يوميات عضوة

[ام عبودة]

صبااااح الخيراااات والليراااااااات
من قبيل نظت. وجدت القهوة وحليب ميمي ولدي
لبست الاولاد راهم راهو الى المدرسة وداااائما كي العادة مع العياط ههههههههه
والان راني نوجد في حوايج الزوج باش يخرج الفطور ما هواس عليا مي كاش ما نروح نطبق
خسارة الحالة مغيمة وباااردة ما كانش الشميسة اللي نموت عليها هههههه
رايحة نخمل الغرف وممكن نسيق على خاطر راهم يبنترو في الادارة من لهيه وانا كاين باب ما بين غرفتي ومكتب زوجي
دخلت شوي غبرة للدار مش حاجة كبيرة
ميمي راهو يقولي ما ما. هيا نلعبو هههه قلتلو في هذا البرد ما كان لا درجوحة ولا اي شئ ومع صبح مزكوم شوي
الحمد لله على كل الاحواااال
هيا باااي وتهلاووو في ارواحكم. كملوا اشغالكم ومن بعد نتلاقو. ههههه

[كابريسة]

صباح الخير ام عبودة و الاخريات اللي ما زال ما نعرفهمش
انا نضت شوية روطار اليوم و لوكان ما نوضنيش زوجي مش رايحة نوض ههههه
راني نفطم في وليدي الصغير و تعرفو الحالة ساعة ساعة و ينوض يقول كاش ما ينوبو صدقة و انا والو ما نفهمش بصح الحمد لله راني في آخر الموضوع
المهم نوضت وليدي الكبير (4 سنوات تقريبا) باش يديه باباه للمدرسة القرآنية و رحت صبحت على عزوجي على خاطر اليوم تروح لsale de réeducation و رجعت تقهويت و من بعد فتحت الميكرو قلت نضرب تحويسة خفيفة في النت يخي ناض سلمو المشاغب درتلو حليب و لاعبتو شوية خملت الغرفة و رتبت الاسرة و كيما قلتي ام عبودة اليوم الشميسة صبحت راقدة هههه امالا لا تشماس للفراش لا والو ....
و اليوم دالتي في الطياب و قلت نروح نعجن و ندير لهم شريبة سخونة تاع فيرميسال و من بعد نشوفكم ....
لا اله الا الله , محمد رسول الله

[ام عبودة]

كابريسة صبااح الخير
والصلاة والسلام على رسول الله
الله يعينك انت والصغير والله يحميه من كل شر
ويعطيك الصحة. كي دخلتي ولدك للمدرسة القرأنية انا امنيتي ندخلهم بصح قلت في العطلة الصيفية
يعطيك الصحة اليوم راكي ناشطة يم يم كون جيت جارتك والله غير نعرض روحي وحدي ههههه نمووووت عليها الشريبة حنا ما يحبوهاش بصح في دار بابا كنا نديروها في الشتاء ايام البرد كي نرجعو من المدارس او الجامعة او حتى الشغل ههههه كبرت معيا ههههه
لانو من يد ما ما. كانت طيبةةةةةةةةةة. مع مطلوعها الله الله توحشتها

[كابريسة]

الله يسلمك حبيبتي
في الواقع ما عجنتش على خاطر لقيت بقى الخبز من البارح و لوكان نعجن ما ياكلوهش درت الشربة و السلاطة و فورت الفول قلت انحيه من الطريق على خاطر قلت باش ندير طعام في العشا باذن الله .و دورتها للفريجيدار عندي بزاف ما درتلوش تنظيف عميق عطيتلو تشليلة الله الله .خسارة عندي ديفو في البورتابل ما يتنقلوش منو الصور و لوكان حطيتلك صور...
و انت وش خدمتي اليوم؟؟؟

[ياسمين1990]

اهلا اختي أم عبودة ما شاء الله على النشاط والحيوية
هذي اول مرة نشوف موضوعك الله يبارك
رب يكملك ويعينك امين

[نهى اسطاوالي]

السلام عليكم كيف حالكن جميعا
انا اليوم ماقمتش باشغال كثيرة نضت الصباح طيبت الحليب للزوج وبعدما راح رجعت تكسلت شوي ههههه ومباعد نضت للتسياق سيقت وكملت ناضو الاولاد على 10 ونص فنيانين هههههه رحت ندير الغذاء عملت دجاج وكويرات فيونداشي ورميت فيهم قطع بطاطا وجزر اممم جواز يليق للجو نتاع اليوم راه مغيم والشميسة ماكاش ومباعد حكمت الحوايج لي غسلتهم وطبقتهم وحطيتهم في الخزانة جا الزوج تغدينا وتوضينا هو راح للمسجد وانا صليت الظهر وقعدت على الحاسوب جا الزوج تكسل شوية وانا رقدت الاولاد وتكيت شوي ونضت للعصر طيبت القهوة والحليب وجلست امام الحاسوب

[نخله.]

السلام عليكم

دخلت نقرعج في ركن التدابير المنزله كاش ما ندبر على الغاشي ولا يدبرو عليا

لقيت هاذ الموضوع عجبني ولو اني فنيانه قريت الصفحه الاولى و الاخيره فقط



موضوع جد مهم و مفيد سيرتو مع اهاذ الايام البرد والغبار راني حاسه روحي مقصره في بيتي شويه

مع الوحم جيحني و زاد انا زوجي اغلب انتقاداتو ليا هي كثرة التنظيف ..................تكلت على كلامو وديت استراحه هاذ الشهر

و راكم عارفين استراحة شهر وش نتيجتها

مع اولادي ماشالله راني نشوف فالدار ومانيش مصدقه وش راه صاري



الحمد لله هاذ الايام بدا يخف اعراض الوحم وبديت نتنشط و زدت لقيت هاذ الموضوع

رح نبدا او نرجع لنشاطي تع بكري ورح نحكيلكم يومياتي به ما نكونش متطفله........................هذا ادا قبلتوني معاكم طبعا...........ماتخافوش راني نشيطه......راني نمر بفتره خاصه برك

ا



اختي ام عبوده قولي الصح...............غير بيناتنا؟؟؟ زوجك وش راه يقول عليك

باه ما تفهمينيش غلط

انا السبع تاعي نهار كامل يكريتيكي فيا على النقا و يقولي كثرتي علينا....................مليي كنت في حاتي الطبيعيه طبعا ماشي هاذ الشهر

وكي راهي داري فوضى نسالو نقولو راهو عاجبك الحال يقولي عادي وين راه المشكل كلشي مليح.................وانا صراحة راني مقلقه بسبة الديزوردر اللي راني فيه

نزيد شوي نهبلللللللللللل


علابالي ثرثاره داخله من دقيقتي نبلبل ذطرك تقولو هاذي تع قصره ماشي تع خدمه وتحاوزوني هههههههههه

[ام عبودة]

اهلين وسهلين بالوافدااااااااااات نورتووووني
كابريسة راهي ريحة النقاء لحقتني الى هنا
يعطيك الصحة وربي يكملك
انا من بعد ما خليتكم روحت درت الحوايج في الماشينة باش ما يكثروش عليا وحكمت هذا المكتب رجعتو يشعل هذه صور من الارشيف



بصح لو تشوفوه قبل كيفاش كان واااااع كركبة البراء كامل دخلوها برجليهم وكثرة الحركة في هذا اليوم تقول بلعاني
المهم كملتو وروحت للغرفة تاعي مسحت شوي الغبرة من التلفاز والموبل وفتحت الشبابيك ونشفت الارض وقبل عطيت للدوش مسحة بسيدهم رووووووعة
راهم الصور هبلوني ما بغوش يتحملو ما عليش الارشيف كاين هههه


درت على غرفة الاولاد اليوم الحمد لله صبحت شوي مليحة
غسلت مواعن القهوة وكملت الغسيل نشرتو ومن بعد سيقت الدوش
رجعو الاولاد فطرتهم دوشت ماهر ورقدتو الاولاد راحو الى المدرسة تفرجت شوي نستنا في الزوج يرجع قال فطرت البرا ما بقى وقت للرقاد حكمت الايباد حطيت تطبيقاتي في قسم التطبيقات وجيتكم هنا ههههه لقيت الخير والخمير والحمد لله

[ام عبودة]

المشاركة الأصلية كتبت بواسطة ياسمين1990

اهلا اختي أم عبودة ما شاء الله على النشاط والحيوية
هذي اول مرة نشوف موضوعك الله يبارك
رب يكملك ويعينك امين

مرحبااااا والله يسلمك
نورتي الموضوع
واميييييييييين على الدعوة الحلوة

[ام عبودة]

نهى يعطيك الصحة والله يعينك

[ام عبودة]

نخلة علا بالي قد لسانك قد ذراعك
ومرحبا بيك معنا ونتشرف بمرورك وحطيلي يومياتك راكي كيفكيف معايا الغبار مرضنا وهبلنا نقي منا ترجع منا تقول ما درت والو
مبروك عليك الوحم وربي يكملك
انا زوجي عمرو ما قالي يعطيك الصحة في التنظيف برك مش اشياء اخرى قد ما نخدم قد ما ندير والو مرات نتذمر نقولو من بعد يقولي واش راكي اديري نهار كامل وانت وحاكمة الايباد هههه واش راكي تخدمي الغسيل بالماشينة والخبز من الكوشة هههههه
بصح انا بالنسبة لي مليحة قد ما ينتقدني قد ما نزيد. ههههه وراء كل رجل عظيم مراااااااااا ...............؟؟؟؟؟؟؟؟؟

[ام عبودة]

صبااااااااح الهمة والنشاااااااااااط
نظت الصباح وجدت القهوة وفيقت الاولاد الزوج خرج قبلهم عندو موعد ومن بعد درت للاولاد لبستهم وبعثتهم الى المدرسة
مازالني في الارفة راهو البرد طاير حااالة ومغيمة نهار تاع بركوكس او مردود ههههه
هيا نوض. نفض ونكنس برك وبلاك نخمل خزانة الاولاد ونخفف على روحي عمل الغد راهو العطلة ولازم. نديرو غير للزوج والاولاد
وبلاااك جاينا ظياف من بعييييد
ممكن نغيب شوي

[نخله.]

صباح النور ام عبوده وشكرا على الترحيب

نبدا بسم الله اليوم وش درت؟؟؟؟

نضت شويا بكري قبل الاذان درت عجينه المسمن خليت القرصات يرتاحو ورحت توضيت وصليت و فيقت ولدي الكبير عندي واحد برك يقرا وزوج فالدار

وجدت البيبرون تع بنتي وحطيتو عند راسها باه كي تفطن ما تبكيش وما تنوضش باباها لخاطر لبارح سهر مع الميكرو على بالي ليوم يصبح..............يمالا حبستلو الريفاي تع تيليفونو باه ما يصونيش وما ينوضش حتى نوجد السنيوه

خليت ولدي يغسل نص انص نخاف يدوش يمرض مع البرد ويبدل حوايجو ( ولدي 7 سنين يقرا سنه 3 و مازار يشمخ حوايجو فالليل سوفرونس) هو يوجد حوايجو من الليل قبل ما يرقد

الى المطبخ كملت المسمن وجدت القهوة والحليب وقشرت البرتقال لازملهم كل يوم فالشتا عندنا تقريبا 3 كيلو كل يومين

مازال ما ناضوش..............درت الغدا فريك و زدت وجدت الدجاج للعشا درتلو التوابل والزيت والى الثلاجه

يفطر وليدي البكر ويروح للمدرسه ماشي بعيده 5 دقايق يوصل

طلعت نوضت السبع راهي 8 نحطلو بنتو في فراشو تلعب باه ينوض ........ يفطر يصلي يسخن السياره الى العمل

نتلهى ببنتي نغسل ونبدلها وديرلها الحيبوسه و نقعد نعس فيها ونستنى مرات حتى نص ساعه بدون نتيجه

لبسنها و لقيت ولدي ما زال ما ناضش ما نقدرش نفتح النوافد و نبدا الميناج حتى ينوض

رحت للدوش و التواليت نقيتهم مليح باه غدوا ما نتعبش معاهم

وليدي مازال ما ناضش

عيطت فالتيليفون للوالده

ما زال ما ناضش

جيت نضرب طله على المنتدى بصح ذرك نروح نوضو ونكمل صوالحي طول عليا

هاا يومي او صباحي تع اليوم

الي يشبه لكل يوم

[amina nourhanne]

مساء النور حبيباتي راكو درتولي القلب بهاد اليوميات يعطيك الصحة ام عبودة انا عروسة جديدة في عمري 25 سنة و *عندي عام ونص زواج و ما عنديش ذراري ضرك يتسمى مسؤولياتي قليلة المهم نضت اليوم على 8 راجلي *لبس و راح لخدمتو وجدتلو كلش في الليل و هو اصلا ما يستقهواش صباح يعني نحط القهوة لروحي برك، و طبعا انا كي نوض نكون مطروشة و نص فايقة alor قهوتي نوجدها في الليل و يبقا لي غير نشعلها صباح، قريت اذكاري و حطيت سنيوتي و استقهويت ،البارح درت حلوة الصابلي البرتقال جات بنيييييييينة تمتعت bien غير انا و راسي كي كملت توكلت على ربي و كتبت برنامج اليوم......نسيت ما قلتلكمش بلي انا كل يوم نكتب الخطوط العريضة تاع واش عندي ندير مثلا كيما اليوم خملت الدار،غسلت الماعن تاع الكوزينة،درت الماشينة تاع الحوايج،و غسلت الزربية تاع salon نسيت ما قلتلكمش بلي لول البارح درت grand ménage تاع الصالون البارح كنت طايبة يعني درت القاطو و العشا و الميناج تاع كل يوم و بس!!!! حتي اليوم باش غسلت الزربية المهم الفطور راجلي ما يفطرش في الدار يعني عندي العشا برك ، ضرك يدخل الظهر نبدا ندخل القش و نغلق الدار،ندوش و نخمل الخزانة ،راجلي غالبا يدخل من الربعة للفوق نكون كملت كل شي نديرو قهوة و نقسرو و نحكو من بعد هو يروح يصلي و يريح و يكونيكتي شوية انا نغسل كيسان القهوة و نوجد عجينة السوفلي باش ندير العشا *

[دروب التابعين]

الله يبارك عليكم