دورة الاستعداد لفصل الشّتاء بيتي مشرق كفصل الرّبيع

[تاج الوقار16]

السلام عليكم ورحمة الله وبركاته
صباحكم مبرووووووووووووووك
واش من مسابقة؟

وحابة نسقسي على القرلو مدامو قليل قبل ان ينتشر
وكيفاش نحي طاشات من رخام الكوافاز

[Rati Ne]

المشاركة الأصلية كتبت بواسطة تـاج الوقار

السلام عليكم ورحمة الله وبركاته
صباحكم مبرووووووووووووووك
واش من مسابقة؟

وحابة نسقسي على القرلو مدامو قليل قبل ان ينتشر
وكيفاش نحي طاشات من رخام الكوافاز

صباحك مبروك اختي شوفي القرلو كاين واحد البرودوي في صاشي اخضر صغير اماشي غالي 20دج فعال ردي بالك على الاولاد برك ولا برودوي قرلو مات يتباع 100دج مليح تاني

[crono]

السلام عليكم
ام مؤمن عظم الله اجركم في فقيدتكم والهم ذويها الصبر والسلوان وادخلها فسيح جنانه يا رب
اللرابط للتعازي
https://www.djelfa.info/vb/showthread...post3994644537

[نهى اسطاوالي]

السلام عليكن
أنا راني عقاب الثلاجة لازم نرجعها كيما ثلاجة ام صابرين اهاه عجبتني فكرة المناديل وراني نطبق فيها بصح زدت حاجة وهي اني فرشت الاليمنيوم في القجور تاع الثلاجة جات هايلة
خسارة مانقدرش نحطلكم التصاور ماعنديش الكابل
بصح نصورها ونخبي الصور الى حين نحطهالكم ان شاء الله

الصباح فرزت وسيقت
مازاتلي الخزانة فقط



مريومة الصغيرة اهلا بك بيننا نورت وشرفت القسم ياغالية ، قبلة من خالتك نهى

[نهى اسطاوالي]

قآلتْ إحداهنَّ : لديَّ حُلمٌ صغيرلكنّه يُشعرني بالفرحِ باسْتمرار! أن أسعد زوجي كلّ يوم ، أن أجعل يبتسم ، أن أرى الفرحة والطّمأنينة في عينيه ما حييتْ!

أم تغاريد دوختيني بهذي اهدرة درك غير يدخل نعطيلو ابتسامة كبيرة خلي يقول واش بيها هاذي جنت في عقلها

[om wassim]

مساء الخير فراشاتي الحبيبات
تاج الوقار حبيبتي توحشتك و واش راهي بشائر الحبوبة تاعي كبرت فرحت كي لقيتك شاركتي معنا الف مرحبا
ام تغاريد شكرا على كلامك الرائع لي دير الحماس اما على المشروع انا في راسي زوج أولا الخياطة لاني عندي دبلوم فيها و نحبها بزاف لكن الماشينة تاعي في دارنا بسبب الضيق يعني المشروع مؤجل لحين يرزقني ربي بالسكن و المشروع الثاني الحلويات و هدا اجلتو حتى تشفى امي الحبيبة ربي يطول في عمرها و نبدا أن شاء الله و كلامك زاد قواني خاصة أنه زوجي الدخل تاعو قليل الحمد لله لكن حبيت نساعدو
و لأنه ماحبش يخليني نخدم برا بالديبلوم تاع القراية خممت فهد المشروعين أن شاء الله

[sofia dj]

السلام عليكم
نهي ضحكتيني هههههههه7هه
ام تغاريد بارك الله فيك اختي راني حابة نشارك فالمسابقة بصح الله غالب هذا الاسبوع عندي ظروف تمنعني
اللي وليدها مريض ربي يشفيه

[sofia dj]

ام صابرين ربي يشدلك في صحتك و الله يبارك عليك
اللي سقسات عالقرلو كاين برودوي يجي في ساشي صغير اخضر ديريه شحال من مرة

[غزالة1]

السلام عليكم
صباح الانوار على احلى احلى فراشات

[قطيطوشة]

المشاركة الأصلية كتبت بواسطة تـاج الوقار

السلام عليكم

على فكره راني حطيت رابط الموضوع في موضوع دردشه الامهات الجد لانوهم يعانو من خربشه بسبب الامومه باش نستفادو مع بعض
راها التحقت قطيطوشه ان شاء الله يلتحقو الاخريات

غرفتي ضيقه بزاف وفيها سرير بنتي وثلاجه صغيره وفيها ساش لانج ننشر الداخل ايضا
ماعنديش مكان حتى انو لي طابل دو نوي فوق بعضاهم لربح المكان
احيانا يقلقني الديكور هذا ولكن ما لقيتش بديل
خزانتي من 5 ابواب ولكني نخزن فيها لي درا ومخايد ولي كوفرولي
نتمنى تفيدوني بافكار
زوي غير يرمي نفرزها تم تم تتخلط
ونامل فيها يعني طابله صغيره بلاستيكيه
ومساحه الغرفه ما تتعداش 3.5 متر في 4 متر او اقل
مع العلم اني عامله وحاصله بزاف مع لونكومبرومون يوميا تروحلي 3 ساعات طريق وساعات نحس التعب ونهملها خاصه انو بنتي مزالت في شهرها الثامن

أنا نفس الشيء كيفك تاج الوقار
عندي غرفة وكوزينة
الغرفة فيها سرير بنتي و سريري
لي تابل دو نوي فوق الخزانة
و خممت نتخلص من التسريحة و لكن الموضوع بعث فيا الهمة و البارح فرزتها و تخلصت من بزاف حوايج و ربحت قجر حطيت فيه قش بنتي

الغرفة ديما نحاول نبدللها الديكور من حين لآخر باه نحس انها وساعت شوية
و فوق الخزانة حاطة لي فاليز و كيما قلت لي طابل دو نوي و لي كوات
و عملت كي شغل ريدو يغطي من السقف حتى اعلى الخزانة باه نغطي الكوارث لي الفوق ههههه
شيء آخر راني بديت نلتزم بيه من لي التحقت بيكم
هو تجهيز مايلزم للغد
ولاني عاملة وعندي بنت في الشهر الثامن
عشاء الغد نوجد نص طياب في الليل و اضع في الثلاجة باه كي نرجع للدار غير نحط فوق النار
بقالي نلتزم بتلميع الحوض
اما الجانب الجمالي فحدث ولا حرج

[أم تغاريد]

السّلام عليكم ورحمة الله وبركاته
طاب صباحكنّ فرآشآتي ....
راني قريت الردود ديالكم وفرحت بتفاعل بعضكنّ
أشجع وأشكر كل من تسعى إلى متابعة الدّورة
بينما ألوم من غابت عنّا وكانت في بداية الدّورة قمّة في النشاط amel، أم عبد الله وياسين ، شقية لكن وفيّة،هنو أم ياسر،سرور،آسيا 25 ...والقائمة طويلة
أين انتنّ حبيباتي؟
يد واحدة ما تصفقش حتى انا نفشل كي نشوف ماكاش نشاط
اليوم المفروض يكون اخر اجل للمشاركة في مسابقة يوم مميز في حياة فراشة
ماكان حتى مشاركة رايحة نمدد في الاجال
لكن ادا بقات الدورة هكدا نغلقوها

[أم تغاريد]

ما هي المشكلة فراشاتي عندكم شغالات بزاف؟ ماراكمش لاحقين؟
الروتين خلاكم هكدا؟
فلنتحآور

[الوردة الندى]

السلام عليكم جميعا لكل الفراشات النشيطات اللي يبعثوا الحيوية والنشاط غيابي كان طويلا لكن سعيت دائما للحفاظ علي معظم التطبيقات
تنظيف الحوض10/10
العناية بالنفس8/10
التطبيقات الاخرى فرزت غرفة اولادي ورتبت ملابس الشتاء وهذا وين راني مع غرفة نومي كي نكمل نبعث الصور
بالنسبة للجديد درت برنامج اسبوعي للطبخ ارجو من الفراشات ابداء ارائهم
الاحد:حبوب(عدس-لوبيا.....................)
الاثنين:شربة(فريك-دويودة...................)
الثلاثاء:gratin(منوعة من منتدى الجلفة)
الاربعاء:عجائن(سباغيتي-ماقارون-ثريدة..................)
الخميسitza-quiche(;;;;;;;;;;;;;;;;;;;;;
الجمعة والسبت اطباق تقليدية اختيارية بالنسبة ليا عادة شخشوخة والا بربوشة
هذا البرنامج ساعدني كثيرا في توفير بعضالوقت خاصة وان اولادي في اعمار مختلفة

[أم تغاريد]

وعليكم السّلام ورحمة الله وبركاته اهلا بعودتك اخني الورد الندي
حياك الله
رجعتيلي شوية نشاط كي شفت ردك يعطيك الصحة اختي
كملي هكدا في انتظار الصور
بالنسبة لقائمة الاطباق بانتلي متنوعة وهايلة ماتنسياش السلطات خاصة كي عندك اطفال لازم ياكلو الخضر
وفقك الله
مشكورة

[oum sabrin]

السلام عليكم حبيباتي واش راكم اتمنى تكونو بخير
حبيبتي ام تغاريد عندك الحق يد واحدة ما تصفقش لم افهم لم هذا الخمول عسى الانع خير حبيباتي توحشنا التقارير و تبادل الافكار و الاسئلة
واقيلا ما عجبكمش الموضوع لي طرحتو تاع المطبخ هههه
بالنسبة للمسابقة انا كنت اخترت امس الثللاثاء كيوم مميز يعني مصور و لكن مازال فقط ما كتبتش التقرير و لكن تعملي مليح لو تمددي الاجال شويا بالتحاور مع الفراشات و نحطو كامل مع بعض
اختي صوفيا شكرا لك على الدعاء لك بالمثل
اهلا بكل الملتحقات الجديدات
بانتظار تفاعلكن تقبلوا تحياتي