يوميات فتاة جزائرية متجدد

[فتاة جزائريه]

السلام عليكم

الموقف لي انحطيت فيه كان صعب ومحرج بصح مستحيل نرجع في رأيي وبديت نخمم وخايفة من الزقا تع بابا وماعلاباليش كيفاش جا في بالي باش نحكم monsieur سعدي و نقولو بلي بابا سيفار بزاف ولوكان يلقاني برا ندور يدير فيا حالة ويقلي حبسي لوكان ماشي جا يعرف مليح السيد حميد صاحب المخبر والله مايخليني نخدم عندو ووقتها رجع سعدي يحلل ويقلي اه لوكان قلتيلي من الاول هكة كامل ما نبعثكش وغلقنا الموضوع وانا تنفست من قلبي وريحت من موقف صعب كنت رح نحط روحي فيه

كي رجعت للدار حكيت لبابا وكامل العايلة واش صرا وواش درت وكيفاش تصرفت وكنت طبعا نستنى كي العادة وقتاش يقاطعني بابا ويبدا يزقي عليا بصح لي فاجئني كي لقيتو استناني حتى كملت كامل وقالي اسمعي يابنتي نقلك زوج كلمات حطيهم مليح في بالك في هذي الدنيا الرزق على ربي مالازم تذلي روحك لحتى واحد على جال الرزق. وديري في بالك ايلا ربي كتبلك حاجة حتى عبد ما ينحيهالك وايلا ربي ما كتبهالكش حتى واحد مايعطيهالك اخدمي بنيتك واخلصي فيء خدمتك لوجه الله وانتظري الجزاء فقط من الله لوكان ضعفتي ولا تراجعتي وقبلتي تروحي وين بعثك سعدي يبقى دايما يستغلك بحجة انو يشدك تخدمي تم وفي الاخير ربي عالم ايلا يشدك ولا لالا بصح هكة انتي فرضتي موقفك واثبتي نفسك

فرحت بزاف بهدرت بابا وتعلمت منها بزاف حاجات و تأكدت مع الايام ومن معاملة السيد سعدي بلي كان عندي الحق كي ما طاوعتوش على خاطر شفت بعيني كيفاش ماكان قادر يحرك ولا شعرة قدام السيد حميد ويرجع قدامو كي الفار ماعندو حتى كلمة

حاجة اخرى اكتشفتها في السيد سعدي ولي يدو ماشي ليه وكل مايحكي مع وحدة منا احنا لبنات يحب يقعد حذاها او يلمسها بقصد او بدون قصد واول مرة كي حكمني ليدي حسبت ماشي بلعاني بصح كي سقسيت حميدة ولامية وحتى حليمة قالولي عسي روحك منو هذاك ماشي عاقل ووقتها قعدت نديرلو في حساباتي وكل مايجي يحكي معايا نبعد عليه وكي يقرب ويقلي وين راكي تبعدي راني نحوس نفهمك نقلو ماتخافش عليا نفهم هكة من البعيد ومع ذلك ما كنتش نسلم من لسانو ومن العبارات لي كان مرة على مرة يرميهملي وسط الهدرة حتى لليوم لي كنت نمشي قدامو ضربني للظهر وقعد يضحك درت ليه وعنيا حمرين ووجهي يشعل بالنار وقلتلو هذي اخر مرة عندك ايلا مالقيتش وين تدير يديك نقطعوهملك باش تريح وبما انو كل لي يخدمو في المخبر كانو تم وشافوه واش دار مالقى واش يقول غير انو ينحي طابليتو ويخرج وانا كملت مع حميدة كلي ماصرا والو

بعد ايام قرر السيد سعدي يدي عطلتو السنوية وقبل ما يخرج قالي ماتخافيش كي نرجع نعلمك كيفاش تديري les analyses لي نديرهم انا وانا رديت بكل برودة اعصاب اوكي رح نستناك ما تخافش

حاولت في هذاك الشهر نستغل الفرصة باش نتعلم التحاليل لي يديرهم السيد سعدي هكة باش مانظطرش اني نتعلم من عندو على جال هكة اقتربت من لامية وطلبت منها تعلمني وهي كانت مثل حميدة في طيبتها وصبرها وكانت طريقتها في تعليمي ساهلة وتخليني بلخف نحط يدي في الخدمة ونتعلم ومرات بزاف كنت نخلطلها شعبان مع رمضان وخاصة في النهار لي تكون عندها بزاف خدمة وتحوس تكمل بلخف نجي انا مع تالي ونخبزها و في بلاصة مانعاونها باش نخرجو بكري نزيد عليها ومع ذلك كانت تساعفني وتقلي معليش راكي تتعلمي نستحملك بصح مؤقتا يا إما ايلا كملتي هكة وحدة فينا تخرج من الخدمة

طبعا كلام لامية ماكانش يزعفني بالعكس كنت نتعلم من كل أخطائي وعمري ما نعاودها واكثر شي كنت نركز عليه هو كيفاش نكسب محبة لي معايا في الخدمة لأنو انسان ما يبغكيش عمرو مايقدر يعلمك او يصبر عليك اما زملائي كان يعجبهم فيا اني كلما درت غلطة وبداو يزعفو عليا نقعد نخزر فيهم ونتبسم ومانرد بحتى كلمة وكي يكملو هوما هدرتهم يرجعو يضحكو معايا كلي ماصرا والو ومرات حتى يطلبو مني السماح لأنهم تقلقو مني ويقولولي نسينا بلي كنا من قبل كيما انتي

بعدما كنت نكتفي فقط بالنظر كي يكونو يدريو في prélèvement جاء اليوم لي طلبت مني لامية انتي ندير انا prélèvement خفت في الاول ومن بعد تشجعت وشديت الابرة وحطيتها في يد الأنسة لي كانت تبان عليها خايفة مني أنا اكثر من الابرة لي كانت في يدي تشكيت الابرة وحاولت نجبد الدم بصح ما خرج والو مع انوla veine كانت باينة وكنت حاطة فيها نحاتلي لامية الابرة من يدي وقالتلي اصبري انا نكمل وزادت دخلتها مليح خرج الدم يجري قلتلها والله بيسطو وك انا تان درت كيما انتي ضحكت عليا لامية وقالتلي بصح انتي كنتي حاطتها في الجلد وهكاك ماكنتي رح تجبدي غير الهوا كان لازم تدخليها اكثر قلتلها بلي انا نخاف نضرها قالتلي ماتنضرش اديها على ضمانتي بصح انا ما اقتنعتش بهدرتها وقلتلها لازم تسيي فيا وتنحيلي انا الدم كي ماننضرش نعرف وهي طاوعتني نحاتلي الدم قعدت نشوف فيها وهي تشرحلي وبلا مانحس حتى لقيتها كملت وقالتلي واش وجعتك؟؟

قلتلها كامل ماحسيتش خلاص ضروك نولي نزدم بلا مانخاف وماشفتش بلي فريد كان واقف على راسنا وقالي يالله ضروك نتجرأ لأول مرة ونعطيك يدي باش تديريلي prélèvement ونشوفوك ايلا صح تعلمتي؟
شديت انا الابرة وغرستها في يد فريد مسكين قالي يابنتي راكي وصلتي للعظم هي صح ما توجعش بصح ماشي تدخليها كامل في يدي خرجتها شوية حتى بدا الدم يخرج فرحت بزاف بروحي وحست اني درت انجاز

وصلى اللهم وسلم على سيدنا محمد

[فتاة جزائريه]

المشاركة الأصلية كتبت بواسطة ملكة-الجزائر

يومياتك رائعة جدا و طريفة احببت المرة الي رحتو فيها للجزائر العاصمة او رحتوا للبحر حتى صابكم لاستاد في وسط الماء والله غير قتلتيني بالضحك
واعجبتني المرة الي رحتي عند مرت خالك تم بديت تتعلقي بالاسلام و المرة الي عيطلك ولد خالتك قيس 12 تع الليل
و الله غير يومياتك جعلتني نحبك بال ما نشوفك
شكرا لك

السلام عليكم أختي مشكورة على الترحيب والتعليق الجميل اسأل الله أن يعجلني خيرا مما تضنون ويغفر لي ما لا تعلمون ربي يخليك ويحفظك

المشاركة الأصلية كتبت بواسطة نينا الجزائرية

اهلا بيك امينة
عملتلك موضوع ترحيب في منتدي شقائق الرجال
معليش اختي تكملي المشوار
وتحطي الحلقات
الان اصبحتي منا وعلينا
والموضوع موضوعك اختي

اهلا بيك أختي الحبيبة مشكورة على الترحيب رح ندخل ليه ونرد عليك ربي يخليك ورح نبقى انا نحط الحلقات

المشاركة الأصلية كتبت بواسطة fatouma alg

اهلا و سهلا و مرحبا بكِ اختي
واخيرا شرفتنا ..
نتمنى لكِ اقامة طيبة بيننا
تحياتي

مشكورة اختي ربي يخليك والشرف ليا انا اني موجودة بين بنات بلادي

[ملكة-الجزائر]

شكرا لك امينة مميزة كالعادة

[soltana]

ومبروك رفع الحظر لاختنا نينا
والله غير توحشناك اختي

[fatouma alg]

شكرا اختي على الحلقة الرائعه من عضوة رائعه
نتمنى برك ما تطوليش علينا
ننتظر الجديد

[وداد100]

اولا نرحب بالا خت امينة في منتدانا واشكرها كثيرا على اليوميات ة التي كانت اكثر من رائعة وذكرتني بايام الجامعة
اما الاخت نينا فابارك لها رفع الحطر والمنتدى مطلم في غيابك

[mouna24]

شكراااا على الحلقة الرائعة ونتمنى مطوليش عليناا

[إلهام1993]

ماشاء الله أسلوبك رائع في سرد يومياتك ربي يحفظك

[فتاة جزائريه]

السلام عليكم

خدمتي في المخبر خلاتني نتعلم بزاف حاجات في معاملة الناس وخاصة المرضى ونتحمل قلقهم ونرفزتهم و اول مرة لما طلبو مني نقعد في la réception قعدت عاقلة حتى لحقت ال 10 وجا واحد مع امو وكان بزاف مقلق وباغيها تفوت قبل الغاشي لي كانو يستناو من الصباح على اساس راه مشغول ومايقدرش يستنى وانا طبعا ماعجبنيش الحال وقلتلو كامل هذو لي قبلك راهم بشغالاتهم وماكانش لي يقبل تفوت قبلو قالي بصح انا راني client تاعكم لازم تفوتوني
قلتلو احنا مانخدموش بالبيسطو وزدت معاه في الهدرة

حتى بدات حليمة تقلي اسكتي وخليه وكي راح قالتلي مالازمش تديري مشاكل مع الزبائن حتى ولو كان غالط ساعفيه وسيي تفهميه بالعقل والا مايعاودتش يرجع طبعا انا ماكنتش مقتنعة برايها وقلتلها زباين مثل هذا الله لا يرجعهم

بعد نص ساعة ام الراجل هذاك مرضت اكثر وقلبها غمها فوتناها بلخف وجا ليا وليدها وقعد يقلي شفتي قلتلكم لازم تفوتونا بلخف وانتي لي ما خليتيهاش والله كاش مايصرالها غير نباسيك هذي الكلمة نرفزتني بزاف وقلقتني ومن سوء حظي كان واحد اخر واقف على راسي ويقلي اعطيني ورقة التعيارات تاعي طرت فيه وقلتلو وينها الورقة كيفاش رح نعرفها انا اعطيني الbon لي خلصت بيه نعرفك ولا رح نوحي عليك

قالي خلاص اختي اسمحيلي ماعرفتش والله هاكي الbon وكي شفت في وجهو لقيتو راجل كبير غاضتني عمري كي تعاملت معاه بهذيك الطريقة الغير مؤدبة اعطيتو تعياراتو وجريت للداخل وبكيت وبعد ما راح هذاك السيد المقلق هو وامو لي ماصرالها والو ورجعت لاباس بيها دخلت ليا حميدة وفهمتني بلي مالازمش نتقلق من هذو العقليات على خاطر رح نتلاقى بيهم بزاف على هذاك لازم تكون عندي برودة اعصاب وصبر واهم حاجة نحافظ على ابتسامتي طول الوقت وماشي من حقي نخلف زعاف واحد في اخر ماعندو حتى ذنب فكرت مليح في هدرتها مع اني كنت عارفتها وفاهمتها بصح الله غالب فلتت اعصابي واصريت اني نكمل باقي اليوم في الاستقبال هكة باش نوالف ونتعلم كيفاش نعامل الناس

قعدت حليمة مع الميكرو تدخل في النتائج تع التحاليل وانا قعدت نستقبل في الزبائن ولي يجي نقلو بإبتسامة رقيقة معليش تصبر دقيقة وبعد ربع ساعة درات حليمة موراها لقات جيش من الناس واقفين على راسها وكامل ساكتين ويشوفو فيها انخلعت وقالتلهم واش كاين بداو كامل يحكو في وقت واحد وكل واحد يقلها واش خصو وهي تجري وتقلي مدي هذي الورقة واعطي لهذا هذي الورقة وقولي لهذاك يرجع غدوة حتى سرحتهم كامل قعدت تضحك عليا وقالتلي يابنتي وعلاه كنتي مجمعتهم عند راسك ومخليتهم يستناو قلتلها انا شفتك مشغولة كنت نقلهم اصبرو دقيقة ضروك تكمل وتحكي معاكم وهوما قعدو عاقلين واستناوك ضحكت عليا وقالتلي شفتي كي تعاملي الناس بلطف وتتبسمي في وجهم وانتي طبعا عندك ابتسامة حلوة حتى ولو كنتي غالطة يصبرو عليك

ومن يومها ولات عندي نظرية ثابتة وهي معاملة كل الزبائن بالحسنى ومحاولة التخفييف عليهم و طبعا طبقت قاعدة الإبتسامة في وجه اخيك صدقة فما بالك لو كان هذا الاخ مريض رح يكون اكثر انسان محتاج لإبتسامة وكلمة طيبة تخفف عليه وخاصة بعدما تفكرت كيفاش كنت نتأذى من المعاملة السيئة تع بعض العمال في الإدارات قررت اني مانكونش كيفهم على خاطر ماشي كامل الناس كيف كيف وأكثر أكثر حاجة تعلمتها هي أني ما نكسب عداوة حتى انسان لأني مانعرفش وين ممكن نتلاقي بيه مرة اخرى وممكن نكون وقتها انا لي محتاجة لخدماتو

بعد ما فات شهر رجع السيد سعدي للعمل ورجعت كي العادة مشاكلي معاه كنت اكثر وحدة ترجعلو الهدرة وكامل كانو عارفين اني مانحملوش ومانحملش طبايعو بصح كان لازم عليا نساعفو مع حفظ كرامتي وكل مايجي يحكي معايا نقلو رجاءا يجب المحافظة على المسافة القانونية بيني وبينك لازم تبعد شوية هكة تعلمت نتعامل معاه نلعبها نزعق ونضحك في الوقت لي نحقق فيه كامل واش راني باغية وبلا مانزعفو او نخلي لخرين يحسو واكثر حاجة كانت تزعفو مني كي نقلو عمو سعدي يقلي مانيش عمك مازلت جااان واش بيك

بعد شهرين في المخبر وليت نخدم مثلي مثل أي بنت تم لدرجة انهم كانو يعتمدو عليا في بزاف تعيارات ولما يغيبو يطلبو مني نحكم بلاصتهم بعد ماعملوني خدمتهم مليح وكيما يلزم اما الخلصة ماكنتش نخلص كامل لاني كنت مجرد stagiaire وخلاص والمرة الوحيدة لي اعطاني فيها مرتب كان مبلغ 2000 دج بعد ما اعطاهم كامل ضعف هذاك المبلغ بمناسبة عيد الأضحى بصح انا فرحت بزاف بأول مصروف يدخل جيبي وحسيت انو جزاء تعبي ومن عرق جبيني


وصلى اللهم وسلم على سيدنا محمد

[جوهرة نفيسة]

يعطيك الصحة أمينة أستمتعنا و استفدنا

[fatouma alg]

شكرا على الحلقة ننتظر البقية

[أحلام سرمدية]

مشكورة مشكورة مشكورة امينة فعلا عيشتينا مع القصة وجعلتينا نحسو بشعور البطلة في كل حالة
بكينا معاها
خفنا معاها
فرحنا معاها
وضحكنا معاها
ربي يوفقك امينة وتكملينا اليوميات
اختكي نور

[نينا الجزائرية]

السلام عليكم امينة
حلقات رائعة عجبوني بزاف
يعطيك الصحة
عجبني بزاف عمك لي حب يعمل retoure d'age
وكيفاش تعلمتي تنحي الدم ههههه
مسكين الحمد لله عمري ما نتخيل نكون في مضربو
تحياتي لك
وان شاء الله حلقات الجاية يكونو اروع

[fatouma alg]

اش راكي اختي نينا توحشنااك
وينك اختي امينة رانا نستناو في الحلقات

[نينا الجزائرية]

الحمد لله راني بخير فاطمة السوال عليك