موضوع مميز تطبيق لأحلى تشاراك بالتفصيل الممل لعيونك أم ماجد - الصفحة 9

فايزة1207 · 2014-02-16, 13:12

تحفة تحفة تحفة يسلم ربي هاذوك اليدين
حبيت نسقسيك على اللوز لاني عمري ماشريتو غالي
طريقتك من البداية للنهاية في الحشو
حابة نديرو لبنت سلفتي

إلهام07 · 2014-02-17, 13:12

اقتباس:

المشاركة الأصلية كتبت بواسطة فايزة1207

تحفة تحفة تحفة يسلم ربي هاذوك اليدين
حبيت نسقسيك على اللوز لاني عمري ماشريتو غالي
طريقتك من البداية للنهاية في الحشو
حابة نديرو لبنت سلفتي

ألف شكر حبيبتي على المرور :

1- شوفي أولا ماكانش كيما حشوة اللوز خفيفة وبنينة وهي الأفضل حتى خير من الجوز والبيستاش

ثانيا : التشاراك مايديش بزاف حشو يعني غير شوية برك لوز ديرلك بزاف حبات وانا شعاري النوعية وليس الكمية يعني ندير شوية وجي بنينة وتحمر الوجه احسن من بزاف وماشي مليحة

ثالثا: نعطيك عفسة ملييحة تقتصدي بيها شوية في اللوز :
جيبي كيلة نتاع لوز بالقشرة ( مثلا نقولو تشري ب400دج ) + نفس الكيلة كاوكاو بدون قشرة بصح ماشي محمص حذاري ماشي محمص
حطيهم في روبو وأرحيهم مع بعض حاولي ديريه رطب شوية باش مايقعرش العجينة ، حطيهم في صحن كبير واقسميهم على 4 وكيلي الربع إذا جاتك ربع الكمية مثلا كاس ديري كاس سكر يعني : أربع كيلات مكسرات + كيلة سكر عادي + رشة خفيفة قرفة + عطر اللوز الحلو ( الحلو وليس المر ) + شوية فاني + مغرف كبيرة زبدة طرية وزاست القارص ( كثري ) وشوي ماء الزهر وتلمي بالبيض وتحطيه يبات باه يشرب السكر تاعو

شوفي هذي الحشوة : يجيك الطعم كأنه لوز 100/100 واحد مايفيق باللي فيه كاوكاو وزيد الفاني والزاست والقرفة يغطيو تماما طعم الكاوكاو تستبني غير اللوز
وخلينا اللوز بالقشرة باش يبان كأن الحشو لوز وجوز

البيض يخلي الحشو يبقى طري خلاص ومهما يطول يبقى طري وماييبسش

ملاحظات :
* كي تعملي الحشو وتخليه يريح حذاري لازم تحطيه في صحن وتغطيه بالبلاستيك باش ماينشفش
* كي تبداي تخدمي في التشاراك تشكلي 4 أو 5 تمرات نتاع حشو تحلي كرية العجينة وكل تحطي الحشو وتغلقي وتشكلي التشاراك . بصح ماديريش بزاف تمرات نتاع حشو باش ماينشفولكش وأيضا تحاولي ديما ترجعي تغطي الصحن نتاع الحشو

أي أسئلة انا في الخدمة تحياتي

فايزة1207 · 2014-02-17, 14:01

والله مالقيت مانقول ربي يجازيك دنيا واخرة دائما معطاءة
كي ندخل المنتدى ندخل اولا لملفك وكل ماتجربي وصفة للاخوات نهزها ونحط ملاحظاتك معاها
ربي يرزقك ببرنوس الهنا

it's me · 2014-02-18, 10:38

يسلموووووووووووووووووووووووووووو

~اسيل ريحانتي~ · 2014-02-18, 12:54

يعطيك الصحة الهام

أم يوسف1984 · 2014-03-10, 17:36

يعطيك الصحة التشاراك جد جد متقون الله يبارك في ام اماني وكاكينوفا وام محمد تاج ويعطيهم واش يتمناوا

أم بلوكة · 2014-03-11, 08:40

يهبل يهبل ما شاء الله

إلهام07 · 2014-03-11, 10:07

شكرا حبيباتي على المرور

اقتباس:

المشاركة الأصلية كتبت بواسطة فايزة1207

والله مالقيت مانقول ربي يجازيك دنيا واخرة دائما معطاءة
كي ندخل المنتدى ندخل اولا لملفك وكل ماتجربي وصفة للاخوات نهزها ونحط ملاحظاتك معاها
ربي يرزقك ببرنوس الهنا

حبيبتي العفو لازم كامل نتعاونو ونعطيو نصائح من القلب وكيما انا تعلمت من عندكم بزاف حوايج لازم انا ثاني اللي يسقسيني نعطيه نصائح من القلب
ألف شكر على الرد وأي استفسار في اي تطبيق ليا ان في الخدمة
تحياتي