الطبعة العاشرة لدورة الرقي بمدبرة منزل مثالية

[نبض الفؤاد]

السلام عليكم ورحمة الله وبركاته.....
والله والو ،راني حاضرة معاكم قلبا وقالبا .
نتبع كل خطوة تديروها . نصف النهار قعدت كتبت التطبيق والتعليق على الاخت مينة اعجبني تعبيرها و مدحت ابداعها ...انا كليكيت على قفلة (اضف الرد المتطور ) زعمة زوقت شوية ....راح كل شيء والله غير قريب بكيت رقبتي توجعني قدام الميكرو بزاف..... ايا نضت قلت ندور شوية حتى خرج ولدي من المدرسة يحب يتفرج الرسوم اذا بقيت قاعدة معاه نراقب فيه لأنو مكاش ثيقة في الرسومات كيما راكم عارفين .. المهم أنا على هذي الحال حتى دخل عليا خويا راكم عارفين حطيتلو القهوة و الكرواسون و التمر و بذلك استنيت حتى جاو البنات و ابيهم من العمل شربوا قهوة و راني جيت ضرك نكوناكتي حتى لقيتك يا سندس زعفانة مني ما يكون الا خاطرك ......
مزية العشا كاين من الفطور .. شربة عدس باللحم و سلاطة و فاكهة (تفاح)

[نبض الفؤاد]

تطبيقي ليوم السبت هو كالآتي:

كيما قلتلكم كنت برا نهار كامل مالا في المساء بعد العشا غسلت بنتي الماعن العشا و خملت الكوزينة في هذي الأثناء رحت للحمام غسلتو شوية نقيت المغسلة و طاسة الوضوء و ... و عقمت فراشي الاسنان كامل وفي كاس به ماء جافيل و ماء ، غيرت المنشفة ،و طهرت حوض الغسيل (ما عنديش بينوار عندي مرش و قصعتو) ..و خرجت صليت وضعت الفازلين على يديا و رجليا و لبست جوارب وكحلت عينيا كيما قالت اختي اريج بكحل عربي الله الله، ثم حكمت المصحف و قريت الورد اللي فاتني يوم كامل يعني 20 صفحة و الحمد لله ، رقدت مرتاحة شوية ...

و الآن تطبيقي ليوم الأحد :
نضنا أنا و زوجي صلينا الفجر و قرينا الأذكار بعد شوية ناضوا الأولاد متاخرين شوية على الوقت حظروا انفسهم للذهاب ، متعودين يخملوا غرفتهم لكن اليوم ما قدرووش الله غالب .. حظرت القهوة و التمر و الخبز و الزبدة بعد انطلاقهم جيت طليت انا شوية واش كتبتوا بعدي و بديت بالفطور نفخت العدس و غسلت السلاطة و رحت مباشرة لغرفة النوم انخلعت لقيت حوايج الشتاء مجبودين يعني نصف نهاري راح مع ترتيب الخزانة .. فرزت الحوايج الموسخين و بعدين خملت حوايج الصيف في حقائب لابعادها لحين اخراجها ، و غيرت شراشف السرير و نظفت شوي غبرة .. و بعد الفطور غسلت ماعني و دخلت للدوش ، و قبل ما ندخل عملت عصير ليمون على شعري للقضاء على الدهون الزائدة .و من بعد راني قلتلكم جا خويا ....و بقالي جزء من الورد اليومي نكملوا قبل ما نرقد ان شاء الله

راهو حان وقت العشا ربي يتقبل صلاة الجميع و صحا عشاكم
ليلة سعيدة

[~ حراير ~]

السلام عليكم و رحمة الله تعالى و بركاته
أولا راني تعبااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا ااااااااااااااااااااانة
و رجلي يتنابحو كي الكلاب حاشاكم و حاشا من قبالي

هاد وين قعدت بديت نقرأ في تطبيقات حباباتي لقيتهم ماشاء الله قايمين بالحالة مت بالضحك مع مينة و تأثرت كثير كثير بكلام أختي بنت اخليل و عجبني كلام سعاد "تقول عليها ماهيش امعانا طول راهي تطبق وحدها هيهيهيهيه والله ماتزعفي مني يا سعاد راني غير نضجك" أما سندوسة ففكرتني بكلام أمي بكري كانت ديما تقولي راكي في وجه السوق و كانت كي تقولهالي طول نتخيل واحد يبرح ليلى ليلى ليلى بـ خمسة ألاف بـ 10 آلاف هيهيهيه .... أيا و سندوسة راهي توري في رويحتها قدام العباد تحط في القاطو و تقعد تحكي معاهم و تخدم في التروسو قدامهم .... عندك تزليني حذاري تبلعطيني ...لأنه كاشفاتك كلنا فتنا على هادي الفترة هيهيهيه ما تزعفيش حتى انت راني غير نتمسخر في تمسخيرة ثقيلة هيهيهيه راهو التعب ينطق فيا كيما قال البومباردي ناكل و إلا نشرشي ههيهيهييه

درك نروحو للتطبيقات
راكم شفتو بديت بدية امليحة كملت الجانب الديني النهوض الباكر قبل ما يخرجو لولاد على 7:30 كانت كملت الشغل اليومي و الغداء طايب

و ياله قلت انروح لغرفتي و فعلا بديت فيها نحيت الستارة و الغلافات تاع المخايد و الدراوات لحتهم مباشرة في المشينة عدا اريدو و الكوفرلي رنختهم في شوية لوشا معاه مينيدو على الريحة و الرطابة
هزيت المطلة للبالكون تتشمس و الديسوندلي و الزربية ثاني عطيتهم نفضات املاح و خليتهم يتشمسو و جبدت الفراش البديل لحت للشمس ثاني "رغم أنه ماكانتش الشمس طالعة مليح 7:45" المهم مسحت فوق الخزانة و مسحت كامل المابل و عقبت نشافة نظيفة على الحيوط و غسلت الباب و قبضته و من جيهة قفلة الضوء و غسلت التاقة و مسحت الكاروات "ماهمش بهدا الترتيب المهم تفهموني برك و بالنسبة للتلفزيون ماعنديش في غرفتي" و سيقت الأرض على مرتين المرة الأولى بالجافيل و الصابون و بعدين بالماء و السانبون و ما صبيتش الماء بزاف باش ما نبذرش و تحصل سندوسة في الإثم هيهيهيه
أيا أنا كملت فتحت الخزانة لقيتها مرتبة "كما عادتي بالألوان و بالأنواع تقولشي براوات مطبقين" قلت انفرش و فرات لما فرشت صارت الغرفة كأنها غرفة عروس
و تخيلو وش اجرى ....... الخزانة بدات تعيط كيما بيت مينا و قاتلي نبيع بيك و قعد ضميري يصرخ في رأسي راكي تدي الوسام بالكذب .... أيا ما بلعطتهمش كيما دارت مينا ...رحت فرشت درا فوق الزربية و بديت نجبد في القش و انحط قلت انبدل طريقة الترتيب باش ندي نقطة إضافية من المعلمة أو حتى bon point و تخيلو وش لقيت ؟؟؟؟؟؟؟؟؟؟؟؟؟؟؟؟؟؟؟ تقريبا 480 ألف صرف حاطاتو تحت القش لأنها عادتي نحط الصرف و ننسى و ين حطيتو هيهيهيهيه المهم نظمت طابق واحد ..... و زيدو تخيلو وش صرى و حازتها الساعة 9:30 ؟؟؟؟؟؟؟؟؟؟
دقدق الباب و لقيت أمي العزيزة جاتني وهي جيتها عزيزة بزاف يعني ماتجينيش غير من المناسبة للمناسبة يعني كل عامين تقريبا باش تدخل لداري .... أيا عاودت فرميت على الباب تاع بيتي مسكينة قعدت معاها شوية و امبعد دورت الغداء ل يكان طايب و درت تليتلي أبيض بالدجاج "التليتلي كان مفور ديما نخبيه كاش ما يجيني ضيف نلقاه ساجي" و قعدنا في الكوزينة خدمتلها حبات قاطو جايينها الضياف بعد غدوة من قسمطينة و في نفس الوقت كنا نحكيو و نمنشرو نحكيو و نمنشرو "باينة على كناتها" أيا ضربت اعليها لقيتها الخامسة قاتلي غير انروح ندهت جارنا روحها
و بديت مباشرة بالجانب التربوي دراسة و مراجعة تميناها و الحمدل لله قالولي وينهي القصة التربوية الي وعدتينا بيها يوميا قلتلهم "
امشششوووووووووووووو ططططيييييييييرررررررررررررررروووووووووووو من وججججججججججججههههههههههههههههههههههيييييييييييي ياااااااااااا مصاااااااااااااااااااااااايب
أأأأأأأأأأأأأأأأأأأأأأأأأأأأأأأأأأأأأأأأأأأأوووووو ووووووووووووووووفف

طبعا مساكين هربو يجرو صلاو صلاتهم و رقدو و طفو الضو وحدهم مالي غاضوني و رحت بستهم و طلبت منهم السماح و قلتلهم راني تعبانة ساعفوني و احسنو عوني و شوفو أنا رضيت أمي حتى أنتم رضو أمكم "حسبت روحي درت حاجة امليحة" نطقت لالة أريج و حاربتني بسلاحي و قاتلي "ماما حبيبتي كيما تقولي لا إفراط و لا تفريط ماشي ترضي أمك على حساب وليداتك " طبعا مالقيتش وش انقولها بلعطتها و قلتلها كي تكبري راكي تفهمي ... لأني نستنى فيكم تقولولي وش رايكم؟؟
المهم رحت للكوزينة غسلت المواعين كامل و البلاطوات تاع القاطو و الروبو خليتو و جوزت نشافة على كل الدار ..... دخلت لبيتي قلت انديرلها كي كوزينة سعاد انفرمي عليها و إلا نبلعطها كيما مينا و انقولها غدوة .... لكني تفكرت الهمم العالية و التحدي الكبير قلت ...... يا ربي يا مريم يجيبلك راجل يديك اعلينا و يمنع عليك الكونكسيون هك ما دوخينا لا وسام لا عمار بوزوار أيا و خزيت الشيطان و شعلت الراديوبصوت اخفيف لقيتها غناية نايلية نضت انسوج معاها و نرقص في يدي و كتافي طلعلي المورال بديت مع القش ساعة نطبق و نرجع ساعة نشطح .... والله مافقت كيفاش كملتو ... شفت في الخزانة و نظامها الجديد عجبتني صارت تقولها خزانة عروسة و زدت لصقت حوافظ العطور المزينين خدمتهم صارت تحفة حسيت روحي راح نضرب عليها تزغريتة أيا لقيتها العشرة و ربع حشمت من الجيران خفت يقولو من الوحش تاع راجلها هبلت مسكينة عودت ضميت فمي و حليت يدي على الكلافيي و هاد هي التزغريتة على بيتي و على خزانتي
يويويويويويويويويويويويويويويويوويويويويويويويويوي ييييييييييي
وررررررررررررررررررررررررررررررررررررررررررررررررر رررريييي

[oummalak]

يصبحكم بالخير يا لبنات [color="magenta"]
راني متاخرة في تطبيقاتي رايحة نبدا بادن الله
السبت قريت البرنامج وحسبت يبدا الاحد كي العقونة قلت انا شاطرة ضربتلها تحميمة وزدت كوب كيلي جيت نهبل كها نوجد روحي للدورة ههههههه
الاحد
الجانب التنظيفي رحت لغرفتي بديت بالسرير نفضت المرتبة ومسحتها بالانجات ومسحت السرير بالمنظف الخاص بالاثاث ومن بعد خملت القجورا كامل انتاع الكوميدينات ولاكوافيز بعد دلك رحت للخزانة مسحتها من الداخل والخارج ونظمت الملابس جبدت انتاع الشتاء وخبيت انتاع الصيف وعلى فكرة الخزانة من الداخل مسحتها بالماء +قطرات من عطر فام دو بوس واش نقولكم الريحة تهبل كي كملت الخزانة مسحت التلفاز والخزانات انتاع الفراش من الداخل والخارج كدلك الثريا نشفتها شوي ومسحت الباب جاء الان دور البلكونة خرجتلها نفضت غير بالمكنسة البيبان انتاع اللوح كان المطر غسلهم
سيقت الغرفة بالجافيل وجال دوش عندي من افروشي والله الريحة تهبلل غرفتى كملتها الخامسة لكن مع شغل الدار
الفطور درت شربة باللحم والفارميسال جاءت روعة وزدت سلاطة جزر رابي معه تونة
في المساء غسلت نصف الحما م وباقي النص لاننى من كنت نسيق الغرفة انتاعي خليت الماء السخون يسيل هكدا جانى التنشاف ساهل بالجافيل لم استعمل النضاف كل يوم انا نغسل البينوار بالجافيل والازيس يعنى ديما نقي غسلة خفيفة يولي يبقص
اليومباقيلي غير البينوار نغسلو ان شاء الله
الجانب الدينى على اتم وجه من ناحية الصلاة في وقتها والحمد لله القران اتممت سورة البقرة وكنت بداتها السبت
الادكار كدلك قراتها وسورة الملك كدلك
اليوم ان شاء الله صايمة دين واجر
الجانب الجمالي كحل عين +سيشوار وزيت للشعر فاتيكا باللوز+مكياج وترطيب لليدين +تفريش الاسنان
اليوم نهضت الساعة السادسة دوشت وصليت قريت 6صفحات من القران وقريت الادكار وجيت نكتب تطبيقاتى لانهم ولادي لبارح ما خلاوني نقعد فالميكرو [/col
الجانب انتاع اللاعتناء بالاولاد دعاء بسلامتها شغل من الصباح حتى للليل بصخ تدخل فالخاطر رغم العمايل الي تديرهم

[oummalak]

واله لبنات راكم ما شاء الله تطبيقاتكم هايلين وحكاياتكم اروع مت بالضحك لبارح قريتهم فالبورتابل انتاع ولدي ومين الكتبة اصغيرة ويكتب بالفرنسية اليوم كتبت فالميكرو لكبير

[oummalak]

حبيبتي بنت خليل ربي يرحم الوالد ويشفيك حاولي على روحك الان فهمت علاش راك مقلقة يحسن عونك لكن تهلاي في وليداتك راهم صغار ويححتاجوك ربي يحفظك

[oummalak]

اريج قوليلي تكتبي بالميكرو ولا بالقلم انحير كي نشوف مشاركاتك ونضحك عندك تعليقات تبكي من الضحك ربي يخليلك الوالدة ولوليدات

[oummalak]

نبض الفواد تطبيقاتك ما شاء الله وربي يعاونك ويحفظلك لوليدات

[oummalak]

حبيت نسقسيكم لبنات عندي ثريا مليءة بالكريستال الرقيق وتجيني واعة باه نقيها الى عندكم طريقة ما تبخلوش علي

[oummalak]

سندوستى ربي يحفظك من كل عين قايمة بكل شىء انا كالسلحفاة غير ما تنحيليش النقاط برك ههههههههههه

[oummalak]

اختى سعاد وفاء راك شاطرة بصح راك اور شو احنا رانا فالبيوت وانت راك فالكوزينة

[oummalak]

مينة يامينة وواش من مينة ضحكت بالدموع على المشاركة انتاعك زيدى تطبيقاتك هايلة وربي يعاونك

[oummalak]

زعمة اليوم اصبحت ندعيلكم دعاوي الخير ايا ردو وقولو امين يارب العالمين

[~ حراير ~]

السلام عليكم و رحمة الله تعالى و بركاته
يصبحكم ربي بالخير و التقتى و الهناء

اللهم أنت ربي لاإله إلا أنت عليك توكلت وأنت رب العرش العظيم ماشاء الله كان ومالم يشأ لم يكن ولاحول ولاقوة إلا بالله العلي العظيم أعلم أنالله على كل شئ قدير وأن الله قد أحصى كل شئ علما اللهم أني أعوذ بك من شر نفسي ومن شر الشيطان وشركه ومن شر كل دابة أنت آخذ بناصيتها أن ربي على صراط مستقيم...

اللهم أني أعوذ بك وبكلماتك التامة من كل شيطان وهامة ومن كل عين لامة

اللهم بك أصبحنا وبك أمسينا وبك نحيا ،وبك نموت ، وإليك النشور

حباباتي و خواتاتي و صحيباتي وش أحوالكم راني كملت شغل كل يوم و الغداء راني درت شوفلور المرقة راهي اطيب و خليت قليانو لمبعد و خبز الدار راهو يخمر باه انلوحو في الكوشة ماعنديش الدقيق باش اندير كسرة درة خبزة بالفرينة و هاد هي طريقتي البسيطة
1 كيلو فرينة "يديرلك خبزة كبيييييرة أو 2خبزات" + فنجان زيت + 3 مغارف حليب غبرة "أو تعجني بالحليب" + ملح حسب الرغبة + مغرفة سكر +خميرة فورية تلوحيها في الدقيق أو كانهي خشينة تحليها في الماء الدافي تلميهم بالماء دون عجن فقط تلميهم حتان تعود عجينة لينة مثل عجينة الفطير و تزيديلهم أبيض بيضة و شوية زبدة و تلميهم امليح و تكوني قرصة مدورة توضعيها في سينية مدهونة و تخليها تطلع ادهنيها باللأصفر تاع البيضة و رشيها بشوية جاجلان و دخليها للكوشة بعد 3 دقايق نقص النار شوية حتان تفوح عليك ريحة الخبز تجي خفييفة و بنييينة
و درك قبل ما نبدا الشغل راني ريحة للسوق نقضي "حالة الي وحدو" و لكن قبل حبيت نقول حاجة لأختي بنت اخليل

حبيبتي بنت اخليل ربي يرحم باباك و ربي يعطيكم الصبر و لكن مالزمش تكثرو من البكاء لأن البكاء يحجب عنكم ميتكم يعني إذا حبيتي باباك ربي يرحمو يحس بوجودك و يرد عليك السلام انتاعك لازم
1- تروحي للجبانة يوم الجمعة قبل العصر لأنه هاداك الوقت ربي يرد على الميت روحو لمن يأتيه زيارة
2 ما توقفيش عند الشاهد بل أوقفي عند رجلين القبر باش يكون وجهك مقابل وجهو
أهم حاجة باش يشوفك ما تبكيش لأنه البكاء يحجب عنك رؤيته يعني حاولي تمسكي روحك
- لما تتفكري باباك ما تبكيش تفكريه بدعوة زينة خيرلو
- كان تحبي باباك برفعولو قدرو و تزيديلو في حسناتو أحفظي القرآن لأنه كل ما تحفظي آية يلبسوه تاج من نور و يرفعوه درجة يصبح هو حاير منين جاتو و يسألوه من معاه كيفاش صرت هك يجاوبهم بحفظ ابني للقرآن .... يعني تصوري انت تستفادي و هو يستفاد ...... ييييييييااااااااااه و يا رحمتك بينا يا ربي
يا رب يا حنين يا كريم ترحم بابات بنت اخليل و تقيه عذاب القبر يارب تجعل قبر نور و ضياء يا رب تجعلو روضة من رياض الجنة و ما تجعلوش حفرة من حفر النار يا رب تجاوز على سيئاته و تبدلهالو بحسنات و تباركلو في حسناته و تزيدلو فيها برحمتك يا أرحم الراحمين اللهم آمين

و درك انخليكم على خير و ربي يكون في عونكم
حق قولولي وين هاد الدردشة انعود ندشدش معاكم كي تضيق روحي .... و بمناسبة ضيق الروح أختي لعزيزة سعاد انا ماجاوبتكش على سؤالك عليا لأني مالقيت وش انقولك هاداك النهار ....ماقلقتش على سبب واضح و لكن كيما نقولو "الوحش الي قتل الجحش" فهمتيني؟؟؟؟؟
هيا سلام عليكم و رحمة الله تعالى و بركاته

[oummalak]

حبيبتي ايتس مي ربي يعاونك في خدمت الدار وبرا