موضوع مميز طبخ الأعراس - الصفحة 6

بصيرة2 · 2014-10-08, 15:42

ربي يحفضك حبيبتي ويعطيك قد تعبك وكلش راني سجلتو البربوشة يعني الكسكسي احنا في الشرق نقولو البربوشة
وبالنسبة لعود القرفة فعلا لازم الوحدة تقسمو انا خطرة حليت عود قرفة لقيتو مدود حاشاكم

صدفات · 2014-10-08, 16:05

سلام يا روح مراد
حبيت نسالك في ما يخص الشربة أنا دايما في الوليمة عراس خاوتي الحج .....الخ ندير الحريرة تخرجلي مليحة بدون فخر والصراحة أنا نهرب من الشربة لأنني نخاف من الفارميسال من العبر خصوصا إذا كانت الكمية كبيرة 200 أو 300 شخص
ما تقوليليش عينك هي ميزانك نحوس نعرف إذا عندك كاش عفسة ههههههههههه

روح مراد · 2014-10-09, 10:08

zصدفات
نعطيلك الطريقة اللي رايحة تكيلي بيها نهار تكوني قاعدة و رايحة طيبي شربة فرميسال في الدار طيبي بالكيل مثلا القدرة نتاعك العبر نتاعها كاس فرميسال و الديها هي الميزان من بعد كيلي القزان نتاعك شحال يرفد من قدرة مثال
القدرة منتاعك توكل 5 أشخاص
و انت عندك 100 شخص رايحة تكيلي 20 قدرة و تفرغيها في القزان تشوفي العبر نتاع الماء وين يلحق في القزان و من بعد نكيلو 20 كاس فرميسال
و مع الوقت تولي تعرفي بمجرد ما تحركي إذا تزيدي أم لا

بصيرة
أنتوما في الشرق الطيبو كسكسي مرقة حمرة
الفكرة عندكم في بنة الكسكسي الأحمر هو في ترقاد اللحم في البداية
أحكمي 15 قطعة لحم أو دجاج ديريها في طبسي كبير
ديري في طبسي آخر مغرفة عكري حلو + الملح+ الفلفل الأسود + 2 ملاعق طماطم مصبرة و 3 مغارف أو 4 زيت و خلطي الكل و فرغي على اللحم و خلطي مليح باش يدخل فيه الخليط و خليه في الثلاجة
إذا كنت مزروبة خلطي و طيبي مباشرة
سكرفجي 2 حبات بصل كبار و حطيهم في القدر و فرغي اللحم عليهم و 2 حبات طماطم مرحية + نصف عود قرفة و خلي الكل يتقلى على نار خفيفة لمدة 15 إلى 20 دقيقة من بعد مرقي بالماء المغلي
إذا كانت عندك الحميصة مشمخة زيديها مباشرة كي تمرقي إذا عندك حميصة طايبة زيديها في الأخير
بالنسبة للكسكس فوريه عادي فوق اللحم
من بعد كي يطيب دهنيه
بالنسبة للخضر غير يطيب اللحم نحيه و غطيه جانبا و ضيفي الجزر هو الأول
الخضر تقدري ديري الجزر + القرعة
أو القرعة + لفت
أو الجزر و القرعة و اللفت
كاين اللي يضيف حتى الخرشف بالصح ماشي للعرضات للكسكس اللي نطيبوه للدار
الميزان على حسب واش رايحة الديري
مثلا 4 حبات جزر + 4 لفت + 4 قرعة أو 3 حبات من كل شيء كل واحد كيفاش يحب المرقة نتاعه
باش تعرفي القيس نتاع المرقة لازم تكيلي بالغراف
كل طبسي ديريلو 2 غرارف و من بعد زيدي للاحتياط

صدفات · 2014-10-09, 13:50

شكرا روح مراد على الفكرة هي معقولة ونقدرو نطبقوها على جميع الأطباق.

alchimi · 2014-10-09, 19:41

اقتباس:

المشاركة الأصلية كتبت بواسطة صدفات

سلام يا روح مراد
حبيت نسالك في ما يخص الشربة أنا دايما في الوليمة عراس خاوتي الحج .....الخ ندير الحريرة تخرجلي مليحة بدون فخر والصراحة أنا نهرب من الشربة لأنني نخاف من الفارميسال من العبر خصوصا إذا كانت الكمية كبيرة 200 أو 300 شخص
ما تقوليليش عينك هي ميزانك نحوس نعرف إذا عندك كاش عفسة ههههههههههه

السلام عليكم أختي

بارك الله في كل وحدة تقدمنا معلومة في هدا المجال

ممكن أختي تعطيني مقاديرك للحريرة

يعطيك الصحة

روح مراد · 2014-10-12, 08:56

صدفات أجري تخدمي
الأخت تطلب مقادير الحريرة

صدفات · 2014-10-12, 09:53

اقتباس:

المشاركة الأصلية كتبت بواسطة alchimi

السلام عليكم أختي

بارك الله في كل وحدة تقدمنا معلومة في هدا المجال

ممكن أختي تعطيني مقاديرك للحريرة

يعطيك الصحة

صباح النور يا اختي
كنت في المرة السابقة قلتيلي على الحريرة اولا يليق تشري من السوق تشيشة و يا ريت لو كانت مرمز
في طنجرة تحطي زيت مع البصل مقطع رقيق مع الحم لي عندك انا ندير الداند من الفخذ يجي بنين تخليهم يتقلاو مليح تضيفي لهم الخضار مقطعة جزر لفت بطاطا كورجات تقلي مليح على نار هادية ضيفي لها الملح حرور راس الحانوت كروية كركم وزنجبيل طماطم مصبرة حوالي ملعقة اكل وتمرقي بكاس ماء وتكوني حضرتي البوكي نتاعك فيه قصبر كرافس وحد العشبة حنا نقولو لها لحية الشيباني او لحية الشيخ و هي لي تعطي نكهة مميزة لحريرة التيارتية تضيفي هاذ الاعشاب وتمرقي حوالي لتر ونصف و تخليها تكمل طيابها حوالي ساعة و من بعد تنحي الحم البوكي وتطحني المرق ترجعيه فوق النار منين يغلي ضيفي تشيشة حوالي 150غ (مع الخضرة جي قد قد ما ثقيلة ما جارية ) تهفي النار كي تبغي طفي تكوني موجدة 2 سنات ثوم مع ملعقة قهوة كروية تهرسيهم مع بعض و تضفيهم مع عصرة ليمون و شهية طيبة
انا مع الاخير نزيدلها حمص طايب و الحم مفتت مع شوية حشاوش خاصين بالحريرة إن شاء الله مانكونش طولت عليك.
هذه الكمية تكفي 8 أشخاص ما عليك غير تضاعفي الكمية حسب المطلوب.

صدفات · 2014-10-12, 09:57

صباح النور يا أخت مراد
راني هنا

روح مراد · 2014-10-12, 09:57

merci يا صدفات قافزة الله يبارك

تغرينية · 2014-10-12, 17:06

راني نستفاد منكم تاع الصح الصح شكرا لكم

صدفات · 2014-10-13, 08:37

اقتباس:

المشاركة الأصلية كتبت بواسطة تغرينية

راني نستفاد منكم تاع الصح الصح شكرا لكم

صباح الخير لكل البنات
صح يا تغرينية رانا الكل نستفادو
روح مراد الوبيا الخضرا نتوما في الوليمة ديروها مرقة حمرا بطماطم و اللحم و لا سوتي مع المحمر

روح مراد · 2014-10-13, 08:53

صباح الخير صدفات
اللوبيا الخضراء نديروها باللحم و الطماطم مرقة حمراء
مي مانديروهاش في الولائم الكبار
يعني مثلا العرس عندنا يكون يوم الخميس في الليل
اللوبيا نطيبوها عشا عشاء للمقربين اللي يكونو حاضرين بوم الأربعاء أو نطيبوها فطور للمقربين اللي يكنو فالدار يوم الخميس على 12
احنا مثلا نديرو العرس في الدار يكون عندنا ديما حوالي 100 شخص على 12 يفطرو على هاذيك نطيبوها باش تكون فطور خفيف و ساهل و ما يديش وقت كبير
بالصح هاكا وليمة كبيرة مانديروهش
عادة يديروه في الجنازات تقريبا كامل الناس أو كي يكون هاكا فطور أو عشاء للعائلة الكبيرة

صدفات · 2014-10-15, 15:51

مساء الخير وين راكي يا روح مراد وين غطستي نضن راكم في منطقة وحدة و على هذا ما بنتوش في زوج أنت و أم حمزة الغالية.

alchimi · 2014-10-15, 23:39

اقتباس:

المشاركة الأصلية كتبت بواسطة صدفات

صباح النور يا اختي
كنت في المرة السابقة قلتيلي على الحريرة اولا يليق تشري من السوق تشيشة و يا ريت لو كانت مرمز
في طنجرة تحطي زيت مع البصل مقطع رقيق مع الحم لي عندك انا ندير الداند من الفخذ يجي بنين تخليهم يتقلاو مليح تضيفي لهم الخضار مقطعة جزر لفت بطاطا كورجات تقلي مليح على نار هادية ضيفي لها الملح حرور راس الحانوت كروية كركم وزنجبيل طماطم مصبرة حوالي ملعقة اكل وتمرقي بكاس ماء وتكوني حضرتي البوكي نتاعك فيه قصبر كرافس وحد العشبة حنا نقولو لها لحية الشيباني او لحية الشيخ و هي لي تعطي نكهة مميزة لحريرة التيارتية تضيفي هاذ الاعشاب وتمرقي حوالي لتر ونصف و تخليها تكمل طيابها حوالي ساعة و من بعد تنحي الحم البوكي وتطحني المرق ترجعيه فوق النار منين يغلي ضيفي تشيشة حوالي 150غ (مع الخضرة جي قد قد ما ثقيلة ما جارية ) تهفي النار كي تبغي طفي تكوني موجدة 2 سنات ثوم مع ملعقة قهوة كروية تهرسيهم مع بعض و تضفيهم مع عصرة ليمون و شهية طيبة
انا مع الاخير نزيدلها حمص طايب و الحم مفتت مع شوية حشاوش خاصين بالحريرة إن شاء الله مانكونش طولت عليك.
هذه الكمية تكفي 8 أشخاص ما عليك غير تضاعفي الكمية حسب المطلوب.

يعطيك الصحة أختي على الرد وعلى الشرح بالتفصيل
ربي يعطيك ما تتمناي

روح مراد · 2014-10-16, 08:58

صباح الخير ياصدفات
راني هنا و لكن نتوما كامل هربتو من المنتدى
كنت نخمم نفتح كاش موضوع يفيد كامل الأخوات بالعازبات و المتزوجات و لكن ما عرفتش واش هي أكبر حاجة راهي مقلقتهم
أعطوني فكرة و نقاشوها