|
قسم العصائر و التحليات الوصفات حصرية لأعضاء منتدى الجلفة |
في حال وجود أي مواضيع أو ردود مُخالفة من قبل الأعضاء، يُرجى الإبلاغ عنها فورًا باستخدام أيقونة ( تقرير عن مشاركة سيئة )، و الموجودة أسفل كل مشاركة .
آخر المواضيع |
|
|
أدوات الموضوع | انواع عرض الموضوع |
2013-04-29, 10:55 | رقم المشاركة : 1 | ||||
|
تحلية بالشكلاطة والكاراميل
الوصفة 17 صباح الخير عسولات عندي مدة ماحطيتش وصفات ، حبيت نستجمع قواي ونجيب الجديد بصح ماصبرتش ، خاصة البارح كي حطيت صورة التحلية الأخوات كامل طلبوها وكنت انا خرجت جيت لقيت زمامير و ......وقريب لقيت روحي مطلوبة للعدالة مالا قلت نحطها بكرامتي أحسنلي هي وصفة نتاع تحلية تعلمتها منذ سنوات مع وصفات أخرى : خبز باقيت وLES BABAS و كيك SAVARIN و LES ROULES الحلزونيات ( نوع بريوش ) ....... تعلمتهم من موقع وكتب فرنسية لتعليم الحلويات للطباخين المحترفين. المهم ، ماحطيتش الوصفة من قبل لان المنتدى ماشاء الله معمر بما لذ وطاب ، بصح باش ماتقولوش بخلتنا ، هاهي الوصفة : * طبقة الكاراميل : 1- نذوب 100غ شكلاطة بيضاء 2- نضرب 50غ كريمة شانتيي مع دانيت كاراميل باااااردة ( لازم الخليط يكون جامد ماشي جاري ) 3- نضرب بياض بيضة مع قرصة ملح حتى يطلع مليح ونضيف 3 ملاعق سكر ونضرب حتى يذوب السكر 4- نضرب صفار بيضة مع فانيلا بالخلاط مع 1 ملعقة كبيرة سكر حتى يذوب السكر وتصبح الكريمة بيضاء اللون 5- نضيف الشكلاطة الدافئ إلى خليط صفار البيض ونضرب بالخلاط 6- نظيف بياض البيض إلى الخليط و نخلط برفق بواسطة ملعقة من الأسفل إلى الأعلى 7- نظيف الكريم شانتيي إلى الخليط ونخلط برفق بواسطة ملعقة من الأسفل إلى الأعلى نفرغ الخليط في كؤوس وندخله للثلاجة * طبقة الشكلاطة : 1- نذوب 100غ شكلاطة سوداء أو شكلاطة حليب 2- نضرب 50غ كريمة شانتيي مع نص كاس حليب باااارد ( لازم الكريمة تكون جامدة وثقيلة ماشي خفيفة باش تجمد مليح ) 3- نضرب بياض بيضة مع قرصة ملح حتى يطلع مليح ونضيف 3 ملاعق سكر ونضرب حتى يذوب السكر 4- نضرب صفار بيضة مع فانيلا بالخلاط مع 1 ملعقة كبيرة سكر حتى يذوب السكر وتصبح الكريمة بيضاء اللون 5- نضيف الشكلاطة الدافئ إلى خليط صفار البيض ونضرب بالخلاط 6- نظيف بياض البيض إلى الخليط و نخلط برفق بواسطة ملعقة من الأسفل إلى الأعلى 7- نظيف الكريم شانتيي إلى الخليط ونخلط برفق بواسطة ملعقة من الأسفل إلى الأعلى نفرغ الخليط في الكؤوس فوق الخليط الأول برفق وممكن نزين حسب الذوق ، أنا الكؤوس نتاعي صغار تعمرو كامل مالقيتش كيفاش نزين . * لازم تبرد مليح قبل الاستهلاك ومن الأحسن تبات في الثلاجة . هاهي واجدة ، ماصورتش الخطوات ماكنت عارفة رايحة تعجبكم وتطلبوها : هذي الوصفة الأصلية ، بصح أنا كي نكون مزروبة ونحب نديرها : * نطلع شانتيي مع دانيت شكلاطة بااااردة جدا ونفرغ في الكؤوس وندخلهم للثلاجة ( لازم مانكثرش الدانيت باش ماجيش الكريمة جارية وماتجمدش ) * ونزيد نطلع شانتيي مع دانيت كاراميل بااااردة جدا ونفرغ في الكؤوس فوق الطبقة الأولى( لازم مانكثرش الدانيت باش ماجيش الكريمة جارية وماتجمدش ) وندخل للثلاجة وخلاص الطعم هاااايل ماعندي مانحكي كاراميل + شكلاطة مممممممممم تهبببل الطريقة الأولى جي جامدة أكثر والطريقة الثانية جي خفيفة ، بصح الطعم في الطريقتين يم يم أتمنى أن تنال إعجابكم وترضاو عليا راني خفت خاصة أوغيسيا اللي من الصباح وهي تزمر وبعثتلي تهديد هذا هو : " هاتي الوصفة وإلا " وراهي تتوحم خفت تخرج في البيبي ههههههه راني نخاف من الحوامل .
|
||||
الكلمات الدلالية (Tags) |
بالشكلاطة, تيمية, والكاراميل |
|
|
المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى
المنتدى غير مسؤول عن أي إتفاق تجاري بين الأعضاء... فعلى الجميع تحمّل المسؤولية
Powered by vBulletin .Copyright آ© 2018 vBulletin Solutions, Inc