مشاركتي في مسابقة شاف مطبخنا 3 الحلويات

[الوهرانية 1]

اخواتي الكريمات اولا حبيت نشكر كل وحدة وقفت معايا وسالت علي ودعاتلي بالشفاء واعتدر منكن ان كنت بعيدة على المستوى المطلوب لان الطبيب منعني من الاقتراب من الحرارة ونصحني ان ابتعد عن المطبخ خلال هدة الفترة حتى تجف الحروق لكن لانكم عزاز وغاليين عليا قلت نقدم ليكم حاجة خفيفة وبسيطة برك المهم نكون في الموعد
بسبب المشرفات رجعنا من طباخات الى مصممات ازياء هههههه المهم هاهي عروستي الي حابة تخطب ونقولكم لنها بسيطة جدا واي وحدة ممكن تعملها حتى ولو عمرها ما دارت طورطة وفيها فكرتين جديدتين من ابتكاري ههههههههههه شفت المرض واش يدير وزيد تحضر في وقت قياسي في ساعة تكون واجدة راني نهدر على خصالها باش يكثرو الخطابة عليها ههههه
الفكرة 1 / عجينة البسكويت للتغليف
الفكرة 2 / وياغورت بالفاكهة لحشو االطورطة

نمرو للمراحل والتحضير اعتمدت على البساطة والسهولة وهي في متناول المبتدئات واقصد هنا الي مجربتش من قبل الكيكات والكريمات يعني ممكن تكون هادي درجة اولى في السلم ومن بعد تتعلم اكثر واكثر وتنوع في الكريمات والحشوات

اولا عجينة البسكويت
هي عجينة ممكن تنفعك في يوم لتغليف الكيك الصراحة هي عجينة اللوز لكن بدلت اللوز ببسكويت مرحي غبرة
نحتاجو 250غ بسكويت مرحي أي نوع تحبي انا استعملت تع 10 دج
250غ سكر ناعم
ملعقة كبيرة زبدة طرية
ملون غدائي
شربات في نصف لتر ماء 250غ سكر
تحضير العجينة/ سكر + بسكويت مرحي وزبدة نخدمهم مليح من بعد نضيف الشربات باردة وتكون عاقدة ماشي خفيفة من الاحسن نضيفي اللون الابيض من بعد نصبغو العجينة حسب الرغبة




حضرت الجينواز درت 4 حبات بيض لاني حبيت ندير الدمية جالسة ماشي واقفة 4 بيض- 120غ سكر -150غ فرينة -رشة فانيلا -كيس خميرة حلوى

قطعتها على 4

حبيباتي لاني منقدرش نحرك يدي بزاف استغنيت عن الكريمات لاني نعتمد في طرطاتي على كريمة الزبدة بخليط النشاء ولكن يتطلب التحريك المستمر على الفرن وانا ممنوع عليا الحرارة
فكرت في طريقة ولقيت هادي

نعم ياغورت الفواكه استعملت جنينة وعصير كوكتال

نبلل قرص الجنواز بالعصير ثم نحط الياغورت وهكدا حتى نكمل الاربع قطع

حليت عجينة البسكويت

حطيتها على الاقراص ووضعت الدية في الوسط انا استعملت غير نصفها الارجل لا و لفيتها بالمنيوم لان الجزء راح يدخل في الكيك

زينتها بكريمة شونتي


وورود عجينة اللوز


شكل الفستان من الوراء

باقي الصور


شكلها من الداخل




في الاخير تحياتي لكل الحبيبات وحظ موفق للمتنافسات الغاليات
واعدروني مرة اخرى وراعو ظروفي لانو ماكانش حاجة من مقامكم وتمنيت نقدم اكثر
للعلم فهي من مجهودي الخاص وماجبت حتى حاجة ولا فكرة من قوقل او منتدى اخر وهادي في كامل وصفاتي في المسابقة
لانو منتدى الجلفة يستاهل انو الواحد يخدم راسه شوية ويعصر ابداعاته ويقدم الجديد لاول مرة ومايكونش في منتديات اخرى
[/B]