الى الاخت لينة 2007 - الصفحة 5

ام امجد14 · 2012-02-28, 22:20

السلام عليكم والله تحسنو اولادى كثير وخفت مشاكلهم بطريقة ملحوضة وذلك لانى مشيت بنصائحك
ولكن راه عندى مشكلة هو ان اولاد راهم كثيرى التشاجر فيما بيناتهم
و تخيلى ان كبير يضرب الصغير يعنى بتدرج وانا نبقى حاير فى التعامل معاهم
وخاصة اولادى الكبار يعنى الذى عمره 12 سنة هو اخيه الذى عمره 10سنوات توصل بيهم حتى الشجار الى الضرب وانا نوقف حائرة
هل نضربهم ام نتركهم ام ماذا افعل واصبحت هته الحالة تقريبا كل يوم
فارشدينى

lyna2007 · 2012-03-08, 08:32

اقتباس:

المشاركة الأصلية كتبت بواسطة ام امجد14

السلام عليكم والله تحسنو اولادى كثير وخفت مشاكلهم بطريقة ملحوضة وذلك لانى مشيت بنصائحك
ولكن راه عندى مشكلة هو ان اولاد راهم كثيرى التشاجر فيما بيناتهم
و تخيلى ان كبير يضرب الصغير يعنى بتدرج وانا نبقى حاير فى التعامل معاهم
وخاصة اولادى الكبار يعنى الذى عمره 12 سنة هو اخيه الذى عمره 10سنوات توصل بيهم حتى الشجار الى الضرب وانا نوقف حائرة
هل نضربهم ام نتركهم ام ماذا افعل واصبحت هته الحالة تقريبا كل يوم
فارشدينى

السلام عليكم اختي ام امجد كيف الاحوال ان شاء الله بخير .
تشاجر الاولاد خاصة الذكور امر مالوف في كل العائلات لان كل واحد وشخصيته وكل واحد حاب يفرض نفسه .
وعادة يتواصل التشاجر في بعض الاحيان الى غاية سن المراهقة
لانهم الان يتشاجرون عن الالعاب عن الكومبيوتر عن بعض الامور اللي تخص الصغار وغيما بعد عن الالبسو والجال تع الشعر و...........
اولا لا يجب ان تدخلي في التشاجر معه حاولي فقط تفريقهم دون صراخ.
ثانيا حاولي ان تفهمي على ماذا ا يتشاجرون اذا كان على الكمبيوتر مثلا حاولي ان تضعي نظام في البيت بحيث يجعلهم يستعملونه بالتناوب في كل مرة .
ان كان عن الالعاب حاولي ان توفري لهم اكثر من لعبة ويتبادلونها .
يجب ان تتحدثي دائما معهم وتذكريهم ان هذا اخوك هذه الكلمة تترسخ في اذن الطفل وسيفهم ان الاخ لا نضربه .
يجب ان تعاقب الظالم فيهم بالحرمان من اللعب اوالخروج او باي شي يحبه عادة .
يجب ان تكوني صارمة في هذا المجال معهم .

وفي الاخير لازم لك كثير من الصبر لان كل الاطفال يتشاجرون عزيزتي .

رشــــ81ــــا · 2012-08-04, 17:05

السلام عليكم و الله موضوعكم اكثر من رائع و ان شاء الله ربي يوفف كل ام في تربية اولادها انا عندي رأي بالنسبة للأولاد العنيفين ممكن انك دخليهم للرياضة مثل الكارتييه او الجيدو او اي رياضة يحبوها هي رايح تخليهم يصرفو الطاقة الزائدة في شبئ مفيد و يروحو للدار عينين معندهمش خلق للعفار

ام امجد14 · 2012-11-22, 16:03

السلام عليكم اختى لينة و كيف احوالك ان شاء الله تكونى بخير والحمد لله على رجعتك الينا بالسلامة و الله حبيتك تفهمينى فى شخصية ابنى الكبير الذى كان يعانى من الكذب
جلست معاه و حاورتو قالى انا مانحسش بروحى عندما نكذب و فهمت مليح و تكلمت معاه فى حدبيث مطول وحكينا ايضا حتى على جانب الدينى
و قلتلو نلعبو لعبة انى نوضعلك علامة بالقلم كل يوم فى يدك و عندما تحس بانك سوف تكذب انظر اليها و كل يوم احكيلى واش صار معاك وشحال من كذبة كذبتها و
والله حسيت الامر نجح معايا لكن مازال يكذب عندما يخاف منى انا او ابيه و يصمم على الكذبة كيفاش نعززلو ثقتو بنفسو رغم انى دائما عندما يقول الحقيقة ما نعاقبوش وناكد معاه على الموقف وجزاء الذى يقول الصذق
الامر الثانى هو يهتم بمضهررو الخارجى فوق الخيال الى درجة انو يغير ملاسو مرتين او اكثر فى اليوم و يتكلم فقط غير على الملابس وشراء الملايس رغم اننا مش مقصرين من هته الناحية و يمشط شعره بطريقة غريبة عيينا نتكلو معه لكن بدون جدوى و الصلاة اذا قلتيلى يصلى وذا غبت ما يصليشش
انا نحس بلى بدا يكره الدراسة يعنى يرو ح دروسو و يحفظ الا بعد الحاح منىوما عندوش القدرة على تحكم فى اعصابو اذا تعصب اتوقع منه كل شيء
قلة ادب فى الكلام و كانى لست امه و رفع الايدى و كانه سيضربنى و طبعا نخرج واتركه نلقاه مباشرة جاء يطلب فى السماح وكان شيءلم يحدث و كل مرة نفس شيء

هو ايضا كثير الكلام و كلما يخطر على باله يقولو ثرثار ورانى خايفة تروح معاه هته الصفة

رغم الكلام الى قلتو عليه لكنو طيب جدااااااو حنبن فوق الخيال و يتاثر بسرعة و يحب التجمعات العائلية و عندو حب العطاء و مساعدة الناس الى درجة تلفت الانتباه

انصحينى كيفا ش نتعامل معه باش ينجح فى حياته و
سمحيلى طولت عليك مكشوووورة حبيبتى

hasnawa · 2012-11-24, 21:07

شكرا للجميع

ام امجد14 · 2012-11-26, 13:01

اين انتى يا اختى لينة ربى يرجعك بالسلامة

ام امجد14 · 2012-12-09, 17:11

السلام عليم من فضلكم احد يجاوبنى مانيش عارفة كيفاش نتعامل معاه

~ حراير ~ · 2012-12-09, 21:48

أختي العزيزة ام امجد
والله راني حاسة بيك و حاسة بوليدك و كأني نشوف فيك

قبل ما نبدأ في أي كلام انحب انقولك على الدكتور طارق الحبيب يكون يوم الجمعة على 10 أو 11 في قناة الرأي عندو حصة مع الشيخ العوضي في القمة و الموقع تاعو اسمو مطمئنة زوريه و شوفي يمكن تستفادي منه
و انا قتلك على اسم الدكتور لسبب أني الجمعة الماضية كان يتكلم على التربية و الحقيقة أني لحقت في آخر الحصة لما صنف الأولاد على حسب تربيتهم و أخر صنف هو الطفل الراقي و قال أنه التعامل مع هاد الطفل يكون بالصمت يعني ماغير تنظري له نظرة معبرة عن غضب أو عن عدم رضا راح يفهم وحده و حسيت ولدك من هاد النوعية

لأنك قلتي هو طيب و حبوب و اجتماعي
يعني الشيئ الي راهو فيه حاجة مستجدة عليه

و السبب واضح قدامنا وضوح الشمس و هو الـمـــــــــــــــــــراهــقـــــــــــــة
و طبعا المراهقة هي عبارة عن مرحلة انتقالية مابين الطفولة و البلوغ أو الشباب و هاد التغيرات هي صح في جميع أموره و احواله يعني الجسمية والفسيولوجية والعقلية والاجتماعية والانفعالية والدينية والخلقية و لكن ما أردت التأكيد عليه هو جسمه المسكين و التغيرت التي تحصل فيه بدون ارادته او بدون ما يتحكم فيها فإما يتمرد عليها او يتقبلها و ما يحسش بيها

و الأهم من هذا كله راهي تغيرات تع هرمونات طالعة هابطة يعني باختصار تخيلي نفسك و حالتك النفسية و انت معذورة او انت تتوحمي هكداك راهو وليدك
ممكن نكون بالغت و لكن ماتقدريش تنفي انها فترة الصراعات الداخلية و الخارجية و ماتقدريش تنفي وجود علاقة بين عمل الهرمونات الجنسية والتفاعل العاطفي سواء سليم او خاطئ

على هك حبوبتي حبيتك مابين ماجات المختصة تركزي على هاد الحوايج و لكن بدون املاء و بدون طلب مباشر و بدون أوامر بل بكلام جميل و حب و دائما امسكيلو يديه و امسحيلو على شعرو و كلميه بلغته التي يحبها مثلا تعليق مرح على شعرو بالجال او مقارنة مضحكة على لباس زمان و لباس الآن
و درك انقولك على الحوايج

اولتها ركزيلو على اسلاميتنا يعني الانتماء تاعنا للدين الحنيف يمنعنا من امور و يامرنا بحوايج لازم نطبقوها و بهذا تكون عندو هوية أو بالأحرى انتماء يمشي على اساسه و معليهش ساع على ساع تفاهمو كل الدار يصومو و لما تصومو يقوم الوالد الكريم بالدعاء و الصلاة جماعة .... و كان مش لاهي الأب هنا فرصة كبيرة قولي لولدك يأمكم و تصلو جماعة
انا احيانا بنتي اريج انخليها تأمنا ... و نصلي معاهم و بعدين نعاود صلاتي وحدي في بيتي درقة عليها باش تحس بالمسؤولية و بخاوتها و كانهم واحد و عدة اشياء اخرى

الثانية ديريلو او يدير لنفسه هدف صغير و قريب المنال و هدف بعيد شوية يسعاليه و عجبتني فكرة الأخت عن الرياضة او شوفيه هو لماذا يميل و ساعديه

و درك نقولك على حاجة مهمة الصحاب و ما ادراك ما الصحاب انصحيه بالشوية باش يغير الصحبة الي يفكرو غير في الملابس و في التفاهات و قولو يرفع الهمة انتاعه و ذكريه بالصحابة و حتى بالدعاة تاع درك أو كاش لاعب متأدب و نجح في حياته
مثلا عنتر يحي بوقرة هوما مثال رائع للوطنية

و حاجة أخيرة مشكلة الفراغ ما تخليهش وحدو ابدا و اذا لقيتيه يلعب في الميكرو شاركيه اللعبة و تنافسي معاه و تكلمي بطريقته

و الصبر راهو مفتاح الفرج و الدعاء في كل وقت
ربي يهديه و ربي يحفظه من كل بلاء و يبعد عليه الظلام و ولاد الحرام آمين

ام امجد14 · 2012-12-10, 08:05

الله يعطيك الصحة راكى بردتيلى قلبى
كنت خايفة و نحسب روحى اخطات فى تربيتو
مشكوووووورة على كلامك

ام امجد14 · 2012-12-10, 08:23

اختى اريج بالنسبة لاوقات فراغ عندو نهار الجمعة و السبت نحسو ضايع فيهم اقتريحى على كيفاش نعمرهملو
و الصلات كيفاش نزيد نحبو فيها لانو ما يصلي الا اذا قتلو

وفاء سعاد · 2012-12-10, 08:36

اختي ام امجد راني كي قلتلك الاخت لينة راهي رجعت راهي ترد على اللي كاتبين في موضوعها المثبت جربي اكتبي فيه باش ترد عليك

ام امجد14 · 2012-12-10, 13:20

مشكووورة اختى سعاد

~ حراير ~ · 2012-12-10, 21:58

السلام عليكم و رحمة الله تعالى و بركاته
أختي لعزيزة أم أمجد والله غير ضحكتيني
أولا خليني نستسمحك مارديتش عليك في سع لأني والله مالقيت الموضوع من قبيلة و أنا ندور من قسم لقسم بدراع مالقيتو لأني في العادة نخدم غير بالسجل و راحو لبنات مسحوه ما لقيت حتى موضوع شاركت فيه هيهيهييه مع النسيان هاداك هو المهم
قتلك ضحكتيني زعم انت الأم الثالية بنظري تستناي مني انا نقولك بلي راكي ما قصرتيش مع ولدك
شوفي على حسب كلامك معايا من قبل و على حسب نصايحك معانا كامل نقولك أنت الأم المثالية الي نطمنو معاها بلي راح تخرج شباب فب القمة للجزاير الحبيبة
شوفي مارانيش انجامل فيك و لكن الأم الي تهتم بوليداتها و تقعد تاكل في رويحتها باش يتسقمو هوما راهي فعلا ام مثالية و انت ما عندك ما يخصك
ولكن كما تعلمين الكمال لله يعني مستحيل راح توفي و تكفي في كلشي أو كما يقول خاوتنا التوانسة ماكيش شمس تزرقي على كل البلاد يعني لا تستطيعي الإلمام بكل شيئ قد تغفلين على أمر ما فلا تكثري اللوم على نفسك حتى لا تتعبي فلنفسك عليك حق يا حبوبتي
و قبل ما نتكلمو على أمجد خاينا نتكلمو على أمه الطيبة الي راح تقتل روحها بالتخمام
شوفي حبوبة لازملك الراحة يعني بعد نهار تعب خلي و لو نصف ساعة راحة لك أنا في العادة بعد ما يرقدو لبنات و نكمل شغل الدار نعطي لنفسي نصف ساعة راحة كل نهار كيفاش ساعات نستلقي ساعات ندير قناة القرآن و نقعد نشوف في الكعبة المهم وقت راحة لنفسي و فقط و زيد حاجة أخرى "سمعتها من اوبرا" كافئي نفسك يعني بعد المجهود تاع انهار كامل ممكن تكوني اصبت فيه أو اخطأت المهم أنك بذلتي مجهود و تعبتي لتحقيق أهدافك طبعا الي هي تربية ابنائك و فتح بيتك بلراحة و السعادة و الهناء ... على هك كافئي نفسك ولو بشيئ بسيط
و نعطيك انا وش نكافئ نفسي علبة ياغورت الي نحبو ونموت عليه ... ضوء خافت ... إذاعة القرآن أو القناة الأولى مع صوت خافت و نقعد ناكل في هاداك الياغورت غير بالشوية و نستبن فيه و نتمتع "تقولشي طفلة صغيرة هيهيهيه غير قوليها" المعنى الي حبيت نوصلو شوفي انت وش تحبي و كافئي نفسك به و لكن في حدود المعقول ما تقوليليش محزمة معشة بالدبلوني هيهيهيهيه
المهم انك تستمتعي

و درك وش نقولك على وليدنا العزيز انا لماسألتيني والله حسيت لساني تعقد لأني عندي لبنات و لبنات مش كيما الدراري
عموما أنا و بناتي نحبو الرسم و المطالعة كثير كثير فنقعدو نرسمو مع بعض مثلا نتفقو على رسمة وحدة و نقعدو نرسمو فيها و بعدين نعلقو على رسمة كل وحدة
أو نخرجو مع بعض في رحلة خفيفة خاصة لما يكون والدهم موجود و من لي نركبو في السيارة و احنا نغنو تخيلي وش نغنو أغاني وطنية موطني قسما من جبالنا ....
اما ابنك فوالله ما دريت وش انقولك كنت راح انقولك الرياضة ما دريتش هل يحب الرياضة أم لا على هك حاولي تتحاوري معاه و تشوفيه وش حب هو و باش تسهلي عليه ابحثي انت اولا على النوادي الرياضية المناسبة و بعدين اقترحي عليه

اما بالنسبة للصلاة فنقولك الصح راهو في سن تحمار العين على صلاته و رغم هذا تقدري تحببيه في الصلاة بأنه يصلي معاك كما قتلك و يروح لصلاة الجمعة مع والدو و لكن سهليها عليه يعني على 11 مثلا جهزيلو الدوش يكون سخون و نظيف و حضريلو قشه و 2 فوطات املاح و زينين و خاصين به و قوليلو تفضل يا أميري يا تاج راسي يلي نفتخر به قدام الناس يلي رافعلي راسي في العايلة و هك تحفزيه و تحضريه للصلاة
و انحب انقولك احنا بكري في دارنا و مازال انديرها في داري "ولكن لأحيان بسيطة" كنا نحضرو انفسنا لصلاة الجمعة من الخميس في الليل نحضرو ملابس الصلاة و نهار الجمعة بعد صلاة الصبح في وقتها نقراو سورة الكهف و امبعد الدوش و امبعد نقعد قدم التلفاز نسمعو لخطب الدول الإسلامية يعني لا شغل دار لا والو و حتى الغداء حاجة خفيفة المقصود نفرغو انفسنا لصلاة الجمعة و فقط
راني طولت اعليك درك و رانا نزيدو نتعاودو ان شاء الله
نوصيك حاجة وحدة استهلاي في ام امجد راح تلقاي امجد استهلى في روحو بروحو و ربي يملكو بالعقل و الدين و ربي يجعلو هادي مهتدي اللهم آمين

ام امجد14 · 2012-12-12, 13:44

الله يعطيك الصحة و الله ينوك راكى اعطيتينى افكار هايلة و الله غير فرحت بيهم و من الان نبدا فى تطبيقهم
ومشكورة على كلامك علي رانى فرحت بيه نتمنى و رانى نديرفى مجهودى باش ربى يوفقهم الى طريق صلاح و فكرة هايلة تاع مكافئةنفسى عجبتنى بزااااااااااااف والله غيررانى ندعيلك و مشكووورة

ام امجد14 · 2012-12-13, 09:31

صباح الخير اختى اريج و مرة ثانية مشكوووووورة على كلامك
ؤرانى اندهشت كى قلتيلى راه كيما الى تتوحم على هذيك بحثت ووجدت انو هته الفترة ترهق جسمه علابيها دايما عندما نقولو حاجة يقولى رانى تعبااان لهذا يسموها المراهقة فغيرت معاملتى معاه