أجريو شوفو قبل لا يرجعو 20

[إلهام07]

البسملة1

مساء الخير حبيباتي

المضحك في الأمر أنني نطبق الوصفات ومانتكاسلش بصح نتكاسل نحمل الصور ونكتب موضوع نحط فيه تطبيقاتي ، تبهديلة هذا واش اسمو .

كل يوم نقول نحط التطبيقات نلقى روحي زدت طبقت حاجة جديدة والقائمة قاعد تكبر يا ويلي أسبوع وأنا نكتب في موضوع وزيد النت ثقيلة والمنتدى ساعات مايفتحش باليومين هبلني المهم راني خزيت الشيطان وقلت نبدا داشة داشة حتان نكملهم .

التطبيق 1 : كيكة 14 ملعقة
جات خفيفة وبنينة وشيكولاطية تهبل ههههه طبعا أنا غيرت كي العادة في الشكل درتها زوج طبقات ( شششششش نقلت على أم نجم هههههه ) وماقطعتهاش قطع يعني مانقلتش كل شيء ودرتها تارت لاخاطر كانو عندنا ضياف الغفلة نتاع كل مرة كلاوها وعجبتهم كي العادة قريب ماخلاوش أنا نصور ونعاود فيها على 6.00 نتاع الصباح بايتة نحلم بيها :


وهوما هذا ماخلاولي وععععععععععععع :

* ملاحظة الجوز راهو مسروق

الرابط : https://www.djelfa.info/vb/showthread.php?t=1253830

التطبيق 2 : سفنج روزا للمرة الثانية
خفيف وبنين وساهل ماهل وسريع كانو عندنا هذوك الضياف ( اللي بالي بالك ) وماكاين والو للفطور وأنا خدامة نخرج من الدار على 6.30 مالقيت غير سفنج روزا يفكها طيبتو وصورتو وخرجت نجري للخدمة وكلاوه وماخلاوليش :

الرابط : https://www.djelfa.info/vb/showthread.php?t=1287840

التطبيق 3 : دولمة جريوات نتاع أم ماجد حبيبتي
كيما قلتلها حقق الطبق انتصار عظيم عجب كل الأسرة ( التي لا يعجبها العجب ) وطلبوه يتعاود بكمية كبيرة
أم ماجد واقيلا نديرو كيما الأندية نتاع كرة القدم نديرلك إعارة جي طيبيلهم في دارنا هذا ثاني طبق نطبقهولك ويعجبهم بزاف :

قدمتو مع هريسة بريق الأمل

الرابط : https://www.djelfa.info/vb/showthread.php?t=1301806

التطبيق 4 : للمرة الثانية هريسة بريق الأمل الخطيرة
مالقيت مانقول فيها رووووووعة وراهي بدات دير العدوى نتاعها هنا في المنتدى وطبقوها العديد من الأخوات

زاكية اقتصادية وبنة خطيرة راني ندير ونعاود :

هاهي الوصفة لاخاطر بروقة ماحطتهاش موضوع ، اتمنى تحطها للاستفادة:
هريسة بروقة
الهريسة خدمتها تجي روعة مع المشاوي
حبة بصلة وراس ثوم وفلفل اخضر حار وحبتين طماطم وماء وملح في الميكسور
تترحى مليح حطيها فوق النار زيديها وحدة جومبو اختياري وكمون وكروية وزيت وفلفل احمر حار مرحي بودر ومغرف طماطم علب
تعقد مليح تنشف على الزيت وحطيها في بلارة والى الثلاجة
https://www.djelfa.info/vb/showthread...296728&page=12

التطبيق 5 : طاجين التونة للأخت درة بيتي
رأيي بصراحة : البنة بنين ويستاهل طبقوه عجبني بزاف بصح من الأحسن لو البطاطا مقلية لاخاطر راهي تفتت خلاص كي عادت مغلية مسبقا بصح أكيد الطبق لذيذ :

الرابط : https://www.djelfa.info/vb/showthread...E1%CA%E6%E4%C9

التطبيق6 : تارت الفراز نتاع أم كوثر
رهييييييييييبة بصح أنا فقط درت 3 بيضات يعني نصف الكمية وشوفو الخطورة اللي يقدرو يديروها غير 3 بيضات ماتستهانوش فيهم أعتقد الصورة معبرة جدا وفي غنى عن تعليقاتي :


الرابط : https://www.djelfa.info/vb/showthread.php?t=538389

التطبيق 7 : حلوة البنينة للأخت شمس الأصيل
أخواتي عجبتهم بزاف يحبو حوايج النواد كوكو وسماوها حلوة الباونتي "BOUNTY" ( كيما الماكسي ).
نصيحتي للأخوات اللي يحبو يطبقو الوصفة :
* خشنو طبقة الشكلاطة باش الحبة من بعد تتنحى من المول وإلا تتكسر وتلصق فيه
* ديرو وصفة صابلي يكون هشوش كيما نتاع أم رامي الوصفة نتاع الأخت جات شوية مقرمشة وتتعالك كيما الماكارون.
* ديرو نصفا الكمية نتاع عجينة الصابلي الي في الوصفة أنا درت الكمية كاملة عطاتني أكثر من 60 حبة حوالو عينيا معاه
* كثرو المعجون حتى يتلم النواد كوكو باش كي تاكلو القاطو مايبقاش يتفتت.


الرابط : https://www.djelfa.info/vb/showthread.php?t=1320837

التطبيق 8 : تطبيقي لدرس معالجة الكاوكاو لام إسلام آية
راني طبقت الوصفة والكاوكاو بقى حوالي أسبوع باش نشف مليح من داخل مع أنني دخلتو للفرن كيما قالت أم آية واللون نتاعو تحول إلى البرتقالي لاخاطر حطيت فيه مبشور البرتقال ماكانش عندي الليمون بزاف أم كوثر راني نمضي في سنيا إذا فهمتي القصد هههههه


التطبيق 9 : تطبيقي لمربعات الشفلور

ونصيحتي فيه كثرو مبروش الليمون ونقصو الشابلير باش مايجيش معجن وأيضا صغرو المربعات باش يجي ساهل في العمل .

الرابط : https://www.djelfa.info/vb/showthread...D4%DD%E1%E6%D1

التطبيق 10 : تطبيقي لمقلوبة بالمرقاز نتاع ام رامي
روعة أقل مايقال طبعا أطباق أم رامي لا تحتاج شهادتي فيها صدقوني طبق جد لذيذ باش ماتستغربوش الشكل أنا درتو بالمرقاز المخادع نتاعي يم يموالله بنين يهبل غير جربوه

الرابط : https://www.djelfa.info/vb/showthread.php?t=941971

التطبيق 11 : تطبيقي لقاطو الملفوف للأخت حفيظة 42
بنين، خفيف ، يذوب في الفم ، هشوش واهم حاجة ساهل في الخدمة ومايديش الوقت واقتصادي درت نصف الكمية للفاتحة نتاع أختي جا هايل ودار السوكسي في العرس كلاوه كامل واللي بقى داوه معاهم ههههههههه
نصيحة فقط قد ماتقدرو ديرو الحربوش رقيق راهو يطلع بزاف
وللعلم هذه الكمية تقطع 60 حبة أو أكثر بقليل

الرابط : https://www.djelfa.info/vb/showthread...CD%DD%ED%D9%C9

التطبيق 12 : قريوش لسان الطير
هو صح الموضوع حطاتو حبيبتي الغالية على قلبي الوهرانية1 بصح أنا كنت نديرو من قبل هذو 4 سنوات ملي جبت الوصفة ورجعت نديرو ديما في الأعياد بصح هذا لا يمنع نشكر الوهرانية على الموضوع .
هذا راهو درناه ثاني للفاتحة نتاع أختي .

الرابط : https://www.djelfa.info/vb/showthread.php?t=1168531

التطبيق 13 : بسبوسة بدون بيض للأخت فايزة
هي في الأصل ماشي بسبوسة هي بين قلب اللوز والبسبوسة لاهذي لا هذي يعني حاجة وطعم جديد
راني وفيت وعدي فيوزة وطبقتلك وصفة ومازال انتطريني

الرابط : https://www.djelfa.info/vb/showthread.php?t=1130867

التطبيق 14 : أومليت بلا زيت لام انس
حبيبتي أم انس المبدعة بوصفاتها دائما لازم يكون كاين تطبيق ليها جربت فريت أمليت ساهل ماهل والبطاطا من داخل طابت ولات طرية يعطيك الصحة حبيبتي كان ماعندي والو وكنت متكاسلة نطيب تفكرتها درتها ودرت فيها هريسة بروقة من داخل يم يم :

الرابط : https://www.djelfa.info/vb/showthread.php?t=1295135

التطبيق 15 : ميلك شايك المشماش نتاع فايزة
نقول حاجة وحدة فيه : يهبل يهبل يهبل يهبل يهبل يهبل لاااااااازم جربووووووه خاصة كي درتو بعسل ام انس رووووعة زاد الطعم غنى رووووعة غير جربوه يهبل وبارد وثقيل يم يمي مي
بقاتلي شوية شانتيي زينت بيها كيما شفتهم يديرو في قناة فتافيت
هذيك الشكلاطة جاتني هدية قلت نحطها في الصورة باش نغيركم بيها ونفوخ عليكم شوية هههههه

فايزة ماحطتش الوصفة موضوع هاهي الوصفة على لسان صاحبتها :
300غ مشماش نقطعه قطع صغيييييرة معه نخلط مع كاس عسل من الأحسن المصنوع في البيت بعصير الليمون والفاني ونضيف لها نصف مغرف كبيرة قشور ليمون ، ونديره فوق النار ل5د ونحن نحرك
ونحيه يبرد ، نضيفله 4كيسان حليب عادي و4مغارف ماءبارررررررررد ، ومغرف كبيرة فانيليا، وونرحي الكل بالبرا ميكسور

ونصفي الخليط ، نكون مطلعين الشانتيي جانبا نضيف 3مغارف كبار للخليط ونعاود نرحي الكل ، ويقدم بارد امممممممممممممممم

التطبيق 16 : حلوة ساهلة لشرب الشاي
جربتها وساهلة الصراحة وخفيفة من داخل وهشوشة بصح تشرب الزيت عجب وتفتت خلاص بصراحة ماعجبتنيش مافهمتش وين الخطأ

الرابط : https://www.djelfa.info/vb/showthread.php?t=1324597

التطبيق 17 : جبن للطلي ساهل ماهل للأخت صفاء البحر
الصراحة ماصلحليش ومافهمتش السبب ثقال غير شوية وحبس مع أنني اتبعت التعليمات بدقة

كي خليتو بات تصفى الثقيل الفوق والجاري تحت وليت نهز غير من فوق ونستعمل وهو في الحقيقة بطعم المايونيز وليس الجبن استعملتو للسلطة غاضني نرميه لسلاحف النينجا

الرابط : https://www.djelfa.info/vb/showthread.php?t=1329856

التطبيق 18 : سلطة كرمب على طريقة كنتاكي للأخت إيمان
لذيذة طبعا للناس اللي يحبو السلطة ويحبو الكرمب تعجبهم بصح نصيحتي ديرو فقط ربع كرمبة لانو السلطة هذي زاكية وماتنساوش الكرمب ثقيل ويعطي احساس بالانتفاخ والشبع لهذا ينصح به للريجيم لانه فيه ماء بزاف

الرابط : https://www.djelfa.info/vb/showthread...9+%DF%D1%E3%C8

التطبيق 19 : أرز ودجاج في أكياس الشواء نتاع ام أنس
وختامها مسك روووعة غير جربوه بنين يهبل وحاجة جديدة حسيت روحي كأنني راني في الهند ناكل في الأرز ماشي في دارنا خخخخخ بنين بصح نصيحة ديرو أرز فاير باش مايتفتتش :

الرابط : https://www.djelfa.info/vb/showthread.php?t=1314488

إذا شفتو بعض الصور غير جيدة فهذا يعني أنني تعبانة ورايحة نطيح نصور بنص عين هههههه لذا أعذرو قلة جودة بعض الصور .

نشكر كل الأخوات اللي استفدت من وصفاتهم ربي يجعلها في ميزان حسناتهم آمين

ما تتقلقوش غدا إن شاء الله نحط الروابط