطي في مقلة الطماطم الي نقيتيها وقطعتيها صغير وحطي الزيت وملح وفلفل اكحل ومغرفة صغير عكري ويلا اتحبي الحار حطي الهريسة وامبعد حطي الفلفل حلو مقطع صغير وحطي البيضنجال مقطع صغير بزاف وديري الثوم 4 سنات كبار وخلطيهم كي تدخلهم الطياب ديري حشيش مقطفة يعني الكسبر هادا مكان وطفي عليه ايجي ايشهي.

idron0 · 2016-03-10, 17:55

حساء الدجاج ام محمد تاج

في قدرة حطي اطراف الدجاج ومن الاحسن لي فيه العظم وقصي سنينات ثوم وملح وفلفل اسود وزوج مغارف كبار زيت وورقة رند وغطي اطراف الدجاج بالماء وحطيهم يطيبو على نار متوسطة
كي يطيب الدجاج حمريه ولا عاودي اقليه كيما تحبي ونجيو للصوص لي بقات تجيك نص لتر صفيها وفي نفس القدرة ذوبي زوج مغارف كبار مسطحين فرينة في فنجال حساء كي تذوب الفرينة كملي ضيفي الحساء على دفعات حتان تكملي باقي الحساء طفي النار وضيفي فنجال كرام فراش وبالصحة ولهنا راه رووعة للزكام.

idron0 · 2016-03-10, 20:50

دونات oum ibrahim

الوصفة شفتها في قناة سميرة

500 غ فرينة
مغرفة و نص خميرة الخبز
نص كاس حليب غبرة
50 غ سكر
2 بيض
مغرف صغيرة ملح
60 غ زبدة طرية

نخلط الفرينة + السكر +الحليب غبرة +ملح+خميرة ثم نضيف البيض + الزبدة و نعجنها بالماء دافئ حتى نحصل على عجينة طرية نخليها تخمر
نحللها بسمك 8 ملم و نقطعها دوائر ثم نقطع في الوسط دوائر صغيرة لنحصل على شكل الدونات

نحطها في صينية مرشوشة بالفرينة لكي لا تلتصق (لانو اذا لصقت رايح يهبطلها الخمور و ما تنتفخش في القلي )و نغطيها نخليها تزيد تختمر شوية بيد ما تسخن الزيت
نسخن الزيت و نقليها حتى تنتفخ و تتحمر و لازم نبدا القلي من الحبة الاولى الي شكلناها

التزيين حسب الرغبة شوكولاذايبة وخطوط بالقلاصاج او فرميسال ملونة او قلاصاج او ممكن نرش سكر ناعم
هذه المقادير تعمل كمية لاباس بيها و نقدر كذلك ندير بيها بريوش يجي روعة
الوصفة اقل ما يقال عنها انها راااااااااااااااااااااااااائعة تجي خفيفة و ما تشربش الزيت جربوها و رجعولي الخبر .

إضغط هنا لرؤية الصورة بحجمها الطبيعي.

idron0 · 2016-03-10, 20:55

خبز الساندويتش حلو و مالح oum ibrahim

كاس حليب دافىء وتقدري ديريه باللبن لكن بالحليب افضل
كاس ماء دافىء
2مغارف سكر
2 مغارف خميرة خبز اذا كان الكاس نتاعك صغير ديري مغرف و نص
2كيسان فرينة
تخلطي هذي المقادير تتحصلي على عجينة سائلة غطيها و خليها تخمر مليح حوالي ربع ساعة الى 20 دقيقة
من بعد زيديلها نص كاس زيت و الفرينة حوالي 2 كيسان ممكن تزيدي 2 ملاعق حسب نوع الفرينة وحجم الكاس الي كيلتي بيه انا نكيل بكاس نتاع 250 ملل يعني في المجموع 4 كيسان فرينة و شوية ومغرف ملح و اعجنيها مليح تتحصلي على عجينة طرية غطيها و خليها تخمر راهي ماطولش لانها خمرت بعد المرة الاولى
من بعد اقسميها كويرات و احشيها بالشيىء الي حبيتي مثلا صوص طماطم دجاج مفتت او تون او لحم مرحي طايب جبن طري و مبشور بيض مغلي مفتت انت و ذوقك
حللي كل كرية دائرة و حطي الحشو في الطرف و لفي عليه و اغلقي مليح باه ما يتفتحش في الطياب و ادهنيهم بالبيض مع شوية قهوة و زيت و رشي الجلجلان و خليهم يزيدو يخمرو شوية و طيبيهم في فرن ساخن مسبقا حتي تشوفيهم تحمرو
بالنسبة للحلو ممكن تحشيهم بالنوتيلا او شكول مبشورة او معجون و ممكن تزيدي السكر في العجينة انا درت عجينة وحدة و قسمتها و بعد ما طابو رشيت الحلو بالسكر قلاصي او ادهنيهم بلاجولي و الف صحة و هناء

idron0 · 2016-03-10, 21:05

بسبوسة خفيفة وبنينة سوسو المغتربة

إضغط هنا لرؤية الصورة بحجمها الطبيعي.

idron0 · 2016-03-11, 17:57

المحمصة حياة نور الدين

انا عندي طريقتين

حطي زيت والبصل والفلفل الاسود والاحمر وقرفة وراس الحانوت واللحم او الادجاج او اي حاجة تبني بها وقطعي حبة بطاطا وحبة جزر وحبة قرعة وحبة لفت مربعات صغار وسنينة ثوم وملح وملعقة طماطم مصبرة وحبة طماطم مرابية وقلي مليح زيدي الحشبش وكاس ماء وخليبه حتى يغلي زيدي الماء باش طيب الخضرة كي طيب نرحيها ونضيف طماطم مصبرة ادا خص ونمرق كي تغلي نضيف حمص ومحمصة تاعنا ونخليها تطيب وادا حبيتي جومبو

إضغط هنا لرؤية الصورة بحجمها الطبيعي.

اما الطريقة الثانية واللي جي اممممم
نتبعوا نفس المراحل الاولى منديروش غير الثوم وكي نمرقوا منديروش الحمص
في طنجرة اخرى نديروا زيت وثوم وحمص وملح وفلفل اسود واحمر وحار وكمووون نقلوا ونزيدوا كاس ماء كبير كي يغلي نضيفوا بولات الكفتة المخدومة بالملح والثوم والحشيش ونحطوهم يطيبوا وطماطم مصبرة

كي توجد المحمصة او البركوكس نسقوه في صحن ونسيقوا من فوق بالمرق اللي طيبناه والله جربيها رووووعة وحتى ولادك ميحبوش الحار انا نطيب المحمصة عادي وفي المرق الثاني ندير الحار ومنديرلهمش من فوق

إضغط هنا لرؤية الصورة بحجمها الطبيعي.

idron0 · 2016-03-11, 18:06

وصفة البريوش ام سهام 02

1كاس حليب دافي و كاس لبن و ملعقة اكل و نص خميرة خبز من 3 الى 4 مك سكر و نخلط كامل و نخليه 10 دقائق حتى يعمل فقعات نضيف الفرينة حبة بيض و 1مص ملح حتى نتحصل على عجينة تتلصق ندخل حوالي 100غ زبدة ماغرين طرية ونخبط العجين مالفوق للتحت حتى تترطاب ندخلها في كيس مبلل بماء دافي و نتركها تخمر كتخمر نحبط لها الخمور و نرش طاولة العمل بالفرينة و نعمل حربوش ونقطع قطع و كل قطعة نكورها ونشكها اما دي بتي با محشين بالشكولا او كورات محشية ايضا و نعمل لها علامة زائد مالفوق و نحاليهم يخمرو وحد 15 دقيقة و ند هنهم بخليط التلميع و نذر عليهم السكر و الخبيزات كاوكاو ايفيلي
و بالصحة والهنا .

إضغط هنا لرؤية الصورة بحجمها الطبيعي.
إضغط هنا لرؤية الصورة بحجمها الطبيعي.

idron0 · 2016-03-11, 18:10

كريمة الليمون بدون مايزينة رزيقة 16

ليوم جربت كريمة الليمون بدون مايزينة جاتني هايلة و بمقادير مضبوطة و الله قمة حبيت نفيدكم معايا
المقادير
3 عصير ليمونات 50 غ زبدة قيس ملعقة كبيرة معمرة مليح انا نستعمل لابال 3 بيضات كاملين 50 غ سكر
التحضير
في كاسرونة علي نار هادئة ديرو الزبدة و عصير الليمون علي نار هادئة
في هداك الوقت ندير 3 بيضات مع 50 غ سكر نخلطهم مليح با الباتور من بعد نجيب الكاسرونة نفرغو بشوية خليط الزبدة و الليمون فوق البيض و السكر و دائما مع مواصلة الخفق
من بعد نردوه للكاسرونة دائما علي نار هادئة و التحريك المستمر حتي تتقال
هايليك جاهزة للاستعمال صدقوني خفيفة و بنينة مكاين حبيبات و لا دوق المايزينة .

إضغط هنا لرؤية الصورة بحجمها الطبيعي.

idron0 · 2016-03-12, 10:12

كروكات بالروز ام هدول

الطريقة للسيدة نوال اضفت فقط سنينة ثوم في المقادير
اولا تغلي الروز مليح مع شوية ملح وتصفيه وتخليه يبرد ومن بعد ضيفيلو حبات من الجبن الطري وتبليه بشوية ملح وفلفل اكحل وكركم ترحي سنينة ثوم وتعجنيه مليح ومن بعد تعمليه على شكل صبيعات او كوريات وتمرغيهم في الفرينة وتزيدي في البيض يكون فيه شوية ملح وفلفل اسود ثم نمرغوه في الخبز مرحي ومحمص ونقليهم على نار متوسطة صدقوني بنان بنان ...... ملاحضة انا قبل مانقليهم بعد ما شكلتهم حطيتهم في الثلاجة مدة نصف ساعة او اكثر.

idron0 · 2016-03-12, 10:16

مثوم الفول oum habouba

نغسل الفول بقشوره ونقسمه قطع وننحي هدوك الخيوط نتاع الاطراف ونفوره ملييح ومن بعد ندير في مقلاه ثوم قد متزيدي قد مايكون بنين مع زيت ونقعد نقلي فيه ومنبعد ندير الفول اللي فورناه ونقليه معاه مليح مليح لازم حتى نشوفه دبال وحمار واكيد على نار هادية ونظيف حبة طماطم مرابيه مع شويه فلفل احمر حلو ةفلفل احمر حار ونمرق بشوية ماء ونخليه يغلي قدما تثقل لاصوص وفي الاخير نضيف القسبر مقطع ونطفي وحد البنة اممم بصحتكم .

إضغط هنا لرؤية الصورة بحجمها الطبيعي.

idron0 · 2016-03-12, 15:23

الكوكا oum ibrahim

الوصفة هي لام وليد

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.
إضغط هنا لرؤية الصورة بحجمها الطبيعي.
إضغط هنا لرؤية الصورة بحجمها الطبيعي.
إضغط هنا لرؤية الصورة بحجمها الطبيعي.

ملاحظة : مرغرين التوريق درت 250 غ فقط كما ندير في العجينة المورقة اي النصف نتاع الفرينة .

idron0 · 2016-03-12, 15:34

حفظ الدبشة والمعدنوس دائمة الحمد

تشدي بورت مونجي تكون نظيفة الدبشة تنقيها عادي ومتغسليهاش وتشدي تقسميها الى مجموعات تحطي صاشي نيلو او ورق طبخ تحطي كمية من دبشة وتزيدي صاشي من فوق وتزيدي كمية من دبشة وتزيدي صاشي فوقها حتان تكملي الكمية نتاع الدبشة في الاخير تغطيها بصاشي وتقفلي البوغتمونجي تقدري تحتافظي بيها مدة كبيرة حتى 21 يوم في الثلاجة لتحت ميصرالها والو كلما تجي طيبي اغسليها ولوحي .

idron0 · 2016-03-12, 15:40

تيراميسو lyzzabel

إضغط هنا لرؤية الصورة بحجمها الطبيعي.

و التطبيق للاخت lahna moka

إضغط هنا لرؤية الصورة بحجمها الطبيعي.

هاهي كريمة التيراميسو الي استعملتها تتباع ب 150 دج

إضغط هنا لرؤية الصورة بحجمها الطبيعي.