يوميات عضوة

[ام عبودة]

اهلين وسهلين بالوافدااااااااااات نورتووووني
كابريسة راهي ريحة النقاء لحقتني الى هنا
يعطيك الصحة وربي يكملك
انا من بعد ما خليتكم روحت درت الحوايج في الماشينة باش ما يكثروش عليا وحكمت هذا المكتب رجعتو يشعل هذه صور من الارشيف



بصح لو تشوفوه قبل كيفاش كان واااااع كركبة البراء كامل دخلوها برجليهم وكثرة الحركة في هذا اليوم تقول بلعاني
المهم كملتو وروحت للغرفة تاعي مسحت شوي الغبرة من التلفاز والموبل وفتحت الشبابيك ونشفت الارض وقبل عطيت للدوش مسحة بسيدهم رووووووعة
راهم الصور هبلوني ما بغوش يتحملو ما عليش الارشيف كاين هههه


درت على غرفة الاولاد اليوم الحمد لله صبحت شوي مليحة
غسلت مواعن القهوة وكملت الغسيل نشرتو ومن بعد سيقت الدوش
رجعو الاولاد فطرتهم دوشت ماهر ورقدتو الاولاد راحو الى المدرسة تفرجت شوي نستنا في الزوج يرجع قال فطرت البرا ما بقى وقت للرقاد حكمت الايباد حطيت تطبيقاتي في قسم التطبيقات وجيتكم هنا ههههه لقيت الخير والخمير والحمد لله

[ام عبودة]

نهى يعطيك الصحة والله يعينك

[ام عبودة]

نخلة علا بالي قد لسانك قد ذراعك
ومرحبا بيك معنا ونتشرف بمرورك وحطيلي يومياتك راكي كيفكيف معايا الغبار مرضنا وهبلنا نقي منا ترجع منا تقول ما درت والو
مبروك عليك الوحم وربي يكملك
انا زوجي عمرو ما قالي يعطيك الصحة في التنظيف برك مش اشياء اخرى قد ما نخدم قد ما ندير والو مرات نتذمر نقولو من بعد يقولي واش راكي اديري نهار كامل وانت وحاكمة الايباد هههه واش راكي تخدمي الغسيل بالماشينة والخبز من الكوشة هههههه
بصح انا بالنسبة لي مليحة قد ما ينتقدني قد ما نزيد. ههههه وراء كل رجل عظيم مراااااااااا ...............؟؟؟؟؟؟؟؟؟

[ام عبودة]

صبااااااااح الهمة والنشاااااااااااط
نظت الصباح وجدت القهوة وفيقت الاولاد الزوج خرج قبلهم عندو موعد ومن بعد درت للاولاد لبستهم وبعثتهم الى المدرسة
مازالني في الارفة راهو البرد طاير حااالة ومغيمة نهار تاع بركوكس او مردود ههههه
هيا نوض. نفض ونكنس برك وبلاك نخمل خزانة الاولاد ونخفف على روحي عمل الغد راهو العطلة ولازم. نديرو غير للزوج والاولاد
وبلاااك جاينا ظياف من بعييييد
ممكن نغيب شوي

[نخله.]

صباح النور ام عبوده وشكرا على الترحيب

نبدا بسم الله اليوم وش درت؟؟؟؟

نضت شويا بكري قبل الاذان درت عجينه المسمن خليت القرصات يرتاحو ورحت توضيت وصليت و فيقت ولدي الكبير عندي واحد برك يقرا وزوج فالدار

وجدت البيبرون تع بنتي وحطيتو عند راسها باه كي تفطن ما تبكيش وما تنوضش باباها لخاطر لبارح سهر مع الميكرو على بالي ليوم يصبح..............يمالا حبستلو الريفاي تع تيليفونو باه ما يصونيش وما ينوضش حتى نوجد السنيوه

خليت ولدي يغسل نص انص نخاف يدوش يمرض مع البرد ويبدل حوايجو ( ولدي 7 سنين يقرا سنه 3 و مازار يشمخ حوايجو فالليل سوفرونس) هو يوجد حوايجو من الليل قبل ما يرقد

الى المطبخ كملت المسمن وجدت القهوة والحليب وقشرت البرتقال لازملهم كل يوم فالشتا عندنا تقريبا 3 كيلو كل يومين

مازال ما ناضوش..............درت الغدا فريك و زدت وجدت الدجاج للعشا درتلو التوابل والزيت والى الثلاجه

يفطر وليدي البكر ويروح للمدرسه ماشي بعيده 5 دقايق يوصل

طلعت نوضت السبع راهي 8 نحطلو بنتو في فراشو تلعب باه ينوض ........ يفطر يصلي يسخن السياره الى العمل

نتلهى ببنتي نغسل ونبدلها وديرلها الحيبوسه و نقعد نعس فيها ونستنى مرات حتى نص ساعه بدون نتيجه

لبسنها و لقيت ولدي ما زال ما ناضش ما نقدرش نفتح النوافد و نبدا الميناج حتى ينوض

رحت للدوش و التواليت نقيتهم مليح باه غدوا ما نتعبش معاهم

وليدي مازال ما ناضش

عيطت فالتيليفون للوالده

ما زال ما ناضش

جيت نضرب طله على المنتدى بصح ذرك نروح نوضو ونكمل صوالحي طول عليا

هاا يومي او صباحي تع اليوم

الي يشبه لكل يوم

[amina nourhanne]

مساء النور حبيباتي راكو درتولي القلب بهاد اليوميات يعطيك الصحة ام عبودة انا عروسة جديدة في عمري 25 سنة و *عندي عام ونص زواج و ما عنديش ذراري ضرك يتسمى مسؤولياتي قليلة المهم نضت اليوم على 8 راجلي *لبس و راح لخدمتو وجدتلو كلش في الليل و هو اصلا ما يستقهواش صباح يعني نحط القهوة لروحي برك، و طبعا انا كي نوض نكون مطروشة و نص فايقة alor قهوتي نوجدها في الليل و يبقا لي غير نشعلها صباح، قريت اذكاري و حطيت سنيوتي و استقهويت ،البارح درت حلوة الصابلي البرتقال جات بنيييييييينة تمتعت bien غير انا و راسي كي كملت توكلت على ربي و كتبت برنامج اليوم......نسيت ما قلتلكمش بلي انا كل يوم نكتب الخطوط العريضة تاع واش عندي ندير مثلا كيما اليوم خملت الدار،غسلت الماعن تاع الكوزينة،درت الماشينة تاع الحوايج،و غسلت الزربية تاع salon نسيت ما قلتلكمش بلي لول البارح درت grand ménage تاع الصالون البارح كنت طايبة يعني درت القاطو و العشا و الميناج تاع كل يوم و بس!!!! حتي اليوم باش غسلت الزربية المهم الفطور راجلي ما يفطرش في الدار يعني عندي العشا برك ، ضرك يدخل الظهر نبدا ندخل القش و نغلق الدار،ندوش و نخمل الخزانة ،راجلي غالبا يدخل من الربعة للفوق نكون كملت كل شي نديرو قهوة و نقسرو و نحكو من بعد هو يروح يصلي و يريح و يكونيكتي شوية انا نغسل كيسان القهوة و نوجد عجينة السوفلي باش ندير العشا *

[دروب التابعين]

الله يبارك عليكم

[دروب التابعين]

يا ام عبودة راكي ماشاء لله غيرتيني وش هذي الشطارة مديلنا شوية

[ام عبودة]

المشاركة الأصلية كتبت بواسطة دروب التابعين

يا ام عبودة راكي ماشاء لله غيرتيني وش هذي الشطارة مديلنا شوية

هيا مرحبااا بيك معنا وكوني متتبعة واكيد رايحة تكوني احسن منااااا اكييييد

[ياسمين1990]

الله يبارك ما شاء الله
ادعولي تحكمني هذي العدوة ونكون كما انتم

[ام عبودة]

المشاركة الأصلية كتبت بواسطة ياسمين1990

الله يبارك ما شاء الله
ادعولي تحكمني هذي العدوة ونكون كما انتم

اهلين ياسمين وتبعينا ورايحة تحكمك العدوى غصبا عنكييييي ههههههه

[ام عبودة]

نخلووووووولة الله يصبحك بالربح والخير
هههههه نخولة تعجبك ولا نبدل واش دارك فيك الغبار انا نكرز منو صراااحة
يومياتيييييي ك تشبه لتاعك انا برك مانوضش للمسمن بكري نديرو من الليل والصباح نسخن برك العائلة كبيرة واش نصبح الى الظهر وانا نطيب ههههه
وحتى انا كي يقولي نوضيني على الساعة كذا ديريني زدت ساعة في الرفاي يقولي وهو يعط علاش ما نوضتنيش
نقولو كي شفتك تعبان قلت نخليك تصبح ههههههههه
وبصحتكم الفطور
يومك زاااهي بالرغم من الجو هههههه

[ام عبودة]

دروب التابعين مرحباا بيك معنا
نهى وينك ما بنتيش
امينة مرحبااااااااا وتقلشي وزيدي هههههههه
سنيوة وحدك وقاطو ههههههههه بصحتك انا قهوتي مرات ما نستمتعش بيها مع اولادي يمرضوني يقعدو نعسانين وفنيانين ولوكان نخليهم وحدهم راااحت السنيوة
هههههه غير كي يخرجو نجيب كاس قهوة بالحليب واكيد حاجة حلوة باش يعقب نهاري حلو هههه
وعجبتني فكرة كتابة الاعمال باينة عليك منظمة الله يكملك ويفرح بالبوووبووووو

[ام عبودة]

اعماااااااالي لليوم من بعد ما خليتكم ياخي تهليتو في ارواحكم ؟؟؟؟؟


الغبار داير فينا اليوم حالة والبرد يقتل حنا راه برد الصحراء يظرب في العظم ما يرحمش هههههه
بمانو الغبار لازم كل يوم مسيح الموبل الشباك مغلوق والباب بعيد منين تدخل الغبرة؟؟؟؟؟؟؟؟؟
وانا صراحة ما نصبرش حتى تصحى الحالة حكمت غرفة الاولاد فرزت الخزانة ونظمتها وعطرتها واممممم الريحة الحلوة في الكلوار تظرب
مسحتها برك مع غرفتي والكلوار مغبر بزاف سيقتو ثمثم لحق وقت الفطور مع رجوع الاولاد فطرنا عملت ترطيب وزيت للشعر لعبت بزاااف مع ميمي بويسك مريض اليوم وحبيت ندللو باش يشرب الدواء شوفتو كيفاش انا انتهازية هههههه
رقدتو وتكيت شوي. حبيت نعمل حاجة للعشية لقيت طفلتي طيبت حاجة
الغد عطلة يعني ما كانش تدريس للاولاد اليوم. ندبر واش ندير للعشاء
باااي نتلاقو من بعد

[نخله.]

سلام عليكم.....................شفتو؟؟ كل ما وحدة تحكي يومياتها البقيه يتنشطو فكرة الموضوع هايله

نكملكم ............بعد ما نوضت وليدي 10/30 زربت درت على الدار على الخفيف شمست الفراشات برك الارضيات خليتهم لغدوا انشالله نسيق مره وحده ورحت لخزانتي نظمتها وطبقت الحوايج كانت مقلبه وتنشطت كي لقيتكم تحكو على الخزاين درت الكوراج معاكم ورحت لخزانه راجلي اصلا منظمه زدت شوي برك انا نهمل روحي و ولادي بصح مانهملوش هو ولا حوايجو ههههههبيستون

مازال الوقت اللي يخرج فيه وليدي وجدت للغدا تع غدوا.............ايه ما تستغربوش لاني الجمعه نقلب الدار و نسيق والدار عدي 2طوابق تديلي الوقت

الجمعه عندنا الطعام مقدس قطعت الخضر تاعي تع غدوا وخبيتهم ورحت للماشينه( نسيت ماقلتلكمش الماشينه مسكينه كل يوم تغسل معدهاش كونجي) جبدت الحوايج ونشرتهم جا وليدي حطيتلهم تغداو وطلعت نجري بدلت حوايجي وتحفت لاستقبال السبع

كي رجع ملخدمه تغديت معاه وراح ما يقعدش يجي يتغدى ويجيب الخبز والديسار برك

غسلت ماعيني وراح وليدي اللمدرسه اانا توضيت وقريت البقره نقراها يوميا تشد 40 دقيقه تماما

صليت الظهر دخلت الفراش وغلت النوافد شعلت المدفآت وداتني عيني انا وبنتي ونسيت وليدي الصغير كي نضت لقيتو يتفرج حذايا فالرسوم

درت بيبرون الحليب لبنتي وراها فوق الحيبوسه

وقت العصر نروح نتوضى نصلي ونوجد روحي انا وسنيوتي لاستقبال ابو الاولاد

من بعد نرجع نحكيلكم كيفاش نكمل النهار+ يوم الجمعه لاني ما نقدرش ندخل غدوا شااااااارجي