♠⊱⋛⋋الدرس الاول من تعليم فنون الطبخ...مقبلات البطاطا..♠⊱⋛⋋

[زينب 83]

المشاركة الأصلية كتبت بواسطة ام مؤمن

السلام عليكم

بارك الله فيكم على هذه المدرسة الرائعة في ميزان حسناتكم

يعطيك الصحة زينب مبدعة كالعادة و فنانة ساحاول الالتزام قدر المستطاع ان شاء الله

يا ريث تحطيلنا مع كل درس رابط الموضوع الذي سنضع فيه تطبيقاتنا و ايضا المدة و اخر اجل للتطبيق و ربي يجازيك كل خير حبيبتي

انا انقطعت عن المنتدى لفترة و عن الكوزينة و لكن ان شاء الله ساكون معكم من جديد و بكل همة

بعد مراجعة الردود عرفت انو نحطو تطبيقاتنا في قسم التطبيقات و لمدة اسبوع عندي اقتراح صغير اتمنى ان لا يضايقك مجرد راي

لماذا لا تفتحو موضوع مثبث واحد خاص بالمدرسة توضع فيه كل التطبيقات لان عدد العضوات كبير و عدد الدروس ايضا صيصبح كبير مثلا الموضوع يكون عنوانه تطبيقات العضوات للدرس الاول من دروس المدرسة و الموضوع يكون فقط لوضع التطبيقات بالصور من دون ردود اضافية بهذه الطريقة يتسنى لك و لنا مشاهدة كل التطبيقات في موضوع واحد و ممكن ايضا انتم مدرسين المدرسة و المشرفين عليها تختارو مثلا صاحبة احسن تطبيق مميز و هكذا يكون الحماس بين العضوات كبير

يبقى مجرد رائ و شكرا

ساحاول تطبيق ما استطعت ان شاء الله رغم انني مريضة جدا لان كل الوصفات رغم بساطتها هايلة و تستحق التجريب و ساضع تطبيقاتي ان شاء الله

ربي يشفيك غاليتي ام مؤمن توحشنا و توحشنا إبداعاتك
حبيبتي يمكن ماعلابالكش لكن المنافسة من الاول هيا أساس المدرسة و اكيد في كل أسبوع سخنتأر احسن تطبيق
اما بخصوص اقتراحك الاول اذا فتحنا موضوع واحد كاين تطبيقات ستظلم لانو اكيد متعب انك تحوسي بين الصفحات على الصور و زيد التطبيقات راح تضيع بين الردود ، لذا هكذا احسن كل تطبيق يأخذ حقه
بارك الله فيك حبيبتي ، نتمنى نشوفك منورتنا دايما

[أمنية غفران]

ماشاء الله تبارك الرحمان أختي زنوبة ديما متألقة و منك نستفيد دائما جعل الله ما تقدمينه في ميزان حسناتك
ربي يحفظك و يهنيك

اعذريني و لظروف عملي لا أستطيع المشاركة في المسابقة يعني ما نكونش متواجدة دائما بصح هدا ما يمنعنيش نجرب وصفاتك الرائعة حنونة

يعطيكم الصحة جميعا يا البنات

[فرج قريب]

مشكورة اختي وصفات هايلين و المقادير في متناول الجميع

[الماسة النادرة]

بزاااف فووور يعطيك الصحة وقتاش الدرس الجاي

[ام مؤمن]

المشاركة الأصلية كتبت بواسطة زينب 83

ربي يشفيك غاليتي ام مؤمن توحشنا و توحشنا إبداعاتك
حبيبتي يمكن ماعلابالكش لكن المنافسة من الاول هيا أساس المدرسة و اكيد في كل أسبوع سخنتأر احسن تطبيق
اما بخصوص اقتراحك الاول اذا فتحنا موضوع واحد كاين تطبيقات ستظلم لانو اكيد متعب انك تحوسي بين الصفحات على الصور و زيد التطبيقات راح تضيع بين الردود ، لذا هكذا احسن كل تطبيق يأخذ حقه
بارك الله فيك حبيبتي ، نتمنى نشوفك منورتنا دايما

امين و ربي يبعد عنك المرض و الادى حبيبتي و الله حتى انا توحشتكم بزاف

كلامك عين الصواب انت محقة حبيبتي يستحسن ان ياخد كل تطبيق حقه

بارك الله فيك و بداية المدرسة كانت بداية موفقة و ان شاء الله سيكون لي نصيب من المشاركة و التطبيق و الالتزام

الله الموفق

[ام براء عبيدة]

ماشاء الله هدوين شفت الدرس ماشاءالله وصفات جديدة معلبليش البطاطا نقدر ندير بها هدو المقبلات يعمرو العين قدام الضياف جاري التطبيق بإذن الله

[مرام 92]

المشاركة الأصلية كتبت بواسطة زينب 83

اهلًا بكم غالياتي في اول درس لنا في هذه المدرسة
بما انه اليوم اول درس و مازال ماوالفتوش ريتم المدرسة ، فكرت اني نقدم درس خفيف و أفكاره سهلة و خفيفة و تقدر اي ربة بيت ديرها و اخترت مكون بسيط و متوفر في اغلب البيوت الجزائرية ،






و تعمدت اني نحط عدة افكار باه ماتتقيدوش و تكون عندكم حرية الاختيار
يعني الإلزامي هو وصفة واحدة فقط و الباقي اختياري كل واحدة و إمكانياتها


هيا نبدأ بسم الله



أعشاش البطاطا

هذه مقبلة سهلة و لذيذة و غير مكلفة و صحية

نغسل البطاطا و نرابيها و مباعد نعصرها مليح من الماء بواسطة مصفاة و لا بيدينا ، نزيدولها شوي ملح ،ثوم ،بيض، فلفل ابيض و نرصوها في المول يكون مدهون بالزبدة و نديرو فجوة في النص ، طبقة البطاطا ماتكونش سميكة
ندخلوها فرن سخوووون شاهل من تحت و نخليوها حتى تقرب طيب
كي قريب يطيب نجبدوه و نعمروه

ببيض مخفوق مع جبن ملح بهارات دبشة مقطعة و ممكن اضافة تونة ،فطر ،دجاج ،لحم مفروم

و نزيدو شوي جبن مبشور و ندخلوهم حتى يطيب البيض














ميني بيتزا البطاطا

هاذي وصفة سهلة جدا و لذييييذة و راح تعجب الاطفال

نقطعو البطاطا بالطول او بالعرض اذا حبات كبار ، السمك يكون حوال نصف سنتيمتر
نفوروها و نحطوا فوقها الصلصة ثم الجبن المبشور
الصلصة
سخنت بضع ملاعق حليب و ذوبت فيها جبن مثلثات و خلطت حتى عقدت و اضفتلها ثوم مرحي ، زعيترة، شوي لحم مفروم طايب قبل و قطع فطر و طماطم مقطعة قطع صغااااار
هاذو كامل نخلطو هم مع بعض و نحطوهم فوق البطاطا ، الصوص تكون عاااااقدة ماشي جارية
ندخلوها فرن سخووووووون شاعل من فوق حتى تتحمر و يذوب الجبن












ميلفاي البطاطا

هذي فكرة سهلة و لذيذة جدا ، انا حبات البطاطا لي عندي صغار ممكن ديروها اكبر حجما و راح تكون مرافق جيد للدجاج المحمر
نقعطعو البطاطا قطع رقاق على طريقة الشيبس و نطوهم فوق مناديل ورق تمتص الماء
نتبلو هم بشوي زبدة او زيت ملعقة او اثنين حسب الكمية و نزيدو ،ملح ،زعتر، ثوم مجفف، و شويييية جبن مبشور و نخلطو كلشي
مباعد نجيبو مول مدهون مليح بالزبدة و نستفو قطع البطاطا على طريقه الميلفاي و نرشو من فوق جبن مبشور و ندخلوها لفرن سخون حتى تتحمر و طيب
مقرمشة من برا و طرية من داخل اممممممممم













بينيي البطاطا

هاذو البينيي بنان ياسر ياسر
العجينة
كيلتين بطاطا مسلوقة و مهروسة ، انا غسلتها و سلقتها بالقشر و مباعد قشرتها
كيلة فرينة
ملعقة قهوة خميرة كيميايية
رشة ملح
ملعقتين جبن مبشور او قطعة جبن مثلثات
نخدمو العجينة بالباتور نحطو البطاطا اولا ثم الفرينة و باقي المكونات، و نخلطو حتى ترجع العجينة طرية و نخلوها عادي و نقصو اقراص نحشيوهم بالحشو لي نحبو
انا حشيتهم بلحم مفروم مقلي مع بصل و ثوم و بهارات و شوية جبن احمر و نغطوهم بالأقراص الثانية
و نقليوهم في زيت سخوووون، راهم يطيبو بسرعة

و اللذة مانحكيش ذوقو و أحكموا مع رشة عصير ليمون اممممممممم













ميني همبورغر البطاطا

هذي طريقة سهلة و لذيذة لتقديم الهمبورغر و في نفس الوقت لذيذة و ممكن تتحكمو في الحجم كيما تحبو
و نقدرو نديروها بالبطاطا او بالكورجيت

نرابيو البطاطا و نعصروها من الماء مليح و نتبلوها بملح ، فلفل ابيض، ثوم ، دبشة مقطعة ، و بيض ونخلطوه

نسخنو مقلة ماتلصقش و اذا تلصق ندهنوها بالزيت و نحطو مول مدور و نحطو في وسطو الحشو و نخليوه يطيب على نار هادئة من الجيهتين
على فكرة غير يحكم الشكل نحيو المول و نحطو قرص تاني

بصح ما يطيبو نشكلوه على شكل همبورغر بإضافة أقراص اللحم و السلطة و الجبن و الطماطم

لي ماعندهاش اللحم ممكن دير أقراص بيض داخل المول











اصابع البطاطا بالمرغاز
هذه وصفة لذيذة جدا جدا

نقطعو البطاطا و نفوروها و نرحيوها بالفرشيطة او الرحاية اليدوية ضروري بالروبو تولي مطاطية و ماتقدروش تخدم بيها و نزيدولها ثوم ، بهارات ، ملح ، صفار بيض ، دبشة او معدنوس مقطع

نطيبو المرغاز و نفرغوه من كامل الزيت تاعو بعد ما نثقبوه

نغلفو حبة المرغاز بالبطاطا و نشكلوها على شكل أصبع بمساعدة عمود الشواء نحطوه يرتاح شوي في الثلاجة ،نمرروه في بيض ثم فرينة
و نقليوه في زيت سخووووون
و البنة اممممممممم،
صحاب الريجيم هاذي خاطيتكم ههههههه











ورود البطاطا

مذاق لذيذ و شكل ألذ

للعجينة انا درت عجينتي لي معتامدتها
كاس حليب دافئ
ملعقة خميرة
ملعقة سكر
فرينة
نطلعوا اولا الخميرة مع الحليب و السكر و نضيف الفرينة تدريجيا و اخيراً نزيدو الزبدة حتى نتحصلوا على عجينة طريقة و تلصق لاااااازم
نخليوها تخمر كي تضاعف الحجم نهبطوها و نشكلوها

البطاطا نقصوها قطع دائرية رقيقة نقليوها او نرشوها بشوي زيت و نطيبوها في الفرن

نطرحو العجينة فوق جلجلانية مرشوشة و نقصوها شرائح رقاق نستفو قطع البطاطا و نرشو شوي جبن مبشور و نلفوها على شكل وردة ندهنوها بحليب و نخليوها تخمر و مباعد نطيبوها في فرن سخوووووون مسبقا بعد ما ندخلهم نقصي لو شوي باه طيب من داخل مليح و اذا عندكم المروحة شغلوها
و هذي النتيجة













هذا الدرس الاول يا رب تكونو استفدتو منو و اذا ماعجبكمش ، ان شاء الله الدروس القادمة تكون احسن
بانتظار تطبيقاتكم غالياتي و لكم حرية الإبداع

روووووووووووووووووووووووووووووعة مكونات بسيطة درتي بيها العجب روحي ربي ينولك كل ما في بالك راكي ديتي من عندي دعاوي بزاف ماشاءالله اللهم بارك

[~أمة الله~]

روااائع ماشاء الله اللهم بارِك
سلِمت اليدين أختي زينب، ربّي يبارك فيك وفي أفكارك الطيّبة، أنا نلقى روحي بزاف في وصفاتك لأنّها صحيّة ماشاء الله ...
أحلى تقييم...
ملاااحظة صغييرة: فضلا عزيزتي بالنّسبة للملاعِق -في الوصفة تاع وردة البطاطا مثلا - ، إذا تقدري حطّي إذا كبيرة أو صغيرة، وجزاكِ الله خيرا

[sassah]

ya3isaha okhti
koun dirlna wasafa sihiya l regim

[جزائرية 16]

الله يبارك ولا اروع ممممم

[serine14]

44444444444444444444444444444444444444444444444444 44444444444444444444444444444444444444444444444444 44444444444444444444444444444444444444444444444444 44444444444444444444444444444444444444444444444444 444444

[أ م ساجد وسيم]

ختي تعيشي وقتاش اخر اجل الجمعة ولا سبت رجي عليا حنونة

[ام و ابنة]

استاذة زينب جبتلك تشوفي تطبيقاتي المتواضعة

https://www.djelfa.info/vb/showthread...post3995103790

[ام و ابنة]

ساجدة فرحت بزيارتك موضوعي

تفضلي رابط الدرس الاول

https://www.djelfa.info/vb/showthread...1919421&page=4

[ام نور الهدى 2014]

روائع زينب ماشاء الله عليك
و ربي يجازيك كل خير على المجهود المبدول