واخيرا نجحت تجربتي *ميلفاي بعجينة الفيلو بدون زبدة توريق *

[شمس بريكة]

ان شاء الله تكونو كامل ملاح
اليوم راني فرحانة لاني درت حاجة جديدة
واول مرة تصلحلي وانا نحب نجرب
كنت ساخفة علي الملفاي ومشكلتي ما نعرفش نخدم العجينة المورقة

و زيد حتا الزبدة اللي تخدم بيها ما نعرفش كفاش دايرة
مالا يا ام مخيخ خممي وجيبي الحل
قعدت نخمم في بديل وتفكرت
بما انو درتو بقلاوة بعجينة الفيلو الي تجي بالنشا والي جربتها وصلحت
قلت علاه ما نجربهاش
وزيد تخاطرت معي صحبتي في الخدمة تجربو معايا
ونشوفو شكون الي صلحلها والي تخسر تسلك الغدا ههههه
وزيد عجينة الفيلو
يخي تجي مورقة و مقرمشة كما الملفاي
هايا درت الكوراج والعمال علي ربي
خدمت العجينة وندعي في ربي تصلح وما نديش تبهديلة هههههه
بصح تجربتي صلحت والحمد لله وجيت نجريييييييي باش نحطهالكم
وتتهناو من معانات العجينة المورقة واللي ما تعرفش تخدمها كيفي
طولت عليكم بالحكاية هيا نبداو التفاصيل





المقادير
اربع كيلات فرينة
نص كيلة الي عندك سمن/زبدة/زيت
انا صراحة درت بالزيت العادي
رشة ملح
فاني
ماء الزهر

بسسي العجينة بالزيت وزيديلها رشة الملح والفاني و لم بماء الزهر
وخليها ترتاح انا عجنتها معي لعشية جوايه 16:00 كي روحت من الخدمة وبعد العشاء بديت نخدم فيها
كما عجينة البقلاوة


اكيد كملت مواعني باش تفضالي الكوزينة للحرب الي راح نديرها ههههه



حليها تكون رقيييقة و كل طبقة حطي بيناتهم النشا ودرتها بطول حبة الملفاي
كل جهة درتلها 06 طبقات عجينة وكل طبقة بيناتهم النشا



بعد ما تحطيهم فوق بعض حليهم بالحلال باش يلصقو ببعضاهم

اغرسي فيهم الفرشيطة وديري ثقبات ياااسر
ادهني المول وحطيهم يطيبو
انا ما شفش شحال الوقت بصح ما طولتش ما بين خدمت الكريمة لقيتها تحمرت
وزيدي حمريها من فوق

شوفو كفاش مثقوبة وحمرتها و خرجت مورقة




نروحو للكريمة
سهلة جدا
درت كاس حليب زوجم غارف نشا كبار
سكر علي حساب الرغبة
فاني
صحبتي الي جربت معايا دارت عصير ليمون جات فيه بنة تهبل اللي تحب دير انا ما درتش
خلطيهم وخليها تخثار ملليييح وحطيها تبرد بجيهم

اما الصبغة البيضا الفوقانية هيا عبارة عن

سكر قلاسي شوية فاني ومغرف صغيرة ماء ملون ابيض فققققققققط ما تكثروش الماء راهي مغرف صغيرة تكفي ونتي عينك مزانك لازم يبقا خاااااثر كما القلاصاج صبي بلقطرة و خلطي مليييييح


ديري طبقة الملفاي ومن بعد الكريمة والطبقةة الثانية انا درت زوج طبقات الي تحب دير ثلاثة عادي واضغطي عليهم مليح باش يلصقو بالكريمة مليح ومن بعد السكر *القلاصاج*

ذوبي الشكولة وديري سيور ومن بعد احكمي كيردون واخدمي عكس سيور الشكولة مرة للاعلى مرة للاسفل بلعكس

مركز تحميل الصور
ونصيحة مني ما تخليوش حتان ييبس السكر باش تخدمو اخدمو الشكولة والسكر مزال ما يبسش لخاطر كون تخليوه حتان ييبس
وتبداي تخدمي شكولة راح يتكسر وتفسد خدمتك
خلي القلاصاج ينشف وقطعيه وكولي بالصحة والهنا
ان شاء الله تعجبكم وتجربوها
انا راني فرحانة بتجربتي



وهاذا الشكل الاخيييييييييير

مركز تحميل الصور


مركز تحميل الصور
راكم تسقسيو شكون ربح انا الي ربحت لغدا هههههههههههههههه