الجزء 171 من واش طيبتي اليوم�� كوزينة اللمة والمحبة والبساطة ����

[ام هدول]

المشاركة الأصلية كتبت بواسطة حياة نور الدين

هدا عشايا والحمد الله دولمة كرنب وبطاطا سوتبي ام وليد والتشينة اللي لوكامن مكلتهاش اليوم تصرالي حاجة هههههه

كي دخلت دخل عشاك معيا حيوتة اممممممممممممممممممم ...راني نتعشى خخخخخخخخخخخ واي ليك التيشنة

[حياة نور الدين]

ام الاء ربي يحفظك حنونة كريمة اختي وبنت جود

ام هاجر انت ثان ربي يخليك ويفرحك حبيبتي

[ام هدول]

راجعت شوية تفركت الجاجة لمحمرة تع ام هاجر لي تسخف وتقول كولوني ....ولمحاجب المتنوعة لام الاء الحارة ولي ماش حارة ولمسمانت راكي دايرة حساب كل وحدة ..ربي يخليك
وفهت الوصفة الصعيبة تع زينب ...هههه عجبتني وتمنيت نطبقها ......
عشايا كا ن شفلوغ ....وسلطة ....بنان ولله الحمد

[حياة نور الدين]

هههههههه ام هدول بصحتك والتشينة هي المندرين خخخخخخ يخي هذا كان سؤالك

[RIMA.87]

السلام عليكم ،
عشايا اليوم حساءالخضر كان بقالي من البارح و طبقت كروكات البطاطا لكن زدت فيهم شوية شفلوور و حشيتهم بالجبن الطري و رافقتهم بصوص الطماطم جاااو روووووووووعة ،بساطة خفة و بنة ،مشكوووورة اختي حياة على الوصفة
اللهم ارزقنا شكر نعمك التي لا تحصى.
اللهم ادمها لنا نعمة و احفظها من الزوال

[ام طيري الجنة]

السلام عليكم و صح عشاكم حبيبات ألبي تؤبروني شو مهضومين هههه
جبتلكم عشايا الخفيف الضريف ( انا ماتعشيتش ريجيم راكم عارفين باغية ندير لاطاي ههههه )
[IMG][/IMG]
[IMG][/IMG]
البنات هذي وصفة بيسكوي بدون فرينة بالخبز اليابس يكون يابس مليح و ترحيه و تغربليه اللي تبغي تحارب التبذير و ما ترميش الخبز جربتها و جات هايلة( اخذتها من عند اخت يوتيوبوز جزائرية وسمها زوزو ربي يحفطها ) و كليناها كلها تخلطو هذ المقادير كيما اي بيسكوي و كي اطيب انت و شطارتك و امكانياتك في التزين انازينتها بشكولا ذايبة و سايلة اممم هذاك واش كان عندي هههه
[IMG][/IMG]
كملت الشقا و الغسيل نتاع الماعين و دوكا راني مع التخضير و التصحيح لذلك اسمحولي نروح خير من اللي نروح غدوة للتلاميذ بلا تصحيح و بلا تحضير هههه و اذا كملت راح ندخل صحة ايا يعطيكم الصحة اتهلاو في رواحكم و تهلاو في حيوتة راها مريضة و سيقو الكوزينة و غسلو المواعن انا الهربة تسلك بااااي

[كوثر التائبة]

هدا فطوري اليوم بانيني


وهدا عشايا رشتة



وهدي كسرة دارتها صباح تطبيقي لوصفة مطبخي الصغير خرجة روعة وخفيفة


سهرة ممتعة

[زينب 83]

مانزيدش ندخل عندكم في الليل ابدا هههه
انا مانكلش في الليل و انتزما قتلتوني
حياة عشاك يشهيييي باه حشيتي الكرنب؟ و كون تتكرمي تزيدي الطريقة خير و خير هههه
ريمة اممممم يعطيك العافية خفيف ظريف و شحال نحب الصور المقربة لي فيهم الجبن
ام نسرين بصحتم الحوت ما شاء الله
ام.هدول اهلا وسهلا طلبت منك وصفة في الكوزينة السابقة وين راهي ؟؟؟ههههه
ام و ابنة صح عشاك حبيبتي
كوثر الله يبارك في دوك اليدين يعطيك الصحة حنونة

هاذي وصفة الكريب و تصلح تاني بان كايك




تصبحن على خير غالياتي
في رعاية الله و حفظه

[حياة نور الدين]

ريمة يعطيك الصحة الصبيعات يشهوااااا من يديك حنونة بصحتكم وشكرااا لك على الثقة

امونسرين اممممم عشاك اللي نحبوا بصحتكم حنونة وربي يقدرك على الكاييات والتحضيرات حنونة
وهكاك زيري البنات راني عياااانة ههههههه زعما نزيد من عندي خخخخ

تصبحن على خير حباباتي نخليكم غدوة ان شاء الله يوم يكون مشرق وسعيد ومعمر هنا وخير

[ام هدول]

الاخوات لي سقساوني على طريقة الشخشوخة ....صورة التفاصيل المملة ...هاي ليكم اتفضلو معايا بسم الله
اولا ....تبلي السميد يكون من النوعية الجيدة فقط بالملح والما عاد ي تتحصلي على عجينة ماتكون ش طيرية بزاف لانو رايحة تطرى بالعجن ....تغطيها بكيس بلاستكي او ورق شفاف ..وتخليها ترتاح على قد ماترتاح تجيك ساهلة في العجن انا نبلها في الليل ونعجنها الصباح

[حياة نور الدين]

رجعت على جال كوثر وزينوبة

كوثر قهوة الصباح وفطورك وعشاك يشهوااااا بصحتكم هههههههه تفكرت الوحم يخاه عليك مهبولة خخخخ

زينب تطلب وصفتي من ممو عينيا حنونة
فورت اوراق الكرنب الكبار حتى دبالوا شوية
الحشو درت لحم مرحي ،كمشة ارز، كمشة جلبانة، قصبر رقيق، قلب الكرنب مقطع رقيق ملح، فلفل اسود، بصلة رابي وسنات ثوم رابي ،فلفل احمر،نعجن الحشو مليح
كي يبردوا الاوراق نعمر كرة من الحشو ونحطها ونلف كما حبة البوراك
في طنجرة نحط زيت وثوم وملح وفلفل اسود واحمر وكمون وملعقة طماطم مصبرة وحمص نقلي شوية وندير كاس ماء كي يغلي المرق نحط الحبات تاعي ونخليهم يطيبوا متكثريش الماء لانه الكرنب يطلق الماء خليه حتى تخثر الصوص

[oumelabedmh]

السلام عليكم.كيفكنم ان شاء الله تمام التمام.اختي حياة اليوم جربت خبيزات السلق جاو بنان يسخفو الله يبارك اولادي قلتلهم هادا كعك الارز كيما تاع الكوميك وكلاوهم ما بقى والو ربي يبارك فيك وفي عايلتك يتمم حنلك على خير.
كانت الاخت روضة سقسات على التقوس ونوييت نزيد مشاركاتي باه نقدر نراسلها في الخاص بصح قدر الله وماشاء فعل ماقدرتش للاشغال اللامتناهية اختي هدا عندو علاقة بنقص فيتامين دال
وممكن اسببه وضعيته داخل بطنك المهم انك تعرضيه للشمس وتعطيه الفيتامين دال حسب توصيات الطبيب وكاين تحليل تاع هاد الفيتامين باه تتاكدو بلي ناقص وكاين حالات فيزيولوجية مع يكبار الطفل ويمشي تروح اما بالنسبة للتقماط فاتاكدي اولا انو ما عندوش خلع ورك عند الولادة لانه التقماط يزيد الحالة واكيد الطبيب الاخصائي راه يفيدك احسن المهم اتبعيه
االاخت ام جوجو على سلامتك طهورة ان شاء الله راكي عندك معزة ربي الي يعلم بيها تفكريني في باتنة ونشم ريحتها في طيابك
توبة سلامي لك وربي يوفقك في دراستك
بعد اذنكن حابة نقول كلمة وان شاء الله ما تزعفوش مني خاصة الي كيفي من وراء الكواليس اخواتي في الله ما تنساوش كي تعجبكم حاجة تقولو ما شاء الله تبارك الله لان العين حق وحتى لو الوحدة ما تقصدش ونوصي نفسي قبل منكن لانو مرة صرات انو عضوة كانت تحط كيكات ماشاء الله ومن بعد مسكينة ولات تشكي انو حاجة ما ولات تصلحلهاو تترجى العضوات يقولو ما شاء الله والايامات هادي نشوفو ا بلي من اعمدة المنتدى يطيحو مريضات الوحدة تلو الاخرى والله قصدي الخير وآسفة على الاطالة والتدخل.ليلة طيبة

[ام هدول]

ثانيا ....ععند العجن ماتقطعيش لعجينة ديالك ...تدلكي بلاما تقطعيها .....منبعد تعملي حربوش..وتقطعي كرات بنفس الحجم

[ام هدول]

ثالتا ...تحطي كرات العجين داخل كيس بلاستيكي باش ماتنشفش العجينة وتبداي تطرحي بالوحدة وتحطي في قطعة قماش ةتغطيها حتى تكملي جميع الكراتملاحضة تطرحها رقيقة

[ام هدول]

رابعا ....كي تكملي تطرحها تسخني الطجين تاعك ... وتبداي طيبي فيها لكن غير تجمد برك ..من الجهتين مانتسايش تننقبيها ..باش ماتنفخش وديرلك لقشور وكل خبزة طيب تقصها ارباع وكي تكملي غطيها بقطعة قماش وخليها تبرد ...