موضوع مميز وصفات من حراير مطبخ وش طيبتي اليوم - الصفحة 7

*عاشقة الجنة* · 2013-08-20, 15:07

أم محمد تاج

لابات أقلاصي ذايبة وضيفيلها زوج مغارف ماء الزهر وزوج مغارف زبدة ذايبة والسكر قلاصي بالشوي حتان توصلي القوام المطلوب

القلاصاج فيه: بياض بيضة فنجال زيت نصو زيت ونصو زبدة ذايبة وفنجال حليب واكستخي تاع اللوز مغرف كبيرة ومغرف صغيرة فاني وملون أبيض لازم باه كي تضيفي الملون لي حابتيه يخرج هو بعد ما يخرجش باهت وتضيفي السكر قلاصي مغربل والله تحفة وماييبسش خلالالالالاص درناه في عرس سلفتي وخبينا سهمة سلفتي وحدة كانت في الطاليان والله فات الشهر وماراح ماجا هو هو على ضمانتي حنونة

لقلاصاج لي يجي فيه ليدام زيت أوزبدة ماتخافيش منووووو خافي تاع ماء الزهر والسكر ولا السكر مع عصير القارص

*عاشقة الجنة* · 2013-08-20, 15:39

أم محمد تاج

وصفة المخبز

أربع كيلات أي نوع من المكسرات وكيلة سكر عادي واكستري تاع اللوز وزاست تاع القارص لازم يكون بزاف والزبدة إذا الكيلة تاعك صغيرة ديري زوج مغارف زبدة طرية وانت المقدار تاعك وهنا السر وهو البيض ابداي ببيضة لمي ومبعد بصفار ومبعد ببيضة وهكذا حتان تتلم وما تجيش جارية لازم تجي طرية وكاكمة روحها مليح والسر الثاني لازم تبات في الثلاجة يوم كامل وفي الغدوة شكليها وحطيها على نار أقوى شوي من تاع المسكوتة تحمار فقط من تحت وكي تخرجيها عسليها وهي سخونة بعسل وحدو بدون إظافات وقلاصيه حنونة

ghorba · 2013-08-22, 15:28

منولة هاكي وصفة البغرير
ندير السميد والنلح وشوي خميرة خبز شوي زيت نخلط ونبل بماء دافى نخليها ترتاح شوي
ومن بعد نعجن ونقطع
وحد ال5 دقايق ونبل بالماء الدافى ونحلها بيديا
ونخليهاترتاح شوي وتسخني الطاجين انا ماعنديش درتها فالمقلاة

fati21

ghorba · 2013-08-22, 15:35

fati21

منال بالنسبة للروز
نرابي بصلة والزيت والملح ونضيف اطراف الدجاج ونخليها تتقلي مليح
منبعد نضيف الثوم وحبة طماطم مرابية ونخليهم يتقلامو ونزيد مغرف طماطم مصبرة ووشوي هريسة وفلفل اسود وراس الحانوت وشوي فلفل احمر
ونقلي مليح ومن بعد نمرق ونضيف شوي حمص وجلبانة وسنارية مقطعة 2 وحبة بطاطا مقطعة علي 4 وبسباس الاعندك يجي روعة وقرن فلفل حار
ونخليها تطيب
نغلي الارز حتي يطرا ونفورو وبعمايفور الارز
نحطو في بايركس نضيف شوي زبدة لاصوص والي الفرن حتي يتشرب هديك لاصوص
وبصحتك

fati21 · 2013-08-23, 14:34

ليدي ميليون
الشكشوكة نتاعنا عادي وتجي بنييييينة مع المطلوع واش نقلك هههههه

حطي شوي زيت تسخن واقلي فيها الفلفل كي يتقلى انزعيه من الزيت وحطيه في صحن بجيه

شكشوكة
الطماطم ديريها تكون وطرية وحمراء نقطعها رقيقة بالسكين برك وفي الاغلب نديرها في الروبو ندششها برك أو رابيها كيما تحبي وتبليها بملح وفلفل أسود وهريسة واذا كلنت الطماطم حامضة زيدي غييييييييير شوي سكر حطيها في المقلاة لي قليتي فيها الفلفل متكونش فيها الزيت بزاف وقلبيها خليها على نار متوسطة طيب الطماطم وحطي فوقها الفلفل أغلقي طيب على مهلها باش الفلفل يطلق ذوقو ماتخليهاش تنشف بزاف من الماء

ساهلة ماهلة

fati21 · 2013-08-23, 14:40

ilbeldelmondo
فاتي هذه طريقتي و زيدي شوفي تاع الأخوات
Doughnet
اربعة بيض دافئة
كاسين حليب دافئ
3/4 كاس زيت
نص كاس سكر
ملح
زاست
ملعقتين خميرة الخباز
اخلطي المقادير السائلة في العجانة او باليد اذا بالعجانة استعملي المضرب k (ملح سكر زيت بيض حليب زاست او قشور البرتقال) و كاس فرينة
و خليهم يتخمرة 45دقيقة
اضيفي الفرينة حتى الحصول على عجبنة ما تيبسيهاش و خمريهم ساعة
افردي العجينة بمساعدة الفرينة بسمك 1 سم و اطبعي دوائر
كاين طابع واجد و يمكن تستعملي دائرة كبيرة و تثقبي بالصغيرة
تخليهم يطلعو ساعة يأخذ الوقت يمكن التخمير يكون غير 20 دقيقة لكن الخميرة المستوردة تعبانة في جيناتها ههههه اذا عندك لي تباع في فرنسا تصلح 20 دقيقة
المهم يأخذ شوي وقت لكن يجي يهبل و تقليه و تعسليه او تسكريه او ديريلو كراميل قلاصاج شوكولا واش تحبي

fati21 · 2013-08-23, 14:41

ام ياسين الزهراء

2 غرافة فرينة مع مغرف خميرة تاع الخبز ومغرف تاع سكر ومغرف تاع الزيت وخميرة تاع الحلوى و2 بيض شوي ملح ونحب نزيد زاست تاع القارص والفاني نعجنهم كيما المطلوع يعني نضربهم من تحت لفوق ونخليهم يطلعو ويجو كيما المطلوع يعني كيتجي تقرصيهم ديري الزيت في يدك وديري كويرات صغار خليهم يطلعو وسخني الزيت وابداي تقلي كل ماتجي تلوحي وحدها حليها شوي واتقبيها بصباعك وارميها في الزيت وديريلهم سكر قلاصي ان شاء الله فدتك

نسي شكون اللي طلبت وصفة

صحى عشاكم واحلام سعيدة

أم ياسين الزهراء · 2013-08-23, 14:53

بارك الله فيكم

فايزة44 · 2013-08-23, 20:10

سهى حبيبتي جيتي هاهي وصفة الرشتة وطريقة عملها

- كيلو سميد رقيق
- ملح حسب الحاجة
- بيضة واحدة مخفوقة بالشوكة مع شويييي ماء باش ما تتكعبرش كي تخلطيها مع السميد
- ولمي بالماء حتان تكون عجينة طرية وكوريها كويرات وخليها ترتاح ساعة

- الان حضري النشا حلي بالماشيتة نتاع الرشتة اول خطوة حليها في 1 لثلاث مرات وحطي عليها النشا شوي ماشي بزاف
- ثم في 3 وراح توكن عندك شرائط طويلةاذا جاتك طويلة بزاف قطعيها بالسكين على اثنين
- ثم في 6 المكينة لي عندنا أخر رقم فيها 6 وحطيها فوق منشفة نطيفة وتكون كبيرة ومرشوش عليها شوي نشا وخليها تشيح شوي متخليهاش تشيييح بزاف
دوركا كي تشيح غير شوي فوتيها في الماشينة في الجهة لي تقطعلك رقيق فهمتيني واش نقصد سهى ؟؟ راح تجيك عبارك عن خيوط خشنة اذا حبيتي نصورلك ونمثلك بالاوراق باش تزيدي تفهميني مليح
كل ما تفوتي شريط وتقطعيه بالماشينة روليه على يدك بالشوي عليه وخليه بجهة يشيح العجين
اذا حابة تخبيها خليها حتى تنشف خلاص باش كي تخبيها ماتفسدش
اما اذا حابة ديريها في هذاك اليوم مكانش مشكل ملازمش تنشف خلاص فوريها هادي بشوي زين غييييييير شوي زيت
كي تفور حليها بيديك بالاصابع برك وبخيها بالماء وخليها تتشربوا شوي وزيدي فوريها للمرة الثانية فقط لا اكثر

نتمنى نكون أفدتك وفهمتي علياواي استفسار راني هنا

ladymillion · 2013-08-23, 20:12

شكرااااااااااااا فيوزة الحبيبة أفر حتيني

fati21 · 2013-08-23, 22:26

ام محمد تاج

حبيبتي لي طلبت وصفة التشاراك واقيلا أم التوأم هاو ليك الكاس تاع التاي لي كيلت بيه وجاتني خمسين حبة بالتمام والكمال ويهز تقريبا ثمانية مغارف فرينة كيلي واتبعي وصفة أم أماني راهي روووووووعة ولا يعلى عليها
والحشوة: 300 غرام لوز وتقدري تعوضي بالكاوكاو أربعة مغارف كبار سكر عادي زاست تاع القارص ليكستري تاع اللوز وزوج مغارف كبار زبدة وتلمي البيض حتان تولي عندك عجينة تخليها ترتاح مليح
القلاصاج: فنجال صغير تاع القهوة حليب وفنجال ماء الزهر وفنجال زيت نصو زبدة ونصو زيت لافاني ليكستري تاع اللوز وملون أبيض لازم باه كي تضيفي اللون لي حبيتيه يخرج هو وناصع وضيفي الملون الأزرق ومبعد ضيفي السكر قلاصي تاعك حتان تخثار مليح مليح وجربي بالوحدة لازم ماتبانش العجينة نشالله نكون وفيت واسمحيلي على التأخير ماكنتش في المنزل

tokio hotel · 2013-08-24, 12:17

سلام اختى ا م تاج عجبنى الجلاصاج انتاعك و حبيت نجربو لكن قريت فى عدة مواضيع ليك مرة نلقى فيه ماء زهر و مرة لالاياريت توضحيلى النقطة هادى ركزى مليح و شكرا

fati21 · 2013-08-24, 13:46

ام محمد تاح

لهوووومة تكرم ياخويا المغبون خخخخخخخخخخخخخ
شوفي في الميكسور حطي زوج بيضات ومغرف كبيرة سكر وفاني واكستخي تاع اللوز ونص كاس لوز مطحون مليح وكمشة بيستاش ونص مغرف صغيرة خميرةو الفرينة زوج مغارف خبطي وحطيهم في لي مول تاع السيليكون وحمريهم في الفرن ونحيهم أنا هاذ الكمية قطعتلي 15 نحبة وكونجليت منها ممممممممممم

ladymillion · 2013-08-24, 21:25

باتيلا اليك مطلوعي

سميد قدري بالقرصة
م ص ملح لكل قرصة
م ك حليب بودرة لكل قرصتين
م ص خميرة الخبز لكل قرصة
م ص سكر
م ك زيت لكل قرصة
سينوج ماشي بزاف اذا تكثري منو يمنع طلوع الخميرة
ماء دافي بلي بيه العجينة بلي بالماء واعجني بالتقطيع واتخمي العجين بالماء ويكون العجين متجانس تماما
بلي الكيس وحطيه فوق العجين او ديري طريقة الهام نتاع الكيس انا نبلو ونحطو فقط والعجييييييييييين يكوووووووووون متخوم

خليه يتخمر حسب الحرارة نتاع كوزينتك راكي تعرفي كي يطلع
اعجنيه ملييييييييييح مليييح حتى يعود يترتق العجين الان اسقيه بالماء الدافي واعجني واخبطيه مليح كيما خبز الدار ويكون لين
تقرصيه وطيبيه عادي في الطاجين اذا سقيتيه بزاف وجاك يلصف كي تكوني تقرصي فيه رشي الفرينة وقرصي

بالصحة حبيبتي

بريق الامل& · 2013-08-25, 13:36

حيهتى كلها امل
عزيزتي بروقة في طنجرة حطي اطراف دجاج مع مغرف سمن وشوية زيت (يمكن الاستغناء على السمن ) وقليهم شوية تم ضفي الدرسة
الدرسة في مهراس حطي راس توم مع فلفل حار وشوية ملح واهرسيه مليح حتان يرجع ناعم وضفيه للطنجرة وزيدي كمون وفلفل عكري وخلي الدجاج على نار قليلة وقلبيه حتى ياخذ طعم التتبيلة وخليه يطيب على نار قليلة دون اضافة الماء وادا اضطريتي ديري شوووووووية برك
من جهة اخرى حطي الحميصة تغلي في نصف طيابها ضيفيها بالماء تاعها للدجاج وزيدي مغرف طماطم مصبرة وخلي الدجاج يكمل طيابو مع الحميصة والمرق يكون شوية خاتر
بعدما تطيب قطعي عليها شوية معدنوس وخليها تجي بنينة
الشطيطحة تحب التوم والحار باه تجيك بنينة وتقدري تضيفي كريات من صدر الدجاج المرحي والمتبل. تان تجي مليحة