دورة الاستعداد لفصل الشّتاء بيتي مشرق كفصل الرّبيع

[om wassim]

سلام لبنات الله الله عليكم راكم فحلات الله يبارك
انا غدوة ندير التسريحة و لخزانة بديتها اليوم درت غير شوية حوالي 10% ماتضحكوش لا كتب ربي غدوة نكملها
بما انو وليدي يموت على القراية هههه كل يوم يقولي اديني لمسيد و باباه ماحبش قالي صغير 3 سنين
المهم شريتو كتابات و ادوات و كامل واش يلزم و كل يوم نديرلو حاجة باه يتعلم

[oum sabrin]

صباح الخير و الهمة و النشاط
واش راكم يا فراشات
أنا حتى البارح في المساء باش راحو ضيافي اليوم راني مبرمجة تكملة الخزانة
الغذاء درت شربة راهي تظيب و دوك نخمل الغرف على السريع و ننظلق باذن الله ما يكونوش طواريء هههههه
يومكن موفق حبيباتي

[om wassim]

يوم موفق للجميع و ليك اختي أم صابرين
انا راني مع الشغل كي نكمل و ينوضو الأولاد راكم علابالكم حالة شامبرة وحدة ربي يفرج عليا و عليكم بسكنة يارب
نبدى بالتسريحة فالحق تاعي نحيتلها كلش ملي كبر وليدي قلت نسقمها اليوم شوية
و منبعد ندور للخزانة أن شاء الله

[ام مؤمن]

طاب مسائكم و طابت اوقاتكم احبتي

اليوم سنشرع ان شاء الله في بداية تطبيقات الدورة لنجدد الحيوية و النشاط من جديد

اولى التطبيقات التي سنلتزم بها ان شاء الله هما تطبيقين اثنين سنطبقهما معا ان شاء الله

تطبيق تلميع الحوض + تطبيق الاعتناء باالنفس بمجرد النهوظ من الفراش(تجهزي 10/10)


التطبيق الاول لليلة و الثاني لصباح يوم الغد


التطبيق الأول: تلميع حوض المطبخ

قومي اابتداءا من ليلة اليوم بتلميع حوض مطبخك
افرغيه من اي شيء فيه
و قومي بتلميعه
ان كنت قد فعلت ذلك فبوركت
و ان لازلت فقومي بذلك قبل خلودك للنوم
و ان كنت بعافية لاسامح الله
لا تتركي الاواني متجمعة في الحوض
ضعيها في اناء و رتبيه في مكان ما في المطبخ
و قومي بتلميع الحوض
يجب وجوبا تااااماااا ان تقومي بتلميعه كل ليلة مهما حصل و مهما كانت ظروفك
و هذه اول عادة يجب ان نكتسبها من اليوم فصاعدا

فائدة هذا التطبيق:

غدا صباحا لما تستيقظين من النوم و النعاس يغلبك
و عيناك مثقلتان
حين تدخلين مطبخك لتعدين الفطور لك و لعائلتك الحبيبة
و تقع عيناك على الحوض و هو نظيف و ملمع
ستدركين مدى الراحة و السرور الذي سيدخل على قلبك





التطبيق الثاني: تجهزي 10/10

معنى ذلك
غدا صباحا بعدما تستيقظين
(يا ريت يكون ذلك ولو نصف ساعة قبل وقت استيقاظ ابنائك و زوجك)
حتى تخصصي وقت خاص لك وحدك تهتمي فيه بنفسك و تدلليها و تخبريها كم تحبينها
قومي في هذا الوقت بغسل وجهك بغاسولك اليومي و رطبيه
و امشطي شعرك و رتبيه حتى و ان اضطررت لاستخدام المسرح الحراري
(لمالا اولست تستحقين ذلك)
و بعدها البسي احلى حلة في بيتك
لا تستخسري على نفسك لبس ملابسك الجميلة في البيت
حتى ملابس الخروج لا تستخسريها على نفسك
تزيني و تجهزي و كأنك جاهزة للخروج
و تعطري مع شوية ماكياج خفيف طبيعي
و ها انت ملكة جمال الفراشات

هذه ثاني عادة سنكتسبها معا هذا الشهر
يجب وجوبا تاما أن تطبقيها يوميا مهما كانت ظروفك او وقتك
الزمي نفسك على تطبيقها مهما كلفك الامر
لا تتنازلي عنها من اجل شخص ىخر او شيء آخر
فجمال بيتك يبدأ من عندك

فراشات المحبة اوصي نفسي و اياكم بالالتزام بهذين التطبيقين ابتداءا من اليوم ان شاء الله و في انتظار وضع جدول الجانب الديني لاحقا ان شاء الله و حتى نبرز معالم يومنا و كيفية تنظيم و ترتيب يومنا من بدايته التي هي اولى نسمات الفجر الى اخر ساعة في الليل سيكون نظام السير كالاتي

بداية اليوم المشرق

البداية تكون من الليلة السابقة و اول تطبيق نقوم به هو تلميع حوض المطبخ

و ايضا سادرج لكم تطبيق اخر لاحقا و هو تطبيق تجهيز ما يلزم لليوم الموالي للفراشة و افراد اسرتها كل ليلة قبل النوم:''(احاول ترتيب التطبيقات حسب توقيت اليوم )

البداية ستكون الاستيقاظ لصلاة الفجر في وقتها ان شاء الله حتى نستفتح يومنا ببركات الرحمان و ننال بيوم موفق ان شاء الله

ثم الالتزام بالتطبيق الثاني: تجهزي 10/10

و بعدها انت حرة يا فراشة في تقسيم ساعات يومك الى حين وضع تطبيقات جديدة ان شاء الله

دون ان ننسى الالتزام بتطبقات الدورة الشتوية و التي كانت بدايتها ترتيب الخزانة و التسريحة

و ان شاء الله عندما نصل الى تطبيقات الروتينات و الجداول سنقوم باعداد جداول نجدول فيها كل اعمالنا و تنظيفاتنا بشكل مظبوط و نقسم ساعات اليوم حسب اولوياتنا و ظروفنا و نخصص لكل اعمالنا و هواياتنا و عباداتنا وقت محدد

اتمنى ان اكون وفقت في ايصال الفكرة لكم و اتمنى ان تجد صدى و ترحيب و التزام بالتطبيق من كل الفراشات

الفراشات القديمات طبعا التطبيقات واضحة ليكم جيدا و اتمى تساعدوا معي الفراشات الجدد على التعود على نظام الدورة القديم

و الفراشات الجدد ان شاء الله مع الوقت رايحين تندمجوا اكثر و اللي عندها اي استفسارات نحن بالخدمة

لا تنسوا الحيوية و النشاط شعارنا دائما بارك الله في اوقاتكم و اعمالكم و كلل تعبكم بالرضى و التوفيق

[بسمة امل الجزائر]

حااااااااااااااااااااااااااااااااااااااااااااااااا اااضر غاليتي ان شاء الله يعم الانظباط للمشي قدما نحو حياة هنيئة سعيدة مفعمة بالحيوية والنشاط

[بسمة امل الجزائر]

اموووووووووووووووووووووووولة بالبركة عليك وربي يهنيك ان شاء الله ويسعدك

باقي العوضوات ودون استثاء ربي يعينكم ويقدركم والمزييييييييييييييييييد من النشاط

[ام مؤمن]

و اخيرا وسط كل الفوضى و حالة الطوارىء القصوى التي اعاني منها وجدت وقت صغير للدردشة معكم احبتي

نحن مع بداية الشتاء و في فترة ما بعد العيد واش نقولكم راني في فوضى كبيرة احاول الخروج منها و لكن بخطوات منهكة و ثقيلة و لكن المهم انني اتقدم الى الامام و لو ببطىء

قبل العيد باسبوع واحد كان عرس سلفتي و قبل العرس باقل من شهر كانت الخطبة و الحنة و الفاتحة و العقود سبحان الله كل شيىء تم في مدة شهر تقريبا و هذا الامور لخبطت عليا نظام حياتي اول شيىء قصرت فيه هي العبادات بحكم ضيق الوقت و انشغالي في التحضيرات و كان التقصير يشمل عدم قرائتي للمصحف من فترة و ترك الاذكار و التقصير في صلاة الفجر و طبعا تقصيري سببلي تعب نفسي و احساس بالذنب

بالنسبة للمنزل واش نقولكم الفراش توسخ الخزائن مبعثرة و المواعين و حتى اولادي قللت اهتمامي بيهم و زاد وصل العيد مع التلباز تاع اللحم المطبخ صار كارثة المسكين
و فوق كل هذا مرضت انا و اولادي طيلة ايام العيد و سيبت منزلي المسكين غير الخروجات المفاجئة و الضيوف و العراس اللي ماحبوش يخلصوا علينا ههه راني راحة ندير اضراب و منزيدش نروح

و الحمد لله و بعد كل الذي مر عليا استطعت بتوفيق من الله ترتيب الخزائن و المواعين و ايضا غسل الفراش و الزرابي
و هذه الايام درت شوية تنظيفات عميقة شملت الصالون و الحمام و المرحاض اعزكم الله و اخر تنظيف قمت بيه صبيحة اليوم و هو التنظيف العميق للمطبخ الجدران و الارضية و الفرن و الغسالة و الرفوف

و مازالتلي بعض الامور العالقة نقسمها على الايام القادمة ان شاء الله

لكنني اعمل تحت ظغط نفسي كبير و محتاجة الصراحة الى فترة نقاهة نحاسب فيها نفسي و نجدد فيها اهدافي و نبدا بداية جديدة مع الله و نحاول ننظم حياتي اكثر حتى نعيش مرتاحة نفسيا و نقضي على التراكمات و الفوضى في حياتي

و هذا الامر اللي خلاني نحكم في الدورة بيديا و سنيا لانها الملاذ الوحيد الذي سيساعدني على محاربة الفوضى و البداية من جديد

اعدكم ان شاء الله سااشارككم اهدافي و مشاريعي و معكم ساقوم بجدولة حياتي من جديد

جدول للعبادات و جدول لتنظيفات البيت و لممارسة الهوايات جدول مخصص لاولادي و زوجي جدول للعناية الشخصية و الجمال وووووووووووووووووووووووو

كانت هذه فضفضة ربة بيت مرهقة و متعبة و لكن بمجرد فضفضتي معكم حسيت براحة كبيرة

اسفة كتبت جريدة سلام

[ام مؤمن]

ماعليش راني استوليت على الصفحات اليووووووووووووم كي لقيت شوية وقت

ماكنتش عندي فرصة باش نعلق على ردود حبيباتي الفراشات و خاصة اللي طرحوا استفسارات

البداية من عند حبيبتي ام تغاريد ربي يحفظك على كل ما تقدمينه لنا مواضيع و افكار رائعة مفيدة و عملية و تبت الحيوية و النشاط و راكي حببتيني في هذا الشتاء و تحويله الى ربيع دافئء في بيوتنا

خزانتي بالفعل تستحق اعادة برمجة ااقصد اعادة تطبيق بسبب العرس كنت نلبس و نروي و نرمي رجعتها كارثة حتى الملابس اللي كنت نغسلها نحطها من فوق برك بدون ترتيب
الحمد لله قبل الدورة كنت ديجا غسلت كامل القش تاع الشتاء و شمستو مليح يعني راهو محتاج ترتيب فقط
كيما سبق و قلت كانت الاولوية خزانة اولادي الحمد لله كملتها البارحة و رتبت قش الصيف و الشتاء

و رتبت ايضا رف واحد من خزانتي اعلى رف و هو مخصص لملابس الاعرااس و القنادر الثقال و اليوم الصراحة ماقدرتش نمس فيها لانني درت تنظيف المطبخ ممكن في المساء ندير رف اخر اذا قدرت ان شاء الله
و راحة ندير كل يوم رف او 2 حسب وقتي حتى انتهي منها و ننتقل مباشرة الى التسريحة ان شاء الله
اسفة لضيق وقتي لا استطيع وضع الصور حاليا ربما في مشاركات اخرى ان شاء الله


om wassim ماشاء الله عليك و ربي يحفظ وليدك راكي احسن مافعلتي شرتيلو ادوات هكذا تشغليه شوية و تعلميه في نفس الوقت
تكلمتي على الجانب الديني و الجمالي وووووو ان شاء الله قريبا ستكتمل الدورة بكل الجوانب

ام نسيبة ماتطوليش علينا توحشناك نحن في انتظارك

سرور2 حبيبتي مع الاسف لم ارى صورك لكن حبيت ننصحك نصيحة صغيرة ماتحطيش المواد الغدائية في خزانة الملابس اذا تقدري اشري القجورا البلاستيكية (لي بوغط سوليي ) كاين احجام صغيرة ماتديش مكان كبير في الغرفة حطيهم في شوكة و خبي فيهم

ام ياسر قولي لزوجك يديرلك رفوف عند النجار انا خزانتي كانت رف واحد كي نطبق القش يريب كامل كيل زوجي بالمتر و طلعلي رفوف جديدة ساعدتني في تقسيم الملابس و ايضا افكار ام تغاريد هايلة

ذات النورين فكرتك مليحة المهم القش يكون مافيهش غمولية و مرتب و لكن حاولي تفصلي بين تاع الشتاء و الصيف

amel...برنامج متوازن ماشاء الله يحتاج الى رتوشات صغيرة فقط خليك معنا ان شاء الله في الايام القليلة القادمة سنقوم باعداد جداول تساعدنا على تنظيم اوقاتنا و تقسيم مهامنا على مدار اليوم ابشري على حد قول حبيبة و ام صابرين نصحتك نصائح رائعة و الف الف مبروك حبيبتي بصحتك العيد و ربي يتمملك على خير و يسعدك و يهنيك و تكوني ربة بيت ممتازة

حبوبتي ام صابرين نتكل عليك في تنشيط التطبيقات بحماسك المعروف و ربي يتلطف بينا و تكون الطوارئ يسيرة و مقدور عليها

ام ادم اتهلي في بنيتك وكل شئ هين فيما بعد

حبيباتي اخصكم جميعا بالسلام و المحبة و كل من ذكرت اسمها او لم اذكره ربي يحفظكم جميعا لي رجعة ان شاء الله

في امان الله


لا تنسوا تطبيقاتنا انتم و انا ملتزمون بها و هما 2 فقط انتظروا القادم من التطبيقات ستكون كثيرة و اجبارية

[*بنت الاسلام*]

salem alikom en retard choiua mé maeliche stahamlouni rani ada jdida fel montana . awalane barak laho fik ela mawdoue tres intéréssant w ynachat . mé bghite nsaksi hadja ma andiche bezaf meli rhalt le moi d'aout w ghsalt kamel les vetements netae l’hiver w samachthom ghaya lakhatarche kanet fihome riht l humidité a ton avis khas neawad nchamashom ?barak laho fikom ya kafzates

[خوخة02]

السلام عليكم واش راكم
انا كملت شمبرتي اليوم راهي هايلة وراني حاسة براحة كبيرة قلت نزيد معاها المطبخ بصح عييت ظهري وجعني
ام مؤمن صح هادوك تطبيقين ملاح في حياتنا التطبيق الثاني كل يوم نديروا الحمد لله
اما التطبيق الاول ماشي كل يوم صراحة ان شاء الله نبدا من اليوم
سلااااااااااااااااااام

[ام آدم]

ربي يحفظك ام مؤمن ويحفظ ولادك
باذن الله التطبيقين يتطبقو وان شاء الله يصبحو من عاداتنا الابدية

[أم تغاريد]

السّلام عليكم ورحمة الله وبركاته يا غاليات مرحبا بكنّ جميعا طاب مساؤكنّ
راني نطل على ردودكن باستمرار
الله يبارك عليكم النشاط والحيوية انا راني كيما انتوما غارقة في الترتيبات مع الطوارئ لي جاتني اليامات لي فاتو تعطلت شوية
بصح الحمد لله راني نتقدم
حبيت نأكد على تطبيق الحوض وتطبيق تجهزي
ضروري من اليوم ان شاء الله نبداوه وتكتبو " تم التطبيق " باش نشوفو شكون لي راه صح اتبع في الدورة
انا وأم مؤمن رانا نحاولو نوفقو بين التزاماتنا وبين هاد الدورة عاونونا بنشاطكم
ديرو القلب لبعضاكم
ان شاء الله نحاولو نطورو هاد الدورة ونديرو فيها مسابقات كي نفرزو شوية الحالة
حبيت نقولكم بلي راني معاكم وان شاء الله نرد عليكم بالواحدة غير نلقى شوية وقت
الان رايحة ندير العشا أبعث لكم سلامي مع زخّات المطر الّتي بدأت تبلّل الأرض الآن~

[amel...]

مساء الخير عليكم يا اجمل فراشات ... ان شاء الله راكم ملاح و الصحة بخير

شكراعلى الدعوة الزينة شقية لكن و فية و كذلك ام مؤمن ان شاء الله هاد الدورة تكون بمثابة تربص لي باه نكتسب عادات مليحة و نفرح انا قبل مايفرحو بيا بيت شخي

المهم انا راني كملت العشا حطيتو يطيب درت باطاطا كوشة و كملت قطعت القلاوة و عدلتها باه توصل لماليها ان شاء الله

بالنسبة للتطبيقات باذن الله ساكون من الملتزمات و ربي يقدرني

ربي ان شاء الله يبارك في لمتنا

سلامي لكل وحدة باسمها ... لي عودة بعدما نتعشا و نغسل لماعن و نلمع الحوض

[oum sabrin]

مساء الخير حبيباتي الفراشات
حبيبتي أم مؤمن يعطيك الصحة على مجهوداتك المقدمة بالرغم من انشغالاتك الكثيرة ربي يقدرك
بالنسبة لتطبيق الحوض الحمد لله مواضبة علية و اصبح م روتيناتي اما التطبيق الثاني الصراحة ماشي دايما يعني الصباح نسبق في شغلي ثم كي نكملأستحم و اذا كان عندي الوقت أتزين و لكن معاكم ان شاء الله نرسخ هاد التطبيق و يصبح لنا عادة جميلة لا يمكن الاستغناء عليها
اختي امال بصحتك ما جابولك و ربي يكملكم في الخير انت و كل المخطوبات يا رب
اختي ام وسيم بصحتو ابنك انا تان ابني شريتلو كي شاف اختوشرات مع الدخول المدرسي دار حالة هههه
اختي ام ادم ربي يقدرك مع فطام ابنتك ساعفيها مراح تكون حساسة نوعاما هاد الايام و تبكي كثيرا الله المستعان ربي يعيشهالك
اختي ام تغاريد يعطيك الصحة على ما تقدمينه من افكار جميلة في انتظار ردودك و افكارك
اهلا بريحونة كفراشة جديدة في بستان الفراشات النشيطات
ختي خوخة بصحتك الترتيب يا شطورة
سلامي لكل الفراشات و

ساضع تقريري لاحقا بعد تحميل الصور

[hafidha20010]

السلام عليكم
يعطيكم الصحة على هذا التشجيع والنشاط لراكم تبعثوه فينا
انا راني نتبع في الدورة بكل جوارحي اليوم التسريحة ولات تهبل ياحصراه شحال عندي ما شفتهاش هكذا
كل شيء ولى في مكانه وان كان مازال يخصني شوية علب صغيرة باه تتسرج مليح بصح عموما ماشاء الله ولات تسريحة وعليها الكلام
يعطيك الصحة ام مؤمن لازم تنقية الحوض مهما حصل بالنسبة لي اعتبرته امرا وجب تطبيقه
بارك الله فيك ام تغاريد راك فكرتيني في حبيبة اتمنى لهل عودة ميمونة