الجزء **168* من واش طيبتي اليوم.. كوزينة تحضيراتنا لعيد الأضحى و رجوع الغايبات - الصفحة 5

sama83 · 2016-08-24, 23:02

ليلة سعيدةةةةةةةةةةةةةةةةةةةةةةةةةةةةةةةةةةةةةةةةةةةة ياحبيباتي

أم هبوبة · 2016-08-25, 08:21

صباح الانوار و الخيرات و المسرات على اغلى الغوالي و احلى الحبايب
توبة يا الحبيبية الف الف مبروك الكوزينة الي حليتيها باش يتجمع فيها الاحباب و ترجعنا نجتامعوا كاملين رانا نتهاونا بزاف و بعدنا بصح الظرووف احياينا تكون قاوية علينا
و الله عالم الكل في القلب و دايما نتفكركم و ليكم وحشة كبيرة كبيرة بزاف
ما شاء الله على الخيرات الي حطيتيهم كل شيئ يشهي

كنت نتمنى نحطلكل الباروك بصح ما عنديش باش نصور الاولاد كسروا كل شيئ ما خلاو والوا على هدا الشيئ بعدت على الكوزينات الي قبل و تقريبا انعدمت مشاركتي فيهم سامحوني

سلام لكل الحبايب كل واحدة باسمها دون استثناء

omjoujou · 2016-08-25, 08:43

السلام عليكم ورحمة الله وبركاته
صباح الخيرات
الف الف الف مبروك افتتاح هاذ الجزء الجديد حبيبتي توبة ان شاء الله عتبة مبروكة ومربوحة عليك وعلينا
بصح وينو اسمي زعمة انا اللولة لي اعلنت التمرد و طالبت بغلق الكوزينة لقديمة نظرا لغياب صاحبتها وافتتاح الكوزينة الجديدة
ذرك ندير شنوفة كبيييييييييرة

أم سدرة · 2016-08-25, 09:25

صباح الخير عليكم
غدايا اليوم تليتلي من بعد إن شاء الله

اريج 07 · 2016-08-25, 09:43

بونجوغ حبايبي
توبة وينها القهوة هههه هيا تفضلوا تفطروا خاصة زيكا

*توبــــة* · 2016-08-25, 10:26

صباح الخير حبيييييييييباتي

اسمحولي ماحطيتلكمش قهوة الصباح.... مانضتش بكري... بايتة مريضة

شفتي يا مريووووووومة كون مش نتي راهم استقهواو برا .... خخخخخخخ حشووومة
يعطيك الصحة لبوووووووووزتي

ساما83... منورة حبيبتي بتواجدك معانا... وراكي نتي سيقتي الكوزينة لبارح وطفيتي الضو

ام هبوبة غالياتي والله طلتك علينا تسوى الدنيا... حتى بلا صور نتمنى تتواجدي معانا يا الغالية

ام جوجو حبيبة قلبي... والله مانسيتك كتبت برك اللي غايبين... ماعليش يا ست الحسن والجمال
ضرك نزيد اسمك ولوووووو دنتي بتأمريني أمر خخخخخخخخخخ كلو الا زعلك
ام سدرة صباااااااحو حبيبتي.... بصحتكم التليتلي .. نموووت عليه

هيا جبتلكم سفنج ولا بيني كيما تحبو سميوه ههههههههه المهم خفاااااااااااااف

سبحان الله وبحمده عدد خلقه ورضا نفسه وزنة عرشه ومداد كلمااااته

أم ياسين الزهراء · 2016-08-25, 11:24

صباح الانوار

صابروني نصغر صوري ونحطهم عجزت برك ههههههههه

تقهوينا زوج مرات الحمد لله وربي يديم الخيرات شكرا اريج وتوبة شاطرات كثر مني ربي يفرحنا بيكم عن قريب ونتهناو منكم هههههههههههه

ام جوجو والفنا بطايبك بلاكي تزعفي وتخلينا للشر والله نشيانو ننقصو بزاف ربي يحفظك

لبنات نخليلكم سوال عندي سنيوة طول 40 سم وعرض 30 يعني تقريبا وحابة ندير فيها بقلاوة شحال ترفدلي من العجينة والحشو والعسل الشاطرة اللي تعرفي نستعرف بيها ههههههههههههه وشكرا

غدايا سباقيتي والحمد لله ونشوف واش نلبز للقهوة

أم ياسين الزهراء · 2016-08-25, 11:26

نسيت نقوللكم حاجة من غبائي وشطارتي فاصيت الرسايل الكل اللي راسلتني ومارديتش عليها تعاودلي والله مافقت وخايفة مانردش على وحدة تحساب صمطها اسمحولي ياخي تعرفو غبائي هههههههههههههه ومواح الكل

*توبــــة* · 2016-08-25, 11:51

اقتباس:

المشاركة الأصلية كتبت بواسطة أم ياسين الزهراء

صباح الانوار

صابروني نصغر صوري ونحطهم عجزت برك ههههههههه

تقهوينا زوج مرات الحمد لله وربي يديم الخيرات شكرا اريج وتوبة شاطرات كثر مني ربي يفرحنا بيكم عن قريب ونتهناو منكم هههههههههههه

ام جوجو والفنا بطايبك بلاكي تزعفي وتخلينا للشر والله نشيانو ننقصو بزاف ربي يحفظك

لبنات نخليلكم سوال عندي سنيوة طول 40 سم وعرض 30 يعني تقريبا وحابة ندير فيها بقلاوة شحال ترفدلي من العجينة والحشو والعسل الشاطرة اللي تعرفي نستعرف بيها ههههههههههههه وشكرا

غدايا سباقيتي والحمد لله ونشوف واش نلبز للقهوة

ياااصباحوووو ميمتي الغالية
راكي حابة تتهناي منا ااااااااه.... اريج بلاك مي انا هنا يموت قاسي معاكم خخخخخخخخخخ

دخلت على جالك .... شوفي الصينية اللي عندي 35/40 تهزلي كيلو فرينة وشوي والحشو كيلو كاوكاو والعسل رطل

بصحتكم السباقيتي معشوووووووووقي... خسارة دارنا مايحبوش العجائن

omelbanin · 2016-08-25, 12:01

السلام عليكم ،واش راكم ،غدايا تاع اليوم شطيطحة سردين ،وفريت .
قولولي كيفاش راهو يبان ،وليدي طيحلي التابلات ولات تصور noir et blanc .

شكرا اريج على القهيوة ،وانت ايضا توبه على الخفاف ،والمعلومه هههه.انا نحب لي يعرف االمقادير exact.

omjoujou · 2016-08-25, 12:09

سلام لبنات
جبتلكم غدايا روز بسمتي في الكوكوت تفضلوا معايا

حياتي كلها امل · 2016-08-25, 12:13

السلام عليكم وشراكم يا فحلات الله يبارك معندي مانقوووول
اريج وتوبة صحيتو على القهوة والخفاف رغم الرجيم وبصحتك ام ياسين السباقيتي ام البنين الله يبارك كي العشاء كي الغذاء يعطيك الصحة والتصاور راهم هايلين هذو هما الذراري مايخلو حتى شيء

أم محمد تاج · 2016-08-25, 12:17

صباحاتي يا بطابيييييييييط
دخلت على سفنج توبة الحبووبة رووعة رووعة يعطيك الصحة
مريووومة هاتي كاس حليب بسفنج تووبة ههههه مواحاتي
ام الجوووج جارتي الغالية وام البنين ممم وممم وممممم بصحتكم
غدايا كي العزوووزة الديجيتال سباغيتي
توبة اتحمليني شوي يالغالية ضيفي في ليستة المبحوث عنهن قمر ووهيبة ازال موااااح

انا هي رزيقة · 2016-08-25, 12:17

السلام عليكم نهاركم زين و سعيد بطبوطاتي الجميلات فتحت على فطور اختي ام البنين و الله فرحت كي دخلتي الكوزينة معانا حبيبتي و طيابك باين زين وقيلا رايحة تنافسيني في الخفوفي الظريف ...... خخخخخ البارح حطيتي بروشات و اليوم شطيطيحة سردين يا مي يامي و ما تتقلقيش حنونة الصور راهم يبانو عالكيف بصحتكم كلشي يشهي
مولات الكوزينة الف سلامات عليك من المرض ربي يشافيك حبيبتي و ماشاء الله عليك البارح بغرير الله الله و اليوم بينيي اممم و تقولي تلبزي راكي تبعدي العين عليك حنونة و الله ايديك يتلفو في حرير و يا لهوي شهيتيني في البغرير غدوة لازم نديرو باذن الله ..... خخخخخ
حبيبة قلبي مريومة تسلميلي على الطاولة المزيونة كيفك بصح وين راهو الفطور راكي حطيتي غير الطباسا و الجو و الخبز ..... خخخخخخ علابالي راكي توجدي راني في الانتظار حنونتي
ام عبدو و ملاك و ام سدرة الجميلة مرحبا بعودتكن القوية يا الفحلات ربي يباركلكم في دوك اليدين
اختي ام شيماء الفين هلا و متشرفة بمعرفك حبيبتي
سما 83 البسكرية اهلين بريحة الحبايب و نورتينا بطلتك علينا حبيبتي كثفي المشاركات باه تتمتعو بطيابك
ام جوجو الفحلة اكيد توبة منسانتكش حنونة لانك كنتي في بالها و كنتي السبب انو فتحتلنا احلى كوزينة و كيما قالت ام ياسو بلاكي تزعفي و تخلينا للشر .... خخخخ
اختي ام ياسو نهارك سعيد اختي و سمحيلي معنديش فكرة على طلبك انا خايبة في هذ المسائل يا لهوي عليك يا زيكا ..... خخخخخخ

هذطا وين شفت دخول ام تاجو و حياتي كلها امل نهاركن جميل حبيباتي

حياتي كلها امل · 2016-08-25, 12:19

هذا عشايا تاع البارح شربة مرمز وسلطة خضر مفورة