بيتك جنتك ورضاء ربك مبتغاك 2 - الصفحة 80

وفاء سعاد · 2013-03-01, 21:40

اقتباس:

المشاركة الأصلية كتبت بواسطة ام عبد اللطيف

المواقف الصعب كثير لكن اصعبها وافت اخي عمره 14سنة وكان ذالك منذ 5سنوات كل ما اذكر ذال يقشعرو بدني حيث انه كان بكامل قواه احسن صحته واقف مع اصدقائه حتي وقع ارضا لم يجد الاطباء اي سبب لوفاته اتصلت بي اختي واخبرتني لم انوح او اندب قلت انا لله وانا اليه راجعون ومازلت حتي الان اكتب لكم وانا ابكي لحمد لله

اختي راهو اصعب موقف نقراه لحد الان والله غير الدموع في عيني على خاطر عندي خويا عمره 22سنة ونموت عليه ومانقدرش نسخايل حاجة تمسو بصح راهو حكم الله وقضاءه كن فيكون وراهو مكتوب يموت في هاديك السن رغم انه صحيح كيما قلتي ربي يرحمو ويدخله فسيح جنانه امن يارب العالمين

سمراء الدنيا · 2013-03-01, 21:40

مساء الخير وفاء و عبيدة كيراكم .....سمحولي نغسل وجهي و نجي

وفاء سعاد · 2013-03-01, 21:52

اختي صليحة والله بدني اقشعر وصعيبة بزاف خلصت تاع ام عبد اللطيف لقيت تاعك سبحان الله شوفي ربي كيفاه عطاك حاجة تصبرك وتنسيك هول الصدمة يمهل ولا يهمل والله مالقيتش واش نهدر

سمراء الدنيا · 2013-03-01, 22:07

شكرا ليك وفاء ... سبحان الله غير نسمع كلامك نرتاح

وفاء سعاد · 2013-03-01, 22:17

يعيشك صليحة اختي شهادة اعتز بها كتيرا

وفاء سعاد · 2013-03-01, 22:20

فاطيمة راهي ابنتي شبعت فرحة كي قلتلها صاحبتي تسال عليك عمبالها ليلى على خاطر هي اللي تعرفها بزاف كي تخدم التمارين تاعها وندخلو لهمزة الوصل نستفادو منها وكي فهمتها باللي فاطمة تاع بشارفرحت وقالتي عادو عندي زوج يعرفوني

وفاء سعاد · 2013-03-01, 22:24

صليحة واش مهدي راهو خلص الحفاضة ولا مازال روحي لهمزة الوصل راهي ليلى حطت تمارين يهبلو حمليهملو واعطيه يحلهم بصح حتى يخلص الحفاضة

ام باديس · 2013-03-01, 22:25

مساء الخير لكل الاخوات اليوم النت ثقيلة بزاف هبلتني ..اليوم جبتلكم بقلاوة درتها البارح تاع عجينة الفيلو للاخت ام كوثر

تفضلوبصحتكم

ام باديس · 2013-03-01, 22:29

ختي معليش نسقسيك وين همزة الوصل هذي لي فيها التمارين

اقتباس:

المشاركة الأصلية كتبت بواسطة وفاء سعاد

صليحة واش مهدي راهو خلص الحفاضة ولا مازال روحي لهمزة الوصل راهي ليلى حطت تمارين يهبلو حمليهملو واعطيه يحلهم بصح حتى يخلص الحفاضة

ام منيب · 2013-03-01, 22:29

راكم قستوني للصميم
حتى انا ماننساش امر يوم في حياتي كون ما نعزكمش والله ما نقدر نكتب هذه الاسطر من قوة الدموع
في مارس 2005 كانت اختي الكبيرة في عمرها 40 عام حامل في وليدها الرابع وفي شهرها الاخير وتمارس حياتها اليومية عادي بين التعليم كاستاذة في اللغة الانجليزية وبين تربية الاولاد احسن تربية لكونها مثقفة دينيا وتربويا
ولما قربت ولادتها اخذت عطلة ومنشطارتها وجدت كل شي للنفاس كانها عروسة
خدمت الطمينة والرفيس بنفسها وحتى القاطو عملت 3انواع
ودارها رجعتها وردة و لما حان موعد الولادة راحت للسبيطار بعد ما ضمت ولادها
ولدت عادي وشافت وليدها وسماتو عبد الهادي وبعد ساعات قالونا دخلت للانعاش وحنا النار لاهبا فينا وعلى 11تاع الليل كنا العايلة كلها في دارنا متلمين حتى ولادها جاناخبرالموت تاعها كالصاعقة
انا نفسي ما نجمتش نعيط لانو ولادها كانو في وسطنا وبقات هذيك الشحنة في قلبي شهور ولولا اماني وتمسكي بالله تعالى كنت نهبل
وعطاني ربي صبر كبير وبلا ما نحس هوما يخرجو في محملها وانا نكبر ونقول انا لله وانا اليه راجعون
بصوت عالي انا واندهشت في نفسي لاني تاكدت بلي اختي الله يرحمها ذاك الوقت كانت تحتاج للرحمة والدعاء لا الدموع والعياط
وتخيلو احساسي لما رحت نجيب غدا من ذاك وليدها من السبيطار بدون ام.....
......سامحوني ما نجمتش نكمل....
ادعولها بالرحمة

وفاء سعاد · 2013-03-01, 22:32

اقتباس:

المشاركة الأصلية كتبت بواسطة ghalemmm

مساء الخير جيت نطل ونروح ولادي عنهم امتحانات
فيما يخص السؤال أصعب يوم في حياتي كاملة هو الأحد 16 أكتوبر ساعة أذان الفجر توفى أبي العزيز فجأة بدون سابق انذار رقد لاباس عليه والصباح مات
كانت أكبر فاجعة مرت بنا ،، الله المستعان ما زلت لحد الآن ما نيش مصدقة بلي بابا توفى رحمة الله عليه
راني نكتب ونرجف لا اله الا الله

ربي يرحمو اختي ويوسع عليه الحمد لله اختي ماتعدب ماوالو هادي وحدها تواسيك جاتو الموت خفيفة وربي كتبلو ووصل النهار تاعو على هاديك انت بقاتلك كلي كدبة راهي طريقة موت الانسان تلعب دور كبير في الصبر عليه انا لله وانا اليه راجعون

ام باديس · 2013-03-01, 22:34

ربي يرحمها و يجمعها مع الشهداء في الجنة يا رب

اقتباس:

المشاركة الأصلية كتبت بواسطة ام منيب

راكم قستوني للصميم
حتى انا ماننساش امر يوم في حياتي كون ما نعزكمش والله ما نقدر نكتب هذه الاسطر من قوة الدموع
في مارس 2005 كانت اختي الكبيرة في عمرها 40 عام حامل في وليدها الرابع وفي شهرها الاخير وتمارس حياتها اليومية عادي بين التعليم كاستاذة في اللغة الانجليزية وبين تربية الاولاد احسن تربية لكونها مثقفة دينيا وتربويا
ولما قربت ولادتها اخذت عطلة ومنشطارتها وجدت كل شي للنفاس كانها عروسة
خدمت الطمينة والرفيس بنفسها وحتى القاطو عملت 3انواع
ودارها رجعتها وردة و لما حان موعد الولادة راحت للسبيطار بعد ما ضمت ولادها
ولدت عادي وشافت وليدها وسماتو عبد الهادي وبعد ساعات قالونا دخلت للانعاش وحنا النار لاهبا فينا وعلى 11تاع الليل كنا العايلة كلها في دارنا متلمين حتى ولادها جاناخبرالموت تاعها كالصاعقة
انا نفسي ما نجمتش نعيط لانو ولادها كانو في وسطنا وبقات هذيك الشحنة في قلبي شهور ولولا اماني وتمسكي بالله تعالى كنت نهبل
وعطاني ربي صبر كبير وبلا ما نحس هوما يخرجو في محملها وانا نكبر ونقول انا لله وانا اليه راجعون
بصوت عالي انا واندهشت في نفسي لاني تاكدت بلي اختي الله يرحمها ذاك الوقت كانت تحتاج للرحمة والدعاء لا الدموع والعياط
وتخيلو احساسي لما رحت نجيب غدا من ذاك وليدها من السبيطار بدون ام.....
......سامحوني ما نجمتش نكمل....
ادعولها بالرحمة

وفاء سعاد · 2013-03-01, 22:38

اختي ام باديس راهي في المنتدى العام الابتدائي راهو موضوع متبت لاختي اريج المسك اسمه همزة الوصل رائع جدا عندنا استاد روعة اسمه عبد الناصر يفهمك اي حاجة مراكيش فاهمتها في الدروس لجميع السنوات في الابتدائي

نبض الفؤاد · 2013-03-01, 22:38

اقتباس:

المشاركة الأصلية كتبت بواسطة salima14

سلام لبنات النت راه ثقييييل راني فرحانة بغيت نفرحكم معايا فرحتين
الفرحة لولة أني شفت سيدنا وحبيبنا محمد عليه الصلاة والسلام في مناني
والفرحة الثانية أني جبت الپرمي فوت الإمتحان وربحت سلاااااام

مبروك عليك الؤيا والبيرمي العاقبة لينا ان شاء الله

اقتباس:

المشاركة الأصلية كتبت بواسطة ghalemmm

مساء الخير جيت نطل ونروح ولادي عنهم امتحانات
فيما يخص السؤال أصعب يوم في حياتي كاملة هو الأحد 16 أكتوبر ساعة أذان الفجر توفى أبي العزيز فجأة بدون سابق انذار رقد لاباس عليه والصباح مات
كانت أكبر فاجعة مرت بنا ،، الله المستعان ما زلت لحد الآن ما نيش مصدقة بلي بابا توفى رحمة الله عليه
راني نكتب ونرجف لا اله الا الله

الله يرحمه ويوسع عليه موت الفجأة فاجعته وحدها

اقتباس:

المشاركة الأصلية كتبت بواسطة فاطمة بشار

بصحتها بنتك وفاء راني فرحت معاها و امانة قوليلها راهي مسلمة عليك طاطاك فاطمة والا قاتلك شكون اشرحيلها انتي بطريقة

راكي عارفة بناتي كامل يعرفوكم ونقولهم طاطاك وفاء وطاطاك فاطمة وطاطاك صليحة يعني راكم عندي جزء من العائلة

اقتباس:

المشاركة الأصلية كتبت بواسطة سمراء الدنيا

نجو ضرك لجواب نتاع سؤالي
كنت حامل في ايامي الاخيرة بابني الاول ....جهزت كل ما يخص الولادة حتى نروح نولد عند امي ..... كنت في شحال من شهر ما رحتش و نخممك كي ندير نوقف قدام والدي و كرشي كبيرة و فرحانة و باغية نوريهم قش البيبي و الصوالح للي خيطتهم.... المهم جا نهار لخميس للي كنا متافقين عليه و رحت منين و صلت لدارنا لقيت الغاشي و السيارات ... قالولي الوالد توفا.............................................. .................................................. ................ تتخيلو الموقف نعيط ونطيح على كرشي و ما وليتش نشوف بعينا ..هذاك النهار فوتو حالة و النهار لاخر داوني للسبيطار ولدت و انا نبكي ...و ابني جاو في راسو الضربات نتاع الطياح ... سبحان الله تلهيت نداوي في ولدي و خفاف عليا وقع الصدمة و سميت ولدي على جدو و راهو ضرك هو عينيا ....عزيز عليا بزاف...
استغفر الله راني نبكي و كانها صرات لبارح و هي فات عليها 16 سنة

تعبيرك هزني واقشعر بدني ربي يرحم الوالد نتاعك وشفتي رحمة ربي بيك كيفاه رزقك بالولد سبحان الله حكمته في ذلك ....ادعيله في كل صلاة

اقتباس:

المشاركة الأصلية كتبت بواسطة وفاء سعاد

فاطيمة راهي ابنتي شبعت فرحة كي قلتلها صاحبتي تسال عليك عمبالها ليلى على خاطر هي اللي تعرفها بزاف كي تخدم التمارين تاعها وندخلو لهمزة الوصل نستفادو منها وكي فهمتها باللي فاطمة تاع بشارفرحت وقالتي عادو عندي زوج يعرفوني

وفاء ما شاء الله على بنتك لو كان خبرتينا لوكان سمعناها معاك ونفتخرو ببنت اختنا العزيزة ربي يحفظها لك وقوليلها خالاتك يهنوك ويسلمو عليك

وفاء سعاد · 2013-03-01, 22:39

يعطيك الصحة ام باديس راني رجيم بصح ديت واحدة هاهاها خرجتلك روعة