حساء النودلز من مطبخي

[إلهام07]

البسملة1

حساء النودلز

Soupe De Nouilles
Noodles Soup

صباح الخير حبيباتي

نزولا عند رغبة الجميع هذي وصفة حساء النودلز اللي طلبتوها ..... باقي الوصفات سوف تأتي تباعا بإذن الله مانقدرش نحط أكثر من موضوعين في 24 ساعة .

هذا الحساء وصفة آسياوية فعلا رائع لذيذ وسخون وحار وأهم حاجة سريع مايديش الوقت ومدام يعجب ماما يعني يعجب الناس كامل .
ننصحكم جربوه انا راهو رجع مايخطيش من مطبخي نحضرو عدة مرات في الشهر كل أسرتي تحبو وكي نديرو ياكلو ويزيدو وحتى كي تبقى منو شوية في الغد يتهاوشو عليه .
المقادير: هذه الكمية تكفي لـ 5 أشخاص
* قطعة اسكالوب ( نصف صدر دجاجة )
* 4 اكياس نودلز ( ماركة إندومي وليس جومبو ) أنا نستعمل نكهة الدجاج الخاص الكيس البني .
* 1 قرن فلفل حلو مقطعة مكعبات
* 1 حبة بصل مقطعة مكعبات
* 2-3 حبات جزر مقطعة دوائر
* كمية مليحة من :كرفس و دبشة مقطعين ( ضروريين في الوصفة )
* 1 مكعب مرق دجاج ( ماجي )
* 4 فصوص ثوم مقطعة شرائح
* 3 أوراق رند
* التوابل: ملح + فلفل اسود + كسبر + ثوم بودرة + فلفل احمر حلو ( هذا اختياري ماشي شرط ، ماديروش الحار لانو توابل الاندومي حارين يجيكم الحساء حار يشوي ).
* 4 ملاعق زيت + 1 ملعقة كبيرة معمرة مليح زبدة للتقلية
الطريقة :
* نبدى أولا نظف الخضار ونقطعها .



* في كوكوط نحط الزبدة والزيت ونضيف الجزر+البصل+الفلفل ونقلي حتى تذبل مليح الخضار ( لازم نقلي مليح ولكن بدون مانحمر الخضار).

* نضيف الآن الاسكالوب ( ماتقطعوش الاسكالوب باش تجبدوه بسهولة من بعد من المرق ) + الكرفس + شرائح الثوم ونقلي شوية حتى يتحول لون الدجاج من الوردي إلى الأبيض.

* نضيف الآن التوابل المذكورة في المقادير ونزيد نقلي شوية ( انا حطيت شوية فلفل احمر حلو ماي شرط تحطو فلفل أحمر ).

* الآن نضيف أوراق الرند ومكعب الماجي ونمرق ( كمية الماء = عدد أكياس الاندومي + 1 .... يعني عندي 4 أكياس اندومي نحط 5 أكواب كبار ماء = 1لتر وربع ).

* لما يغلي الحساء نغلق الكوكوط ونحطها على الكانون الصغير ( باش ماينشفش المرق وطيب في غرضها ) ونخليها طيب حوالي 30د .
* كي طيب نفتح الكوكوط وننزع قطعة الاسكالوب ونفتتها ( لأنها سخونة أنا نفتتها بزوج شوكات باش مانتحرقش ).

* نرجع الاسكالوب للمرق ونرجع المرق على النار.
* الآن نكسر الاندومي ونضيفها للمرق ونخليها تغلي ( تحتاج حوالي 5د وتكون واجدة ) .

* في هذا الوقت نضيف التوابل نتاع الاندومي ( اللي مايحبش الحار ينقص من أكياس الفلفل الاحمر -بابريكا - مايديرهمش كاملين ممكن تنقصو واحد ) ونبقى مرة على مرة نحرك .

* قبل مانطفي نضيف قطعة زبدة ( 1 ملعقة كبيرة ) + كمشة مليحة نتاع دبشة مقطعة تكون طازجة نحرك ونطفي النار ( خليت الدبشة حتى النهاية باش تحتفظ باللون والريحة نتاعها )

* تقدم مباشرة راهي حارة وسخونة وبنينة توالم بزاف فصل الشتاء .... بالصحة والهناء .

· ملاحظة : ممكن تحضروها بكرات اللحم المفروم لكن انا تعجبني بالاسكالوب أكثر ... أخواتي يحبوها باللحم كل واحد وذوقو .
· إذا حبيتو تحضروها بكرات اللحم المفروم : تحضروها بنفس الطريقة ولكن كرات اللحم ترميوها لما يغلي المرق قبل ماتغلقو الكوكوط .

هنا حضرتها بكرات اللحم المفروم

جربوه فعلا حساء رائع أنا راني تقريبا نحضرو أسبوعيا منين نحب نحضر طبق سريع او تتلفلي واش ندير للعشاء نديرو هو فعلا لذيذ ويعجب كل أفراد أسرتي.
تحياتي ................ لهومة