الجزء 77 من واش طيبتي اليوم سيدتي **تحضيرات شعبان لإستقبال رمضان** - الصفحة 79

tokio hotel · 2014-06-09, 15:55

اختى ام اسلام رابيت بسينة انتاع القرعة كى شافوها تخلعو و قالولى اليوم انباتو بلا عشاء كى داقوها لحسو المول روعة و خفيفة و ساهالة انا درتها بالداند شكرا حبيبتى ربى يجعلها فى ميزان حسناتك
حبيبتى ام يسرى الرابط ما عنديش مى نكتبهالك من عيونى
رطل قرعة صدر دجاج زوج بصلات كبار معدنوس 4حتى 5 بيضات ملعقى كريمة جبن طرىشوية خمارة كسبر مرحى ملح وفلفل فى مقلات انا قليت الدند اولا و نحيتو و حطيت البصل فى مكانو يتقلا فتت الداند و زدتو للبصل و زدت القرعة رابى خليتهم تشربو ملح و كى طابو زدت الجبن بعدما برد شوية زدت البيض و المعدنوس و فرغت فى مول مدهون ومرشوش خبز مرحى و رشيت الخبز من فوق الحقيقة ما تقيدتش بالمقادير كترت القرعة و البيض حطيت 3 قيس ما يشد الغراتان فقط

lahna moka · 2014-06-09, 16:09

مساء الخيرات حبيباتي
راجعت و شفت كلشي بارك الله فيكم حراير بلادي
ريهام حلوتي الطيّوبة "أفطير أقسول" عندنا يسمّوه "ثِقَرِّيسِينْ" ممممممممم شحال نحبهم خااصة كي يطيح الثلج عندنا يمي يمي سلمت يداك
حبيت نشارككم كالعادة بتحضيراتي للعرس, اليوم عمّرت صحون الحلوى اللي رايحة نديرها مع القهوة , أما ليبوات قلت حتى نهار لخميس و نعمّرها

islam1aya · 2014-06-09, 16:14

لهنة يويويويويويويييييييييييييييييييييييييييييييييييييي ييي
هذه من عند اختك الكبيرة عائشة ام اسلام واية الدمعة طحتلي

islam1aya · 2014-06-09, 16:16

رانيا بصحتكم حنونتي مطرح مايسري يمري على قولت اخوتنا المصريين

lahna moka · 2014-06-09, 16:27

أم اسلام و آية بكّيتيني ربي يفرحك بولادك ان شاء الله , فرغي صندوق رسائلك حابة نراسلك
هاذي الدولمة تاع السردين اللي دارتها ماما ممممم بصح شكلها جا كي العصبان هههههههه شبعت ضحك على روحها ههههههه

tokio hotel · 2014-06-09, 16:30

g لهنة حبيبتى ربى يكمل لك على خير و الله غير شفيتينى و تفكرت الدى مضى فى عرسى درت كل شى وحدى و فيه مقولة عندنا انتاع لعجايز تقول الى تخدم فى نهار عرسها تبقى طول حياتها مشقية و حسب التجربة صح من هاداك النهار و انا نجبد ما نرتاحش خلاص
ربى يزين سعدك و يهنيك حبيبتىو كل شى رائع

مريم الاميرة · 2014-06-09, 16:36

السلام عليكم حباباتي توحشتكم مووووووووووووووووووت
كانت النت مقطوعة مالقغي مسلكين بصح ماكانش حتان شكبعنا شيكايات باه فراو المشكل و ان شاء الله تبقا هكذا برك
دخلت على الزغاريت تاع ام اسلام ل لهنة و الله غير الدمعة طاحتلي ربي يعينة حنونتي و يزين سعدك يا رب و الله تعبتي فوق الحق حبيبتي كون جيتي قريبة و الله ما نخطيك حتان تروحي لدار راجلك المهم او ما بقاش و تتهناي ان شاء الله حقا قولي لماماك الكفتة اممممممممممممم يعطيها الصحة
ام اسلام حطيتيلي الوصفة لي طلبتها و لا مازال حنونة اسمحيلي و الله ما راني مراجعة

مريم الاميرة · 2014-06-09, 16:39

يييييييييييييييييي نسيت باه نبارك لام انوس على الكوزينة ههههههههه
الف مبروك حنونتي و مبعد ان شاء الله نجيبلك الباروك

tokio hotel · 2014-06-09, 16:43

حبيبتى لهنة وصلتى رسالة و قيلا بالغالط

lahna moka · 2014-06-09, 16:45

مريومتي ليك وحشة على سلامتك حبوبة, بارك الله فيك على الدعوات الراااااااااااائعة و الله كلّي راكم معايا هدرتكم المشجّعة و دعواتكم تكفيني موااااااااح
حقا اليوم راني صايمة و فطوري رايح يكون شربة و فريت أملات و الحمد لله
رانيا حبيبتي ماشي بالغالط ههههههههههه هاذي ليك

oumibni · 2014-06-09, 16:56

سلام عليكم انشا الله تكونوا بخير ،

لهنة مبروك عليك ،

youyouyouyouyouyouyouyouyiiiiiiiiiiiiiiiiiiiiiiiii iiiiiiiiiiiiiiiiiiiiiiiiiiiiiiiiiiiiiiiiiiii

lyzzabel · 2014-06-09, 16:56

مساء الخير الشيراااااات صح فطوركم و قهوتكم
بغيت نبدأ بلهونتي الحلوة الغالية ماشاء الله حلويات رااااءعة و يعطيك الصحة على التحضيرات و التعب ربي يجازيك عليهم خير الجزاء و دعوات الخير راني ندعيلك بيهم دايما و تديهم تاني من عند الغاليات لي راهم معانا فالكوزينة و ربي يجعل سعدك خير منك يا رب هاذي يقولوها للعروسة و أمها في باريقو ههههه مين تروحي تعرسي معاهم في عرس تاع شيرة غادي تسمعي عجوزتك تقولها ربي يكمللكم بالخير و الصحة و الهنا و يجعل حياتكم دايما أفراااااااح يااااا رب ،، موااااااااح حقا بصحتكم دوامة السردين

ام هنيدة الله يبارك اطباقك تشهي يعطيك الصحة حبيبتي
رهووووومتي الطيبة ربي يخليك و يجازيك بالخير يا الكريمة و سلميلي على ماماك قوليلها وحدة صحبتي وهرانية تسلم عليك

ام اسلام يعطيك الصحة الكيك يشهي و يجذب الأطفال بارك الله فيك فرحتي ولادك ربي يفرحك بيهم

صبرينة ايمان مرحبا بيك معانا مشي غير من وراء الكواليس حبيبتي

صبريييينتي الغاااالية مواااااح ليك يا الزينة و بصحتك واش طيبتي ،، بصح فهموني على هاذ النسوبية مع صبرينة ايمان ولا اليوم ما نرقدش

بصحتكم كااااامل الشيرات ن ع جا يتقهوا ما قدرتش نكمل الردووووود اسمحولي مواااااااح

استغفر الله العظيم الذي لا اله الا هو الحي القيوم و أتوب اليه

islam1aya · 2014-06-09, 17:01

ام اميرة اسمحيلي والله غير مازال ان شاء الله اليوم في الليل نحطها والغد
ليزا على السلمتك ماشي انا الي درت الكيك ام راضية امواااح عليك

islam1aya · 2014-06-09, 17:02

بنات حبيت نشارككم بعض الصور لتحضيراتي الرمضانية اللهم بلغنا رمضان
درسة تع الطرشي لحمر بنتها هااااايلة

بديت نشري في الدجاج لانو رايح يطلع بزاف في رمضان
الصدر احتفضت بيه كامل باش نعملو باني او حاجات اخرى

جمدت فريز بطريقة روعة اذا حبيتو نحطلكم الصور والطريقة

ليزونشوا عندي مدة شهر ملي عملتهم راني ننزعلهم في الماء الي يطلقوه

حميصة طيبتها نصف طياب ورايحة نحطها في المجمد

اشريت الفريك واحتفضت به في علبة حديدية

بالنسبة للجلبانة بابا حنوني اشرالي ونقاوهالي هو ويما الحنينة كنروح في التشعبنية نجيب شوية منها
الطعام فتلولي 25 كلغ في المدية ام صاحب زوجي تبارك الله البركة الله غالب مانعرفش نفتل
اشريت دقيق رطب بن عمر هايل للمطلوع لكن الطبونة مكسرة خخخخخ
الفرينة عندي شوية ونزيد نشري
دقيق مولا بالميزان الخشن تع القلب اللوز مزال ماشريتش
الليمون والبرتقال جمدتهم
الثوم اشريت تع العولة 3ربطات وواحدة لرمضان يعني 4ربطات
الطماطم طلعت عندنا سعرها نار80الى 100دج مازال ماخدمتش منها للشربة
التوابل والعينة ووالمشمش والزبيب مزال ماشريتش نحب نشري العينة من فاميلي شوب بالبليدة اجيبو تع فرنسا هايلة الونشري ايضا من ثم الشومبينون والمايس.... الخ زعمة مكاش هنا خخخ عوايد برك وتحواس ونوع من التغييير
اللهم بلغنا رمضان

lahna moka · 2014-06-09, 17:05

أم ابني بارك الله فيك حبيبتي تسلميلي و أحلى زغرودة يعطيك الصحة
رانيا حبيبتي هههههههه ربي يعطيك ما تتمناي شوفي في امضائي راهو كاين اللي يحسب ههههههههه عرسي نهار السبت ان شاء الله
ليزابيل حلوتي الجميلة موااااااااااااح كبيرة ليك و بارك الله فيك على الدعوات الراااااااااااائعة كروعتك
أم اسلام و آية ربي يحفظك و بارك الله فيك على النصائح ربي يجعلها في ميزان حسناتك يا رب
حقا لبنات راني معاكم في التطبيقات غير اقترحو