وأخيرا....... حتى انا رايحة نحط طياباتي

[amouna.sem]

ماشاء الله

[ورود الشوك]

والله جوعتينا
يعطيييييك الف صحة

[سحر الكلمات]

سلمت اناملك الدهبية ودمت متالقة اختي ممكن تعطينا وصفات تارت وطريقة تزيينها خاصة مع حلول مولد نبوي شريف ^^

[دموع تائبة]

ماشاء الله روووعة
يعطيك الصحة يا الفحلة

[نانا الحيرانة]

بسم الله ماشاشء الله رووووووووووووووعة ربي يزيدكم من نعمه أنا شهاني البوزلوف تاع أختك ياريت تعطينا الوصفة هاااايل

[اسمهان79]

تبارك الله عليك كلش متحوف ملقيت واش نقول فوووووور فوووووووور
يعطيك الصحة ويرزقك بالزوج الصالح والذرية الصالحة
ياريت اختي العزيزة وصفة للقطايف وتكون ناجحة شوفي كليتها عند واحدة من لافامي بصح للأسف ما حبتش تمد الوصفة وكي كثرت عليها عطاتهالي مزورة الصح جربتها و جربت وصفات بزاف لكن للأسف ما جاتش كيما نتاعها ياريت تفيديني يا شاف ومشكووووووورة مسبقاً
بوووووووووسة يا الفحلة

[النايلية الأصيلة]

يعطيك الصحة كلمة قليلة عليك

ماشاء الله رووووووووووووعة :1 9:

ان شاء الله مزد من التألق وربي يعطيك وش تتمناي يارب

[هند11]

امممممم اطباقك روعة ربي خليك للمنتدى

لو سمحتي اختي اعطيني مطلوع تاع امك بطاطا قرنون روطي دجاج مع بطاطاو شطيطحة وسفنج ومشرمل جزر وشكرااااااا

[أم نهال]

أختي إلهام ربي يحفظك كل طيباتك روعة كيما أنت بدون مجاملة رني نشوف ونعاود ماشاء الله صدقني راني نحس بلي نعرفك من خلال تعليقاتك من خلال الوصفات الي تحطيها تمدي من قلبك ربي يزدلك في ميزان الحسنات أن بكل صراحة تعلمت منك بزافلكا جا عندي خويا مانفرط فيك مراة ونص راني نشوف بلي ماشي برك فالطبخ ربييرزقك بزوج صالح ويهنيك على حساب قلبك يامحبوبة المنتدى وهذا كلام خارج من القلب حبيبتي.

[nadiatlemcenia]

ماشااااااااااااااء الله ابدعت حقا
اطباقك راااااائعة شخصييا نحبها بزااااااااااااااااف
جزاك الله خيا والف مبرو البيبي لاخت ربي يحفظو

[دموع الثلج]

يا الهام راكي كتلتيني بالغيرة اطباقك روعة ماشاء الله
كل ما ندخل لمنتدى الجلفة ندنق ادا كاين وصفاتك ام لا

[دموع الثلج]

الله يحفظك من العين ويرزقك بما تتمنين

[ماريـام]

يم يم بنان الله ابارك

[إلهام07]

مشكورات غالياتي على المرور والتشجيع

أختي نادية التلمسانية ربي يحفظك اختي مشكورة على المتابعة هذي مدة ماتلاقيناش


أم نهال مشكورة حبيبتي على الكلمات الرقيقة ربي يحفظك خجلتيني

اختي naouma05 ماتخافيش مدام اين المنتدى فيه الخير والبركة وبزاف أخوات يحبو يديرو الخير خلي اللي يبخل ربي يسهل فيه اللي تحتاجيها تلقايها هنا


اختي هند11 النت كانت مقطوعة منذ أيام:
1- المطلوع انا اللي درتو ماشي ماما وراني حاطاتو موضوع
https://www.djelfa.info/vb/showthread.php?t=1229176

2- بطاطا قرنون تبرشيها فقط وديري في كوكوط شوية زيت وترابي بصل وثوم وتحطي طراف الجاج نتاعك وتقلي ثم تزيدي البطاطا قرنون نتاعك منظفة ومغسولة ومقطعة ( أنا نزيد معاها 2-3 حبات بطاطا عادية مقشرة ومقطعة ) تقلي مليح ثم تزيدي ملح وفلفل أسود وثوم بودرة وورقات رند وتزيدي تقلي مليح ثم تمرقي وماتكثريش بزاف الماء باش ماجيش فيها صوص بزاف ( كيما الجلبانة ) وتلوحي مكعب مرق داجاج وتغلقي الكوكوط راهي ماطولش وطيب حوالي 30-40د على نار متوسطة.
كي طيب تعصري عليها القارص ضروري ( عصرة ليمون ) ورشة من معدنوس وبالصحة والهناء مافيها والو.

3- الروطي نتاع ماما حلي وذنك مليح ههههههههه:
في كوكوط تحطي شوية زيت والجاج نتاعك وتبقاي تحمري فيه بالشوية مليح مليح كل شوية تقليه كي يتحمر على جهة تزيدي تقلبيه حتى يتحمر مليح تزيدي ورقات رند+ فلفل أسود وكمية مليح من ثوم مقطع شرائح أو مرابي كيما تحبي.
في هذا الوقت تقطعي البطاطا + 2 أو 3 حبات جزر ( مهم الجزر هنا ) تقطعيهم دوائر وماترققيش البطاطا باش ماتتفتتش في المرق تقلي البطاطا والجزر وحمريهم لازم ماشي تخليها بيضاء.
كي يتحمر الجاج تمرقي الكوكوط وتغلقي عليها ( ماتكثريش الماء ) .
كي يطيب الجاج تفتحي الكوكوط تضيفي البطاطا لازم يكون مستوى المرق مع البطاطا قدقد مايزيدش ماجيش فيها صوص بزاف وتغلقي على نار هادة 5-10د فقط وطفي
تقدم مع رشة مليحة نتاع معدنوس
وك يكونو عندك الضياف كي يطيب المرق اجبدي الجاج وقطريه مليح ورمديه في خبز مرحي وأقليه ( حمريه ) في شوية زيت وقدميه في الطبق مع البطاطا

3- شرمولة الجزر : الوصفة راهي من هنا من المنتدى غيرت فيها غير شوية هاكي طبق اقتصادي وبنين :
جزر وبطاطا على حسب أفراد العائلة + 4 فصوص ثوم
زيت، ملح وبعض التوابل أنا درت (فلفل أسود، كسبر،كمون، كروية، زريعة البسباس، حبة حلاوة، مكعب ماجي، أوراق رند، ثوم بودر، فلفل احمر).
اولا نرابيو الثوم ونديرو الزيت شوية برك في الكسرونة حوالية 2 مغارف ونحطو الثوم يتقلى مع التوابل وشوية ملح

ثم بعد ما يتقلى الثوم نزيدو الزرودية المقطعة مكعبات صغيرة طبعا اذا كان عندك الجاج او اللحم تقليه مع الثوم من بعد تزيدي الجزر

ونحركوها جيدا مع الثوم والتوابل ونغطيها ونخليها تتقلى مع الثوم والتوابل مليح مليح
جهة اخرى نحط حوالي 2 كيسان ماء يسخنو في طاوة اخرى ونقطعو البطاطا دوائر وبعد ما تتقلى الزرودية مليح نزيدو الزيتون

من بعد نحرك ونزيدو الماء السخون ماشي بزاف غير قيس ما تتغطى الزرودية والزيتون برك من بعد نغطيها ونخليها طيب مليح

من بعد قليت البطاطا و كي طابت ملحتها شوية ....................نزيدو البطاطا................وهاهي واجدة وطبعا الديكور كيما تحبي

4- الشطيطحة : تحمري الجاج كيما درنا في الروطي وتمرقي وتغلقي عليه يطيب بصح المرق ماتكثريش وكي يطيب تفقسي البيض وكي يطيب البيض طفي وخلاص.

5- السفنج لليوم ماقدرتش نهز عليها الوصفة كل مانقوللها تقولي بميز عيني نخدم دوختني


اسمهان أختي مافهمتش واش من قطايف تقصدي كاين زوج أنواع اي وحدة تحوسي ؟


ختي نانا حيرانة : البوزلوف راهي وصفة ام ماجد ربي يحفظها راهي في ملفها الشخصي


أختي سحر الكلمات حاضر أختي رايحة نزيد نحطلكم موضوع عن تزيين التورتات مع انو تورتاتي كلهم تزيينهم بسيط ماشي حاجة

أختي kosrah الله يحفظك اختي أسعتني كلماتك مشكورة اختي محبة الناس نعمة من عند الله


حاضر أم أيمن ضرك نقول لماما ديرلكم طاجين الزيتون وتحطلكم الصوفة ومشكورة على الثقة وبصحتكم البطاطا

المشاركة الأصلية كتبت بواسطة ام ريان عبدالله

الهام اين انت؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟

أختي النت كانت مقطوعة راني راسلتك وقتلك واش تحتاجي قوليلي مافهمتش كيفاش نعاونك ؟


جوهرة الكون أختي البيتزا راني حطيتا موضوع اليوم وراني ننتظر في أطباقك

أختي jojo dj لي تارتولات راني حطيتهم في موضوع وحدهم :
https://www.djelfa.info/vb/showthread.php?t=1552924

أختي روح مراد أنا معتمدة هذي الوصفة نتاعي للعجينة ساهلة وسريعة واقتصادية وخفيفة:
الباقي واضد كي طيب تفرغي نستلي كاراميليزي من تحت وتخليها تجمد شوية في الثلاجة وتزيدي تفرغي فوقها قاناش شكلاطة وتخليها تبرد وتقدميها
https://www.djelfa.info/vb/showthread.php?t=1552924


ياسو زكازيكو راهو راح روح خلانا في الهدوء تهنينا من البكاء نتاعو

[ام ريان عبدالله]

سلام الهام حبيت تعاونني عيد ميلاد ابني الاول قريب حبيت نديرلو لاتارت معرفتش كيفاش نديرها
اومعرفتش واش نطيب معاها تاني راني حايره