الجزء 1 : كُوزِينَةْ الأَكْلْ الصِحِّيْ ........... مع زُخْرٌفَةٌ

[zokhrofa]

المشاركة الأصلية كتبت بواسطة شمس بريكة

موضوع هايل و طليتو على قلبي شحال وانا نحوس على موضوع هكذا
انا راني في الشهر الثامن من الحمل وما وليتش نتقبل اي ماكلة معدتي توجعني و الحريق
حشاكم ليي ناكلها نرجعها وليتنقصت الماكلة خلاص و وليت مانشبعش ونحس جسمي فاشل ماذا بيا تعطوني كاش اكلات يكونو صحيين يفيدوني ويفيدو البيبي بالفيتامينات و بالطاقة و يشبع و ما يخلوش معدتي تتقلب
بارك الله فيكم

اهلا اهلا أختي شمس ربي يحفظك و تسلكي على خير

اختي هذاك الحريق المشكل تاعو ما عندو حتى علاقة بالأكل صحي ام لا

المشكل هو انو عضلات المرأة يترخاو اثناء الحمل لكي توساع البطن و بما أنو المعدة عضلة هي أيضا تترخى و تولي ما تتغلقش بعد ما تسرطي الاكل كي يوصل ليها و هي تكون تهضم تطلع الانزيمات الى الانبوب البلعوم و تحرقو خاطش ربي سبحانو دايرلنا هذاك البلعوم لا يحتمل تلك الانزيمات

لذلك النصيحة الوحيدة لي تفيدك هي انك تأكلي الكمية متقسمة على عدة لقمات يعني كل 2 سا تاكلي ربع الطبسي لي موالفة تاكليهي في غضون 20د فقط

اذا على 8 كولي 10 كولي ربع و على 12 و على 2 تاع العشية ثم على 4 ثم على 6 ثم على 8 و خلاص حبسي الاكل و ارقدي بعد 2 ساعة من الوجبة الاخيرة

بكمية جد صغيرة بحيث ما تفوتش 10 لقمات المهم تكون اكل مفيد مثلا 8 صباح تمر

10 حبة برتقال صغيرة او نصف وحدة كبيرة

12 خضر و سمك من الاحسن ما تاكليش اللحوم الحمراء لأنها تحتاج هضم كبير و اذا تشهيتيه من الاحسن يكون هو فقط يعني على 12 تاكلي قطعة لحم صغيييييرة

على 2 مساء تاكلي خضر الطبق

على 4 فاكهة بكمية صغيرة

على 6 عصير منعش او تمر

على 8 مساء حاجة خفيفة مثلا خضر مفورة على شكل سلطة لكن بدون بطاطا و بدون ارز

و اذا حبيتي حاجات ملاح من الاحسن الاكل تاعك يكون عبارة عن سوائل في هذه الحالة مراحش كامل تنضري يعني راح تعاوني معدة ديالك على الهضم السريع و بالتالي ما تنضريش

نتمنى نكون عاونتك

[جهينة اليقين]

السلام عليكم الي سالت على القراتان انا عندي بلا تاع زجاج بالغطاء نتاعو يعني يطيب لي مليح وعلى ذكر الطياب يوصي الدكتور محمد الفايد بالطبخ البطيء والابتعاد عن الكوكوط ما امكن والطياب يكون في الطين او الاينوكس او الستالس ونقصي للناروخليه يطيب في غرضو
وكذلك الابتعاد عن المشروبات الغازية تماما وتعويضها بصنعها في البيت احسن
ويوصي النساء بعدم الاكثار من اللحوم والدواجن خاصة لانها تحدث لخبطة في الهرمونات وتكون عرضة لعدة امراض كالغدة الدرقية والعقم والسرطان عافانا الله واياكم

[zokhrofa]

هااااااااااا جهينة أوّل مرة نشوف وحدة كيما انا تبع محمد الفايد ههههه

ربي يسترك على المعلومات انا هبلت عائلتي بيه

و تعرفي بدات العدوى تنتقل الى اهل زوجي الحمد لله راهم بطلو المشروبات الغازية

في البداية انا بطلتها عندي 2 عام و من بعد زوجي عندي اقل من شهر و الان اهل زوجي

[zokhrofa]

جواز القرنون بالباطاطا



الطريقة :

تقلي البصل في الزيت

تضيفي القرنون

تضيفي الباطاطا

تضفي ملح + كركم + راس حانوت + قرفة عود + فلفل اسود

تخلي الكل يتقلى مليح

من بعد تمرقي بالماء و تخلي الطاجين يطيب في عقلو حتى تنقص المرقة و تولي خاثرة ماشي حتى تنشف هههه

و من بعد افرمي المعدنوس و ارميه من الفوق و اغلقي الطنجرة و طفي عليها

يعني ما تخليش النار بعد ما تضيفي المعدنوس

بعد 15د سقي الطاجين في طبسي و شبحيه بالليمون

بالصحة و العافية

[zokhrofa]

و هذا عصير صحي 100ب 100


راح نعطيكم السر ديالو ان شاء الله تجربوه في أقرب فرصة



https://www.djelfa.info/vb/showthread...post3996797391

[ام احمدي]

بارك الله فيك حنونة زخرفة وكامل العضوات على الموضوع الراءع وما يحمله من نصاءح وبداءل ووصفات صحية
حنونة من نهار حطت الاخت نظن اريام موضوعها يشبه لهدا حاولت نغير نظام غذاءنا والحمد لله لكن الموضوع ملقاش تفاعل وراح وان شاء الله هنا يبقى ويكون تفاعل اكثر وتاني موضوعك تاع الديتوكس شجعني باش نواصل بلا ما ننسى نصاءحك الراااءعة

[ام احمدي]

حنونة انا كل صباح منين نوض نشرب كاس ماء دافء على الريق سمعت بلي يخلص الجسم من السموم ومن الاحسن يكون فيه شوي ليمون معصور
القليان تقريبا مرتين او3 في الشهر وندير تاع الفور االا اذا كنت مزروبة نقلي
لي سالي مرة في الشهر يعني بيتزا ولا برغر ولا فطيرو ولا ......
الخيز نقصنا من المشري بزاف والا كليناه ناكلوه في النهار
حنا من عشاق زيت الزيتون الحمد لله هههه
نحاول ساعات نطيب بيه لكن للاسف غالي لهدا ندير الزيت النباتي لكن بكمية قليلة
الحلويات مرة في الاسبوع
وربي يهدينا ان شاء الله ويرزقنا الصحة والعافية

[امّ اياد]

مس الخير كتبت رد ولقيتو مفاتش
زخرفة يعطيك الصحة والله يبارك زواج يشهي نموت عليه هو والبطاطا فالكوشا بصح زوجي كن متوليش بطاطا مقلية ميدورش بيها
وبصحتك العصير درك نضرب عليه طلة
هداك نهار قريت على فوائد عصير الجزر خدملي فالراس قلت بلاك نولي نديرو نفطر بيه اذا عجبني
اليوم درت غداء عدس الاحمر بصح معجبنيش اول مرة نديرو والفت بالعدس الاخضر

[امّ اياد]

ام حمدي حتى زيت نباتي ومعندو مخاصو هي المهم نبعدو على دهون المهدرجة كيما زبدة ودهان

[امّ اياد]

زخرفة هدبك تاع بصل يخضار مصراتليش صراتلي مع ثوم مرة خضارلي يصرالو كمهاك كي تولي فيه وحد المادة بكثرة نسيت سماها

[البحر الصافي]

السلام عليكم ورحمة الله وبركاته
زخرفة الف الف مبروك افتتاح هذا الموضوع فكرة هااايلة
ونقلك اكلك رائع يعطيك الصحة يبان بنيييين
سلامي للاخوات الفضيلات ماراجعت والو شفت الموضوع دخلت

[zokhrofa]

المشاركة الأصلية كتبت بواسطة ام احمدي

بارك الله فيك حنونة زخرفة وكامل العضوات على الموضوع الراءع وما يحمله من نصاءح وبداءل ووصفات صحية
حنونة من نهار حطت الاخت نظن اريام موضوعها يشبه لهدا حاولت نغير نظام غذاءنا والحمد لله لكن الموضوع ملقاش تفاعل وراح وان شاء الله هنا يبقى ويكون تفاعل اكثر وتاني موضوعك تاع الديتوكس شجعني باش نواصل بلا ما ننسى نصاءحك الراااءعة

هاااا هاذي شهادة نعتّز بيها

مليح بديتيه الديتوكس و لا مزال ؟

ان شاء الله يكون التفاعل برك ما نعرف اذا مليح كي راه في هذا القسم او نغيرولو المكان واش رايكم ؟

[zokhrofa]

المشاركة الأصلية كتبت بواسطة ام احمدي

حنونة انا كل صباح منين نوض نشرب كاس ماء دافء على الريق سمعت بلي يخلص الجسم من السموم ومن الاحسن يكون فيه شوي ليمون معصور
القليان تقريبا مرتين او3 في الشهر وندير تاع الفور االا اذا كنت مزروبة نقلي
لي سالي مرة في الشهر يعني بيتزا ولا برغر ولا فطيرو ولا ......
الخيز نقصنا من المشري بزاف والا كليناه ناكلوه في النهار
حنا من عشاق زيت الزيتون الحمد لله هههه
نحاول ساعات نطيب بيه لكن للاسف غالي لهدا ندير الزيت النباتي لكن بكمية قليلة
الحلويات مرة في الاسبوع
وربي يهدينا ان شاء الله ويرزقنا الصحة والعافية

الله يبارك ما تخافيش مع الوقت راح تشوفي انو حتى العائلة تاعك تتأثر بيك

انا هكذا درت عندي عامين ملي حبست المشروبات الغازية هاذا وين زوجي عاندني

يعني الخلاصة لازم مثابرة هههه و جهد كبير

راكي تعرفي طريق الحق معمر شوك و طريق الضلال معمر ورد ولا لالا ؟

[zokhrofa]

المشاركة الأصلية كتبت بواسطة امّ اياد

مس الخير كتبت رد ولقيتو مفاتش
زخرفة يعطيك الصحة والله يبارك زواج يشهي نموت عليه هو والبطاطا فالكوشا بصح زوجي كن متوليش بطاطا مقلية ميدورش بيها
وبصحتك العصير درك نضرب عليه طلة
هداك نهار قريت على فوائد عصير الجزر خدملي فالراس قلت بلاك نولي نديرو نفطر بيه اذا عجبني
اليوم درت غداء عدس الاحمر بصح معجبنيش اول مرة نديرو والفت بالعدس الاخضر

اهلا معليش راني كتبت موضوع على لي يروحلهم الردود هههه ما نعرف اذا شفتيه

المهم نصيحة سريعة كي تعرفو رواحكم حا تكتبو حاجة كبيرة من الاحسن قبل اعتماد الرد ديرو كوبيي في سبيل الاحتياط

نولو لموضوعنا معليش طيبيه كيما ديالي و دخليه يتحمر من الفوق برك فالكوشة راح تشوفي يعجبو

انا ولا مرة جاني في بالي ندير تاع الجزر جربيه ههههه وقوليلي نعاندك

العدس الاحمر من بعد نعطيك طريقة يجيك بنين لازم نشريه

[zokhrofa]

المشاركة الأصلية كتبت بواسطة امّ اياد

ام حمدي حتى زيت نباتي ومعندو مخاصو هي المهم نبعدو على دهون المهدرجة كيما زبدة ودهان

صح كيما راكي تقولي

زيت نباتي اضراره كي يفوت 180 درجة يعني في القلي

لكن كي يتخلط مع الماء ماراحش يفوت 100 درجة يعني ما يتحرقش و ما يوليش سام

اذا ما تخافوش كي تطيبو بيه فقط زيدو الكمية من الماء