الورشة الثـــــــــــالِثَةُ البدرون ســــطـــــايــــفـــيــــة

[stayfiya]

السلااام عليكم
واش راكم توحشتوني عمبالي شوفو اليوم رايحين ندخلو في الصح و كيما وعدتكم نحطلكم طريقة تفصيل و خياطة البدروووووون
و رايحة تكون معايا لابرانتي نيميرو 1. ام هزار
الموديل خيطتو من قبل و حطيتو في المنتدى من قبل و هذي تصويرتو باش تتفكروه

مالا ماتلعبولي حتى لعبة و طبقوه و رايحين نخيطوه مع بعضانا و كل مندير مرحلة نصورها و نحطها على المباشر ههههه و لي تقدر طبق ماذا بيها تنظم و باش ما ننساش نحتاجو 70 سم ساتان دوشاز و 2 متر اي نوع للسروال المهم يبريي و يتكسسسسسسسل و نحتاجو قالون 3متر و ليزيستراس نتاع لاكول و لاستيك
هيا وجدو الادوات و السلعة و ديرو شوية زيت للمشينة باش تسرح
و غدوة نتلاقاو دمتم بخير و الى الملتقى ان شاء الله

ّّّّّّّّّّّّّّّ

السلااام عليكم وااااش وجدتو رواحكم رانا رايحين نبداو التفصيل ركزو مليييح
ام هزار الفحلة وجدتلنا المشينة
علابالكم ما نبداش نفصل حتى نشرب فنجال قهييييوة وحدة تنوض طيبلنا ماتخافش نسناوها ههههه
همم
هاتو الكتان نبداو نفصلو البوليرو
قلتلكم الكتان المستعمل ساتان دوشاز انا خيرتو خاطر واقف مليح و مايبرقش وانت استعملي واش تحبي فكروني قداش قلتلكم تشريو ...هاه ام هزار قلت 70سم نحكمو الكتان نطبقوه على 4
و ديما الكتان يكون مجمول جيهة الامام يعني التقطاع يكون على اليمين و اليسار نتاعنا اووك
تبعي معايا

تحطي مقاساتك على الكتان ولا باترون حنا مولات الكتان هاذو هوما قياساتها
و كي تخلصي قطعي و ما تنسايش الواحد سم حق لخياطة و ضك سيباري الامام و الخلف بالنسبه لليبانس عرضهم 2سم و الطول 9 سم

ضك نفصلو لي روفار(السجاف) لي يدوبليو لخياطة نحطو الكتان نتاعنا و نطراسيو العرض قيمة خمس صباع يعني بالتقريب 7 سم و لي يدها قد البالا غير دير 3 صباع هههههه
ضك نوليو للبيستي كيما راكم تشوفو البيستيي درابي اااالووووووغ ركزي معايا ام مريم راكي هبلتيني على الموديل الدرابي شوفي و هزي الفكرة
استنايني قبل نشرب قهوتي العشوة طويلة غير ديرولنا كاش سفنج نشربو بيه لحليب

to be continued
.
.
.
.
.
.
.
.
.
.
..
.
.
.
.
.
.
.
.

.
;ولينا و لا برانتي راهي تخيط
شوفو البيستيي

هذا الخلف يجي دوني

و هكذا من الامام

من بعد نعتلكم كييفاش نديرو لبروتالات يتربطو في الرقبة من لور
و السرؤاااال
نطبقو الكتان على 4

هيا راني خارجة و من بعد نولي ريحو عاقلين باش نجيبلكم الحلوة يخيي

ّّّّّّّّّّ

هاااانيييي جيييييييييييييييييييييييت
وحد البرررررررد يقتل
نكملو بصح قبل منكملو شجعولنا شوي لابرانتي راهي هبطلها المورال و ماحبتش تكملي لخياطة هيا اشكروها شوي

هاه وين وصلنااا
فكروني امممم
اووووكي قلنا نبداو لخياطة
نلصقو السروال و من فوق نديرولو لاستيك

و البيستيي نخدمو لي ريبون لي نربطوهم في الرقبة
هاي الطريقة

و من الخلف في الظهر تركبي لاستيك
و نروحو للبوليرو
انا اول حاجة نبدا بيها لي بانس

و نروحو نركبو الطراف لي فصلناهم كيما شغل دوبلير
راكم معاياا ركزو

كي نخيطو قبل ما تقلبي الكتان تكرونتيه باش كي ندوروه مايجيش مقلب و كي تقلبي حديه طريييبيااان داكوردوو

و نجيبو ليمونش و نكفوهم هكذا

نلصقوهم في بلاصتهم راكي ديري لي فرونس جيهة لكتاف
لايك ذات اوكي

و نحطو البيستولي تسخن و نبداو نلصقو القالو انا القالون بدلتلو لي بيير كان بويض قلبتهم رووووز

و من خلف هكذا

لابرانتي راهي تلصق في ليزيستراس اصبروها شوي
ليزيستراس راهي دارتلهم ام كوثر موضوع مثبت يعطيها الصحة

هااه خلصت
شوفي كيفاش خرج

خلصناااااااااااا
بقات نصوروه كومبلي غدوة نشالله ندبرلكم مانكان و نلبسلها باش يبان مليح و لي تسرق التصويرة ماذابيها تخلي اسمي لا نقتلها تفاهمناااا



















مشكورة حبيبتي لابرانتي ام هزورة و مزال معاها نكملو مشاريع كبااار هههه هيا سلاااام و لي جرب الورشة ماذابيها تفرحنا و تحطهالنا ان شاء لله تكون عجبتكم الورشة لعقوبة للجاي
سلااااام