حل عملي لمشكلة الطبخ بالنسبة للستات اللي بتشتغل :
السلام عليكم يا قمرات اديني رجعتلكو
أنا يا بنات زي ما قلتلكو بشتغل 9 ساعات في اليوم ومش برجع البيت إلا وقت المغرب، يعني صعب جداً ألحق أعمل حاجة في الوقت الضيق ده خصوصاً إننا لازم ننام بدري شوية عشان نصحا بدري
أنا جربت اطبخ كم أكلة يوم الأجازة بس ده بيضيع متعة اليوم ده اللي من المفروض يكون للراحة و الدلع و أشغال خفيفة و أصلاً طعم الأكل مش بيفضل حلو زي لو اتعمل في سعتها فأنا لقيت حل للمشكلة العويصة دي
أولاً الواجب ده عايز طولة بال و تفكير و تكتيك بس هيريحك قوي إن شاء الله
إنتي تجيبي ورق مقوى ملون (أنا بستعمل الدوسيهات الملونة اللي بيتحط فيها الوتائق يا رب تكونوا عرفتوها )
و بقطعها لمربعات كل دوسيه بيعملي 8 مربعات (عشان فيه وشين ) وأعمل 38 ورقة مربعة ملونة طب ليييه 38 ؟؟؟
أنا أقلكو أنا و جوزي بنتغدى في الشغل في مطعم الشركة يعني أنا بطبخ عشا بس و عندنا اجازة يومين في الاسبوع يعني الأيام دي بطبخ غدا و عشا ، يبقى لو الشهر 30 يوم يبقى ب 30 عشا يزيد عليهم 8 وجبات غداء أيام الإجازة ... تبقى الحسبة 38 وجبة و كل وحدة تعمل على حسب الوجبات اللي بتحضر في الشهر .
بعدين هتقعدي تفتكري الأكلات اللي بيحبها جوزك و ولادك و إنتي طبعاً و اكتبي في كل ورقة رقم معين من 1 ل 38 و إسم الأكلة و الوصفة لو إنتي مبتدأة زي حالاتي ههههه و دوري على أكلات حلوة ومغذية و في نفس الوقت مبتخدش وقت كبير في التحضير، الأكلات اللي بتاخد وقت بسيبها لأيام الإجازة أما بكون رايقة ووقتي ملكي.
و برضه في الورقة تحت هتكتب لائحة الشوبنج اللي لازم يتعمل عشان الوصفة دي : يعني مثلاً في وصفات معينة متنفعش من غير القشدة الطرية يعني لو قررت اعملها بعد ما رجعت من الشغل وفتحت التلاجة و لقيت مفيش قشدة طرية هيطلع تخطيطي على فشوش و هضيع وقت أدور اطبخ إييييه تاني عشان كده لما تسجلي الوصفة دي محتاجة إيه ده هيساعدك تكسبي وقت و حقلك ازاي بعد شوية .
ملحوظة : ممكن بعض الأكلات تكرريها أكثر من مرة في الحالة دي مش هتحتاجي وصفات بعدد وجبات الشهر
هتمسكي الورق ده حطيه في علبة عشان ميضعش منك و كل أسبوع إختاري الوصفات اللي هتطبخي الاسبوع ده، لو هتطبخي غدا و عشا يبقى 14 ورقة و حددي ورقة كل يوم كمان يعني جيبي ورقة تانية و اكتبي عليها أيام الأسبوع و حطي رقم الوصفات اللي هتطبخي قصاد كل يوم
خصصي يوم واحد في الأسبوع تنزلي فيه السوق عشان مضيعيش وقت و خدي معاك لائحة المشتروات اللي هتجبيها منيين ؟ طبعاً من ورقة الوصفات اللي هتطبخيهم الاسبوع ده عشان تضمني انك مش هتنسي حاجة
نجي بقى للطبخ ... إنتي عارفة هطبخي إيه ... و عارفة إن عندك كل مكونات الوصفة ... حيفضل إيه ؟؟؟؟ التحضير و انك تسويه .
والتحضير هو اللي بياخد وقت ... تقطيع خضار ، تقطيع ثوم و بقدونس، تحضير صلصة ...
أنا بقى نظرية الخطيرة تتلخص في الأتي :
بعد ما تصلي الفجر بدل ما ترجعي تنامي خدي نص ساعة أو أقل من وقتك و حضري فيها مكونات الأكلة، قشري الخضار، افرمي البصل، البقدونس أنا بفرمه و اسيبو في المجمد، حضري الصلصة ... و حطي الحاجات دي في حلل بلاستيك و حطيها في الثلاجة
لما ترجعي من الشغل هتلاقي كل حاجة متوضبة حترمي كله في الحلة أو الفرن و تسبيه يتسوى و روحي عيشي حياتك بقى و خلي وقتك لجوزك و ولادك ...
حاجة تانية يا بنات وانتو بتحضرو الأكل خلي لسانك رطب بذكر الله استغفري و احمدي الله على النعمة و إستحضري نية انك بتعملي ده لوجه الله الكريم
جربوها و ردو عليا
بحبكو في الله
( تقرير عن مشاركة سيئة )، و الموجودة أسفل كل مشاركة .
2012-12-15, 18:26
صسث''((صقف("ث''
العرض العادي
