موضوع مميز طبخ الأعراس - الصفحة 5

روح مراد · 2014-09-21, 08:23

شكرا لك يا أختي
أريد نصائح عملية من تجارب النساء

first first · 2014-10-01, 15:12

اخت روح مراد اسمحيلي والله ماعندي فكرة في الطبخ للاعراس
انا مثثلك تغريني هته الفكرة
الحقيقة ماشي باش نطبخ في فرح كبير......لكن ممكن خطوبة فاتحة في بيتنا نسلك راسي...على الاقل انا نحكم الشوربة وخالتي تتولى الباقي.
فكرتك مليحة.

ممكن الاخوات يفيدونا بالمقادير.
وانا ضد فكرة لي يقولك هادي خدمة النسا لكبار...لالا في هدا الزمان الانسان لازم يتعلم...ماشي حاجة خارقة للعادة.مسالة كيل وعفايس يسهلولك الخدمة ويضمنولك النتيجو وفرات
طريقة الشوربة تاعك عجبتني. ربي يجازيك خير ويزيدك فحولة على فحولة.

روح مراد · 2014-10-02, 08:36

صحيتي أختي
ناس بليدة معروفين بالطبخ اللذيذ ماذابينا لوكان تفيدينا
بوصفات الأطباق العادية اللي طيبوها كل يوم ماش المناسبات

دلال 30 · 2014-10-05, 14:41

السلام عليكم
اختي روح مراد ... عيدك مبروك ولكل الاخوات هنا
حبيت نسأل على طاجين الزيتون..... كمية كبيرة...حوالي 50 شخص
ماهي المقادير اللازمة والطريقة
من فضلك

روح مراد · 2014-10-06, 09:55

السلام عليكن عيدكن مبارك
أختي دلال
نبداو خطوة خطوة باش نوضح مليح
أول شيء اللحم أو الدجاج
إذا رايحة الديريه بالدجاج تحسبي 50 قطعة دجاج ملاح و تزيد ديما حوالي 5 أو أكثر للاحتياط
و إذا رايحة الديري اللحم كيف كيف من الأحسن تحسبي القطع مثلا رايحين نحطو 2 قطعات في طبسي نحسبو 100 قطعة و نزيد شوية للاحتياط
نشريو الزيتون هنا ما نقدرش نمدلك الكمية بالضبط عينك ميزانك و على حسب شحال رايحة تسربي في الطبسي كاين اللي يحط بزاف و كاين اللي يحط شوية على حسب المقدور
المهم تشري الزيتون على بكري و تخليه يبات ليلة كاملة في الماء و من بعد إذا عندك الوقت بديلو الماء و زيدي خليه أحسن من أنك تغليه باش يروح الملح
إذا ما عرفتيش الكمية أشري و فرغي في الطنجرة اللي رايحة طيبي فيها حتى تلحقي للكمية المطلوبة
نبداو بالتحضير
نحطو اللحم أو الدجاج نسكرفجو عليه البصل حوالي 4 بصلات و زيدي راس ثوم و زيت و ملح و فلف أسود و عود صغير قرفة و خلي كل شيء يتقلى اللي يحب مرقة حمرة يضيف حبات طاطم مرحية و قليل من الطماطم المصبرة و الللي يحب مرقة بيضاء يخليها بدون إضافة ممكن نضيفو زعفران كذلك الواحد و ذوقو
كايف اللي يضيف أوراق الرند 2
كي يتقلى اللحم نمرقو بالماء المغلي و نخليو اللحم يطيب كي فريب يطيب اللحم نضيفو الجزر مقطع إما دوائر أو طولي مائل يعني دوائر طولية مايلة
و نظيف الزيتون و ربطة معدنوس مربوطة و نخليو كل شيء يطيب
إذا درتي الجاج غير تمرقي تظيفي الجزر و الزيتون و خليه يطيب
و لكن بالنسبة للجاج نراقبوه إذا شفناه طاي قبل الزيتون نحيوه
و كاين طريق أخرى بالنسبة للكميات الكبيرة بزاف نطيبو اللحم و أو الدجاج وحده من بعد نحيوه و نحطوه جيه نغطوه
و المرق نحطو فيه الجزر و الزيتون و نخليوه يطيب
بهذه الطريق نقدرو سربيو بسهولة نحطو الزيتون في الطبسي و فوقه اللحم أو الدجاج
قبل ما نطفو على الزيتون كاي 2 طرق باش نعقدو المرقة
كاين اللي يطيب ناشف من الأساس هذا ما يسحقش مرقة عاقدة
إذا كانت كاينة مرقة كاين 2 طرق
1- الطريقة المعروفة نعمرو شوية مرقة نضيفو لها شوية فرينةملعقة أو 2 على حسب الكمية و قطرات عصير ليمون و قليل من الفلفل الأسود و نحركو من بعد نفرغو على الطنجرة و نخلوه يغلي 5 دقايق و نطفيو عليه
2- كاين اللي يضيف creme freche هذا يعدل من ذوق الزيتون و يعقد المرقة أنا نفضل الطريقة الثانية
كاين اللي يحب يحمر الدجاج و يحطي فوق الزيتون كاين اللي يضيف بطاطا مقلية معاه و هذا في حالة وين يكون عندك بزاف الغاشي و تخافي ما يكفيش
إن شاء الله نكون وفقت في الشرح

صدفات · 2014-10-06, 11:34

صباح النور يا روح مراد راكي شاطرة حنا حاصلين في العشا فطور عشا و أنتي دورتيها عراس واقيلة باغي تبدلي التخصص هههههههههههه

ayaa2006 · 2014-10-06, 12:28

السلام عليكم وصح عيدكم عيدك مبروك ولكل الاخوات هنا
حبيت نسأل على المثوم بالبقري خاطش احنا انطيبوه بالغنمي وجي مرقة بيضاء
مي هذه الخطرة في عرسنا حبو اجيبو البقري اريد ان اعرف هل المرقة انتاعو اجي مليحا بيضاء او جي شوية كحلة.... كمية كبيرة...حوالي 400 شخص
ماهي المقادير اللازمة والطريقة
من فضلك وشكرا

روح مراد · 2014-10-06, 13:22

البقري كي تزيديلو فلف اسود المرقة جي شوية كحلة باش تبقى بيضاء لازم الديري فلفل أبيض و الذوق يجي تقريبا نفسه
المقادير بالضبط ما علابايش و لكن نعطيك فكرة تشري مثلا رطل لحم مرحي و تصنعي كويرات و تشوفي شحال خدملك من بعد شوفي واش يكفي ل 400 شخص
بالنسبة للحم ساهل ديري على حسب الأفراد إذا تحطو مورصو في طبسي أم 2 تحسبو قد الغاشي و خلاص
المهم الطريقة العادية فقط كي تكون كمية كبيرة اللحم يطيبوه واحدو و كريات اللحم و حدها
نديرو اللحم يطيب من بعد طيابه نحيوه جيه نقسمو المرقة اللي طاب فيها اللحم نص نحطو فيها الحميصة و نص لكريات اللحم
باش كي نسربيو يجي ساهل نحطو 3 واحدة تعمر الحميصة و الثانية اللحم و الثاثلة الكريات هاكا كامل يخدمو هاهاهاهاها
صدفات ضحكتيني أنا الروح من و من هاذي دنيا إلا تشومرت نلقى صنعة في يدي و الله هاذي الهواية اللني راني حابة نمارسها بالصح واحدة ما حبت تعاونني
كامل حاصلين واش يطيبو

ام حمزة22 · 2014-10-06, 15:10

روح مراد موضوعك شيق
شوفي حبيبتي انا ما شفيتش على روحي واقتاه بديت طياب لعراس كنت صغيرة ندخل كي لعجايز نطيب فالاعراس
عراس خاوتي وعراس خواتاتي وعراس لواسي وعراس بنات لوسي ربي يهنينا ويهنيهم جميعا
حتى العقيقات
وكنت دايما نفرح كي نشوف الناس تعجبهم الماكلة وننسا كا مل التعب نتتع نهار كامل
لاكن روح مراد انا عمري ما كيلت دايما نخدم ب(ابوبري)و(عيني ميزاني)ههههههههه
وجي الماكلة قدقد والحمد لله
و ما نكدبش عليك راني نشوف بزاف التغييرات في طريقة الطبخ فالاعراس وراني ما زلني ننعلم
مثل طريقة وضع الشاش او خمار رقيق فوق الكسكاس باه تحطي الطعام باه يجيك ساهل وترفديه بسهولة ما نكدبش عليك هاد الطريقة ما كنتش نعرفها ودرك وليت نطبقها طريقة سهلة ومبتكرة
ان شاء الله تصيبي لي يفيدك ويفيدنا في الكمية والكيل
شكرا على هاد الموضوع

صدفات · 2014-10-07, 11:07

روح مراد قريت طريقتك في طياب الزيتون حنا في الوليمة نخدموه بنفس الطريقة ولكن كاين عفسة تحكمي الزبدة الملح فلفل أسود عرق لصفر تعركيهم مليح وتحكمي اللحم عدد ما عندك ضياف وتطليه بهذيك التحميرة و تستفيه في طاجين كبير تغطيه وتشعلي عليه النار و تخليه يقلى على غرضه كي جي تمرقي ذوقيه على الملح غطيه وخليه يطيب
تاخذي الزيتون نتاعك حسب الكمية لي تحطيها في صحن التقديم نتاعك وتضاعفي طبعا الزيتون تكوني نحيتيلو الملح من قبل ليلة كاملة تشليه كي يقطر ديريلو ملعقة صغيرة كروية وملعقة أكل فرينة لكل كيلو تخلطيه مليح وتغطيه و تخليه منين يطيب اللحم نحيه من المرق وحطي فيه الزيتون و خليه يطيب راه يعقاد الروحو و ما يحتاج حتى إضافات
تحمري الفطر كامل غير مقطع في شوية زبدة وتضيفيلو شوية مرق من الطاجين وتخليه يطيب و البقية راكي عارفة كيفاه تكملي المهم هذه طريقة ناجحة بزاف راني معتمدتها في شحال من عام و هي ناجحة و بنينة
أخت هديل عندك الحق طياب في الوليمة يهد الحيل أنا شخصيا نطيب في دارنا برك أمي ربي يحفضها معتمدة علي
و بحكم أني موظفة هذا مهنيني من الحشايم.و السلام عليكم و أنا هنا لأي إستفسار يا عينين مراد ههههههه

ام هاديل وياسين · 2014-10-06, 17:06

بارك الله فيك اخت روح مراد موضوع يهم الكل وكيما قالت الاخت ملازمش نقولو طياب لعراس للكبار
حتى نسا صغرات لازم يتعلمو يجي نهار وين طيحي في ملومة ولازم نتعلمو
انا طبعا منطيبش في العراس قاع مي نطيب في اعراس الفاميلية يعني نعاون وكي نعاون نحب الحاجة اللي نطيبها
حتى تكمل على يدي وندير كما قالت ام حمزة عيني هي ميزاني وحتى البركوكس تاع النفسات نطيبه
وجي هاييييل ونعطيكم نصيحة ملازمش الوحدة العرس الليكان طيب فيه ولله غير تخسر صحتها
عندي بنت خالتي في تيارت المناسبة الي تكون في عايلة زوجها طيب هي فيها ويحبو غير طيبها ولله غير راهي
مقيوسة فسبيطار قالولها عندك الماء ما بين الظلوع واكدولها المرض حكمها من طياب ونعرف زوج اخرين نفس المرض
وتاني هوما يطيبو املا الي تعرف اطيب متكترش على روحها بغيت ننصحكم برك وبتوفيق للجميع

روح مراد · 2014-10-07, 09:11

صحيتي يا أم هديل عندك الحق
أنا حابة نتعلم غير باش نسلك راسي كي تكون حاجة في دارنا أو عند المقربين بالصح في دار راجلي راني مخبية الموضوع كامل ماذابيا ميعرفوش باش نتهنى شوية

روح مراد · 2014-10-07, 09:18

أختي أم حمزة طريقة الخمار كنت نعرفها من بكري
كاين طريقة اللي يعاودو بيها الكسكس ثاني ساهلة ديري بسينة كبيرة ماء فيه ملح و زيت شوية فقط زيت و كي ترفدي الخمار من فوق الكسكاس تغطسيه مباشرة داخل البسينة و ترفديه بالخف و تفرغيه في جفنة و تحليه عادي
من بعد خليه يشرب
كاين طريقة الكيل نتاع الخضرة مثلا تقطعي بسينة جزر لازم لها 2 بسينات قرعة
القرعة باش الجيك حلوة كي تقطعيها رشي عليها ملح و فلف اسود و خليها تشرب قبل ما ترميها في القزان قطريها مليح ولا شليها بالماء باش يروح الملح
هاذ الطريقة تخليها تفقد كامل المرورية و جي بزاف حلوة
أنا ثاني عيني ميزاني و كل عرس في دارنا نيجل المقادير اللي ستعملناهم لكل شيء باش مرة أخرى ما نحصلش

روح مراد · 2014-10-07, 12:04

صحيتي يا صدفات راكي شيفة و أنا ما علاباليش
حنا في الوسط ما نستعملوش في الولايم العقاقر كيما نتوما كيما هاذ العرق لصفر سامعة بيه بالصح عمري ما استعملته و لكن طريقتك تبان مليحة رايحة نجربها كاش نهار و رجعلك بالخبر
حتى انا موظفة و لكن الله غالب ماكاش الموظف في الأعراس و الله كامل نهمبرو
أنا شخصيا أنحب نتعلم كل شيء في الدنا الواحد يخاف يحطوه أمام الأمر الواقع
واحد اليوم أختي انحطت في موقف بزاف صعيب
مات شيخها و احنا من العادات يطيبو باش يعشيو المعزيين اللي يكونو سهرانين في دار الميت
العجوزة قالت لبناتها أنتوما ريحو لعرايس وحدهم يدخلو الكوزينة
أختي و سلفتها فقط و للزوج كيف كيف دارو العشاء بالهاتف هاهاهاهاها كل واحدة تستقسي كيفاش الدير الحاجة حتى لحق الإنقاذ
الواحد يخاف من هاذ الشيء
و مرة زوجة خالي صرالها نفس الموقف كانت عروسة جديدة و في موت واحد من العائلة راحت المسكسنة تعزي حتى لقات نفسها في الكوزينة حاصلة منين تبدا

صدفات · 2014-10-07, 13:42

أخت روح مراد نسيت البصل تقطعيه رقيق و ديريه مع شوية زيت في الطاجين و من ثمة تستفي اللحم نتاعك هاذا في ما يخص الزيتون اما الطعام لي هو الكسكس عندكم كي تعبريه ظربي في 3 مثلا إذا عندك 50 واحد للفطور حنا نديرو 5 في الطاولة 50/5 تعطينا 10 معناتو تعبري 3 و نصف غرفية طعام يابس و العبر يكون بالغرفية لتدفعي فيها هاكذا ما يضيعش الطعام و طيحي في حسابك بلا تبذير.