السلام عليكم
حبيت نشاركم انا تاني بالتحضيرات
اولا نغسل الفريجيدار و نقي الثلاجة مليح و نجمد فيها الطماطم حب هكذاك و لما تولي عندي كمية كبيرة نجبدها كامل نطيبها في زوج كوكوطات و لما تنشف تماما نرحيها بالروبو و نفوتها فالرحاية اليدوية هكذا يبقة القشور و الزريعة ما تنزلش
نضيف للصوص زيت و ملح و فلفل اسود و ثوم مرحي و نطيبها ربع ساعة و نطفي نخليها تبرد تماما و نحطها في علب اذا استعملت قد 3 قرصات نحطها في علبة المرغرين تاع نصف كيلو اذا زوج صغار نحطها في نتاع 250 غ و اذا رح نعمل كمية كبيرة للغدا و العشاء مثلا نحط في لي بوغت مونجي كمية كبيرة
نشوي الفلفل الحلو و نقشرو انا نشويه فالفرن على نار قوية يجيني ساهل فالتقشار و يبقى نظيف ما يطلقش لكحولة و تم تم نقطعو حتى ما يطلقش ماه نكونجليه في علب المارغرين يوم نحب نستعملو زيادة او ما نكونش قاعدة نقطع العلبة بالسكين يجي نازل نضيفلو صلصة الطماطم او نرحي زوج حبات طماطم و شوية فلفل اسود و ملح و ثوم مرحي و نغطيهم على نار قليلة حتى يطيب و ينشف انا نحبو حميص على كارو ما نحبش المشوي بالخل و كل واحد و ذوقو
الفول نجمدو هكذاك مفصص في كيس او اثنين كبار و لما نحتاجو للبربوشة او العيش نحطو في ماء يغلي دقيقة و نقشرو ثم نحطو فالمرقة
الجلبانة نحطها في علب لما نحتاجها للروز او البويون نخلط فقط العلبة شوية و نجبد بالملعقة
الدبشة و الكرافس و المعدنوس نفرزهم و ننزع الحشائش الضارة و العروق المذبالة نغسلهم بالسيقان نتاعهم مليح و من بعد ننفضهم مليييييييييييييييييييح من السيقان و نحطهم بين زوج سارفيات قماش او ورق حتى ينشفو مليح لانو الماء هو لي يذبلهم
السيقان نقطعها نخبيها للشربة بويون يعني و الاوراق نقطعها رقيقة و كل نوع في علبتو وقت ما نحتاج نجبد و نحط مباشرة فوق الصحن
القارص نخبيه حبات ما نعصروش و نخير الحبات الصغار لي قشرتهم رقيقة هادوك فيهم عصير بزاف
نغسلهم و نرابي الزاست نحطو في كيس ثم في علبة محكمة الاغلاق و نكونجليه و الحبات نحطهم في كيس كبير و نجمدهم وقت ما حبيت نستعملهم نجبدهم بساعات فقط
نعمل حلويات نجمدهم للسهرة لما يجونا ضياف
الكسرة و خبز الدار يوم نعمل كسرة بكمية كبيرة و يوم خبز الدار يوم بريوش و نجمدهم و كل مرة نوع من هاذا و ذاك
عصير البرتقال ما خبيتش الكونجيلاتور نتاعي صغير نتبردو بالمثلجات و الفقوس بارد و الفلان طبعا
الفريك نشرو حب و نغسلوه و نملحوه و نخليوه ينشف مليح ثم نرحيوه و يتصفى و نستعملوه للجاري
التوابل نستعمل فقط فلفل اسود ديما عندي و القرفة و باقي اللوازم
نشري النشاء و اللوز و الكوكاو للسهرة و للعيد ان شاء الله بشهر قبل لانو لما يقرب رمضان يزيدو و في رمضان يصبح ثمنهم الضعف حتى النشاء و النواد كوكو
الزبدة كل مرة نخبي باطة حتى لحلويات العيد ما نحتاجش حتى الشكولا كل مرة نشري طابلة حتى تخف المصاريف
كاشما نتفكر نزيدكم
اللهم بلغنا رمضان