~¤ô¦¦§¦¦ô¤~ بيتك جنتك و رضاء ربك مبتغاك 7 ~¤ô¦¦§¦¦ô¤~

[سيرين 5]

صباح الخيــــــــــــر عليكم جميعا صديقاتي، واش راكــــــــــم ان شاء الله بخيــــــــــــر ؟ بداية أسبوع موفقة للجميع
أنا اليوم والله راني عيانة كيما كل ويك آند نعيا فيه أكثر من أيام الأسبوع لكن الحمد لله نقيت دنيتي و راح نبدا نطبق برامجي في التنظيف بإذن الله ممكن نعمل عليها تعديلات مازال ما علاباليش مدى قدرتي على تطبيقها ؟
راح نبدأ بالردود من آخر صفحة علقت فيها يوم الأربعاء

حبيبة: مساء النور ان شاء الله نلتقي في الجنة تيماجيني كي نتلقاو: نقولو حنا لي كنا نقصرو في منتدى الجلفة ههههههه
بالنسبة لقصتك مع عجوزتك ربي يكون معاك و ربي يفرج عليكم نقولك واش لازم ديري ؟ لازم تشوفي كاش حاجة عجوزتك تمكنة منها مثلا المسمن قوليلها علميهولي باش ديريلها زعما الشان و تحس روحها حاجة و خاصة أمام شيخك و أولادو و كل ما تجي تعملي كاش حاجة شاوريها نعملها هكذا ولا هكذا ؟؟؟ صدقيني راح تحس بالفخر و تحس روحها حاجة كبيرة، رغم أنك في قرارة نفسك تعرفيها و تعمليها أحسن منها . و عجوزتك ربي يهديها ان شاء الله و ألف ألف مبروك على خالتك بزيان السعد و لعقوبة للذرية الصالحة ان شاء الله.
فراشات العمر : بصحتكم الهدايا تاكلوهم بالصحة و الهنا، ههههههه عجبني وليدك تاع سنة أولى يخرج رسام بيكاسو ههههههههههه ربي يحفظهملك و ينجحهملك ان شاء الله . شحال نكره نقي القرنون عندي 2 كيلو لعشيا نقيهم باذن الله
أم البنين : بصحتكم الرفيس و بصحتها عجوزتك أنا عن نفسي عملتلها الخبز لي تحبو و بعتهولها راح نحط الصور لاحقا، بصحتكم الكسرة مممم تشهي راكي تغيري فيا و أنا راني صايمة هههههه كنت مشغولة بزاف و الميكرو بزاف تقيل كنت نطل عليكم من البورطابل بصح ما كنتش نقدر نرجع كنت بزاف مشغولة، ممممممم قلتلك راكي غير تشهي فيا و أنا راني صايمة ههههههه بصحتكم البطاطا بالدجاج جاتك تشهي ممممممم
الدر المكنون: و عليكم السلام شكرا بارك الله فيك
حياتي كلها أمل: بصحتكم الخبز يبان يشهي و يعطيها الصحة سمورة صاحبة الوصفة، و قد صدقتي دنيتي كانت مخروبة و كنت مشغولة بها لكن كملت و الحمد لله
نسمة صبح : العفو أختي شكرااااا كيما يقولو سقسي المجرب و ما تسقسيش الطبيب هههههههههههه رانا حاسين ببعضانا في هاذ الجانب ربي يفرج على كل وحدة ان شاء الله و لي مازال ما رزقهاش ربي بالذرية إن شاء الله كي اليوم بالنسبة لطريقة لتعليم اللغات أحسن طريقة هي الأغاني كاين في اليوتوب أغاني أطفال بالإنجليزية و لي باغول مكتوبين يحفظوهم و يتسرحو في النطق
سمراء الدنيا: بالشفاء عليك ان شاء الله طمنينا على صحتك . يعطيك الصحة على وصفات الجمال هايلين بارك الله فيك عجبتني تاع الجيلاتين نجربها ان شاء الله. و ما الجبة الله الله يعطيك الصحة على الفصالة خرجت شابة الله يبارك كل صبع بصنعة . الحمد لله على سلامتك و بصحتك العراس
لجين : لالا قرينا ردودك و بارك الله فيك و راهم جاوبوك البنات يعطيهم الصحة و صلة الرحم لازمة
جهينة اليقين: بارك الله فيك على النصائح ، عجبتني المهنة تاعك وزيرة الداخلية في الدار هههههههه
شي بيبا: يبارك فيك شكرا ان شاء الله ربي يقدرنا ، حبيت نقولك عندك مدونة ما شاء الله يعطيك الصحة
آسيا : يعطيك الصحة لي سألتي عليا ههههههههههه أنا كنت بزاف مشغولة و كنت مرة على مرة نضرب طلة عليكم من التيليفون بصح ما كنتش نشارك و الميكرو تاعي في الدار تقيل تقيل حتى تقولي نخبطو في الحيط هههههههه

يعطيكم الصحة على الموضوع التربية لي اختارتوه أنا عن نفسي بنتي 9 شهور مازال لكن كانت عندي تجربة ملي كنت صغيرة في التدريس ههههههه بديت باختي في البريمار و 2 اخوتي في البريمار أيضا و وليد جارتنا أيضا و مؤخرا ابن لوستي يحب يقرا غير عندي ههههههههه
ربي يوفق و ينجح أولادكم و بناتكم ان شاء الله و أنتم المهات ربي يعينكم أنتم السابقون و نحن اللاحقون ههههههههههه

هناء محمد: يعطيك الصحة على الفكرة 'صدقة على الوالدين' أنا عن نفسي عملت بغرير و صدقتو لأم كانت مؤخرا تعاني من سرطان ما تقدرش تقترب من الفرن كثيرا لذلك مديتلها بغرير لأولادها يشربو بيه قهوة

يعطيكم الصحة على موضوع الجانب الديني بر الوالدين موضوع مهم الأسبوع الماضي كنت نحكي مع صديقتي عنه سبحان الله للأسف ما قدرتش نشارككم الموضوع لكن طليت عليكم و طبقت اقتراح هناء سروافيكم بالصور لاحقا

و يعطيك الصحة على مشاركاتكم في جانب الجمال و الأناقة

ان لله و إن إليه راجعون ربي يرحم أخت حراير و يسكنها فسيح جناته

[سرور2]

وقيل مقرتوش ردي ولا محبتوش تردوعليا

[omelbanin]

[sizeربي يرحم الاخت حراير ياااارب
حبيبتي سبرين ،طل القمر ،انا ندير في لي غوسات نتاوعك ونقول ضركتدخل ،ضرك تدخل ..بصح معليش حبيبتي مهم نقيتي دنيتك.بالمناسبة انا تان راني صايمة. [/size]

[حياتي كلها امل]

يلاختي سرور بزاف رجال هكذا انا ايضا زوجي يشاورني ومبعد ميعجبوش راي وكي سقسي ناس اخرين يعطولو نفس راي ثم نقولو كيما الراى الي طيتهولك بصح تصرالو بزاف ومينضعرش
واخت سرين والله توحشناك وعرفتك بلي راكي غارق في الشغل ربي معاك هذه حالت المراة الخدامة

[فراشات العمر]

اختي سرين انا رايحة ندير كيفك نقي كامل الدار وباه نكمل مع الدورة
الى الملتقى ماتديروش صفحات بزاف نعيا وانا نقرى هههه راني وصيتكم

[فراشات العمر]

بالمناسبة راجلي وحد المرة قالي عاودي الباك بشرط نعاودو انجليزية وانا ماقريتهاش مليح كيفاه ندير زعمة يخليني لكان نجيبو نكمل قرايتي اواه ماشكيتش هو الحوش تاع باباه مايخلينيش نطل عليه كيفاه يخليني نقرى

[arwa alaa]

وين راكم يا فراشات
اختي سمراء ارجو منك نقل مشاركة الاخت امنيات الخاصة بعبادات شهر رمضان للصفحة الاولى راهي في الصفحة رقم 19 لتعم الفائدة ولسهولة ايجادها انا البارح حوست كل الصفحات باش لقيتها

[omelbanin]

ختي سرور الله اعلم رجال كامل كيف كيف ،انا ساعات يشاورني ممبعد يدير رايو ،وممبعد يلقى رايي هو الصح ،بصح هكذاك ويعاودها ،وما عندهاش علاقة بالدراسة راجلي انا قارية عليه وما ياخذش رايي.

[فراشات العمر]

[IMG]https://s*******-mrs1-1.xx.fbcdn.net/v/t1.0-9/13221740_277021042633338_8315210670375882470_n.jpg ?oh=0549fc35a57fca317a0dd9d654c0ed80&oe=57E3258D[/IMG]

[سيرين 5]

أولا نشكر كل أخت انشغل بالها عليا و سألت عن غيابي يعطيكم الصحة و بارك الله فيكم
بالنسبة لتطبيقاتي للأيام الماضية كانت كالآتي:

يوم الأربعاء:
غسلت الأواني - نظفت الفرن - تعشينا مرقاز و زاد جانا صحن دوبارة سخون هههههههه بعدها عملت خبز بياوورت ناتوغ لأم أماني جا هااااااايل و بعتلها منو خبزتين كيما قلنا نمدو هدية صغيرة تفرحهم أنا عجوزتي تموت عليه و جرباتو لوستي ما جاهاش مليح قالتلها عجوزتي هذا حناك العجوزة خخخخخخخخ



يوم الخميس :
في الصباح رتبت شويا المنزل بدلت الفراش و مسحت الغبرة و الزجاج و دوت الغسالة بعدها أخذت بنتي كونترول للطبيب تاعها بعدها رحت لدارنا كنت معولة نعمل ليما البراج لكن للأسف ما عملتهملهاش خرجنا رحنا درت شويا شريت نشاف هايل و من قبل كنت شريت فروطوار فيه ميترا ههههههه باش ما يتقسمش دهري

و شريت هاد العفسة من قبل تتحط فوق البوطاجي فيها جهة لا فمان و تحطي فيها الحبل تاع الماعن و تاع السلك و شيتة صغيرة ، براتيك هايلة

و شريت هاذ الأجاكس لي يجي بهاذ الشكل قلت نجربهم

و من قبل راجلي شرالي مقلاة سيراميك صحيحة و ما تلصقش و هاذ المقلاة تاع الطين تليق للطواجن نستعملها في رمضان باذن الله


رحنا قعدنا شويا في الصابلات عيانة غير لي كوبل و العشوق حتى راحت اختي شكات قالتلهم هذا اسباس فاميليال ولا تاع لي كوبل ؟ ههههههه اختي رايحة فيها بصح والله جاو لابوليس و نوضوهم حاوزوهم كامل
في المساء جا راجلي داني و رحنا إلى البيت قعدنا شويا مع دارهم و تعشينا عندهم كنت في الصباح مديتلها كيلو دقيق تاع القمح و سألتها هذا كيفاش نطيبو مع أني نعرف غير باش تحس بالشان و القيمة هوما داروه مطلوع و أنا عملتو كسرة يابسة أو الفطير
يوم الجمعة:
نشرت الغسيل - رتبت الأواني المغسولة و غسلت المتسخة - نظفت الفرن - طيبت عدس للغداء - و عملت كسرة تاع القمح و بعثت خبزة لعجوزتي



بعدها انتقلت لغرفة النوم فرشت البنك و عاودت مسح الغبار خفوفي و مسحت الأرضية، بعدها رقدت بنتي ثم انتقلت للحمام نظفته تنظيف عميق غسلت الفايونص من فوق للتحت و مسحت البلافون و في الأخير مسحته بالخل رجع يبرق غسلت البينوار و لافابو و الروبينيات مسحتهم بالخل عادو يبرقو غسلت الرآة و مسحتها و سيقت الأرضية بدلت الفوط في الحمام تاع الوجه و تاع القدمين
بعدها انتقلت للمرحاض و غسلتو سيقتو ثم الكولوار هنا ناضت بنتي و أنا ما كملتش فرشتلها في الأرض و دورت عليها المخايد و حطيتلها القراوج تاعها تلعب هههههه بعدها انتقلت لأرضية المطبخ سيقتها ( كي كنت نسيق فيها مزياااا طلعت راسي لقيت بنتي حبات حتى للكولوار قدام الدرووووج خرجت نجري ياجدك واش خرجك خلعتني لوكان راحتلي في الدروج ربي الستار) و ختمت بالبلكون و لميت كامل النفايات في كيس كبير و القارورات في كيس وحدهم
كان جا راجلي كمل شدهالي و رحت دربتها بتحميمة الله الله كي خرجت ضربت طلة لقيتكم درتو موضوع الوالدين و كان اقتراح اخت صدقة عليهم، أنا نويتها صدقة على يما تدفع عليها البلاء ان شاء الله و تطول في عمرها و يعطيها الصحة ، جاتني فكرة لوستي عندها ولدين صغار و هي كانت تعالج من سرطان و الآن الحمد لله شفيت لكن لازم تحاذر قلت نعملها بغرير أم وليد لأولادها يشربو بيه قهوة ما تتصوروش فرحتها بيه هههههه بقات غير تقول مرت خويا دارتلي البغرير و بالجسبت كي جا راجلها يديها جاب لبنتي حوتة فريشكة من البحر من لبلاد هو صيدها ههههههه



هبطت عند عجوزتي قعدنا شويا من بعد طلعنا تعشينا و إلى النوم
السبت : بعد ما شربنا قهوة رتبت شويا البيت والله يطلعلي المورال كي تكون الدنيا مرتبة لوكان تبقى هكذاك لكن يا حليل نظلو نشقاو لكن تترون بين ليلة و نهار خرجنا قضينا كانت الدار تصفر و شريت شويا خضرة باش نطيب هاذ الياملت و أخرى لرمضان إلا كنا من الحيين،و شرينا قرعة كوكا لبنت لوستي كي شدتلي بنتي و شرينا دجاجة لعجوزتي و لقيتهم لواساتي شراو لبنتي لبيسة تاع الصيف شابة يعطيهم الصحة
بعد ما رجعنا صلينا و رتبت شويا المشتريات و أخذت الثوم 3 ربطات عند عجوزتي و عاونتني في تنقيتها يعطيها الصحة و الجلبانة 5 كلغ نقاتهالي لوستي و حطتهالي في صاشيات يعطيها الصحة هي تاني

بالنسبة للثوم جاوني كيسين إلى المجمد و الثالث رحيتو و حطيتو عي علبة و فوقها شويا زيت زيتون للإستعمال اليومي


بالنسبة للجلبانة جاوني 4 أكياس حطيتهم بالمجمد

و الفلفل حلو و الحار بعد ما غسلتهم و نشفتهم

شويتهم على طريقة أم أماني ربي يحفظها فوق الطاجين تاع الطين

و حطيتهم بكيس بلاستيكي باش يسهل عليا تنقيتهم

نقيتهم و ستفتهم في صينيتين متباعدين و حطيتهم بالمجمد

و هنا بعد ما جمدو حطيتهم بأكياس و أعدتهم إلى المجمد

و بالنسبة للقارص عاودنت على سعدي شريت 5 كلغ و عصرتهم و حطيتهم في لي غوبلي و إلى المجمد

أما الدجاج لي بقيت معاه حتى 11 و أنا نقي فيه سلختو و نقيتو و غسلتو و قطعتو و حطيتو بأكياس صغيرة

هنا خملتو في سلة صغيرة و حطيتها بالمجمد

و عملت الكرموس حطيتو في بلارة و عمرتها زيت زيتون نموت عليه و لبنتي تان باش تولي صحيحة هههههههه


إن شاء الله يفيدوكم الطرق و هذي التدابير في التحضير للشهر الفضيل هاوليك علاش كنت غايبة عليكم كترة الأعمال خاصة في الويكآمد لي نتمنى كاش نهار نريح فيهم

[سيرين 5]

المشاركة الأصلية كتبت بواسطة omelbanin

[sizeربي يرحم الاخت حراير ياااارب
حبيبتي سبرين ،طل القمر ،انا ندير في لي غوسات نتاوعك ونقول ضركتدخل ،ضرك تدخل ..بصح معليش حبيبتي مهم نقيتي دنيتك.بالمناسبة انا تان راني صايمة. [/size]

الله يسلمك أم البنين يعطيك الصحة على التطبيقات والله شهيتيني
والله راني ميتة بالعيا و راني صايمة حالتي حالة مزيا ما عنديش خدمة هنا في الخدمة راني مريحة

[سيرين 5]

المشاركة الأصلية كتبت بواسطة حياتي كلها امل

يلاختي سرور بزاف رجال هكذا انا ايضا زوجي يشاورني ومبعد ميعجبوش راي وكي سقسي ناس اخرين يعطولو نفس راي ثم نقولو كيما الراى الي طيتهولك بصح تصرالو بزاف ومينضعرش
واخت سرين والله توحشناك وعرفتك بلي راكي غارق في الشغل ربي معاك هذه حالت المراة الخدامة

قستيها و الله غير قستيها كنت غارقة ، والله بزاف لوكان جا راجلي كافي نريح نربي بنتي نع البوهة خدمة ؟

[سيرين 5]

المشاركة الأصلية كتبت بواسطة فراشات العمر

اختي سرين انا رايحة ندير كيفك نقي كامل الدار وباه نكمل مع الدورة
الى الملتقى ماتديروش صفحات بزاف نعيا وانا نقرى هههه راني وصيتكم

الحمد لله كملت بقاولي حاجات خفاف و مازال نشري خزانة صغيرة لبنتي لملها فيها حوايجها راهم في السلل قلقوني

[حياتي كلها امل]

رحم الله اخت حراير وجميع موتى المسلمين

[فراشات العمر]

اختي سرين مانقدرش ندير كيفك انا كي نخرج مع راجي نخاف نقلو نشر ما يحبش
المهم حبيت نقلك رايحة نعاندك في الخبز مديلي الرابط خرج هايل والفلفل نجربو مادام جربتيه احنا نشويوه فوق الغاز على شباك
راني نستنى