الجزء 63 من واش طيبتي اليوم تزامنا مع عيد المراة

[lyzzabel]

الله يحفظكم ام رحاب و ليلو و ام فاطيمة الكتاكيت راهم لاباس و الحمد لله بصح يهبلووووو
ام رحاب حتى انا تحيرت عليها والله ما عندي فكرة انشالله تكون بخير و سلامة و تدخل تطمننا
صباح الخير رياض و نتقبل

[R I A D]

المشاركة الأصلية كتبت بواسطة lilouchaf

صباح الخير ام رياض

صباحك سعادة و صحة و عافية حبيبتي ليلو
ان شاء الله ارتحتي

المشاركة الأصلية كتبت بواسطة x ام رحاب x

صباح النور والسرور على احلى ام رياض واش راكي

صباحك فل و ياسمين و عافية و صحتين حبوبة ام رحاب نحمد الله و انت و بالشفاء عليك

صباح النور ناتاسابيل

[R I A D]

صباح الخير ليزابيل
بسم الله ما شاء الله عليك الهام كل شيء فن
روووعة تسلم الايادي و ربي يحفظك

ام اناس بصحتك حنونة الشطيطحة و البيض
راهي غير فترة الوحم و بعدين ترجعي لنشاطك ان شاء الله
Fatimoncton اطباقك روعة تسلم الايادي

[x ام رحاب x]

صباح الخير والسرور والسعادة عليك ياحلي ام ايناس واش راكي حبيبتي انشاء الله عقب عليك الوحم ولا مازال

[lyzzabel]

المشاركة الأصلية كتبت بواسطة أم فاطيمة

صباحكم اسعد ليزابيل و ليلوشاف و كل الملتحقات
هاهو عشايا نتاع البارح فرتان بالبطاطا و السلق نتاع ام ابراهيم يذكرها بخير
و ليسكالوب و تحلية فيتامين س بالليمون و البرتقال و سلاطة نسيت ما صورتهاش

ممممم يعطيك الصحة عشا يشهي بصحتكم حبيبتي

[x ام رحاب x]

م فاطيمة اطباقك هايلين بصحتكم

[إلهام07]

صباح الخير هذو تعليقاتي كيما وعدتكم :

هذا قاطو الطبقات بالنواد كوكو نتاع الامنيات بنين يهبل انا زدت في الخليط نتاع النوارد كوكو كمية مليحة من الزاست نتاع الليمون ممممممم خففي وبنين وطري واسفنجي شوية مع حموضة المعجون يم يعطيك الصحة امنياتي
حقة البلاطو نتاعي 25*33سم
راهو ساهل في دقيقة تخلصوه



وهذي جلبانة من الكوكوط مباشرة


وهذا فول بالجاج داراتو ماما هي تموت عليه


هذا عصير ام رامي نتاع البرتقال والجزر مافهمتش علاه ماجربتوهش والله هايل وبنين واقتصادي 1لتر 50دج وطبيعي
كي والفناه في دارنا ولاو مايعجبهمش العصير اللي نشريوه ولفتهم وحصلت



بتي فور بالزيت بنين وطري وخفيف وهشوش وعجبهم كامل وخلصوه في 24ساعة بصح انا كي عدت على بالي راهو بالزيت جاني يشبه اكثر لقاطو المحقن بصح الحق البنة والطراوة



هذا البلاطو قصتو قصة:
شريتو منذ شهور القاطو اللي نطيبو فيه يفسدهولي ، تشفاو الكوارث نتاع الرولي القاطو اللي نطيبو فيه يبقى ساعة في الفرن ونجبدو عجين ونرميه والله خسرلي قداش من مرة القاطو المهم كي حكيت لخالتي قاتلي أنا ثاني صراتلي كيفك كي حكات لجارتها قاتلها شعلي الطابونة ( الكوانين في 3 ) ونقصي للنار خلااااااااص وحطيه فوق الطابونة وخليه حوالي 1 ساعة وطفي وخليه يبرد واستعمليه
والله يا جماعة جربتها صح ضرك وليت نطيب فيه القاطوات
حبيت نقوللكم إذا عندكم صينية ولا بلاطو ثقيل ومايطيبش ديريلو كيما أنا



هذي أول مرة ندير المبرجة وحدي وطبقت وصفة أم رامي وطيبتها في طاجين الطين نتاع الغرايف مالفين نطيبوها في طاجين الحديد بصح لقيت اختي سلفت علينا الطاجين ومارجعاتوش
المهم راهي ساهلة ماهلة و فرحت بيها باف وقلتلهم صوروني مع مبرجتي
ماما عذاتني 10/10 بصح هي طرية ومليحة بصح مبرجة مام كي ديرها بالسمن جي مبسسة بزاف
مبرجة ام رامي جي حاكمة روحها طيبتها براحتي مالفة يتكسولي حبات في الطاجين
المهم جات مليحة ودرتها رقيقة مانحبهاش جي خشينة ومعجنة


راني زدت شطبت حاجة أخرى من القائمة

الوليمة

حتى انا نشارك بوليمة بصح هذي وليمة نتاع صح عندنا الضياف في الدار ماشي وحدنا
وهذا روطي الدجاج والبطاطا ممممممممممممم والله ناكل حتان يروحلي النفس ومانشبعوش



وهذي بيتزا الأعشاب باللحم المفروم والفراميج ( كامومبير وجبن أبيض وقرييار ) لذييييييذة
جيت رايحة نديرقرصة تكفينا دخلت في الحساب أختي وراجلها قلبتهم 2 قرصات لانو كانت عندنا اختي وراجلها ضياف زادت لحقت أختي الأخرى وراجلها وليت بليت عجينة 3 قرصات
زادو دخلو ضياف أخرين قاتلي أختي أقلبيهم 4 قرصات قلتلها والله غير تاكلو كفات ولا خلاتى



وهذا حساء الدجاج نتاع لهنى جا بنين بصح أنا زدت ثقلتو بشوية نتاع فرينة جاني جاري بصح بنين
معاه بوراك اللحم المفروم


هذي شارلوت بالفراز والأناناس فقط وهذاك اللي من تحت سيرو التوت



وهذا حساء الجبن انا ماكليش منو بصح بقاو كامل يسقسيو شكون دار الحساء قالولي بنين يقتل


راني نصورلكم في صحون الضياف بالسرق هذا محشي جريوات وبطاطا لذييييييذ
الجاج بعد ماطاب مرمدناه في خبز مرحي وقليناه



هذي تارتولات الليمون بعجينة بريزي بالزيت من بعد نحطلكم الوصفة جي خفيفة وتتبسس وساهلة واقتصادية ماتبانش خلاص بالي بالزيت ملي جبنا الوصفة اعتمناها منذ عام والله ايلة وساهلة في دقيقة تخلصيها تقول كل يوم ندير تارتولات
والكريمة هزيتها من موقع فرنسي احسن كريمة ليمون خفيفة وبنين مممممممممم الباتيسري الفضل عند كل العائلة ديما تنوض عليها لحرب




وهذا عيش بالقديد والطماطم المجففة والفرماس والله جا يقتل بنين يهبل قلتلكم راني عجوزة

وهذي تارت الموز والكاراميل مممممممم بنة عظيمة كي شفتها ماكانش في المنتدى قلت نحطهالكم موضوع ساهلة خلاص في ساعة تكونو خدمتو بالعجينة بالكريمة بالكاراميل مليحة





وهذي تغميسة الخضار الحارة نتاع مقدسية اللي مثبتة في قسم المقبلات يا بنات راهي تحححفة تهبل أنا زدت معاها فقط حبة بصلة صغيرونة مع المطلوع وفرت مممممممم
راهي اقتصايدة وسريعة في نص ساعة توجد
قلتلهم في الصيف نكرهكم فيها أصبروني برك يرخص الباذنجان والطماطم والجريوات ندير منها بزاف ونخبيها في المجمد


حميس فلفل حلو داراو أختي رانا ولينا شركة نتعاونو بصح ساعات دور عليا


وهذي ثاني شركة راهي أقراص الدجاج بالارز والكريمة نتاع أم رامي بنينة تهبل بصح هنا راهي باللحم المفروم




مازالو بزاف صور نحاول نحطهم في الويكاند

حبيباتي الل علقو على طيابي ربي يخليكم


نادية قاتلي صاحبتي راكي ديتي ذنوبها أسمحيلي بصح انت ثاني لاه داخلة
أختي : fatimoncton عادي نشاركو بواش كاين انا وليت نتكاسل نصور بربوشة الحليب والفريت راكي تعرفي ماجي تحملي صورة غير بالسيف يعني نتكاسل بصح مالفة نحطهم عادي

[أم إناس]

ام راحاب شكرًا غاليتي هندي شهرين وعرفت عندي أسبوع فقط الوحم لاباس بصح معنديش النشاط باه نطيب كرهت الطياب
رياض عزيزتي ان شاء الله وهكي اممممواح
ام فاطمه طيابك اممممممميعطيك الصحه
الهام صباحك نور ويعطيك الصحه فحله وأطباق اممممممممممم
رني معول ان شاء الله ندير تليتلي احمر

[أم فاطيمة]

صباح الخير ام ايناس و الهام
من فضلكم زروني للتشجيع
https://www.djelfa.info/vb/showthread.php?t=1551050

[R I A D]

هذا عشايا البارح
كورجات مدورة محشية و سلاد و فواكه و الحمد لله




وهذي الحبة مقسومة على النص شوفي كيفاه تبان

[douniadiab4]

شكرا حبيبتي لهومة ماقدرتش نرجعلك لانو ماعنديش 1000 مشاركة ربي يعطيك ماتتمناي ولوكان تكملي معروفك وتعطيني قاطوات جدد نديرهم في زيادتي

[فتاة الدعوة]

صباااااااح الخير يا لبنات من فضلكم رابط قرتان الشفلار

[x ام رحاب x]

ام اماني اطباقك في القمة والخدمة متقونة ماشاء الله مزيد من التالق انشاء الله

[natacabell]

شكرا لكي الهام على التوضيحات و تعجبني طريقتك في السرد هههه دورتها لغة من فضلك انا من عشاق التارت ونديرها غير ب الزبدة و انتي من هادا شعال واني ديريها ب الزيت اه يا الهام شكرا لكي على كلشي ومام الشكر قليل عليك ٠٠٠٠الله يرضى عليك حبيبتي

[x ام رحاب x]

الله يبارك ام رياض اطباقك اتشهي بصحتكم