يوميات عضوة - الصفحة 8

ياسمين1990 · 2014-02-22, 15:54

سلام عليكم
شكرا اختي والله كيما قلتي ملي كنت طفلة وكاني غير انا في حومتي كل الناس يهدروا غيرعليا كاينين لضربوا بناتهم على جالي تقول لبنتها شوفي هذيك فحلة
وانتي خايبة
وزدت كي تزوجت كل وحدة تحب تخطب لوليدها تقولي يارب ونجيبها كيما انت مع احماتي هبلوها يقوللها منين جبت هدي
مع زوجي كل راجل يحب يتزوج يحوس على المرة تكون فيها مواصفاتي .........الخ
ارزقنا رب بالولاد كل وحدة عندها لولاد تقول ياربي ويكونوا كيما ولاد فلانة يعني ولادي
والله كل مرة نخرج انا والاولاد في اي مناسبة نرجعوا لدار مراض اما بالحمة او اي مرض اخر
كل مرة نصبر روحي ونقول ربي كتب ولكن وصلت وين الشغل منقدر نخدم حتى حاجة يعني الشغل يخزر فيا وانا نخزر فيه الى درجة مرات نبكي وتمر الايام
وانا غير نزيد ولو نخدم اي حاجة مثلا ننفض ولا نسيق ولا نغسل القش ولا اي حاجة نبات بالحمة في جسمي وكانهم كانوا يضربوا فيا ونصبح مهرسة حاكمة لفراش ونشوف غير بعينية هذا غيض من فيض يعن باختصار شديد ويارب بعد كل شر على عبادك المسلمين
اذا عندك الحل لهذه الهموم والمشاكل اغيثيني
اللهم اني أسألك العفو والعافية والمعافاة في الدنيا والاخرة وصلى اللهم على سيدنا محمد وعلى اله وصحبه وسلم
معذرة اختي ام عبودة من المفروض هذه الصفحة تكون للناشطات وليس للخائبات مثلي وشكرا

نخله. · 2014-02-22, 17:00

اختي ياسمين ربي يفرج ويعينك هذي كلها اعراض عين

راني حاسه بيك جربت العين وش دير فينا انا حتى وليت ما نخرجش زوجي راهو كل يوم يقولي يالاه روحي تخرجي بدلي شوي جو ونا ندير الف حساب وحساب اولو اني كل ما نخرج نجي راسي واجعني والولاد يباتو في حاله من المرض واخرها يصرا مشكل وندوس مع زوجي بعد كل خرجه نخرجوها سبحان الله والحمدلله على كل حال

ارقي نفسك بنفسك

ديري كيما قلت للأخت عايده

كل يوم اقراي سورة البقره كل يوم على الاقل لمدة 40 يوم

اقرايها في جلسه واحده يعني ما تقطعيش وما تتكلميش حاولي تكون في وقت مناسب مثلا اللي يكون فيه الغاشي نايم باه مكاش اللي يديرونجيك

وكاين طريقه هايله ترقي بيها نفسك

تقراي على ماء
الفاتحه 7 مرات
الكرسي 7 مرا ت اول 5 آيات من البقره 7 الكافرون 7 الاخلاص 7 الفلق 7 الناس 7

تقرايهم على كاس ماء تشربي منو وتخلي شوي تغسلي بيه وجهك وطرافك

ديريها د3 مرات يوميا صباح ظهر مغرب

لـ3 ايام متواليه

ماتتكاسليش على خالتك...............مانيش حابه نخوفك بصح راهي العين مصيبه وام المصايب

ارقي نفسك وولادك

و صلي صلاة الحاجه واطلبي من الله الشفاء

رنا كامل ندعولك

ربي يسرلك امورك

ام عبوده ما تزعفيش منا خرجنا على الموضوع................بصح راكي فتحتيلنا موضوع شاسع فتحنا فيه قلوبنا لبعضاتنا

عيدة نور الهداية · 2014-02-22, 18:12

يا اختي نخلة واش نقولك
شكرا شكرا شكرا شكرا ............احسست ان رسالتك كانت من القلب ونابعة من الصميم والله اول مرة تنصحني واحدة هكذا ,,,,,,,لدرجة انني تأثرت وبكيت من كلامك يارب يفتحلك ابواب الخير ويعوضك خير ان شاء الله و ينور طريقك
ساخذ كل نصائحك بعين الاعتبار ......................وسأواصل التواصل معك حتى استفيد منك احسست انكن صحبة صالحة ما شاء الله
.....................................رايحا ندير برنامج جديد في حياتي وان شاء الله يكون كلوا خير وتقرب الى الله
والله احبكم احبكم في الله دخلتم الى قلبي

نخله. · 2014-02-22, 18:46

اختي عايده...............احبك اله الذي احببتني فيه

ونتمنالك النجاح والتوفيق وصراحة اعتبرتك اختي الصغرى وحكيتلك من قلبي لانك فكرتيني في شبابي ملي كنت متخرجه جديده

وراكي بديتي بدايه موفقه ان شالله ربي يتقبلها منك وتفكري كلشئ ديريه خالص يعني انويه لربي اذا كانت نتيجه ايجابيه ليك فلله الحمد

واذا ما عجبتكش النتيجه اكيد كاين سر ربي دايرو رح تكتشفيه يوما ما واكيد اذا اخلصتي النيه رح يكونك الاجر والثواب احسن نتيجه

اي شئ رانا لبعض كانا اخوات عند ربي

عيدة نور الهداية · 2014-02-22, 19:00

ربي يحفضك حبيبتي واختي نخلة ............وشكرا جزيلا على ردودك ................. انا الان اقوم بتحضير الفرض الذي اقدمه للتلاميذ غدا ..............وسأحتسبها كما ذكرتي عبادة ...............................ان شاء الله سأتواصل معك دائما ....دمتي اختي الكبيرة

نخله. · 2014-02-22, 20:12

ربي يعاونك اخت عايده فكرتيني في فروض شهر فيفري تع وليدي غدوا ان شالله نبدا نبحثلو ونطبعهملو يراجع فيهم

انا وجدت لعشا وخملت شويا الخزانه اللي تحت الدروج مخبيه فيها المصروف وراني نسنى فابو ولادي يجي نتعشاو وندوش الولاد باه يرقدو

ام عبوده وين رحتي وخليتينا توحشناك

omassil81 · 2014-02-22, 20:38

يعطيك الصحة يا ام عبودة شاطرة بصح السلة هربتني نصيحة ماتخليش الملابس تتراكم الحاجة لي تشوفيها ماشي متسخة بزاف ديريها بيدك ماتديش منك الوقت باي باي حنونة

ام عبودة · 2014-02-23, 08:31

هاني وليتلكم حبيبااات قلبي وياخي ما طولتش عليكم ههههههه
عجبتوني بزااااااااف نخلة ماشاء الله عليك وراك صغيرة الله يبارك انا عاودت الbacمرة واحدة وقريت اربع سنين في الجامعة نظام قديم كملت على 23 وكيفك نموووت على الخياطة والكروشي نحط فيه العجب غير زوجت حرم عليا الراجل الخياطة والكروشي تعبني من عينيا
والخدمة على جالو حبستها والحمد لله ما نيش نادمة على اي حاجة ربحت زوج راااااائع رغم العريبة واش دايرة فينا ههههههه
نهى حتى انا توحشتك بزاااف تقول عندي عام وتصدقي والله العظيم غير زوجي رايح اليوم الى العاصمة وقالي من اللليل الصباح تروحي معيا قوتلواا والو ما نروحش فرحت كي رجعلي ايبادي باش نخلف واش فات هههههه راااهو يمشي في العروووووق
كاين واحدة اثرت فيا بزاااف ياسمين انا نقلك من عندي روحي اجري على عمرك حالتك لازمها رقية شرعية جداااااااا والله انا صراتلي في العام الثاني من عرسي
كي سكنا هنا كنت الايام الاولى ناشطة فب التفراش والطياب ومن بعد بديت نمرض ونفشل نخدم من فوق قلبي مرات الماكلة تحترق ومرات ننسى الغاز........
لحقت الى درجة وليت نعاف نمشط شعري او نتحمم ودائما تجيني افكار علاواااش علاواااش ندير هكذا وهكذا ولات افكار سلبية المهم حكايتي حكاية
وانا من قبل الزواج كان يظرب بيا المثل المهم خلاص تطورت الامور الى ابعد ما تتصوري درت رقيا شرعية لقيتو نفس قوية وسحر وتامني بربي لقيتو في دارنا كيما وصفونا الراقي والحمد لله من بعد هذاك تعلمت انه العين كاين منها والسحور وكل شي وتعلمت نحصن اولادي وزوجي ونفسي مليح

ام عبودة · 2014-02-23, 08:36

اختي عيدة مرحبا بيك معانا وكل شئ مكتوب ربي وفي كل استخيري وفوضي امرك لله فقط
شغلك ليس عائقا لتكوني نشيطة ومرتبة ومنظمة المهم الارادة
وشوفي رانا في قسم الدردشة عاملين لمة لحفظ السور القرأنية انا مشتركة في سورة البقرة والله غير روووووووووعة مع لبنات
والله يجيبك ولد الحلاااال

ام عبودة · 2014-02-23, 08:42

خياااتي رهم كملو البنتورة في الادارة يعني لازمني حملة ههههههه الحمد لله صورت الدنيا مقلبة ومن بعد نصورها نظيفة هههه مانخلي حتى حاجة ههههه
اسمحولي نروح نغسل الحوايج ونسيق ونمسح الغبراء ونولي
كي العادة النشاااااااااط شعارنا
قبل مانروح كاين اخت علقت على سلة الحوايج ههههه يا خيتيييييييي هذه ذاهي تاع يوم او يومين برك تاع الاسبوع تولي اربع سلل ههههههههههههههههه انا ولادي يبدلو بزاف وزوجي كل يوم وانا كل يوم ههههههههههههه انا غير نكمل الطياب نظربها بالدوش وتبخارة على الكيف ونبدل حوايج الكل ههههههههه وادي الصغير يلعب في الجنان احسبي كم مرة يلعب وكم مرة يوسخ هههههه
والزوج. هذيك عقليتو برك يحب يوميا يلبس حاجة عندو البارح نهار واليوم نهاار جديد ههههههه والشاقي في هذا كله الماااااااااااااااشينة هنههههه مسكينة
هيا تقدهلاو في ارواحكم الى الملتقى باذن الله

amina nourhanne · 2014-02-23, 11:02

حبيبتي ياسمين ندعى ربي يخفف عليك من هاد الحالة و ترجعي شطورة و ناشطة كيما كونتي لازم الارادة القوية و تدكري *لا يغير الله ما بقوم حتى يغيرو ما بانفسهم* لازم انتي نفسيا تحاولي التغيير ما تخليش دارك و حياتك تريب فوق راسك و انتي تشوفي الرقية هي اول الطريق القرآن و الذكر و التحصين الوصفة لكل شيء و ربي يجيبلك لي فيه الخير ختي*

نخله. · 2014-02-23, 11:13

صباح النور عليكم ربي يعاونك ام عبوده احرزي روحك من لابانتور اشربي لحليب راهي ريحتو تضر الروايا

ام عبودع انا ثاني زوجي ماحبش الكروشي بصح شاف لي كوموند يجوني بزاف وعاتباتو يماه قاتلو حرام عليك تدفن فن كيما هذا سيرتو انا نفش غلي فالكروشي راه يخليني مره على مره نتفنن

بصح عينيا ضعفو راني محبسه هاذ الشهرين منبعد نرجع كاش ما نخدم

انا اليوم درت لغدا وعجنت الخبز وفتحت وهويت الدار خرجت الغطاوات والفراشات وبالييت ماسيقتش نسيق مره فالسمانه برك

وزدت عجنه باه ندير المسمن بعد الظهر...لعشيه ان شالله نروح الوالده نديلها المسمن

غسلت طرشونات الكوزينه تع كل يوم و غسلت بيادن الزيت رح نرقد فيهم شوي خضر

وتعبت ما قدرتش نكمل ظهري يوجع فيا موالفه نخدم الصوالح بالسانتوره تع الظهر ومع الحمل ما نقدرش نديرها
ذرت نفرز شوي زريعه حبة الحلوى وسانوج تع الخبز هاذو مايتعبوش

وراني فتحت الميكرو نهدر بال***** مع خواتي فالخدمه وزوجي طبعا باه نقولو وش يجيب مصروف وما يشريش الخبز

نخليكم ونكمل مع زريعتي قبل ما تخمر الكسره

سلام

shaimaaa · 2014-02-23, 11:15

الله معكي ومعنا ومع كل أمهات وسيدات وبنات العرب اللهم آمين

ياسمين1990 · 2014-02-23, 11:58

السلام عليكم اخواتي
ام عبودة حابة ديرينا برنامج نمشي عليه ونحاول نطبق مع المجموعة باه نغلب نفسي والشيطان ونكون امام الامر الواقع
ونحس بلي عندي خواتات راهم يعمل نفس الشغل هكذا ندير الكوراج وننشط شوية
واسمحيلي علابالي بلي مشغولة ولكن هذا العمل احتسبيه صدقة جارية لكل وحدة حابة تغير نفسها الى الاحسن وتلقى الدعم من المجموعة
وشكرا للجميع

نهى اسطاوالي · 2014-02-23, 12:29

اما انا واش نقولكم نجري من ومن الحمد لله راني مازلت في عطلة امومة بصح نهار الخميس نبدا الخدمة درك نهبل من التلاميذ ونزيد ولادي في الدار معليه غير يقراو برك انا اصلا موالفة بالتمرميد والميزيرية تاع الخدمة مللي كان في عمري 21 سنة وانا نقري قريت نظام كلاسيكي ودخلت 5 سنين في عمري ودرك عندي 30 سنة بالضبط هههههههههههههههه وليت عجوز
اليوم والله تفنينت شوية صليت الفجر وعاودت رقد خطركش بنتي الصغيرة رقدتلي على الواحدة تاع الصباح نفحتلها تقعد تلعب المهم سيقت برك وطيبت الغذا وحطيت الحوايج يتشمخو نتغذا ونغسلهم والله راني حابة نبدا نلم القش في كراطن باه نلقاهم جاهزين للرحلة راهي مخوفتني
وماعنديش المعاونة بزاف امي قاتلي نجي نعاونك والله اعلم ادعيولي يالبنات شككتوني في روحي ههههههههههه وقيلا انا تاني ضربوني بعين خطركش مللي زيدت بنتي تفنينت ههههه وليت مانحبش نهتم بروحي خلاص ونتحجج بالوقت