موضوع مميز طبخ الأعراس - الصفحة 7

بصيرة2 · 2014-10-08, 15:42

ربي يحفضك حبيبتي ويعطيك قد تعبك وكلش راني سجلتو البربوشة يعني الكسكسي احنا في الشرق نقولو البربوشة
وبالنسبة لعود القرفة فعلا لازم الوحدة تقسمو انا خطرة حليت عود قرفة لقيتو مدود حاشاكم

روح مراد · 2014-10-09, 10:08

zصدفات
نعطيلك الطريقة اللي رايحة تكيلي بيها نهار تكوني قاعدة و رايحة طيبي شربة فرميسال في الدار طيبي بالكيل مثلا القدرة نتاعك العبر نتاعها كاس فرميسال و الديها هي الميزان من بعد كيلي القزان نتاعك شحال يرفد من قدرة مثال
القدرة منتاعك توكل 5 أشخاص
و انت عندك 100 شخص رايحة تكيلي 20 قدرة و تفرغيها في القزان تشوفي العبر نتاع الماء وين يلحق في القزان و من بعد نكيلو 20 كاس فرميسال
و مع الوقت تولي تعرفي بمجرد ما تحركي إذا تزيدي أم لا

بصيرة
أنتوما في الشرق الطيبو كسكسي مرقة حمرة
الفكرة عندكم في بنة الكسكسي الأحمر هو في ترقاد اللحم في البداية
أحكمي 15 قطعة لحم أو دجاج ديريها في طبسي كبير
ديري في طبسي آخر مغرفة عكري حلو + الملح+ الفلفل الأسود + 2 ملاعق طماطم مصبرة و 3 مغارف أو 4 زيت و خلطي الكل و فرغي على اللحم و خلطي مليح باش يدخل فيه الخليط و خليه في الثلاجة
إذا كنت مزروبة خلطي و طيبي مباشرة
سكرفجي 2 حبات بصل كبار و حطيهم في القدر و فرغي اللحم عليهم و 2 حبات طماطم مرحية + نصف عود قرفة و خلي الكل يتقلى على نار خفيفة لمدة 15 إلى 20 دقيقة من بعد مرقي بالماء المغلي
إذا كانت عندك الحميصة مشمخة زيديها مباشرة كي تمرقي إذا عندك حميصة طايبة زيديها في الأخير
بالنسبة للكسكس فوريه عادي فوق اللحم
من بعد كي يطيب دهنيه
بالنسبة للخضر غير يطيب اللحم نحيه و غطيه جانبا و ضيفي الجزر هو الأول
الخضر تقدري ديري الجزر + القرعة
أو القرعة + لفت
أو الجزر و القرعة و اللفت
كاين اللي يضيف حتى الخرشف بالصح ماشي للعرضات للكسكس اللي نطيبوه للدار
الميزان على حسب واش رايحة الديري
مثلا 4 حبات جزر + 4 لفت + 4 قرعة أو 3 حبات من كل شيء كل واحد كيفاش يحب المرقة نتاعه
باش تعرفي القيس نتاع المرقة لازم تكيلي بالغراف
كل طبسي ديريلو 2 غرارف و من بعد زيدي للاحتياط

صدفات · 2014-10-09, 13:50

شكرا روح مراد على الفكرة هي معقولة ونقدرو نطبقوها على جميع الأطباق.

روح مراد · 2014-10-12, 08:56

صدفات أجري تخدمي
الأخت تطلب مقادير الحريرة

روح مراد · 2014-10-12, 09:57

merci يا صدفات قافزة الله يبارك

تغرينية · 2014-10-12, 17:06

راني نستفاد منكم تاع الصح الصح شكرا لكم

صدفات · 2014-10-13, 08:37

اقتباس:

المشاركة الأصلية كتبت بواسطة تغرينية

راني نستفاد منكم تاع الصح الصح شكرا لكم

صباح الخير لكل البنات
صح يا تغرينية رانا الكل نستفادو
روح مراد الوبيا الخضرا نتوما في الوليمة ديروها مرقة حمرا بطماطم و اللحم و لا سوتي مع المحمر

روح مراد · 2014-10-13, 08:53

صباح الخير صدفات
اللوبيا الخضراء نديروها باللحم و الطماطم مرقة حمراء
مي مانديروهاش في الولائم الكبار
يعني مثلا العرس عندنا يكون يوم الخميس في الليل
اللوبيا نطيبوها عشا عشاء للمقربين اللي يكونو حاضرين بوم الأربعاء أو نطيبوها فطور للمقربين اللي يكنو فالدار يوم الخميس على 12
احنا مثلا نديرو العرس في الدار يكون عندنا ديما حوالي 100 شخص على 12 يفطرو على هاذيك نطيبوها باش تكون فطور خفيف و ساهل و ما يديش وقت كبير
بالصح هاكا وليمة كبيرة مانديروهش
عادة يديروه في الجنازات تقريبا كامل الناس أو كي يكون هاكا فطور أو عشاء للعائلة الكبيرة

صدفات · 2014-10-15, 15:51

مساء الخير وين راكي يا روح مراد وين غطستي نضن راكم في منطقة وحدة و على هذا ما بنتوش في زوج أنت و أم حمزة الغالية.

روح مراد · 2014-10-16, 08:58

صباح الخير ياصدفات
راني هنا و لكن نتوما كامل هربتو من المنتدى
كنت نخمم نفتح كاش موضوع يفيد كامل الأخوات بالعازبات و المتزوجات و لكن ما عرفتش واش هي أكبر حاجة راهي مقلقتهم
أعطوني فكرة و نقاشوها

صدفات · 2014-10-19, 11:56

اقتباس:

المشاركة الأصلية كتبت بواسطة روح مراد

صباح الخير ياصدفات
راني هنا و لكن نتوما كامل هربتو من المنتدى
كنت نخمم نفتح كاش موضوع يفيد كامل الأخوات بالعازبات و المتزوجات و لكن ما عرفتش واش هي أكبر حاجة راهي مقلقتهم
أعطوني فكرة و نقاشوها

صباح النور يا روح مراد توحشتك بزاف كي راكي كان عندي عرس ماقدرتش نطل عليكم والآن راني هنا
وحتى أنا راني نخمم على موضوع و ما لقيتش

روح مراد · 2014-10-19, 12:34

صباح الخير صدفات راني الحمد لله و أنت و أولادك؟
مالقيتش موضوع مهم راني غير نعصر في مخي

gyouyou · 2014-11-22, 11:40

صباح الخير
هذا الاسبوع وبالتحديد يوم الاثنين عندي عزومة لدار الايتام حبيت نطيبلهم طعام بالحم بصح معرفتش الكمية اللازمة باش نطيب ° الطعام و الخضر و اللحم و الحميصة................) هناك تقريبا 100 شخصا فكم يلزم من المقادير وجزاكم الله خيرا

روح مراد · 2014-11-22, 12:06

راني قدمت الطريقة في الأول
تحطي 100 قطعة لحم
بالنسبة للبصل حوالي 2 كلغ غرام
إذا قرعة وحدها تحتاجي حوالي 6 إلى 8 كلغ
بالنسبة للحمص 1كلغ و نصف يكفي تقدري تضيفي حتى إلى 2 كلغ
إذا قرعة و لفت تقدري ديري 4 إلى 5 كلغ قرعة و 3-4 كلغ لفت
إذا جزر ديري 3 كلغ يكفي
أحسن طريقة تحكمي كمية قليلة طيبيها و ضاعفي المقادير
بالتوفيق إن شاء الله

alchimi · 2014-11-22, 12:20

السلام عليكم أختي

ربي يقدرك أختي على فعل الخير وربي يتقبل العمل الصالح منا ومنك إن شاء الله.

أما المقادير بالنسبة لللحم لازم تعرفي في 1 كغ نتاع لحم يكون 4 أطراف ملاح وإدا حبيتي يكونوا 5 تفوتي بهم الواجب

شوفي أنت الآن شحال لازمك

بالنسبة للطعام تعبري لكل شخص la louche ممروطة طعام يابس

الخضر

4 كغ قرعة كورجات

2 كغ بصل

البطاطا 1 كغ

اللفت رطل للبنة

طماطم العلبة رطل ونص
الحمص رطل ونص حتى ل 1 كغ

التوابل

مغرفة اكل ممروطة فلفل اكحل

مغرفة اكل ممروطة قرفة

3 مغارف ممروطة اكل ملح ومن بعد تدوقي ممكن تزيدي

لوشة زيت إدا اللحم مافيهش الشحم الدسم
إدا فيه يطيب في شحمو