وصفات حراير الكوزينة الجزء الثاني

[idron0]

الكفتاجي دائمة الحمد

الكفتاجي هوطبق لذيذ نعملوه خاصة في الصيف او كمقبلة للضياف وفي رمضان نعملو تقريبا يوميا
تقصي البطاطا مربعات وتقليها وتحطيها في صحن بلا وفوقها الطماطم تقصيها مربعات وتقلبها مع شوية زيت وملح وسنة ثوم مرابيا
وتقلي الفلفل وتقشريه وتقطعيه مربعات وتزيدي تحطيه جريوات تقصيها دوائر وتقليها وتعمليها ومن فوق تعملي البيض طايب وتجملي من فوق كيما تحبي.

إضغط هنا لرؤية الصورة بحجمها الطبيعي.

[idron0]

الروتي mizou 123

ناخذ اي نوع لحموم عنمي بقري جاج او داند، نقطع بصل وكتري قد ما يكون بزاف قد ما مليح و ثوم و حبة طماطم، قطعي البصل رقيق شوي و توم و حبة طماطم توابل على حساب كل وحدة واش تحب. تقلي اللحم مليح في الزيت ثم تضيفي لبصل و الثوم و الطماطم و تقلي شوي ثم تضيفي التوابل تقلي شوي ثم زيدي قيس كاس صغييييير ماء و اغلقي لاكوكوت مدة 20د. عينك ميزانك. كي يطيب نحي اللحم و ديريه في بلاتو تاع فور زيدي فوقو شوي من لاصوص و الى الفور و شعلي غير من الفوق يتحمر شوي. و لاصوص الباقية ارحيها بالميكسور ملييييح و ضيفيلها شوي فرماج او كرام فراش و تقدري تزيدي فيها زيتون مقطع دوائر او فطر محمو في شوي زبدة و تقدميها مع بطاطا مقلية و الروتي و لا صوص لازم تكون ثقيلة شوي. و تقدري تزيني بجبن مبشور.
ملاحظة: انا نحب نستعمل فيه ماجيقو دجاج. يجي كيما جومبو بصح في ساشي صغار.

[الرجاء الاماني المجد]

وصفات روعة يعطيكم الصحة

[idron0]

كيكة قدرة قادر أم وإبنة

نعمل كراميل عادي على نار هادية بش ما يتحرقش و يولي مر و نفرغو في المول
نخلط بالباتور بسرعة ثلاث بيضات كبار مع ثلاث ملاعق سكر و نصف لتر حليب بارد او سخون ما يهمش و معاهم لافاني و تفرغتم فوق الكراميل
نعمل جنواز سهلة نخلط ثلاث بيضات صغار او زوج كبار مع ذرة ملح و كاس شاي اللي حجمو مليح ماشي الصغير خلاااص سكر بالباتور بسرعة عالية و في اتجاه واحد يعني ندور يدي كيما عقارب الساعة كي نشوف الخليط بياض و زاد حجمو نفرغ بالشوية اقل من كاس شاي زيت مثل طريقة المايونيز ثم علبة ياوورت طبيعي او كاس شاي لبن او رايب نحبس الباتور نحط ملعقة كبيرة كاكاو اسود و باكي خمارة نخلط بسرعة بالباتور في نفس الاتجاه ثم نفرغ تدريجيا غير بالعقل اربع كيسان شاي فرينة و غير تدخل مع الخليط بسرعة نوقف الخلط
نفرغ خليط الجنواز فوق خليط الحليب و البيض يبان لك كلش ترون و تخلط ما تخافيش
حطي المول في مول اكبر منو فيه ماء ساخن، حمام مريم، و دخليه الفرن
ما تفتحييش عليه باب الفرن قبل نصف ساعة
على حسب الفرن ممكن تأخذ معاك أربعين دقيقة المهم كي تدخلي عود الاسنان و تلاقي الجنواز طابت
نحيه و خليه يبرد ثم حطيه في الثلاجة او ممكن تقليبه قبل ما تدخليه الثلاجة.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

[idron0]

مقروط المقلة mizou 123

ثلاث كيلات سميد الخاص بالمقروط و المفاجأة زووووج بيض صغار و زوج مغارف معجون تاع مشماش و عصير نص حبة قارص نخلطوهم مع بعض بالفرشيطة مليييح ملييييح ثم نضيف كيلة سمن و نبسس ملييييييح و نخليه يريح شوي. ثم نلم بخليط المازهر و الما و تشكلي حربوش و تديري الحشو في الوسط كيييييما تحبي و تشكلي عااااادي حتى تكملي كل الكمية. ثم تخليه يرتاح مرة اخرى مثلا اذا درتيه الصباح تقليه العشيا و العكس. و اكيد تعسليه و هو سخون و العسل بارد و تحطيه في كسكاس يقطر و كي تكملي عاودي اسقيه بالعسل. و من الاحسن تحتفظي بيه في حاجة تاع حديد و تغلقي عليهه ديريه في كوكوطة مثلا.
ملاحظة: لاااازم تقليه في الكسكاس تاع المقروط تاع بكري.

[ام سهام 02]

حبيبتي ايدرينو شكرا ربي يخاليك ويحفظ لك وليداتك و تشوفيهم في اعلى المراتب امين يارب

[idron0]

طريقتي في القديد omjoujou

تحكمي لحم تاعك لي راح تخلعيه تشلحيه مليح بالموس و امبعد جيبي ملح كمية كبيرة فلفل صباغ يعني العكري يكون حار شوي برك وزيدي شوي كركم وشوي ماء خلطي مليح هاذ الدووات ومبعد حطي لحم تاعك ف هاذ ااخليط خلطيه مليح حتى يدخلو الدواوات فبه وخليه يبات و الغدوة هذيك انشريه في حبل و خليه جهة الظل حتى ينشف مليح و امبعد خبيه و جبديه وقت الحاجة راهي بتنو هايلة.

[idron0]

العيش او البركوكس omjoujou

اولا البركوكس انا نستعمل لي يتباع وساعة على ساعة نقول لما تفتلهولي نظن تعرفي كيفاه تستعمليه انا نستعملو عادي نحط الما في البرمة يسخن و نجيب الكسكاس نحط فيه العيش نزيدلو شوي زيت و نحطو يفور المرة الاولى و امبعد كي يفور نسقيه بشوي ما ونخليه يتشرب و نديرلو شوي ملح و نعاود نفورو المهم نفورو 3 مرات و نخليه بجهة
نجي للمرقة تاعو نجيب القديد نحطو يغلي لمدة 15 دقيقة و امبعد نبدلو الماء تاعو و نخليه يطيب كي نشوفو طاب نضيفلو الخضرة لي عندي نقطعها قطع صغار و نلوحها انا درت بطاطا جزر لفت و فول اخضر كان ىعندي في الكونجلاتور حمص يكون طايب بصلة مرابية واذا عندك الكابويا ضيفيها و امبعد خلي الخضرة تاعك طيب كي تطيب ديري درسة تاعك والي هي في مهراس حطي شوي ثوم شوي شحمة قديمة و تقدري تستغناي عليها اذا متحبيش ذوقها زيدي كسبر مرحي فلفل صباغ حار ملح هرسي مليح هاذ المقادير و امبعد لوحيها في المرقة تاعك ضيفي طماطم مصبرة قرون فلفل حار باه يجي حار و خلي المرقة تاعك تغلي شوي و امبعد لوحي العيش تاعك لي كونتي فورتيه و خلي حتى تشوفي المرقة تاعك خثارت و طفي عليها راح تتحصلي على عيش جد لذيذ.

[idron0]

مسفوف الخضر ام وابنة

قطعي الخضر اللي عندك حسب الموجود مكعبات صغيرة و فوريهم و لكن ما تنسايش انو الجزر و كذلك اللوبيا الخضراء اذا استعملتيها ياخذو قت اكثر
يعني انا اليوم مثلا حطيت طبقة اللوبيا الخضراء المقطعة صغيرة تفور و غطيتها كي طابت شوي زدت فوقها الجزر مقطع مكعبات صغار و غطيتو و كي طاب شوي حطيتمن الفوق البطاطا حبة برك مع القرعة و البصل و الفلفل الاحمر الكل مقطعين مكعبات صغيرة و كي طابو حطيتهم يبردوا بش ما يعجنوش
فورت الطعام عااادي و منبعد زدتو للخضر مع كمية مليييحة زيت زيتون .

إضغط هنا لرؤية الصورة بحجمها الطبيعي.

[oumhadjer]

ربي يجازيك ادرينوووووووووووووووووووووووو

[idron0]

لي اكلير ام اسحاقو

كيلي بالكاس تع القازوز تع 250مل
كاس ماء+120غ زبدة+ ملعقة كبيرة سكر+قرصة ملح ديريهم فوق النار حتى يولو يغلو من بعد زيدي كاس فرينة ارميه معاهم على مرة و نقصي للنار حتى توليلك كرة ما تلصقش في الكسرونة نحيها وخليها حتى تدفا من بعد زيدي 3 حبات بيض حطيهم حبة بحبة و خلطي بملعقة خشبية او بالباتور حتى يولي خليط متجانس وديريهم في لا بوش ادوي وديريهم في الفرن في 180د النصف ساعة الاولى من بعد نقصي وديريها 160د نصف ساعة اخرى و مالازمش تحلي عليهم في 20د الاولى وكي يطيبو و يبردو افتحيهم و زيني بواش حبيتي
انا الداخل درت كرام باتيسيار.

إضغط هنا لرؤية الصورة بحجمها الطبيعي.

[idron0]

القرعة بالطماطم om kamilia

نقطعها دواائر متوسطة مش رفيعة جدا نتببلها بملح ,, فلفل اكحل ووننقليها, والطمااطم سواء ندديرررثوم شوية زيت زيتون وطماطم وفلفل كحل وخلييها تطيب وزيدي عليهاارششةنعنناع او كسبر طازج وتحطي فوقها دوائر الكورجيت خليها تتشرب شوية من الصوص
ولآ بطريقة وحدةا خرى تتقلي دوائر الطماطم في شوية زيت وتتبليهم بشوية كمون وفلفل اسود وملح تحطي عليهم دوائر القررععة المقللييين قس ما ياخذو بنة الططمااطمم وذرذرري عليهم معدنوسس وثوم مرحي او كسبر اونعناع ولآ عندك شيدار ديري شوية ويمككن تضيفي لححم مرحي فوقهم.

[idron0]

بطاطا كوشة mariya

نحضر صوص فيها طراف دجاج او لحم مع شوي بصل و طماطم و ثوم و دبشة و ملح فلفل اسود كمون كسبر و رند و زيت نقليها مليح من بعد نضيف الماء مش بزاف
نقشر بطاطا و نقطعها دوائر و نقليها نصف قليان من بعد نحطها في بايركس و نفرغ عليها الصوص و ندخلها للفرن حتى تبقى كمية قليلةو خاثرة من الصوص و يكون الجاج تحمر.

إضغط هنا لرؤية الصورة بحجمها الطبيعي.

[oumhadjer]

mille merci pour votre effort

[idron0]

محاجب السيار المعلمة الجديدة

العجينة سميد رطب وملح و خميرة تاع قاطو ونعجنها بالماء مليح نديرها بولات متوسطين نحل وحدة ونحطها فوق السيار يكون صغير ومدهون بالزيت ونجبد الاطراف حتى تغطي السيار نحط الحشو عليها كامل ونقرص واحدة اخرى ونحطها فوق الحشو ونعدلها مليح حتى تولي كيما القرصة و نقلبها فوق الطاجين رايحة تتنحى فاسيلمون.