عملت زوج رولي بعجينة جنواز و ما خليتهمش يزيدو في الطياب بش ما يجيوش ناشفين
طيبت بالواحد و غير يطيب نروليه بورق الطبخ اللي طاب فيه و لكن انا نسيت ضغطت عليه و المفروض نروليوه خفيف برك بش ما يلصقلكش بزاف منبعد
خليتهم يبردو و رحت طلعت لاشانتيي بالحليب البارد البيضاء زدت لها شوية ملون ابيض و الوردية شوية ملون احمر خفيف
فتحت لي رولي و دهنتهم بشوية عسيلة ثقيلة خلطت معاها عصير نوعية مليحة ثم حطيت الشانتيي البيضاء في واحد و الوردية في الثاني و روليتهم و قطعتهم
https://up.1sw1r.com/upfiles2/fit00019.jpg
وجدت المول اللي شفت حجمو يناسبني و فرشت فيه زوج طبقات تع الورق الشفاف و ستفت قطع الرولي فيه بشكل دائري مع الضغط طبعا و كنت نعمر الفراغات بقطع عشوائية و شوية كريمة
كي كملت حطيت صحن و ضغطت عليه مليح بيدي ثم ثقلتو بحاجة ثقيلة و خمس دقايق منبعد نحيت القارورة و دخلتو للمجمد عشر دقايق
و طبعا بفضل الورق الشفاف رايح يتنحى من المول بكل سهولة
الافضل طبعا صحن ابيض او وردي انا قلبت الدنيا على وحد الصحن عندي ابيض هايل و مشرشف بش تفكرت بلي راه عند عجوزتي قريب بكيت ووووو
كانت عند بنتي دمية جابتهالها اختي و كسرتهلها رجل و هي جديدة خبيتها عندي مدة اليوم نحيت لها الرجل الثانية شفتو الاجرام و غلفت جسمها اللي راح يدخل في الكيكة بالورق الشفاف
غرستها في الكيكة
غلفت الكيكة بالشاتيي البيضاء و عملت ورود بالشانتيي الوردية بمساعدة اسمط و اقدم و اصعب بوش ا دوي في العالم وععععع
الكريمة تع التزيين يرجع للذوق ممكن كريمة الزبدة او الكرام موسلين الداخل و لكن انا فضلت الشانتيي وحدها لاني حبيتها خفيفة و يما تحبها هكذا و كذلك فيها شوية خدمة فحبيت الكريمة بسيطة
ممكن الرولي تحشيه نوتيلا و تعملي ورود بنية فوق الفستان الابيض بصح يما تكره الشيكولا مووووت خخخخ
ان شاء الله الفكرة وصلت و اي استفسار انا في الخدمة
نروح نفطر و نراجع و نولي