الجزء 186 من كوزينة واش طيبتي اليوم على المحبة و الوفاء مجتمعون وللكوزينة مخلصون - الصفحة 68

Fifilondon · 2018-01-25, 13:52

سلام وصحى فطوركم كل وحدة باسمها
نبدا بالغايبة سعيدة خير ان شاء الله عسى الي غيبك علينا غير الخير يارب وطمنينا عليك يا لحبيبة
ام هدول صح فطورك وعشاك البارح شخشوخة اممم شهيتيني
حياة ام رحاب ام فاطمة ريمة صخى فطوركم

nihal159 · 2018-01-25, 13:58

طيييييييييط طييييييييييييط راه وصل الكورتاج تاع لعروسة ههههههههههههه.
لبنات و الله غير نستعرف بيكم، دعيتولي دعوة الخير و ربي استجاب ليكم و رجعلي ربي الطابليت ضنايا لحضني هههههههههه.
نبدا بالغدا تاع ليوم، مرقة بالخضر، و درت فيها الجلبانة و تلخضر قطعتهم بنفس حجم الجلبانة.

nihal159 · 2018-01-25, 14:01

عشاء تاع البارح، سندويشات بالمرقاز على طريقة الهودوغ الامريكية احم احم زعمة نستعرض في عضلاتي هههههههه

nihal159 · 2018-01-25, 14:04

هذا قلب اللوز مباشرة من عين المكان و من قلب الحدث ههههه هذا وين درتو و سقيتو بالشاربات و خليتو يتشرب.

nihal159 · 2018-01-25, 14:07

لبنات اسمحولي ماراجعتش ولش فاتني، لاني لازم نروح نرتاح شوية باش نسترجع قوتي للشوط التاني ههههههههه لي هو العشاء.
شفت ام هدول الله يبارك حرة لحراير راهي تحرق فينا ههههههههه ماشاء الله على هذاك لفتات من اروع مايكون.
فيفي مولات الكوزينة صح غذاك و طريقة التقديم روووووعة. سلامي لجميع الفحلات.

Fifilondon · 2018-01-25, 14:26

اقتباس:

المشاركة الأصلية كتبت بواسطة سحابة باردة

مساء النور صح فطوركم معذرة على التقصير فيفي تعرفي حكمني وحد العجز والله غير نصور ومنكملش تعديلهم ولا نصغيرهم مزية لحقت على كوزينتك الشابة قبل ما تخلاص
سلامي لكل الحراير حيوتة وأم هدول وأم فاطمة ريما النشيطة وأم رحاب شفتها دخلت اليوم يعطيكم الصحة دمتم مبدعات شهيتوني
حيوتة البسبوسة تهوس وربي يتقبل صيامك والحمدالله على سلامتك من حادثة لاكوكوط

وأخيرا هذا لاطارط هدية لكل فحلات الكوزينة

اهلين سحابة الف اهلا ومرحبا على سلامتك والله خصيتينا في لكوزينة وبلا ملامة حبيبتي والله الكل نعجزو ونملو عادي حبيبتي والله نورتي جيتي وجبتي الخير معاك ما شاء الله على طيابك روعة الله يبارك يشهي وهاديك التارت لا تعليق تعجز اللسان عن التعبير ههههه

Fifilondon · 2018-01-25, 14:29

ههههه سمعت الزغاريت والكلاكسون جيت نطل شكون هاد لعروسة لقيتك نتي نهوووولة واش والله ليك وحشة الف الحمد الله على سلامتك والحمد الله كي رجعتلك الطابلات هههه مرحبا بيك نورتي

Fifilondon · 2018-01-25, 14:32

اقتباس:

المشاركة الأصلية كتبت بواسطة nihal159

طيييييييييط طييييييييييييط راه وصل الكورتاج تاع لعروسة ههههههههههههه.
لبنات و الله غير نستعرف بيكم، دعيتولي دعوة الخير و ربي استجاب ليكم و رجعلي ربي الطابليت ضنايا لحضني هههههههههه.
نبدا بالغدا تاع ليوم، مرقة بالخضر، و درت فيها الجلبانة و تلخضر قطعتهم في

حجم الجلبانة.

امممم نهال المرقة تشهي الله يبارك والسندويتشات تحفة كيما يحب الخاطر انا القلب اللوز ما عندي مانقول فكرتيني في رمضان امممم في السهرات تع التاي والقلب اللوز ...و....و.......وعععععع دوك نبكي هههههه

طيور الجنان · 2018-01-25, 14:43

حبيباتي اسمحولي مارانيش مليحة خلااااص ولادي في زوج مراض في حالة و الكبير صراتلو convulsion بعد ماقلت تهنيت منها والله راني مايعلم بيا غير ربي سبحانو ادعيولي تفرج عليا .

Fifilondon · 2018-01-25, 15:11

اقتباس:

المشاركة الأصلية كتبت بواسطة طيور الجنان

حبيباتي اسمحولي مارانيش مليحة خلااااص ولادي في زوج مراض في حالة و الكبير صراتلو convulsion بعد ماقلت تهنيت منها والله راني مايعلم بيا غير ربي سبحانو ادعيولي تفرج عليا .

اهلا سعيدة يا لحبيبة الحمد الله عل. سلامتك والف لا باس عل ولادك ربي يشفيهم ويعافيهم يارب شفاء لا يغادر سقما ربي معاك ومعاهم ان شاء الله شدة وتزول وتشوفيهم بخير يا رب كثري من الاستغفار والصدقة وقراءة القران وصلاة النوافل وربي مافيه غير الخير شدي في ربي وتفاءلي الخير تلقايه وطمنينا حبيبتي كل ما سمحتلك الفرصة

fofol · 2018-01-25, 15:14

Allah ibarak fikom ya chatrat ta hiya ti là kom

حياة نور الدين · 2018-01-25, 15:20

السلام عليكن

ام هدول، ام رحاب ،سحابة بارك الله فيكن قدر الله ولطف

سعيدة ما يكون غير الخير حبيبتي وربي يشفي وليداتك ولا مافيهاش احراج من واش حكماتوا التشنجات وليدك وربي يعافيهم يااا رب

فيفي الطبق رووووعة تع الحوت من فضلك حطيلي الوصفة

سحابة لك وحشششششة ويعطيك الصحة على الاطباق تحففففة وتشهييييي حنونة بصحتكم والعجز كل مرة كيفاش تعوذب منه وخلاص

ام رحاب ربي يدوم اللمة واطباقك راقية حبيبتي يعطيك الصحة

ام هدول البسبوسة ساااهلة ديري وصفة اي بسبوسة معتمدتها نقصي السكر برك شربيبها عادي وبالنسبة للكرامال انا عملت تع ام وليد كاس سكر يذوب ويتكرمل نضيف عليها كاس حلبب فيه مغرف زبدة ومغرف مايزينة وحركي حتى تثقال شوية طفي وفرغيها على البسبوسة والتزيين كما تحبي

حياة نور الدين · 2018-01-25, 15:23

نهال منسيتكش حبيت نرحب برك وحدكككك واش راكي توحشنااااااك والحمد الله رضاو عليك حنونة واطباقك روووووعة ماشاء الله

Fifilondon · 2018-01-25, 16:30

اهلا حياة الله يسلمك على كلامك العسل ومن عيوني وصفة الحوت
اولا نوجد الحوت نضفو ونغسلو ثم نوجد الشرمولة لي هي ثوم ومعدنوس وشوي هريسة ومغرف زيت وعصير ليمون وملح وفلفل وكمون ونرخي اكل بالميكسور حتى نتحصل على خليط ثقيل شوي ندهن الخوت مليح باىشرمولة ونخليه يتشرب قد مايطول قد مايحي بنيين
نوجدو الخضر لي ترافق الحوت انا استعملت بصل فلفل طرشي الوان طماطم وبطاطا نغسل الخضرة ونقطعها دواءر او شراءح ونتبلها بالملح والفلفل والكمون والفلفل عكري وملعقة كبيرة زيت ونخلطها مبيح ونفرغها في مول مدهون بشوي زبدة ونستف الحوت فوق الخضر ودنخلو للفرن حتى يطيب الحوت بعد مرور حوالي ربع ساعة الى عشرين دقيقة جيبي ملعقة صغيرة من طناطن مصبرة زيدي عليها نص كاس ماء حليها مليح وفرغيها على الحوت واله على الخضر وخليه حتى يطيب
انا قدمتو مع الارز : في صحن درت الارز في غرفية وقلبتو في صحن التقديم حطيت الحوت من جهة والخضر من جهة اخرى والصوص لي قعدت حطيتها في صحن صغير لي يخب يزيدها

سحابة باردة · 2018-01-25, 19:55

صح عشاكم
فيفي تسلميلي على الكلام الحلو كلك ذوق وشكرا على وصفة السمك من الصور باينة تستحق التجريب آيما عاينطقو الحوتات هههه من حلاوتهم
حيوتة يتوحشك الخير شكرا عيونك الحلوى سلميلي على البقوص وخياتو
نهولة نستعرف بيك خدمتي قلب اللوز ومخلتيهش في قلبك يهوس من جمالو