|
في حال وجود أي مواضيع أو ردود مُخالفة من قبل الأعضاء، يُرجى الإبلاغ عنها فورًا باستخدام أيقونة ( تقرير عن مشاركة سيئة )، و الموجودة أسفل كل مشاركة .
آخر المواضيع |
|
|
أدوات الموضوع | انواع عرض الموضوع |
2014-12-12, 23:16 | رقم المشاركة : 91 | |||||||||
|
اقتباس:
عليه الصلاة والسلام ربي يحفظها ..سلميلي عليها بزّاااف ماشاء الله عليها رغم صغر سنّها ربي يحفظها وربي يبارك فيك اختي على حرصك ونعتذر على عدم الوفاء بالوعد اني نحط حلقة كل يوم ربي يقدّرنا ويثيتنا اقتباس:
اهلا اهلا اختي فانيي ربي يبارك فيك حبيبة والله فرحتوني ربي يفرخكم وش اسمها بنتك تنضمّ للمجموعة كاين يحيى وصبرين وام كلثوم ومهدي واخته وانيس ومريم... واخرين اولاد حباباتي مانعرفش اسماءهم ان شاء الله اللي تحكي لأولادها تشاركنا اسامي اولادها واسئلتهم وانطباعاتهم نورتيني حبيبتي الله يجازيك خير اقتباس:
وعليكم السلام ورحمة الله وبركاته سمّووورة ربي يخليك حبيبتي والله بعثتلك رسالة وكان صندوقك مملوء ربي يباركلك فيه وفي اخته ويوفقهم يااارب الحمد لله عزيزتي والشكر ليكك اللي وصّلتيلهم القصّة ربي يثبتنا عزيزتي ويقدّرنا على تربيتهم كما يحب ويرضى اقتباس:
اللهم امييين اجمعين .. وفيك اختي جازية جزاك الله خيرا اقتباس:
وجزاك عزيزتي على كلامك الطيب ودعواتك ربي يرضى علينا ...
|
|||||||||
2014-12-13, 00:05 | رقم المشاركة : 92 | |||||||||||
|
اقتباس:
سمّوووووورة اللهم اميييييييييييييين اجمعين ربي يبارك فيك اختي العزيزة والله دعائك وكلامك اثّر فيا بزاااف ربي يخليكم ليا ويباركلي في صحبتكم وربي يديم الاوقات الطيبة في بيتك حبيبتي ويباركلك فيه وفي اهلك يااارب اقتباس:
ربي يريّح بالك ياسمينتي يجازيك عني خير اني احبك في الله اقتباس:
اللهم اميييين اجمعيين اخجلتموني والله ربي يحفظكم وبوسة لصبرين ربي يبارك فيها يارب شكراااا ليك وليها اختي ام صبرين اقتباس:
اقتباس:
اقتباس:
العفو يحيوحي ربي يحفظك اقتباس:
اللهم امييييييييين اجمعين جزاك الله خيرا اختي العزيزة على جمييييل كلامك ودعائك ماشاء الله ربي يحفظها يارب ويباركلك فيها ويجعلها من الصالحين وش اسمها حبوبتي؟ اقتباس:
اهلا بيك اختي زينب تنورينا اكييييد
نعم عزيزتي جزاك الله خيرا على الاضافة الطيبة ومعلومة للي مايعرفهاش ربي يبارك فيك القصة اكيد للاطفال بدون تفاصيل ... والشائع انه حليمة السعدية هي مرضعة الرسول صلى الله عليه وسلم وثويبة كما جاء في الرحيق المختوم مارضعاتوش صلى الله عليه وسلم بزاف وراح للبادية فجزاك الله خيرا على المعلومة حبيبتي تنورينا بإضافاتك الطيبة في كل وقت |
|||||||||||
2014-12-13, 20:10 | رقم المشاركة : 93 | |||
|
اللهم بارك لصاحبة هذا العمل في أولادها ..و اجعلهم نعم الأبناء البارين و العباد الصالحين . |
|||
2014-12-14, 00:39 | رقم المشاركة : 94 | |||
|
مرحبا |
|||
2014-12-14, 13:25 | رقم المشاركة : 95 | |||
|
[quote=ابداع جزائرية;3992252095] عليه الصلاة والسلام ربي يحفظها ..سلميلي عليها بزّاااف ماشاء الله عليها رغم صغر سنّها ربي يحفظها وربي يبارك فيك اختي على حرصك ونعتذر على عدم الوفاء بالوعد اني نحط حلقة كل يوم ربي يقدّرنا ويثيتنا اللهم اميييين اجمعيين اخجلتموني والله ربي يحفظكم وبوسة لصبرين ربي يبارك فيها يارب شكراااا ليك وليها اختي ام صبرين [/color][/size][/font][/ce السلام عليكم و رحمة الله الله يسلمك اختي العزيزة ابداع بوسة صبرين وصلت شكرا على الكلام العطر ربي يبارك فيك وفي عائلتك لا داعي للاعتدار عزيزتي فكلنا نعي مشاغل الحياة الكثيرة متى سنحت لك الفرصة نحن بانتظارك و في غيابك نقوم بالمراجغة التثبيت و طرح بعض الاسئلة لاختبار درجة الاستيعاب والله المستعان ربي يقدرك على هده الحسنة الجارية |
|||
2014-12-14, 22:13 | رقم المشاركة : 96 | |||
|
الحلقة الخامسة عشرة
الحلقة 15 كان يا ما كان .... و ما يحلا الكلام إلا بذكر النبي عليه الصلاة و السلام وحبّوباتي دايما يقولوا ... عليه الصلاة و السلام سيدنا محمد عليه الصلاة و السلام و المسلمين الطيبين خلاص قرّروا يروحو للمدينة .. يعني يهاجروا من مكّة للمدينة ...ويبعّدوا على الكفّار الاشرار وكانوا يهاجروا بالشوية ..كل يوم يروحوا اخرين ... كل يوم يروحوا اخرين لكن سيّدنا محمّد مازال مايهاجرش معاهم حتّى يبعثلو ربي سبحانه سيّدنا جبريل عليه السلام باه يقولّه وكتاه يهاجر ... الكفّار الاشرار بداو يفيقو بللي المسلمين الطيّبين راهم يروحوا للمدينة كل مرّة .. فتفاهموا يتلاقاو ثاني وقالوا لازم نديروا خطّة شرّيرة ...ومانخلّيوهمش يروحوا مّالا تجمّعوا الكفّار الاشرار في واحد الدّار اسمها "دار النّدوة" وش اسمها حبّوباتي ...دار النّدوة .. و قعدوا يفكروا... مّالا واحد كافر شرير قالهم :احسن حلّ اننا نحبسو النّبيّ فردّ عليه واحد فيهم وقال:لالا صحابه هاذوك المسلمين مش راح يخلّيوه محبوس راح يهجموا علينا ..وراح يحرّروه ... فكّروا في حاجة اخرى ... فواحد آخر كافر ثاني قالهم: ..وعلاه ماتخليوهش يروح هو والمسلمين اللي معاه يخطيونا وخلاص قالوله :لالا مايصلحش ...راهواللي يعرفه يعود يحبّو ويتبّعه هكّا يعودوا صحابه بزّاف ..وراح يولّيوا اقوى منّنا وراح يجيوا يحاربونا لأنه احنا عذّبناهم وآذيناهم بزّاف مّالا نطق فيهم واحد شرّير اكثر منهم اسمه أبا جهل قالهم : انا... انا عندي فكرة احسن قالهم احسن حلّ نقتلوا هاذ الرسول ..ونختاروا رجال اقوياء من كل قبيلة نخيّروا راجل قويّ .. ويهجموا على دار الرسول ويقتلوه .. هكذا صحابه مايعرفوش يحاربوا كل الرجال الاقوياء من القبائل هاذوا كامل ومايقدروا يديروا فيها حتى شي ... الكفار عجبتهم الفكرة .... و اتّافقوا أنه مع يرقد سيّدنا محمّد يدخلوا عليه هاذوك الشباب الاقوياء بالسّيوف ويضربوه مع بعض... شفتوا ماما هذاك الشرّ اللي فيهم ...شفتوا ماما وش مش مليح الشّر ... سيّدنا محمّد عليه الصلاة والسلام ...احسن انسان في الدّنيا كااامل وأطيب واحد ..ماياذي لا انسان ولا حيوان ...ولا حتى شجر وكل همّه كان انّهم يسمعوا كلامه باه يدخلوا للجنّة ويمنعوا من النّار ... بصّح هوما ماكانش فيهم فايدة قلوبهم معمّرة شرّ ..ويتبّعوا غير كلام الشيطان الكفّار كانوا يحسبوا بلّي واحد لا شافهم ولا سمع خطّتهم .. لأنهم ماعلابالهمش بلّي ربي سبحانه يشوف .. ويسمع وش نديروا كاااامل ربي سبحانه علاباله بيهم وبخدايمهم ومش راح يخلّيهم ياذيوا سيّدنا وحبيبنا محمّد مّالا ربي سبحانه بعث سيّدنا جبريل عليه السلام باه يحذّر سيّدنا محمّد ...وقالّه :ماترقدش اليوم في بلاصتك الكفّار راهم مدايرين عليك خطّة باه يقتلوك وراهو جا الوقت اللي لازم تهاجر فيه للمدينة وشكون اللي كان عايش مع سيّدنا محمّد في داره ماما ؟ شكون اللي يقولّي ؟...نقولكم؟ سيّدنا عليّ سيدنا علي كان طفل كبير ..لكن كان مسلم طيب و قوي بزاف و شجاع و مايخاف حتى من حاجة سيدنا محمد قال لسيدنا علي بلّي جبريل عليه السّلام حذّره وقالّه ثاني بلّي لازم نرجّعو أي امانة عندنا تاع النّاس في مكّة قبل مانروحوا للمدينة.. سيّدنا محمّد كانوا يهدّدوه الكفار يقتلوه وهو يخمّم في حوايج النّاس يردّهم .. ..حبيبنا .. صلى الله عليه وسلّم مّالا قلنا اتجمّعوا هاذوك الكفّار الاقوياء قدّام دار الرسول صلى الله عليه وسلّم باه مع يخرج يصلّي الفجر يهجموا عليه.. وكانوا هازّين سيوف كبييرة علابالكم قدّاه كانوا؟ كانوا في اربعين شاب قويّ بصّح ربي سبحانه أقوى منهم.. مّالا سيّدنا علي راح رقد في بلاصة سيّدنا محمّد كان رضي الله عنه كما قلنا شجاااع ومايخاف حتى من واحد رقد في بلاصته وغطّى بالغطا نتاعه .. هاذوك الكفّار طلّوا لقاو واحد راقد ...حسبوه سيّدنا محمّد وعماهم ربي سبحانه عليه صلى الله عليه وسلّم.. كي خرج هكذا قدّامهم وماشافوهش ....سبحان الله ربي سبحانه خلاّهم واقفين كما الاصنام وهو صلى الله عليه وسلّم فايت بيناتهم لأنه سبحانه هو اللي خلق عينيهم ...وهو اللي بيدّه يخليهم مايشوفوا حتى حاجة فسيّدنا محمّد هز التراب من الارض ولاحه عليهم وقال من القرآن "فأغشيناهم فهم لا يبصرون " يعني ربّي سبحانه حطّ غطا على عينيهم خلاّهم مايشوفوا حتّى حاجة .... و مشى سيدنا محمد و خلاّهم واقفين كما التماثيل وكي فاقوا لقاو شعورهم بالتراب ..ولقاو واحد راقد ومغطّي في بلاصة سيّدنا محمّد... لكن ...اكتشفوا المفاجأة اللي هبّلتهم... سيّدنا عليّ هو اللي راقد لثمّة وسيّدنا محمّد صلى الله عليه وسلم ماكانش وين راح أمي؟ راح عند صاحبه ابو بكر كلنا نحبّو سيّدنا ابو بكر لأنه كان حبيب سيّدنا محمّد .... سيدنا أبو بكر حتى هو كان يوجّد في روحه باه يهاجر و كان يتمنى يهاجر مع سيدنا محمد و كان موجّد رضي الله عنه جملين قويين باه يسافروا بيهم سيّدنا محمّد كي راحله قالّه ربي سبحانه راهو بعثلي جبريل وامرني نهاجر للمدينة.. فسيّدنا أبو بكر راح يطيييير بالفرحة .. لأنه راح يهاجر مع سيّدنا محمّد عليه الصلاة والسلام اللي يحبّه اكثر حتى من نفسه فسيدنا محمد وسيدنا أبو بكر تفاهموا مع واحد الرّاجل من مكة باه ينعتلهم الطريق... وخلاّو عنده هاذوك الجملين وراحوا عند جبل بعيييد ....جبل اسمه جبل ثور ... و دخلوا في واحد الغار لثمّة ... بقاو في الغارهذاك 3 أيام .... لأنهم علابالهم بلّي الكفار مش راح يخلّيوهم وراح يقلّبوا عليهم الدنيا... وشكون كان يديلهم الماكلة ماما؟ أسماء بنت سيدنا أبو بكرو كانت هي اللي تدّيلهم الماكلة لثمة وماتخاف حتى من واحد ... الكفار الاشرار راح يدخلوا في عقولهم .. عياو يفهموا كفاه هرب منهم سيّدنا محمّد وكفاه ماشافوهش وكفاه مالقاوهش...؟؟؟؟ بقاو يفتّشو عليه في كل بلاصة ... حتى قالهم واحد منهم بالاك يكون في جبل ثور ... فراحوا يجروا لجبل ثور... سيدنا محمد و سيدنا أبو بكر لداخل في الغار .... و شايفين رجلين الكفار سيدنا أبو بكر خاف يعودوا يشوفوهم وياذيوا سيدنا محمد لكن سيّدنا محمد مكانش خايف لأنه علاباله بلّي ربّي سبحانه راح ينصره على الأشرار الكفار سيّدنا محمد شاف مع سيّدنا أبو بكر و قاله ما ظنّك باثنين الله ثالثهما معناها علاه تخاف ...وربي سبحانه معانا ..رانا على الحق ... و ربّي سبحانه راح ينصرنا... الكفاركانوا واقفين قدّام الغار بعد...و لو كان غير طلّو راح يشوفوا سيدنا محمد بصّح شكون اللي خلق عقولهم و عينيهم ؟ الله و ربي سبحانه اللي خلاّهم ما يقدروش يفكروا ولا يشوفوا اللي قدّامهم ورجعوا و هوما راح يطرطقوا من الحيرة والغيظ.. لأنهم عندهم 3 أيام يحوّسوا على سيدنا محمد وماهمش قادرين يلقاوه ومش راح يلقاوه علابالكم علاه امّي؟ لأنه ربي سبحانه ينصر النبي و ينصر الحق دييييما ويهزم الشّر مهما مهما كان قوي و خرج سيدنا محمد عليه الصلاة والسلام .... و سيدنا أبو بكر رضي الله عنه من الغار ... باه يبداو الرحلة ... للمدينة وش راح يصرالهم في هاذ الرحلة ؟؟؟؟؟؟؟ نشوفوا مع بعض ان شاء الرحمن في الحلقة الجاية |
|||
2014-12-15, 21:44 | رقم المشاركة : 97 | |||
|
السلام عليكم ورحمة الله وبركاته |
|||
2014-12-16, 08:17 | رقم المشاركة : 98 | |||
|
السلام عليكم |
|||
2014-12-16, 20:00 | رقم المشاركة : 99 | |||
|
الحلقة السادسة عشرة
الحلقة 16 كان ياما كان... و ما يحلا الكلام إلا بذكر النبي عليه الصلاة و السلام والقفوزين قالوا بأعلى صوت.... عليه الصلاة و السلام سيدنا محمد عليه الصلاة و السلام و صاحبه سيدنا أبو بكر خرجوا من الغار بعد ما ادّرقوا على الكفار الاشرار و ما قدروش يشوفوهم و لا يعرفوا بلاصتهم وكل مرة الكفاركانوا يخططوا وتبانلهم بلي راح ينجحوا بصّح ربي سبحانه يردّهم خاسرين... و يخلي المؤمنين الطيبين ... اللي يدعيوا ربّي سبحانه و يصلّيوا هوما الفايزين خرج سيدنا محمد صلى الله عليه وسلم و سيدنا أبو بكر و راحوا للراجل اللي يعرف الطريق للمدينة باه يساعدهميعرفوا الطريق و ثاني ادّاو معاهم خادم ...خادم كان يساعد سيدنا أبو بكر يعني في قدّاه كانوا ؟؟ سيدنا محمد عليه الصلاة و السلام و سيدنا أبو بكر و الراجل اللي يعرف الطريق للمدينة وخادم سيدنا ابو بكر يعني كانوا 4 رجالة الكفار في مكة كانوا راح يطرطقوا من الغيظ و مش حابّين يحبّسوا شرّ مّالا قالوا : لازم نديروا جايزة للي يقدر يعرف بلاصة سيّدنا محمّد داروا جايزة كبييييرة 100 جمل وراحوا كفار بزاف طمعانين في الجايزة يفتّشوا عليه صلى الله عليه وسلّم لكن الراجل اللي يعرف الطريق قال لسيدنا محمد و اصحابه : راني راح ندّيكم للمدينة من طريق جديد واحد لا يعرفه مّالا راحوا في اربعة على هاذاك الطريق لكن وش صرالهم؟ و هوما في الطريق شافهم واحد شرير وراح يجري لمكّة باه يقول للكفار و كان واحد من الكفار اسمه سراقة مع سمع الخبر و عرف بلاصة سيدنا محمد راح يجججري لداره ...و ادّا أسرع حصان عنده و راح يجري باه يلحق سيدنا محمد و يدّي هو الجايزة ... سراقة قاعد يجججري بحصانه بسرعة كبيييرة حتى كي قرب لسيدنا محمد و سيدنا أبو بكر بصّح علابالكم كي قرّب عندهم وش صرا ؟ مع قرّب سراقة بحصانه من سيدنا محمد ..... حصانه جا طاايح في الأرض ووقع وطاح منّه سراقة مّالا زرب ناض وزاد ركب على حصانه و جرى بأقصى سرعة.... و مع قرّب من سيدنا محمد ..... وش صرا ؟ زااااااد طاح من على حصانه زاد ركب سراقة على حصانه بسرعة و زاد جرا بأقصي سرعة ..... و مع قرّب ...رجل حصانه غاصت في الرمل وماعادش قادر يتحرّك.. سراقة خااااف .... و عرف بلّي سيدنا محمد صح نبي من عند ربّي سبحانه و عرف بلّي ربّي سبحانه يحفظ سيدنا محمد .... و عرف بلي مستحيل يحكم سيدنا محمد فسراقة عيّط لسيدنا محمد و قاله خلاص احبسوا مانيش راح نقدر نجري عقابكم مرّة اخرى... ومانيش راح نزيد نتبّع كلام الأشرار سيدنا محمد حبس و سراقة حكم حصانه و ركب عليه وراح لسيدنا محمد و قاله :الكفار الاشرار راهم مدايرين جايزة للي يقدر يحكمك و أنا خلاص مانيش راح نزيد نتبّعهم ولا نقولهم عليك حاجة فسيدنا محمد سامحه سيدنا محمد و سيدنا ابو بكر كملوا الطريق و هوما في الطريق شافوا خيمة وكانت واقفة قدّمها مرا كبيرة ....اسمها أم معبد راحوا عندها و سقساوها : كشما عندك حليب ولاّ لحم نشريوا عليك؟؟؟ قالتلهم :ماعنديش لكن لقاو عندها معزة ضعييييفة و مش قادرة حتي تاكل ..... و قاعدة قدّام الخيمة سيدنا محمد سقسا أم معبد : المعزة هاذي تدير الحليب ؟ قالت له : لالا راهي ضعيفة بزااف و مفيهاش حليب سيدنا محمد سقساها : نقدر نحلبها ؟ فقالتله :جرب بصّح راهي ضعيفة و مهما نحلبها ماينزل منها والو سيدنا محمد طلب صحن كبير .... و بدا يحلب في المعزة وسبحان الله نزل منها حليب بزاااااف بزاف وكلهم شربوا منّه حتى خلص الصحن الكبير وام معبد واقفة حااايرة سيّدنا محمّد زاد هز الصحن الفارغ وبدا يحلب في المعزة وزااااد عمّر هذاك الصحن الكبير .. وادّاهولها وقاللها هذا ليك ومشا هو واصحابه... وأم معبد باقية حااايرة... واقفة تشوف فرات كفاه معزتها الضعيييفة اللي ماتاكل ماتجيب حليب تجيب الحليب هذا كااامل؟؟؟؟؟؟ كاينة حاجة عجييييبة أم معبد ما كانتش تعرف بلّي هذا سيدنا محمد ... و بلّي ربي سبحانه كان يخلي بركة في كل بلاصة يكون فيها سيدنا محمد شوية هكا ...جا راجل أم معبد ...وشاف الصحن هذاك مليان سقساها منين هاذ الحليب؟ واحنا المعزة نتاعنا ماتجيبش خلاص الحليب فحكاتله الحكاية .... قالها زوجها ...راني عرفته خلاص هذا اكيييد النبيّ اللي يقولوا عليه في مكّة... ولوكان نشوفو نسمع كلامه ونتبّعه في الشي اللي يقول عليه سيدنا محمد و أصحابه كمّلوا طريقهم ... وخلاص... قربوا يوصلوا المدينة وصلوا مكان اسمه قبااااء .... وش اسمه ؟ قباااااء و بناوا مسجد .... وش اسمه؟؟؟ مسجد قبااااء و منبعد كملوا طريقهم حتى كي وصلوا المدينة و لثمّة.. كان كل المسلمين الطيبين يستنّاو .. يستنّاو في سيدنا محمد ...اللي يحبّوه أكتر من النّاس كااااااامل سيدنا محمد اللي ربّي سبحانه اختاره باه يعلم الدنيا كاااامل يعلمها الخير و ينهيها على الشر باه يكون جزائهم الجنّة وأخييييييييييرا ناس المدينة الطيبين شافوا سيدنا محمد جاي من بعيد كانوا فرحانين ..... فرحانييييين بزااااف و عيّطو لبعضاهم وراحوا يجريوا يلاقيوه صلى الله عليه وسلم هو واصحابه أخيرا ! أخيرا ! سيدنا محمد وصل المدينة أهل المدينة قالوا نشيد جميييييل كي شافوا سيدنا محمد قالوا: طلــــــــــــع البــــــــــــدر علينــــــــــــا مـــــــــــن ثنيــــــــــــات الــــــــــــوداع وجــــــــــب الشـــــــــــكر علينـــــــــــا مـــــــــــا دعـــــــــــــا للـــــــــــــه داع و كل واحد من المسلمين قعد يجبد في الجمل نتاع سيدنا محمد عند داره وكل واحد باغي سيدنا محمد يجي لداره و يعيش معاه لكن سيدنا محمد قالهم خلّيوا الجمل و ربّي سبحانه راح يخلّيه يحبس عند المكان اللي راح نعيش فيه فكلهم سمعوا كلام سيدنا محمد و بعدوا على الجمل وبقى يمشي ....يمشي ....يمشي ...حتّى لوين ؟؟؟ سبحان الله بقا الجمل يمشي يمشي حتى حبس عند دار اخواله يعني خاوت أمه آمنة بنت وهب و الجمل قعد في الأرض... فعرفوا بلّي هذا هو المكان عند دار أبو ايوب أبو ايوب الأنصاري ... هذي هي الدّار اللي عاش فيها سيدنا محمد .... و قدّام هاذ المكان بنا سيدنا محمد و المسلمين مسجد .... مسجد الرسول باه كل المسلمين يصلوا فيه وبنا ثاني بيت باه يسكن فيه سيدنا محمد فهّم المسلمين بلّي راهم كامل خاوة المسلمين من المدينة (الأنصار) ولاّ المسلمين من مكة (المهاجرين) ... كلهم خاوة والمسلمين من أي مكان .... خاوة ينتهلاّو في بعضاهم و يعاونوا و يحبّوا بعضاهم فكل مسلم عنده حاجة يقسمها مع اخوه وكانوا ثاني معاهم يهود في المدينة فسيدنا محمد قال لليهود بلّي راهم في أمان إذا قعدوا مهنيين رواحهم وماياذيوش المسلمين سيدنا محمد يعلم الناس دايما الاخلاق اللي ربي سبحانه يحبهم يكونوا عليها اللهم صل و بارك علي سيدنا محمد |
|||
2014-12-16, 21:48 | رقم المشاركة : 100 | |||
|
بارك الله فيك اختي ابداع وبارك لك في وقتك واولادك واليك مقطع مهدى لمريومة من ابني في التحظيري قالي اكتبيه لها |
|||
2014-12-18, 19:11 | رقم المشاركة : 101 | |||
|
الحلقة السابعة عشرة ان شاء الله
الحلقة 17 كان يا ماكان .... و ما يحلا الكلام إلا بذكر النبي عليه الصلاة و السلام ....عليه الصلاة و السلام أخيرا وصل سيدنا محمد للمدينة ....البلاد الباااااهية و كل المسلمين الطيبين اللي كانوا في مكة... هاجروا كما سيدنا محمد للمدينة فسمّاهم سيدنا محمد المهاجرين واهل المدينة المسلمين كانوا فرحانين بزّاف كعاد سيّدنا محمّد راح يجي بلادهم ... وكعاد خاوتهم المسلمين نتاع مكّة ثاني راح يجيو عندهم .. وكي جاو عندهم عاد كل واحد من المدينه حاب يفرّح خوه اللي جا من مكّة ويعاونه بالشي اللي عنده على هاذيك أمّي سمّى سيّدنا محمّد أهل المدينة الأنصار لأنهم نصروا الحق.. وأخييييرا المسلمين عادوا عايشين في امان بعييييد عن أذى الكفار الأشرار لكن وش تبانلكم أمي؟ هل كل اللي في المدينة مسلمين طيبين؟؟؟ لالا حبّوباتي ... المدينة كان فيها اليهود و المنافقين شكون هاذو؟؟ اليهود كانوا ناس ربّي سبحانه بعثلهم زماااااااان نبي اسمه سيدنا موسى و سيدنا موسى قالهم زمان.. كي يختار ربّي سبحانه سيدنا محمد اسمعوا كلامه ...لأنه نبي وقالهم على اسمه و شكله و صفاته يعني هوما كانوا عارفين بلّي ربي سبحانه راح يختار نبي باه يعلمهم الحق و كانوا ديما يقولوا للناس اللي في المدينة احنا راح نامنوا بالنبي اللي راح يبعثه ربي سبحانه قبلكم ونحابوكم معاه لكن علابالكم وش صرا أمي؟ مع عرفوا بلّي ربي سبحانه اختار نبي خلاص ... قالوا لااااااالا ...أحنا ماناش راح نامنوا بيه ولا راح نسمعوا كلامه وعلاه ؟؟؟؟ قالوا احنا كنا باغيين ربّي سبحانه يختار نبي من اليهود احنا باغيين واحد مننا ...واحد من اليهود وعلاه النبي مايكونش منّا؟؟؟؟ تصلح امي واحد يقول هاذ الهدرة؟؟؟؟ لالا ماتصلحش.. ربّي سبحانه وحده هو اللي يختار شكون اللي لازم يكون نبيه ... و ربّي سبحانه برك اللي يختار شكون اللي يعلم الناس الحق مش هوما اللي يختاروا لأنّه ربّي سبحانه أعلم منهم بكل شيء هاذوا هوما اليهود هوما و المنافقين كانوا أشرار و المنافقين هاذوا هوما اشرّ الناس علاه؟؟؟ لأنّهم يقولوا لبعضاهم هيّا نديروا رواحنا ولّينا مسلمين.. ونديروا ارواحنا اصحابهم ..ونتمصخروا بيهم وكي نعرفوا اسرارهم نروحوا نقولوها لليهود الاشرار.... ونديروا رواحنا نصلّيوا ...قداّمهم برك... بصّح في الحقيقة ماهم مسلمين ماهم يصلّيوا ماوالوا هاذوا هوما المنافقين... هاذوا هوما الناس اللي مش ملاح في الدنيا كااامل وحتى اسوأ من الكفّار ...وراح يكونوا في أسوأ مكان في النّار ضركا عرفنا شكون اللي كانوا عايشين في المدينة : المسلمين الطيبين: مهاجرين و أنصار و كان معاهم اخرين أشرار : اليهود و المنافقين و راح نكمّلوا وش اللي صرا بيناتهم في المدينة في الحلقة الجاية ان شاء الله صلّوا على حبيبنا .. اللهم صل علي سيدنا محمد |
|||
2014-12-18, 23:19 | رقم المشاركة : 102 | |||
|
السلام عليكم و رحمة الله |
|||
2014-12-20, 08:13 | رقم المشاركة : 103 | |||
|
السلام عليكم |
|||
2014-12-23, 20:37 | رقم المشاركة : 104 | |||
|
السلام عليكم ورحة الله تعالى وبركاه |
|||
2014-12-23, 21:25 | رقم المشاركة : 105 | |||
|
السلام عليكم |
|||
الكلمات الدلالية (Tags) |
السيرة للأطفال |
|
|
المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى
المنتدى غير مسؤول عن أي إتفاق تجاري بين الأعضاء... فعلى الجميع تحمّل المسؤولية
Powered by vBulletin .Copyright آ© 2018 vBulletin Solutions, Inc