يوميات عضوة

[نهى اسطاوالي]

هههههههههههه ضحكتيني يا ام عبودة والله غير عندك الحق مرات مانحسش بالقهوة ونشربها بالواقفة من ولادي هبلوني وقتاش يكبروا ويعقالوا هههههههههههههه المهم انا طيبت الغذا حمرت صدر تاع دجاج وقليت البطاطا تغذينا وغسلت الاواني صليت الظهر ورقدت ولادي وتكسلت معاهم صليت العصر وطيب القهوة والحليب للزوج درت حبة موسكوتشو الزوج راح راهو متهلي في الدار الجديد ياخي ديت سكن اجتماعي ورانا فرحانين بزاف راهو عقابها مسكين رايحين نديرو الفايونس تاع الكولوار ونعاودو الدوش المهم ضرك راني قاعدة امام الحاسوب ونفكر واش ندير للعشا سلام

[السراب الحالم]

المشاركة الأصلية كتبت بواسطة نهى اسطاوالي

راهو متهلي في الدار الجديد ياخي ديت سكن اجتماعي

اعذري تطفلي أختي كنت حابة نسقسيك على الخاص بصح ما لحقتش لعدد المشاركات:
كيفاه ديتي السكن الجتماعي وانتي أستاذة؟ وزوجك واش يخدم؟
إذا أزعجك سؤالي انسيه
وربي يحفظلك أولادك

[نخله.]

ام عبوده انا ثاني مانديرش المسمن صباح نوجدو بعد لغدا ونطيبو لقهوه لعشيه ونخبي منو للصباح اليوم حاله خاصه بعثتو لصحبياتي معلمات في مدرسة ولدي
نكملكم اليوم كيفاش يكمل

ولفتههم يتعشاو بكري بعد صلاة المغرب مع ندور على كوزينتي نفرزها تلحق صلاة العشا نصلي نقعد نتفرج انا ولادي شويه ومرات كي يدير زوجي الاخبار نلم ولادي تحت كوفيرتا ونحكيلهم حكايه و نشعلو تورش شحال يحبوووووووووهااااااااااااااا بصح مرات ماشي دايمن كي ما يقباحوش

تلحق ال9 ندير بيبرون بنتي نلبسها حوايج النوم ولدي الكبير يبدل وحدو ويمد لخوه وش يلبس لاحظو بللي راني نخدم في ولدي معايا نحبو يتحمل المسؤوليه منصغرو مرات حتى بيبرون ختو هو اللي يعطيهلها و في العطل هو اللي رفد الماعن ويفرز المايده انا غير نغسل الماعن وراهو حاب يغسللي الماعن انا برك ما نمدلوش حتى حيوط الغرفه تع الاولاد نمدلهم تورشونات هوما اللي يغسلوهم يتحملو مسؤوليتهم

انا نغسلهم الحيوط من وراهم ما يفيقوش بللي راني نساعد فيهم وخزانتهم ثاني نعاونهم فيها بصح بلا ما يفيقو حتى الفرز تع كل صباح يبداه ولدي قبل ما يروح للمدرسه بصح راكم عارفين لعب العيال نعاود كلشي من وراه ههههههههه

نرجعو لليوم لازم نكملوه مع بعض حتى نرقدو

يخي قلتلكم ثرثارة ونحكي بالتفصيل الممل
كل واحد الى السرير وندير بنتي فالبرسو ونتغاشى ما نسال على حتى واحد

على 12 تع الليل نوض ندور عليهم ونغطيهم نلقا السبع يتفرج مرات نتفرج معاه مرات نحكو شوي نجيبوها لل2 تع الليل ونرقد

و خلاص نهاري

[amina nourhanne]

الله الله يا الشاطرات الله يبارك

[نهى اسطاوالي]

انا ياخي خليتوني نفكر في لعشا رحت درت طعيمة يعني كسكس بالخضرة اللفت والجزر واللوبيا الخضراء والقورجات والخرشف هههههههههههههههه جميع الخضر وجا بنين اللهم بارك غسلت الاواني لي حضرت بيهم وراني مازلت نستنى في الزوج اليوم طول عندو شغل راني قاعدة امام الحاسوب نستنى فيه سلام

[أم عبد الكريم]

يعطيك الصحة شاطرة الله يبارك

[نخله.]

الجمعه غدوا ان شالله

انا اول ما نفطن نقرا الاذكار تاعي لازم في فراشي قبل ما نوض سينون ننسى من بعد نوض نتوضى نغسل الطعام ونطلع نصلي( الغرف لفوق فالطابق 1 و الحمام والصالون والمطبخ لتحت في الريدشوصي)

نوجد بيبرون بنتي ونحطولها عد راسها و نلبس حوايج الميناج (سورفات) وندير شويهزيت لشعري ونلبس بوني ونهبط نشعل على برمه المرق من بعد نوجد الفطور وندير الطعام يفور الفوره الاولى

الغاشي يطول ما ينوض وما نقدرش نبدا نقربع نبدا بالصالون لتحت وبعيد نحي التابي وننفض الشورى نسيقو ونرجع كلشي ونمسح الغبره ونفوت بتورشون وشوي جافيل على لي تاش اللي باينين فالحيوط مش راح نغسل الزجاج نغلو مره بالشهر برك الصالون فيه 2بيبان بالزجاج + النافذه رح تديلي وقت

نزيد نخرج للحوش عندي 2 حواش واحد مع الدخله والثاني تع كوزينه نسيقهم( ولدي الكبير يبالييهم انا غير نسيق)

ندخل نلقى الغاشي ناض من فوضى التسياق يفطرو يلبسو لي كومبينيزون ويروحو للسوق الاسبوعيه من بعد للدار اللي رانا نبنو فيها (راني غير كاريه)

نبقى انا وبنتي نغسلها ونبدلها و الحيبوسه ونروح نشرع البيبان والتواقي ننشر الفراش و التابيات نخرجهم للتواقي بعد ما نقيهم نحكم زوج بيادن واحد صابون مع الجافيل والثاني ما ندور على الحيوط نتبع لي تاش برك ولي باس و انتيربتور

نفور الطعام للمره الثانيه ونرشو ونخليه

نسيق لي شومبر مع لي كولوار والمطبخ هو الاخير

نفوت خفيف خفيف على الدوش والتواليت

نروح لي بلانت تاعي نباتاتي الجميله ما عنديش جنينه عندي دي بوكي برك نرشهم ونقيهم ونشوف وش خصهم نموووووووت عليهم

نرجع نفرش ونغلق ونعطر الدار ما نحبش الروائح الاصطناعيه ندير بخور الند وندخل للدوش وندوش لبنتي

نخرج نشف بالصيشوار اذا بقا الوقت نقرا البقره واذا مابقاش نسمعها بعد العصر

نفور الطعام و نبيبي للسبع باه يجي ندير السمن ونوجد الغدا

يدخلو يغسلو ويتغدو ويطلعو.............الاب يوجد روحو للصلاة

انا نغسل ماعيني ونطلع نقرا الكهف نكمل جوست مع الاذان نصلي ونذكر حتى 2 يدخل السبع ويدي غمضه

انا ولادي ما يديروش لا سياست نعطيلهم يطبقو لحوايج في لخزانه تاعهم باه يفوت الوقت

ولعشيه نمصلو العصر ونستقهوو ويروحو الذكور ونقعد انا وبنتي نريح غالبا نرقد متعب او نتفرج او نحل الميكو و نافيغي شوي حتى يرجعو ومرات ندير شوي مسمن ونخبيه لغدوا يفطروبيه

الجمعه ما نديرش عشا يحبو يتعشو الطعام يموتو علييييييييييييييييه ما يملوهش

اذا تفكرت حتجه نرجع نكملهالكم

^جمعه مباركه ما تنسوش صورة الكهف

[ياسمين1990]

السلام عليكم
بارك الله فيكم ما شاء الله ربي يعطكم الصحة
اكيد في هذا الوقت انتم راقدين على هذا تنوضوا في الصباح ناشطات كي النحلات
حابة كل وحدة تحكيلي السر ليخليها دائما ناشطة وتكمل خدمتها

[نهى اسطاوالي]

أهلا بيك ياسمين مانكذبش عليك الهمة لازملها عزيمة صح مرات نكونوا ناشطين ومرات يحكمنا التفنيين ههههه المهم ابداي يومك بالأذكار والصلاة ونحي من راسك كل شيء ورايحة تنوضي كي سوبرمان تخيلي بللي رهو جايك وفد ولا ضيوف هههههههههههه ترجعي الدار تشعل
انا رايحة ندير برنامج باه ننظم وقتي يعني ندير مذكرة نكتب فيها جميع الأعمال اليومية حتى الطبخ هكذا نظم يومياتي
ربي يوفقك ياسمين

[نخله.]

السلام عليكم

اختي ياسمسين

من الليل برمجي وش راح ديري غدوا هكذا فطني ناشطه و معوله



انا اليوم ماقدرتش نكمل كل الاعمال اللي برمجهتها تعبت وراه ظهري مكسور بصح علابالي نرقد ليله ونصبح جديده ولله الحمد

مزالي حوش ما سيقتوش والصالون مارجعتلوش قشو بعد الميناج ومازالولي حيوط لي كولوار ما لحقتش عليهم



مل تنسوش بلي سر النشاط والحيويه كيما وصى بيها نبينا بنتو الزهراء

قبل النوم التسيح 33 التحميد 33 التكبير 33 واتمام ال100 ب لا اله الا الله محمد رسول الله

جربوها فبها بركه نفيه وجسميه سبحان الله

[ياسمين1990]

السلام عليكم يا فحلات وجمعة مباركة ان شاء الله
شكرا لكم اخواتي على هذه النصائح
مرات نكون كما انتم ولكن مشكلتي انني لا استمر على حساب الاحوال الجوية اذا كان اليوم مشمس وصحو نكون ماشاء الله ناشطة ونخلص اعمالي ونكون في
قمة السعادة ونكذب اذا كان انا لخدمة هذه الاعمال ولكن للاسف عندما يكون الجو غائم متقلب هذاك اليوم يصبح مزاجي يالطيف الطف
ممكن اكتفي فقط بطهو الطعام هل هذه الحالة مرت عليكم وكيف يكون علاجها
مع العلم اني اقوم بجميع اعمالي الدينية من صلاة وتسبيح وذكر وقراءة القرءان ........الخ رب يتقبل امين

[ياسمين1990]

بالتوفيق للجميع
سلام

[عيدة نور الهداية]

حياة جميلة ورائعة في طاعة الله ومرضاته . خدمتك زوجك واولادك
روعة ماشاء الله
راكي درتيلي وسوسة باش نبطل خدمتي ههههههههههههههههههههه
ربي يحفضلك ابنائك

[نخله.]

اختي ياسمين حابه نسقسيك اذا انت متزوجه ولا لا؟؟؟

لانو اذاكنت عازبه فعادي جدا

انا قبل ما نتزوج ماكنتش ندير الشغل يوميا الا في العطل وماكنتش نحب ندخل الكوزينه اصلا

تعلمت الطياب شهر قبل ما نتزوج

اما الميناج بالنفحات نتحزم اذاكنت وحدي فالدار بصح كنت اذا عولت نرفد داركامله ونرجعها تبرق في نهار واحد مع انو دار اهلي كبيييييييييييييييييييييييره



يعني اذا كنتي عازبه عادي نهار تتزوجي كلشي شتبدل

[نخله.]

عيدة اختي انا كنت عامله واول ما طلب مني زوجي نحبس حبست نخاف تكتبلي عند ربي ذنب لانو زوجي مش حاب الخدمه

رغم اني مازال ماوالفتش الدار عندي 10 سنين فالدار ومازالني نوض بكري باه نكمل لغدا قبل 8 ومازالني ندير الميناج بالويكاند كاني مازلت نخدم


اذا كان زوجك راضي بالعمل تاعك وعملك في اطار مشروع ماننصحكش تحبسي الا اذاكنتي انت تعبتي او شفتي ولادك في حاجه ماسه لوجودك


لانو صعييييييييييييب الوحده تكون تخدم وتحبس

لحد الان نحشم باه نطلب مصروفي منو اذا فهم روحو صحا واذا مافهمش نسكت مرات نكون في امس الحاجه وما نقدرش نقولو الله غالب ماقدرتش

حتى الكسوه اذا تفكر يشريلي تجيني كبيييييييره باه نقولو كسيني و طبعا الاغلب ينسى الرجال ما يقدروش يعرفو بلا ما تقوليلهم عكسنا حنا نفهموها طايره


صراحه راني نتمنى نرجع للتدريس خاصة باه ننفع وليداتي كي نكون معاهم وحاسه روحي قادره نمد وندرس بتميز بصح ربي ماكتبش ......... ولله الحمد