الخبز العربي نااااااجح مية بالمية .... ادخلن

[أنوثة شرقية]

حبوباتي ان شاء الله تكونو وعائلاتكم بخييير
موضوعي اليوم هو الخبز العربي اللي حابة نشاركم تجربتي الناجحة معاه وتابعوني وان شاء الله تجربوه وينجح باذن الله تعالى نبدأ على بركة الله.. فقط مع وضع ملاحظة انو هناك صور مضافة لتنقيح الموضوع وافادتكن اما الباقي فهي من مجهودي وعملي الناجح والحمدلله
المقادير:
كاس ماء دافئ
ملعقة قهوة خميرة الخبز
ملعقة ونص قهوة سكر
نص ملعقة قهوة ملح
2 كيسان ونص فرينة
التحضير.. بسم الله
اولا نذوب الخميرة في كاس الماء الدافئ مع اضافة السكر... ونخليهم ينتفخو


ونحط الفرينة في قصعه ونضيف لها الملح


لما تنتفخ الخميرة في الكاس نضيفها للفرينة ونخلط واذا جات العجينة قاسية ضيفي الماء الدافئ واعجني مليح
في الاول تجيك تلصق لكن مع العجن تصبح مطاطية وتصير ماتلصقش .. لما تعجني اضربي العجينة مليح اعطيها طريحة ارفعيها وخبطيها في القصعه باش تخرجي الهوا
منها وطبعا اذا كانت طرية بزاف ضيفي شوية فرينة والعكس اذا قاسية ضيفي الماء المهم انها تجي تقريبا كيما عجينة المسمن او الفطير كيما يسموه البعض



هذا شكلها بعد العجن

نخليها ترتاح ربع ساعه فقط ومش راح يتغير شكلها بزاف
تقسمي العجينة الى 12 كرية متساوية الحجم ونحطوها في صينية مرشوشة بالفرينة ونغطوها بقماش ونخلوها ترتاح نص ساعه فقط


هنا بعدما ارتاحت هكذا يكون شكلها

شعلي الفرن تاعك من الفوق فقط وخلي فيه صينية الفرن مقلوبة على وجهها تسخن مليح
وابداي اطرحي الخبيزات تاعك بهاد الطريقة

وافتحي مناديل المطبخ الورقية وكلما تطرحي خبزة حطيها فوق المنديل بهاد الطريقة


غطيهم بالمناديل طبعا واقلبيهم لأول مجموعه طرحتيها باش نبداو نطيبوهم هم بالاول
ارفدي اول خبزة بمنديلها وقلبيها على صينية الفرن اللي تكون سخووونة انتبهي تتحرقي وتروح صباعك اللي راح تاكليهم بعد الخبز الشهي ههههه
هنا شكلها في الفرن شوفو كيفاش انتفخت وااااو منظر روعه وهي تنتفخ وعلى فكرة انتبهي راه يتحمر بسرعه ماتخليهش يتحمر بزاااف باش مايجيش قاسي

وهنا بعدما طاب



وهذا شكلو من الداخل خفيف وفارغ كيما يحب القلب

انا درت بيه شاورما ذاك اليوم اتفضلووو لأول وحدة ترد وتقيمني لأنو نكتب في الموضوع ونرفع ونعدل في الصور وابني يبكي جنبي ههههه ازعاااج

نتمنى تجربوووه وتحطوو تطبيقات يالفحلات لأني جربت كثير وهاد الطريقة نجحت معي والحمدلله مية بالمية ,واذا الموضوع يستاهل التثبيت ارجو التثبيت والتقييم
تقبلو حبي وتقديري لكم