الدورة التنظيفية لشهر رمضان - الصفحة 9

ام رزيقة · 2013-06-23, 16:11

بارك الله فيكم جميعا

ام امجد14 · 2013-06-23, 20:32

تطبقى لنهار اليوم
الجانب الدينى الحمد لله
الجانب التنضيفى
بما انو البارح هبطت التحت فاكيد اليوم الفوق
طبعاااااااا البارح نقيت الاول و القاراج
اليوم نقيت الاول الفوقانى و الحوش كلشى بالفايونس ما تعبونيش بزاف و زدت نقيت الطاقة تاع الاول هى الى عياتى كبييييييييييييييييرة
و عملت حمام زيتى لشعرى و دوشت لابنى الصغير و بناتى هدا تطبيقى لنهار اليوم يبان صغير بصح تعبنىىىىىىىىىىىىىىىىههههههههههههههههههه

بنت الجزاير الغالية · 2013-06-24, 09:10

تطبيقي لنهار أمس
نضت مع السابعة طيبت الفطور و غسلت الماعن و سيقت الكوزينة و رحت للدروج غسلتله الفايونس و البيبان مرة أخرى راه الغبار مداير حالة و سيقته و طلعت للدار لميت غرفتي و باقي الغرف و مسحت غبرة الصالون كامل و بخرتها و قفلتها و غسلت الدوش و التواليت و سيقت الأول و ريحة الجافيل الرغوي إممممممممم تنعش و كملت غسلت طرافي و بدلت قشي و جبدت شعري بالليسور و درت شوي روج و رحت سخنت لولادي تغدوا و قعدت على الميكرو تاني شوي و درت قيلولة و من بعدها جوني ضياف بقيت معاهم لقريب المغرب و خرجوا بليت رخسيس و درت شوربة و سلاطة واتعشينا و رتبت الصالة و لميت كل شيء و ريحت
الديني مع الإستغفار و التسبيح
الجمالي راني مع تحدي الخيار و الله غير تحففففففة راني كل ساعتين أو 3 نمرر دائرة على الوجه كاامل
و طبعا كيما قلت من قبل بروسيت سني و لبست قندورة شابة و جبدت شعري بالليسور و طلعته لفوق و شوي روج و هذا ما كان

ام امجد14 · 2013-06-25, 12:56

تطبيقى لنهار اليوم نضت الصباح 7 الله غالب ما فطنتش توضيت و صليت نوضت اولادى باش يروح للمدرسة القرانية وجت الفطور فطرو و راحو
وانا بديت بالماعن كانو بقاولى من البارح ما قدرتش نغسلهم عندى بروبلام نهار السخانة رجلى بوجعونى بزاااااااااااااااف لازمنى الطبيق
المهم كملت الماعن و روحت للملابس كانو غسلتهم و نشرتهم ومن بعد غسلت 4 كوفيرتات ورحت نحسب بقاولى 9 من 20فرحت بزااااااااااف حسيت روحى درت انجاز ههههههههههههههههههههههه
طليت على الساعة لقيتها 9 جففت كاااااااااااااامل البيوت طابق الفوقانى طبعااااااااااااا و عشية بلاك نهود نضرب الجفافة للطابق التحت وكى كملت عجنت المطلوع و قليت البطاطا و سلاطة للغداء نشرت الكوفيرتات بعدما قطرو و ريحتهم الله الله غسلتهم بتاست اليمون و كثرت عليهم الماء يعنى شللتهم حتى عاد الماء التاعهم اببببببببببببببببيض

سمراء الدنيا · 2013-06-25, 15:04

تطبيقي للايام للي فاتو

الحمد لله الصلوات في وقتها ... صلاة الضحى و الوتر ........ ختمت يوم الجمعة التلاوة و بديت من جديد راني في سورة النساء .... الحفظ راني محبسة راني مركزة مع التلاوة ..... صمت انا وبنتي يوم الاثنين و ان شاء الله نصومو لخميس ..راني باغية نتعود على الصيام قبل رمضان باش ما نمرضش اول يوم

بديت في غرفة الجلوس غسلت غطاوات السدادر و غلافات لمخاد

[IMG]https://im31.gulfup.com/FVuRx.jpg[/IM
و خويت الخزنة نتاع لماعين و تعاونت فيها انا و بنتي و سيقنا

بقالي البلافو و الحيطان غدوة ان شاء الله نكملهم
جربت الطبق نتاع ام رجاء البصل بالزبيب و جا روعة و جربت طبق ام رامي جريوات في كيس الشواء و الفلون

ما زالني مع تحدي الخيار ..... روعة رجع وجهي مشرق رغم التعب للي راني فيه

ام راضية · 2013-06-25, 19:56

يعطيك الصحة سمراء حبيبتي علي الهمة والنشاط وربي يبارك فيك
الجانب الديني ما شاء الله راكم قايمين علي احسن وجه
الجانب النظافي اكثر من هكا ماكانش
الجانب الجمالي لنزيد لاختي هده ليديك كي عجباتك وصفة الخيار المنعشة والمبيظة
https://www.djelfa.info/vb/showthread.php?t=844592
وهده لقدميك
https://www.djelfa.info/vb/showthread.php?t=637105
طبعا لكل الاخوات

أم ايهاب 2013 · 2013-06-26, 07:28

شكرا لك اخت راضية على الوصفات ارائعة فعلا وصفة الخيار نتائجها مبهرة

نايليةوافتخر · 2013-06-26, 19:27

ماشاء الله عليكم
راني متبع البرنامج راني كملت الشومبرة لانو ماعنديش غرفة الجلوس

Kati70 · 2013-06-27, 18:57

السلام على الفحلات انا بصراحة مدرت والو الخياطة مخلتنيش بليز شجعونى باش نقدر نخصص وقت للتنظيف راهو جاى رمضان المبارك

نبض الفؤاد · 2013-06-27, 21:05

هذا الايام بقاو باش نحضرو التوابل وكاش صامصا ولا قريوش........

الله يعاونكم.........

شوشو 11 · 2013-06-27, 21:59

واش احوالكم حبيباتي
تطبيقي رجع من الصفر
الحمد لله كملت الغرفة بالفايونس والبانتورة خرجت روهة راني فرشتها
ونضفت الطابق الفوقاني نزيدو شوية مسيح على خفيف
وغرفة الاولاد ان شاء الله غدوة معولة عليها
والمطبخ مازال ومعاه معماعة كبيرة
الجانب الديني مع الصلوات والاستغفار والادكار
الجمالي عملت الخيار وما داومت الليلة نرجع ليه ومع حمام زيت للشع فقط

شوشو 11 · 2013-06-27, 22:24

قصــــــــة قصيـرة ...... بحكمة رائعــة

جلس عجوز حكيم على ضفة نهر .. وراح يتأمل في الجمال المحيط به ويتمتم
بكلمات .. لمح... عقرباً وقد وقع في الماء .. وأخذ يتخبط محاولاً أن
ينقذ نفسه من الغرق ؟!

قرر الرجل أن ينقذه .. مدّ له يده فلسعه العقرب .. سحب
الرجل يده صارخاً من شدّة الألم .. ولكن لم تمض سوى دقيقة واحدة حتى مدّ
يده ثانية لينقذه .. فلسعه العقرب .. سحب يده مرة أخرى صارخاً من شدة الألم
.. وبعد دقيقة راح يحاول للمرة الثالثة ..

على مقربة منه كان
يجلس رجل آخر ويراقب ما يحدث .. فصرخ الرجل: أيها الحكيم، لم تتعظ من المرة
الأولى ولا من المرة الثانية .. وها أنت تحاول إنقاذه للمرة الثالثة؟!

لم يأبه الحكيم لتوبيخ الرجل .. وظل يحاول حتى نجح في إنقاذ العقرب ..

ثم مشى باتجاه ذلك الرجل وربت على كتفه قائلاً: يا بني .. من طبع العقرب
أن "يلسع" ومن طبعي أن "أُحب واعطف"، فلماذا تريدني أن أسمح لطبعه أن يتغلب
على طبعي

عَآمِل آلنَآس بطبعِكْ لآ بطبآعهِمْ ،مَهْمَآ كَآنوآ
ومهمآ تعدَدَت تصرفآتهمْ آلتيّ تجرحكْ وتُؤلمكْ في بعضْ آلآحيّآن ، ولآ
تَآبَه لتلكْ آلآصْوَآت آلتي تعتليّ طَآلبة منكْ آن تتْرك صفَآتكْ آلحسنةْ
لأن آلطرفْ آلآخرْ لآ يستحقْ تصرفَآتك آلنَبيلةْ.

في كثير من الأحيان نندم علي معاملتنا لناس نظن انهم لا يستحقون معاملة طيبة

ولكن هذا الندم غير صحيح فنحن ينبغي أن نعامل الناس بأخلاقنا لا بأخلاقهم

خذ العبرة من هذه القصة

الدر المكنون 7 · 2013-06-28, 13:05

مساء الأنوار على الفحلات الجدد والقدم الحاضرين والغايبين ليكم وحشة كبيرة كيف أحوالكم؟ان شاء الله لاباس يبدو أنو فاتني الكثير راح نقرا الصفحات ومن بعد نرجع

الدر المكنون 7 · 2013-06-28, 19:03

السلام عليكم ورحمة الله وبركاته
ما شاء الله راه النشاط والحيوية دايرين حالة سيرتو ختي صليحة الله يبارك راكي غيرتيني بالنظافة والهمة العالية و عجبتني العرضة لي درتيها في الموضوع الآخر الله يدوم بيتك دايما عامرة بالخير
سامحوني كنت غايبة على خاطر كنت لاهية مع عرس خويا ربي يهنيه ويرزقو الذرية الصالحة وما نسيتكمش راني جبتلكم القاطو ،صورت غير شوية على خاطر ما لقيتش الوقت باش نصور وما لقيتش الراس لي يتفكر التصاور ههههه صورت في الأول شوية ومن بعد نسيت حتى طفرت

هذو لي صنعتهم أنا

وهذا صنعاتو اختي

وهذو لي باني كل وحدة فيكم تدي وحدة

للأسف ما صورتش الباقي
وكي فات العرس رجعت لداري وتخيلو كي لقيتها كلشي مكركب ومغبر بغيت نبكي
ما ريحت ما والو قلت مادام الدم حامي خلي نكمل ديراكت بديت ننفض ونخمل
غسلت الفراش والغطا نتاع الشتا هذا وين بدات السخانة عندنا

طبقتهم وخبيتهم وجبدت فراش الصيف
وغسلت القمح

وداه زوجي يطحنو مع المرمز
غربلت السميد وبعثت المرمز لأمي تخدمولي على خاطر ما نعرفلوش (خلوها بيناتنا)
في اليوم الموالي فتلت الطعام(كسكس)

وزدت فتلت شوية طعام أسمر بسميد القمح

ووجدت شوية حشاوش لرمضان

وهذا وين صحلي نقعد عند الميكرو باش نحكيلكم