يوميات فتاة جزائرية متجدد - الصفحة 57

نينا الجزائرية · 2011-03-21, 17:34

اقتباس:

المشاركة الأصلية كتبت بواسطة nounou lamkalcha

انا لم اعلم وجود هذه اليومية لكن لما علمت قراتها من الاول ال الاخر اريد ان اتعرف على صاحبة هده المذكرة لانني اعجبت بها و بدات اغير مبادء حياتي اشكر جدا بارك الله فيك

صاحبة اليوميات معنا
ويشرفها معرفتك
نورتي الموضوع

هند الجزايرية · 2011-03-22, 10:39

هههههههههههههههههههههههههههههههههههههههههههه هايلة مرسي موضوع في القمة

نينا الجزائرية · 2011-03-22, 11:20

اهلا بيك هند نورتي

بسمة2009 · 2011-03-22, 16:51

أهلا وسهلا أمينة

fatouma alg · 2011-03-23, 18:16

لقد طال الانتظار يا اختي

ssousou · 2011-03-24, 18:00

يوميات روووووووعة شكرا حبيباي نحن في الانتضار

البلبلة · 2011-03-24, 20:07

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ღصمتـﮯ~ لغتـﮯღ · 2011-03-25, 13:38

يوميات قمة في الروعة

من شدة تعلقي بها انني قراتها من اول صفحة ولم افوت ولا كلمة

وفي الاخير اتمنى الاتكون حلقة اخيرة لهذه السلسة

الكلمات لاتكفي للتعبير عن شكري لك اختي
تقبلي مروري

البلبلة · 2011-03-25, 15:08

ختي نينا مكانش الجديد؟

mouna24 · 2011-03-25, 20:08

مازال مكانش جديد لقد طال الانتظار

ssousou · 2011-03-25, 20:22

!!!!!!!!!!!!!!!!!!!!!!!!!!!!!!!!!!!!!????????????? ????????????????????????????

soltana · 2011-03-25, 21:31

مازال مكانش جديد لقد طال الانتظار

ღصمتـﮯ~ لغتـﮯღ · 2011-03-25, 22:01

طال الانتظار لكن الصبر مفتاح الفرج

nounou lamkalcha · 2011-03-26, 17:07

-اخواتي اريد زيارة مدينة شلف باي الاماكن تنصحونني بالذهاب

فتاة جزائريه · 2011-03-26, 21:17

السلام عليكم

بدات تفوت الأيام وماحسيتش كيفاش كملت اربع اشهر في المخبر وبعدما دخلت نخاف من الابرة ومانحملش نشوفها وليت ندير التعيارات بلا مايرمشلي جفن وحتى التحاليل تعلمت بزاف بصح كان مازالي باش نزيد نتعلم اما زملائي لي في المخبر ماكانو يبخلو عليا بحتى معلومة وعلاقتي معاهم كانت على احسن مايرام طبعا بإستثناء السيد سعدي لي كانت علاقتي بيه في مد وجزر دائم

ورغم كل محاولاتي باش نبعدو عليا ونخلي علاقتي بيه محدودة فقط في الشغل إلا انو كان سامط ودايما يلقى طريقة كيفاش يفرض نفسو وبعد ما مليت وليت نتعامل معاه بلا مبالاة هذا اكيد بعد ما علمتو كيفاش يهدر معايا ويديه وراء ظهرو

بديت نحس بصعوبة المواصلة في هذا ال stage على خاطر حسيت روحي نخدم كيما يخدمو هوما بالظبط والفرق الوحيد هو انهم هوما يخلصو في نهاية الشهر وانا لالا ومع ذلك صبرت وقلت معليش انا نتعلم وندي الفايدة قد مانقدر والباقي على ربي

في يوم اتصلت بيا لطيفة وحكينا بزاف على يامات الجامعة وحكاياتنا القدم وسقساتني واش راني نخدم قلتلها ستاج في مخبر قالتلي بلي هي تخدم في صيدلية وصاحبة الصيدلية راهي محتاجة لوحدة بيولوجية و اول وحدة جات في بالها هي انا قالت لل la pharmacienne عليا وبسرعة و وافقت وطلبت منها نجي ونقابلها انا قلتلها اصبري عليا نخمم شوية ونسقسي بابا

بصح كي سقسيت بابا طار فيا

وقالي هذا امر مايحتاجش لسؤال اكيد روحي واخدمي على روحك صليت هذيك الليلة صلاة الاستخارة و في الصباح بكرت ورحت لعندها وحكيت معاها ربع ساعة عجبتني بزاف وحسيتها ناس ملاح وتفاهمنا على انني نخدم عندها اسبوع تسييني فيه وتشوف ايلا تقبلني او لا وتفاهمنا على انو عقد عملي معاها يكون داخل في نظام الادماج لي دارتو الدولة عقد عمل لمدة سنة وهي ايلا شافتني نخدم مليح وعجبتها تشدني دايما انا طبعا وافقت على العرض وانا نقول في قلبي بعد العام يفرج ربي ايلا شدتني مليح وايلا ما كتبش ربي على الاقل نكون اكتسبت خبرة عام نقدر نخدم بيها وين حبيت وقالتلي تان بلي رح تسقسي عليا لي كانو يخدمو معايا في المخبر وهذا من حقها باش تعرف واش رح تخدم عندها

ومن محاسن الصدف ومن بين كل لي يخدمو معايا طلعت تعرف السيد سعدي وهو لي سقساتو والحمد لله هو شهد فيا شهادة تع خير وقالها بلي في الخدمة ماراهيش مية بالمية جايبتها بصح تسلك راسها متعلمة بزاف تحاليل لكن بخصوص الانظباط في العمل وفي مواعيد الحضور والانصراف ماعندي مانقلك انسانة منظبطة ومتخلقة ومحترمة وهذي الشهادة خلات la pharmacienne ترتاحلي بسرعة وبعد اسبوع طلبت مني نوجد اوراقي باش تسنييلي وقالتلي شوفي يابنتي الخدمة نقدر نعلمهالك بصح الأمانة قضية تربية وانتي تباني ناس ملاح وعاقلة وتخافي ربي

شهادة فرحت بيها اكثر من موافقة الفارماسيانة على انها تخدمني عندها وبديت نصنع في اوراقي في نفس الوقت لي كنت نخدم فيه ونتعلم ولطيفة كانت معايا تعاوني وتفهمني الحاجات لي ماكنتش نعرفهم وكانت معانا بنت ثانية اسمها نسيمة هذيك البنت من اول يوم بانتلي انسانة غريبة على خاطر كنت نشوفها تخدل لابسة جلباب وفي الخدمة تنحي جلبابها وتلبس سروال وطابلية مزيرة هذا بلا الغنا لي كل ماتخرج الفارماسيانة تشعلو وتزيدلو اول مرة قلتلها اني مانسمعش الغنا نقصتلو ومن بعد ولات تشعلو ماتديهاش فيا اما لطيفة لقيتها منسجمة معاها تماما ومتفاهمين في هذا الموضوع ولقيتهم دايرين قوانين بعيدة على واش كنت نعرفو في المخبر مثلا تماك كنا نفطرو كلنا مع بعض تقول عائلة وحدة ونخرجو تان في نفس الوقت اما هنا قالك كل واحد يفطر وحدو و وقت الخروج كل وحدة تخرج وحدها وتروح وحدها هكة باش ما نرتبطوش ببعض وتكون كل وحدة حرة

؟؟؟

ماعجبنيش الحال اطلاقا وخممت باش نحبس ونرجع للمخبر ويديرلها ربي تاويل بصح وقتها نكون صعيفة وانسحبت بسرعة واكيد كنت انا لي رح نخرج خاسرة على هذاك قررت باش نحاول كيفاش نبدلهم و في مرة جبت معايا الفطور بالزيادة وعرضت عليهم ياكلو معايا ومن بعد وليت نقلهم وقت الفطور يالله ناكلو كامل مع بعض باش ربي يطرحلنا البركة اما وقت الخروج كنت نقعد نستنى في لطيفة باش نخرج معاها وبعد مدة لاحظت كيفاش بدات تتغير طباعهم وولينا ناكلو كلنا مع بعض وبعد ما نسيمة خرجت من الخدمة على خاطر ماتفاهمتش مع الفارماسيانة وليت نخرج انا ولطيفة دايما مع بعض وهي شرات كيت مان وبدات تسمع الغنا وحدها وبينها وبين روحها

هكة كسبت المحيط لي كنت عايشة فيه وكسبت نفسي وراحتي وقررت اني نتعلم كل حاجة ونبذل جهدي اما الفارماسيانة طلعت انسانة هايلة وتقدر العامل وتعطيلو حقو

هذي هي حياتي و هكة راني عايشة ايامي وهكة خلصت يومياتي لهذا الفصل

حياتي مزالت مستمرة ويومياتي اكيد رح تجيبلي الجديد ماعندي حتى مخططات للمستقبل كيما عرفتوني دايما نمشي بدون هدف مسبق وكل شي حدثلي في حياتي انحطيت فيه بدون ما نخطط وحتى من بعد باش نقبلو ونحبو ابتداءا من الباك والتخصص الجامعي وانتهاءا بالعمل دايما مسلمة امري لله وكلما وضعني ربي في موقف نستخير ونتكل على ربي والحمد لله دايما نلقى انو الخيرة فيما اختاره الله اليوم راني نستنى يجي الزوج الصالح لي دايما ندعي ونطلب ربي يرزقني بيه ونوعدكم رح نحط جزء ثاني ماشي قريبا ولكن انتظروني

اتمنى تكون عجبتكم حكاياتي و نكون دخلت لقلوبكم

وصلى اللهم وسلم على حبيبنا وسيدنا محمد صلاة تملأ بها مابين السموات والأرض