اللي حاكمة مصروف الدار تتفضل معانا - الصفحة 8

pomaria_aindefla · 2012-09-12, 15:40

قسمونا شهرية تع 27000 دج

بنت الجزاير الغالية · 2012-09-12, 16:36

اقتباس:

المشاركة الأصلية كتبت بواسطة pomaria_aindefla

قسمونا شهرية تع 27000 دج

قداه في العائلة و الفواتير قداه مالفة تجيكم باه نعرف نقسم

pomaria_aindefla · 2012-09-12, 16:43

مازال كيما قلت راني في دارنا و لكن حبيت نتعلم
كما تعرفي كينكونو خدامت الشهرية تمشي في سقايط و الفطور

أم الفرسان · 2012-09-12, 23:21

أختي الفاضلة موضوعك مهم للغاية .. وأنا شخصيا نعاني من هذا الموضوع بالذات :
أنا وراجلي نخلصو 75000.00 دج نخلصوا لكراء 8000 دج وتقسيط 25000.00 دج والباقي يادوب يلحق الشهر مع أني عندي ولد واحد برك .. ياريت أختي تنصحيني .. لازم واحد يدير الدار والتاويل.. والمشكل كل ما نقول راح نقتصد نلقاها توخذت أكثر...

تحياتي

mouna08 · 2012-09-12, 23:57

salam barak allahou fiki un sujet hayal
choufi ana manich mzawja mais 7akma masrouf dar baba ya3tini 6 million 3yit kifach naktased chwiya
3andna 8 fi la famille, 2 bnagt ykraw fi lycée w 3 khawti dima hatilna masrouf!!!!
zid internet mais voiture makanech
svp kifach ndir merci

pomaria_aindefla · 2012-09-13, 17:21

إن شاء الله تدخل صاحبة الموضوع و سيدات أخريات و تجاوبك و السيدات يثريينا الموضوع بمشاركاتهم و كيفية الإقتصاد لأنه كل شيء راه غالي

هبة الكوثر · 2012-09-13, 19:23

السلام عليكم ان شاء الله تفيدكم طريقتي نستعملها على مدي 8 اسابيع اي شهرين
الشهر الاول لنحكم 2 ملاين نشري منها القهوة الاقتصادية ريادو فيها 750 غ ب 450 دج
ونشري 10 كلغ سكر
وزوج كلغ كل عدس + لوبيا + مخمصة + سباقيتي + مقارون + الارز + التليتلي + الكسكس + فرينة + دقيق
وبيدون 5 ليترات زيت وقرعة خل وماء زهر و 2 كلغ طمام مصبرة
بلاطو بيض + سانوجة تاع جي ولا قازوز
ونزيد نشري زوج جويجات صغورين نقيهم ونقطرهم ونقطعهم مليح ونوزعهم فلكونجيلاتور وكي يسسو نحطهم في صاشي ونشري كلغ ونص لحم غنمي نقطعهم طراف صغااااااار نينن بينهم برك
يبقالي وحد 300 الف نشرو بيها خضرة لي ماتفسدش كيا لبصل والبطاطا والطوماطيش
كي نطيب فيي السمانةنطيب ماكلة تاع فطور وعشاء مدايرة الميني تاع السمانه عدس +لوبيا + تليتلي + ماشتو + مقرون ونهار لخميس ندير بلا الله الله تاع الصح مليح شطاطح والجمعة طعام والا رشتة ولا شخشوخة ولا لمحاجب
مدايرين شحيحة في المطبخ عبارة عن بلارة زجاج نخطو فيها الصرف مدايرينها سبيسيال تاع الحبز
و 200 الف سبيسال لشكاير لحليب
الشهر لول لي نصرفو فيه ياربي تبقالنا مليون مي كي يجي الشهر التاني نلقاو روحنا مرتاحين خاطرش ماراناش رايحين نستهلكو كلش غير الا عاود شرا الخصرة ولا اللحم لنفس الكيل والا حاجة نتشهاوها
والهر التالت يجي فيه التريسيتي والماء نكونو ديجا موفرينلوا من االشهر التاني
انا في رايي المراة هي لي تتصرف كي تعرف واش تطيب ماشي شرط الماكلة يكون فيها كيلوا لحم بتاه تولي بنينة وماهوش شرط ناكلوه كل يوم انا نقطعو مورصوات صغار نبنن بيه الماكلة وكي نكونو في الشهر لي مرتاحين فيه نقدرو نشرو حتى لي كوتلات نشووهم ونقلوهم
نسيت نقوللكم انا تانيك حدامة على هكا نطيب ماكلة فطور وعشا وعندي الويكاند لي نفشش فيها راجلي بلمكالي ولله الحمد ونقوللكم القناعة كنز لايفني لي عندو مليون يصر قدر مليون ولي عندو زوج يحاول كيفاه يتقشف منها هادو يامات والواحد منا ماهوش عارف واش رايح يصرا بعيد الشر هدا طبيب هدا سفر هدا فرح هدا.................الخ

هبة الكوثر · 2012-09-13, 19:28

وزيد انا لي يهنيلي نهنيلوا اما لي يجيني يديه مشبكين انا تانيك نروحلوا بيديا مشبكين ههههههههه
ااما الحفافات نروحلهم غير في عرس اقرب المقربين الناس لوخرين نلبس لي طايور شابين مع هادوك الخمارات الشابين تاع الاعراس ديجا الحال عاد يخوف الكاميرات والانترنت وناس ماتخافش ربي
والسقايط انا تانيك نحبهم وديما نشري كاشيرة كومبلي الفرامج والياوورت والطون تاع لي بوات لكبار اونسي جامي نططيح اومبان فلعشا ديفوا مايكفيش نكملوهم كاسكروطات هههههههههههه

هبة الكوثر · 2012-09-13, 19:31

اقتباس:

المشاركة الأصلية كتبت بواسطة nokia111

زوجي يخلص مليون وتمنةئة والحمد لله كافيتنا وفايضة

ياريتك ياختي تقولينا كيفاه راكي مقسمتيها وربي يهنيك ويكترلك من خيراته

الملاك المجروح93 · 2012-09-13, 20:12

قسمولنا شهرية تاع 5ملاين ونص

الافراد 6

أم الفرسان · 2012-09-13, 21:46

يعطيك الصحة أختي هبة راكي قايمة بها على الكيف .. ربي يبارك لك

زينب الهلالي · 2012-09-13, 22:24

ما شاء الله الموضوع توسع والخبرات كثرت جميل جدا هذا التفاعل ......
صحيح كلامكيا هبة الكوثر نصائحكواقعية ومجربتها خاصة بالنسبة للمصروف الشهري وكذا نظام الوجبة الواحدة حتى بالنسبة لي انا لا اعمل خارج المنزل لكن دائما نظام وجبة واحدة للغداء والعشاء وإذا ما كفاتش نكمل بالسلطة أو الحليب بالنسبة لي والمهم الأطفال نعشيهم الاول ثم أحنا الكبار نتصرفوا أحيانا ألغي العشاء نهائيا ههههههههههههه فقط حبات من التمر وكوب حليب خاصة مع الرضاعة الليلية المنهكة والمتعبة .....

وفعلا اللحم ليس كل شيء في الطبخ وأنصح ربات البيوت بتجنب الدوام في استهلاكه اليومي لأن هذا يسبب داء النقرس والعياذ بالله
أما البنة المرأة الشاطرة يكون طيابها وكأنه فيه اللحم وهو خال منه والحقيقة وبدون مغالاة زوجي دائما يقول من أين جاك اللحم الي طيبيت به ؟؟؟؟ لكنني اضحك عليه واقول ومن غيرك يصرف لينا ، لا لحم ولا دجاج راهي يدين الحراير ......ههههههههههه

pomaria_aindefla · 2012-09-14, 00:22

ما شاء الله تيارك الله على نساء الجزائر إن شاء الله في المرة الفادمة تقولونا على واش ديرو في القدر من ليزيبيس و كيفاش تطيبو

بنت الجزاير الغالية · 2012-09-14, 09:15

بسم الله ما شاء الله يعطيكم ألف صحة على المشاركات المميزة و نخص بالشكر أيضا أخت هبة و الله تشبهيلي في حوايج بصح أنا في السمانة ندير نهار واحد للحبوب و نهار للعجينة و نهار طاجين و نهار خضرة و النهارين الباقيين ندير المحاجب أو البيتزا أو الشخشوخة أو الطعام و يكون بالجمعة و لازم في الأسبوع نجربلهم حاجة جديدة مش شرط تكون مكلفة بصح تغيير

و زيد القاطو و القوفريت و غيره أنا نديرلهم قاطو للسمانة كاملة إن شاء الله حتى كروكو و حتى كي يجيني ضيف ما نخافش ديما راني موجدة روحي

كذلك كاين أكلات إقتصادية هايلة تحمر الوجه و ما تقضيش عالميزانية المهم تكون في طياب المرأة في حد ذاتها و ديكورها

لي عودة للرد على المشاركات السابقة

pomaria_aindefla · 2012-09-14, 10:52

سيدتي بنت الجزائر الغالية من فضلك إدا كان بإستطاعتك تساعدينا السيدة أمينة ألاء في المحاولة في اٌيدخار من شهرية هدا موضوعها - كيف تسير امورك بيتك.......ساعدووووني - في قسم
منتدى الحياة الزوجية

https://www.djelfa.info/vb/showthread.php?t=1087825