تجهيزاتنا للشهر الفضيل

[sali kanouza]

المشاركة الأصلية كتبت بواسطة arwa alaa

سالي كيفاش تديري العصير السحري

الحمد لله اختي اروى العصير راهي دايراتو الاخت الهام موضوع جربتو العام الماضي واعتمدت الوصفة شوفي فالمنتدى واذا مالقيتيش راح نكتبلك الوصفة لاني مانعرفش نحط الروابط

[sali kanouza]

اختي ام هارون يتوحشك الخير والله حتى انا توحشتكم واش راهم الاولاد والاخت ام هاجر ان شاء الله بخير
ربي يعينك ان شاء الله ومليح كي تتخلصي من الكراكيب شعور لايوصف تحسي فعلا بالترتيب والتنظيم ههه

[sali kanouza]

حبيبتي رندة واش راكي وبصحتك المشتريات مسبقا وحبيت لوكان كل وحدة فينا تقول مشترياتها سواء اواني او مواد غذاىية حتى نذكرو بعضنا
انا اليوم درت عدس للفطور ونضفت الارضيات جيدا فطرتهم وغسلت الاواني والمساء نشوف واش ندير

[حياتي كلها امل]

السلام عليكم اولا نرحب بالحبيبة سالى والله دائما في بالي ويارب يلتحقو الغايبات ويكونو كلهم بخير
انا راني مع التنضيف هذا الاسبوع درتو للمدخل والحمام والمرحاض اكرمكم الله ومكان الغسالة راني نددش مع شوية لغريب
اما التجميد راني خبيت شوية قارص وشوية برتفال وشوية فريزة ومعولة ان شاء الله نخدم صلصة الطماطم
اما القضيان انا انخلي للاسبوع الاخير
والاواني راني نشري بلعقل واش خصني شريت مقلة وبلى تاع كوشة وحبيت نشري طنجرة تاع اينوكس

[رندة.]

اهلا وسهلا سالي هاذي غييييبة. الحمد لله كي راكي بخير ولعقوبة للفراشات الغايبات يلتحقو بينا ان شاء الله

[arwa alaa]

اهلا رندة وام هاجر
سالي شكرا على الوصفة راني لقيتها

[ام هزار]

تحية ليكم كل وحدة باسمها
اسمحولي ما راجعتش كلش فقط يا اروى بالنسبة للمرمز راهو كيما قاتلك جهينة فقط في طريقة طيابو انا نخلطو مع الشربة تاع الفريك يعني الفريك اكبرمنو في الكمية و هو شوية برك يجي ريحتو تتشم من بعيييييييد
راهي بنتي فوق راسي تستنى في الميكرو لي عودة بادن الله

[omelbanin]

السلام عليكم ،حبيبتي سالي والله غير عندك كي خرجت هاذيك الساشي وفتحت لقجور لقيتهم منظمين حسيت بالراحة ،
وبالنسبة للاواني شريت قدرة انوكس ،لاني قررت نتخلص كامل من اواني الالمنيوم ،وكنت شريت من قبل طنجرة ضغط انوكس ايضا .
وبالنسبة للعصير تاع الهام مايجيش مر ،كي تسكرفجو مع القشور ؟

[sali kanouza]

الله يسلمك اختي ام هاجر والله احبكن في الله ربي يوفق كل وحدة ويعطيها ما متمنية
اروى لا شكرى على واجب اختي جربي العصير هاذ اليامات واذا عجبك ديريه فقاءمة العصاءر
رندة ان شاء الله اختي
ام هزار ربي يعينك اختي
ام هارون عيشي اللحضات المتميزة والله اجمل شعور بالنسبة ليا وبصحتك المشتريااات وبالنسبة للعصير انا مجانيش مر ابدا وانت جربيه وشوفي راه يدير كمية لاباس بيها

[crono]

السلام عليكم جبتلكم بهذا البريوش باه تتقهواو
خدمت لقهوة لعشية وانتوما واش درتو حباباتي

[crono]

جامي جاتني في باليحبيبتي إذا كان النشاف تاعك جديد و يهربلك معليك غير تشريلو زويجة مناع¨ش و راح يتهلى فيك

[omelbanin]

الله يبارك اختي كرونو البريوش راهو يشهي ،مقبيل كنت نعجن ،قلت كرونو مابانتش اليوم ،ان شاء الله خير ،حتان طليتي علينا بالخير ولخمير ههههه.
انا لعشية درت فطير مع القهوة ،ولعشا شطيطحة بطاطا وخبز مطلوع.
انا الفترة المسائية يجيني لعجز فيها ،ما نعرف علاش،نطيب القهوة ونعجن ولعشا وبس .يجيني النشاط غير الصباح ،قلت نولي لعادة تبريد منطقة ساخنة نولي نديرها مع لعشية

[arwa alaa]

اهلا فراشات بصحتكم البريوش
انا درت كاك على طريقة ام اسيل والعشاء درت بيتزا
ام البنين انا تاني وليت نعجز لعشية ومنقدرش نخدم

[رندة.]

يعطيك الصحة كرونو على البريوش ماشاء الله، وفكرة المساسك للنشاف فكرة عملية وساهلة.
ام البنين واروى بصحتكم الفطير وكيك ام اسيل. واواني الاينوكس صحييّن احسن من الألومنيوم. ان شاء الله ربي يقدركم كامل وتعمرو دياركم بيهم.

[جهينة اليقين]

ما شاء الله عليكم وعلى النشاط
انا العشية دقيت الزنجبيل فالمهراز وعاودت طحنتو فالرحيوة وغربلت الكمون والكروية للغد ان شاء الله ننقيهم المهم كل مرة حاجة باش ما نضغطش على روحي
للعشا درت تبيخة تاع ام وليد تجي بنييينة
عجبتني الفكرة تاع النشاف رائعة يا كرونو انشاء الله نعتمدها
ام البنين انا كذلك شريت قدرة وكسكاس تاع ستانلس من العاصمة وبهذا قضيت على اخر حاجة عندي بالالمنيوم الحمد لله عندي كوكوط اينوكس والكسارن والطواجن وقدرة طين وكذلك القصاع باش نعجن وندير الطعام لي بلا تاع زجاج بالغطاء ورق الالمنيوم لغيتو تماما