~¤ô¦¦§¦¦ô¤~ بيتك جنتك و رضاء ربك مبتغاك 7 ~¤ô¦¦§¦¦ô¤~

[حياتي كلها امل]

السلام عليكم
يابنات الواحدة كي تتزوج دير في بالها راح تلقى نفس الجو تاع دارهم لكن هذا ليس صحيح سعات الوحدة تروح عند بيت فميلتها القراب وتلقى المشاكل.الحاجة لنوصيها لاي واحدة راح تتزوج اومتزوجة وعن تجربة ادخلي بنيتك مشي بالحيلة يعني ما دايرا في راسك من الاول العجوزة مشي مليحااو اللوسااواي شخص من العاءلة لي راكي رايحة ليهم
وفي نفس الوقت متكونيش مغفلة وكوني ذكية لتكسبي كل الاطراف
واللسان الحلو والاخلاق العالية لها تاثير كبير في النفوس.
ولازم تعرف كل واحدة فينا ان هذو الاشخاص هم اهل زوجك جد وجدة ابناءك واعمامهم وعماتهم قد متعامليهم بالحسنا راح تكبري في نظر زوجك ومهما كانت المشاكل بينكم يجي اليوم الي يعترفو بخيرك
وام الزوج ديرو في بالكم انها تحس ان الزوجة سرقت منها وليدها ومضابيها اوليدها يقعد غير ليها الا ان هذا الامر كاين ام تبينو بزاف وكاين ام تحكم العقل والمنطق فانت داءما حثي زوجك على بر والديه ،ويشريلهم وكي يجيب زوجك شيء فاكية جاج دايمن دير حق عجوزتك وشيخك وربي اولادك على احترامهم والله تكسبيهم ولو بعد حين.

[الدر المكنون 7]

السلام عليكم ورحمة الله وبركاته
أختي سيرين ما شاء الله عليك أنا معجبة بيك وبتفكيرك الايجابي واتباع ماهو أفضل
أتي حبيبة الله يفرج عليك بسكن مستقل خاص بيك وما ذلك على الله ببعيد فقط محتاجة شوية صبر حتى واحد ما لقاها واجدة لكن مع العشرة ومرور الوقت والرزانة أكيد ستفرج باذن الله
الله يفرج على كل وحدة مغبونة في حياتها ما علينا الا التضرع الى الله بالدعاء والالحاح فيه خصوصا رانا مقبلين على أيام مباركة كيما نقولو رانا في العواشير وان شاء الله ربي يتقبل ويصلح الاحوال
سلامي لكل الفراشات كل وحدة باسمها مشكلتي حفظ الاسامي ههههه

حبيت نشكر أختي وصديقتي الامنيات لي حطت رابط الاخت هناء المغربية المغتربة الحقيقة استفدت من قناتها بزاف واليوم كنت نشوف في هذ الفيديو وحبيت نتقاسمو معاكم أخياتي في الله
https://savemedia.com/watch?v=FpbHnkNdsVg
كي تشوفو الفيديو من فضلكم قولولي واش هو الزيت الاساسي لي يجي بروائح مختلفة (ليمون خزامى ..) ومنين يشروه

[حياتي كلها امل]

حبيت نشكر اختي سمراء على وصفة الخبز ووصفة البطاطا المقلية في الفرن
جاني روعة حتى كيبعثت خبزة لعجوزتي فرحت وقاتلي شحال هايلة هذي الخبزة

[حياتي كلها امل]

الاخت الي سقسات على القرنون ،نقيه وخليلو اللب الي فيه الشعيرات ودريه في ماء وخل ثم تكونى حطيتي قدرة وكسكاس فوق النار عندها نحي الشعيرات ومسحيه بالخل اوالليمون وتركيه يفور على فمو عندما يبرد ضعيه في كيس والى المجمد.

[نسمة صبح]

من قبيييل و انا نقرا هذا وين زصلت لاخر صفحة ...و نقرا و نقول نقولها هك نقولها هك ..كي وصلت لاهر مشاركة نسيت واش حابة نقووول هههه

نشكر سيرين اللي فتحت موضوع النقاش و عزفت على الوتر الحساااس ههههه

جاء دوري ههههه

انا كي تزوجت رحت بنيتي مثل الاغلبية منكم و ما حطيت حتى حدود او حرصت في تعاملي..لكن سلكتها غالية لاحظت الكتمان و النظرات بيناتهم كي نحكي حاجة و هوما طول الوقت ساكتين و نا نخلق ف المواضيع...لا علينا تعلمت نسكت شوي و نكتم اموري و مشاكلي اللي بيني و بين راجلي مندخل فيها حتى واحد..

سلافاتي ملاح الحمد لله..كانت مشكلتي مع عجوزتي..منفيقش حتى نلقاها تتهجم علي و نا يعجبها العجب..لا قعادي في دارنا وقت غياب راجلي و لا التنقل رغم انو ظروفنا هي اللي محتماتو و لا طريقة غسيلي و لا نوضاني وااالو ..رغم انهم هوما مشي شاطرين للدرجة اللي يعايرو عليها !
ما زاد من الجفوة انو مرت سلفي دايما تقولي ماهمش ملاح و منروحش عندهم و تقولي لازم نديرو هك و نديرو هك و هذا كلو لصالحها باه متبانش هي لي مش مليحة خاطر دخلت بعدها و هي كانت متروحلهمش بزااف مرتين ف السنة و تتحجج بحوايج بلا معنى و نا كنت نتبع فيها و نسمع هدرتها و حقدت عليهم.

عجوزتي دايما تحب تبيني مش مرا تاع دار و نا تحطيت قدام هذا التحدي و رجعت نحاول انوض و نطيب التقليدي و لعصري و انظف دوون جدوى..
كان راجلي يغيب و كي جي نتلاقاو في دارهم ز من لمشاكل كرهناااا

لما نكونو بعاد مع بعض الحمد لله..

لمشكلة يا حبيباتي مرت سلفي ما تلقى معاها حتى مشكل و متقيسهاش خلااص و نا نروح في جرتها خاطر نسكت و ندير وجه لراجلي!!!!

عجبوني افكاركم حول اهدايا بكل انواعها و الود..عمري ما جربت نشريلها خاطر راجلي دايما يمدلهم دراااهم حتى نتقابضو ..يمد للناس كل خاوتو و خواتاتو حتى لمتزوجة يعطيها ..ف الاول كنت نزعف خاطر امو ترجع تعايرنا تقولنا ما درتو وااالو مبعد قلت ما راحليش يمد للي حب مهم ميقصرش في..

و عجبتني شطارة حبيبة و نا كانو يصراولي مواقف متخلينيش نخدم مبعد تعايرني مكنتش نفهم السبب!!

مثلا تروح تجري تغسل حوايج راجلي مبعد تعاير و نا اكيد راح نغسلو مش راح نخليهم ...تجري اطبق حوايجو تنحيهم من السلك و نقول معلييش..

المواقف بزااف رغم اني نروح ضيفة فقط..
هذا بلا ما نذكر موضوع اني مازلت محملتش و هذا ضمن اني مش كفء نكون مرت ولدها ...هذا هو لمساج لي تخب توصلهولي

[سمراء الدنيا]

السلام عليكم حبيباتي
تجري الرياح بما لا تشتهي السفن
كنت مقررة معظم اليوم نفوتو معاكم و الله غالب الصباح رحت عند الطبيبة اعطاتني تحاليل الغدة الدرقية رايحة نديرهم غدا صباحا و في المساء نسافر لحضور عرس ابن خالي و يوم السبت نروح عند الطبيبة للي موالفة نعالج عندها ... يعني مش راح نرجع حتى ليوم الاحد اسفة كثيرا
لكني مخلية ورايا فحلات ما يتخافش عليهم

ربي يخليكم لبعضكم تفضفضو و تنفسو على رواحكم شويا تهلاو في بعضكم لحين عودتي
ما عنديش عجوزتي و لا اخت زوجي من اول عشنا في بيت مستقل بعيد عن اهلو و عن اهلي و الحمد لله (لكن الدنيا لا تخلو من المشاكل)
ربي يخليك الاخت حياتي امل و بصحتك واش طيبتي كنت راح نرد عليك و نقولك البطاطا ما تتغطاش و تجي هايلة و الحمد لله انو الوصفات نجحو و هذا دليل على انك شاطرة

اختي ام ايمان وصفات هناء للتنظيف جربتهم كامل وكنت نوجد لطرحهم هنا لكن الزوج شاركني في الميكرو ههههه انا اتوق للحرية ههههه
بالنسبة للعطور تباع عند محلات الاواني ب 150 دينار بعطر الليمون و الخزامة و نسيم البحر مش فاضية الان نصورلك

تحية كبيرة لباقي الفراشات

[loudjaine]

المشاركة الأصلية كتبت بواسطة سيرين 5

عطيتيني فكرة بارك الله فيك

واش رايكم اليوم أو ماعليش هاذ الأيام كل وحدة فينا تقدم هدية لعجوزتها بالشيء لي تقدرو عليه يا لوكان خبزة سخونة؟
أنا عن نفسي راح نطيبلها خبز بالياوورت الطبيعي تاع أم أماني تموت عليه و نقدمهولها بنفسي ؟
الرسول عليه الصلاة و السلام قالنا تهادو تحابو ، هكذا نتقربو أكثر من بعضانا
و في نفس الوقت ننويوها صدقة لوجه الله تدفع البلاء و أجرها في شعبان أعظم

و اناوكيفاش ندير ما تولهتوش بالاك لقصتي ولا تناسيتوها ههههه ما خلانيش نروح لدار شيخي ما يتفاهمش معاهم

[سمراء الدنيا]

بما اني رايحة نغيب هاذو يومين راح نحطليكم تجارب جمالية و كي نجي نلقاكم طبقتو ههههه

هذا الجيلاتين لنزع الرؤوس السوداء



ملعقة جيلاتين + ملعقتين ماء دافي على حمام مائي حتى يذوب و نضعه على الانف و نتركه ل نصف ساعة حتى يجف و ننزعه و انظري الى الرؤوس السوداء


يوضع مرة في الشهر هاذي تجربتي الثانية معه يصبح الانف يلقلق ههههه
**************

قناع الخيار للوجه سبق و حطيتولكم و هاذا تطبيقي ليه البارح بعد ما خلصت للي كان عندي

و هذا قناع كلوديا لتبييض اليدين

و استعملت وصفة حنة للشعر النتيجة رااااائعة
10 ملاعق حنة + 5 ملاعق كاكاو + صفار بيضة + ملعقة خل + ملعقتين زيت زيتون و نخلطها بمغلي قشور الليمون للي كانت عندي في الثلاجة خليتها 6 ساعات و غسلتها اول مرة يعجبني اللون

لترطيب الجسم دائما مع زيت جونسون مخلط بالمسك

للاسنان حبة صغيرة فراولة + بيكاربونات و تغسل بها الاسنان



للشفاه خليط ماء + قطرتين من زيت جليسيرين + قطرتين ملون غذائي رائع

[سمراء الدنيا]

الورشة (منقولة)

[سرور2]

الاخت سمرة باذن الله نجرب طريقة الجلاتين لانو راني في حالةمن النقط السوداءفي الانف والذقن

[امّ اياد]

اختي در المكنون هذا هو العطر نخلطو مع ماء ونديرو في قرعة لي تبخ ونرش بيه الدار

[loudjaine]

اخت سمراء طهورا ان شاء الله و نصيحة كي ديري التحاليل عاوديهم الاخطاءةالطبية كثرت انا عندي واحد المريضة 5 سنين و هي داوي على السرطان عافانا الله و اياكم هذه مدة ماشفتهاش كي جات السمامة لي فاتت والله en forme سلمت عليها قلتلها راكي علكيف اتخيلو قالولها ما عندكش سرطان ..... 5 سنوات من شيميو شعرها طاح و العريس راح ضرك راهي 36 سنة عز شبابها فوتاتو في المستشفى قالولها غلطنا غاضتها روحها قالتلي واشمن الم واشمن عذاب تعذبتو ....نصيحة راي الطبيب الثاني و اعادة التحاليل و الاشعة اصبح ضرورة الان..و ربي بعد البلاء على امة محمد

[loudjaine]

اختي نسمة صبح لدالحل تاعك تسكري باب الوسواس مرت سلفك لازم تحدي علاقتك بيها لانها راح توصلك لنهاية ماهيش مليحة
و انا ما فهمتش علاه تسكنو مع عجايزكم من الاول حنا الحمد لله في جهتنا العجايز من الاول يطيشوك برا يتهناو و يهنيو
كيما تقول سلفتي لي بدارها ما يبان عيبها من مليحها
الحل هو الاستقرار لي ما عندوش دار يكري

[جهينة اليقين]

سلام لبنات عجبتكم الحالة كي عاد الموضوع على العجايز شحال كثرو الصفحات هههههه شوفو انا كنت كنة منذ ثلاثين سنة بالاك انا اكبركن راه عندي الخبرة انا كنت متحملة كل شيء حتى ما نحطتش زوجي في موقف الخيار بيني وبين امه حتى لو اضطررت انرجع الكلام و و و وما نشتكيلوش والنتيجة عمر امه ما فالت ولدي جرحني وهي ربي يرحمها رجعت لي غير انا ودا هو دعوة الخير وانا معاه والله كي كبرت ورفدتها غير انا خير من بناتها عادت تقول لي الله يجيب لك وحدة ترفدك كيم رفدتيني اييييييه والله يا بناتي الدنيا ما فيها والو ديرو الخير واصبرو قد ما تطيقو
لي
لجين عمر الراجل ما يكره والديه انت زقي عليه وقولي لو هذا عقوق وانا ولولاد لازم نروحو لايعودو يقولو مرتو حرشاتو وانا متاكدة انو في قرارة نفسو راه فرحان كي ربي عطاه مرا كيم انت اوع تقولي لو عندك الحق ابدا الي مالوش خير في اهاه مالوش خير فيك

[حياتي كلها امل]

شكرا اختي سمراء وربي يجيبلك الشفاء وطهور ان شاء الله .

وانشاء الله تروحي تعرسي بخير وعلى خير وكشما جبينا تصاور ،انا ايضا عندي عرس غدا كنت معوله نروح بصح كيراهي بنتي مع الاختبارات مقدرتش نروح