بركوكس حار يرقص
للرااائعة ليزابيل
البركوكس اولا نحتاج للقديد و لحم الخروف انا اليوم ماكانش عندي درته بالجاج ،، ندير في لا كوكوت زوج بصلات مقطعين و راس ثوم ،لازم نكثر ، و نحط شوية زيت و اللحم و القديد و نقلي نزيد زوج حبات كبار طماطم مقطعين و نقلي و ندير الملح مانكثرش على جال القديد راه مالح حتى من بعد نذوق، فلفل اسود نص م ص ، فلفل احمر م ص ، م ص معمرة قرفة مطحونة ولا عود قرفة يكون كبير ، و الأهم راس الحانوت زوج مغارف ولا ثلاثة حسب ما يكون جديد ولا شوية تعرفيه من ريحته مممممم و نحرك و نسقي بشوية ماء سخون و نزيد زوج مغارف أكل مشي معمرين بزاف طماطم معلبة و نخلي المرق يغلي على نار متوسطة و نزيد عليها ربع حبات زرودية و حبة بطاطا مقطعين ، تقدري تستغني على البطاطا، و ربطة معدنوس كبيرة و نزيد نمرق بالماء سخون و نزيد الحمص نديره في كيس صغير و نقي طبعا و نغلقه مليح و نثقبه بالفرشيطة من كل النواحي بلا ما نمزق الكيس باش يدخله الطياب و نغلق لا كوكوت و نخلي اللحم و المرق يطيبو
في هذاك الوقت غربلي البركوكس باش يطيح منه السميد الزائد و شلليه مليح بالماء دافي و خليه ينشف شوية و فوريه تفويرة وحدة و فرغيه في قصعة و حليه بالملعقة الخشبية تقدري ترشيه بشوية ماء انا ما نرشهش
مين يطيب المرق نصفي الخضار و الحمص و اللحم في كسكاس و نمرس هاذيك الخضار لي بقات فالكسكاس بالملعقة باش نستخلص قاع البنة و نرجع المرق فوق النار ونزيد الحمص ننحيه ملكيس و يطيبو نزيد نمرق حسب الحاجة و نضيف زوج م ص راس الحانوت و نذوق الملح و الحموضة تاع الطماطم المعلبة و نضيف اذا استلزم الامر ، مين يغلي المرق نحي شوية منه في كاسرول نحتاجها من بعد و نرمي البركوكس يطيب على نار متوسطة مع التحريك مرة على مرة باش ما يلصقش و يتعجن حتى يبقاله غير شوية على الطياب و نطفي و نخليه يزيد يشرب المرق
و نروح للحم نفتته و نقطع القديد و عند التقديم نشبح بيهم مالفوق و نزيد المرق ملي نحيته بلالوش فوق اللحم و بالهنا و الشفا ممممممم
![](https://im85.gulfup.com/AUvVzq.jpg)