موضوع مميز طبخ الأعراس - الصفحة 5

ام هاديل وياسين · 2014-10-06, 17:06

بارك الله فيك اخت روح مراد موضوع يهم الكل وكيما قالت الاخت ملازمش نقولو طياب لعراس للكبار
حتى نسا صغرات لازم يتعلمو يجي نهار وين طيحي في ملومة ولازم نتعلمو
انا طبعا منطيبش في العراس قاع مي نطيب في اعراس الفاميلية يعني نعاون وكي نعاون نحب الحاجة اللي نطيبها
حتى تكمل على يدي وندير كما قالت ام حمزة عيني هي ميزاني وحتى البركوكس تاع النفسات نطيبه
وجي هاييييل ونعطيكم نصيحة ملازمش الوحدة العرس الليكان طيب فيه ولله غير تخسر صحتها
عندي بنت خالتي في تيارت المناسبة الي تكون في عايلة زوجها طيب هي فيها ويحبو غير طيبها ولله غير راهي
مقيوسة فسبيطار قالولها عندك الماء ما بين الظلوع واكدولها المرض حكمها من طياب ونعرف زوج اخرين نفس المرض
وتاني هوما يطيبو املا الي تعرف اطيب متكترش على روحها بغيت ننصحكم برك وبتوفيق للجميع

روح مراد · 2014-10-07, 09:11

صحيتي يا أم هديل عندك الحق
أنا حابة نتعلم غير باش نسلك راسي كي تكون حاجة في دارنا أو عند المقربين بالصح في دار راجلي راني مخبية الموضوع كامل ماذابيا ميعرفوش باش نتهنى شوية

روح مراد · 2014-10-07, 09:18

أختي أم حمزة طريقة الخمار كنت نعرفها من بكري
كاين طريقة اللي يعاودو بيها الكسكس ثاني ساهلة ديري بسينة كبيرة ماء فيه ملح و زيت شوية فقط زيت و كي ترفدي الخمار من فوق الكسكاس تغطسيه مباشرة داخل البسينة و ترفديه بالخف و تفرغيه في جفنة و تحليه عادي
من بعد خليه يشرب
كاين طريقة الكيل نتاع الخضرة مثلا تقطعي بسينة جزر لازم لها 2 بسينات قرعة
القرعة باش الجيك حلوة كي تقطعيها رشي عليها ملح و فلف اسود و خليها تشرب قبل ما ترميها في القزان قطريها مليح ولا شليها بالماء باش يروح الملح
هاذ الطريقة تخليها تفقد كامل المرورية و جي بزاف حلوة
أنا ثاني عيني ميزاني و كل عرس في دارنا نيجل المقادير اللي ستعملناهم لكل شيء باش مرة أخرى ما نحصلش

صدفات · 2014-10-07, 11:07

روح مراد قريت طريقتك في طياب الزيتون حنا في الوليمة نخدموه بنفس الطريقة ولكن كاين عفسة تحكمي الزبدة الملح فلفل أسود عرق لصفر تعركيهم مليح وتحكمي اللحم عدد ما عندك ضياف وتطليه بهذيك التحميرة و تستفيه في طاجين كبير تغطيه وتشعلي عليه النار و تخليه يقلى على غرضه كي جي تمرقي ذوقيه على الملح غطيه وخليه يطيب
تاخذي الزيتون نتاعك حسب الكمية لي تحطيها في صحن التقديم نتاعك وتضاعفي طبعا الزيتون تكوني نحيتيلو الملح من قبل ليلة كاملة تشليه كي يقطر ديريلو ملعقة صغيرة كروية وملعقة أكل فرينة لكل كيلو تخلطيه مليح وتغطيه و تخليه منين يطيب اللحم نحيه من المرق وحطي فيه الزيتون و خليه يطيب راه يعقاد الروحو و ما يحتاج حتى إضافات
تحمري الفطر كامل غير مقطع في شوية زبدة وتضيفيلو شوية مرق من الطاجين وتخليه يطيب و البقية راكي عارفة كيفاه تكملي المهم هذه طريقة ناجحة بزاف راني معتمدتها في شحال من عام و هي ناجحة و بنينة
أخت هديل عندك الحق طياب في الوليمة يهد الحيل أنا شخصيا نطيب في دارنا برك أمي ربي يحفضها معتمدة علي
و بحكم أني موظفة هذا مهنيني من الحشايم.و السلام عليكم و أنا هنا لأي إستفسار يا عينين مراد ههههههه

روح مراد · 2014-10-07, 12:04

صحيتي يا صدفات راكي شيفة و أنا ما علاباليش
حنا في الوسط ما نستعملوش في الولايم العقاقر كيما نتوما كيما هاذ العرق لصفر سامعة بيه بالصح عمري ما استعملته و لكن طريقتك تبان مليحة رايحة نجربها كاش نهار و رجعلك بالخبر
حتى انا موظفة و لكن الله غالب ماكاش الموظف في الأعراس و الله كامل نهمبرو
أنا شخصيا أنحب نتعلم كل شيء في الدنا الواحد يخاف يحطوه أمام الأمر الواقع
واحد اليوم أختي انحطت في موقف بزاف صعيب
مات شيخها و احنا من العادات يطيبو باش يعشيو المعزيين اللي يكونو سهرانين في دار الميت
العجوزة قالت لبناتها أنتوما ريحو لعرايس وحدهم يدخلو الكوزينة
أختي و سلفتها فقط و للزوج كيف كيف دارو العشاء بالهاتف هاهاهاهاها كل واحدة تستقسي كيفاش الدير الحاجة حتى لحق الإنقاذ
الواحد يخاف من هاذ الشيء
و مرة زوجة خالي صرالها نفس الموقف كانت عروسة جديدة و في موت واحد من العائلة راحت المسكسنة تعزي حتى لقات نفسها في الكوزينة حاصلة منين تبدا

صدفات · 2014-10-07, 13:42

أخت روح مراد نسيت البصل تقطعيه رقيق و ديريه مع شوية زيت في الطاجين و من ثمة تستفي اللحم نتاعك هاذا في ما يخص الزيتون اما الطعام لي هو الكسكس عندكم كي تعبريه ظربي في 3 مثلا إذا عندك 50 واحد للفطور حنا نديرو 5 في الطاولة 50/5 تعطينا 10 معناتو تعبري 3 و نصف غرفية طعام يابس و العبر يكون بالغرفية لتدفعي فيها هاكذا ما يضيعش الطعام و طيحي في حسابك بلا تبذير.

تغرينية · 2014-10-07, 18:04

سؤال العرق لصفر هو الكركم
انا مره من المرات رحت نعزي صبت الكوزينة خاويا غير بنات الميت صغار يدوروا في الكوزيتة بلا اي تجربه دخلت وعاونت وليت انا الشاف بلاما نعرف والوا مزيه كاين البورطابل سلكني منتم وليت نحب نعرف الطيات تاع الولائم الواحد منا يعاون في وجه ربي

تغرينية · 2014-10-07, 18:08

سؤال العرق لصفر هو الكركم
انا مره من المرات رحت نعزي صبت الكوزينة خاويا غير بنات الميت صغار يدوروا في الكوزيتة بلا اي تجربه دخلت وعاونت وليت انا الشاف بلاما نعرف والوا مزيه كاين البورطابل سلكني منتم وليت نحب نعرف الطيات تاع الولائم الواحد منا يعاون في وجه ربي

صدفات · 2014-10-07, 22:29

راكي نيشان العرق لصفر هو الكركم و جزاك الله خيرا على مساعدتك لأهل الميت مازال كاين الخير

ام يوسف 2737 · 2014-10-08, 00:20

مساء الخير علكن و الله غير استفدنا كثير من تجاربكن في الولائم
عندي فقط نصيحة لاخواتي عند استعمال عود القرفة فالطياب لازم تغسلوه مليح و تراقبوه من الداخل او من الاحسن تفتحوه
على خاطر وحد المراة قتلت كامل اولادها الله يحفظنا بعود قرفة كانت بداخله زرمومية مسمومة
الله يحفظ وليداتنا و جميع المسلمين

صدفات · 2014-10-08, 08:36

صباحكم سعيد
عمري ما كنت نتوقع حاجة كيما هذه يا أم يوسف على كل حال عود القرفة أنا نحله قبل ما نطيب به شكرا على النصيحة وبارك الله فيك .

روح مراد · 2014-10-08, 11:59

شكرا لكن على النصائح
صدفات أنا مافهمتش الطريقة اللي تعبري بيها الكسكس
حنا عندنا نديرو الكسكس عينك ميزانك مانعبروش في الأعراس لأننا عندنا المدعويين بزاف خاصة إذا كان العرس في المناطق خارج المدن الكبرى تصيبي كامي السكان معروضين

صدفات · 2014-10-08, 13:59

اقتباس:

المشاركة الأصلية كتبت بواسطة روح مراد

شكرا لكن على النصائح
صدفات أنا مافهمتش الطريقة اللي تعبري بيها الكسكس
حنا عندنا نديرو الكسكس عينك ميزانك مانعبروش في الأعراس لأننا عندنا المدعويين بزاف خاصة إذا كان العرس في المناطق خارج المدن الكبرى تصيبي كامي السكان معروضين

سلام روح مراد
كيفاش ما تعرفيش شحال عندك بضبط انا معاك و لكن بتقريب و حسب عدد العائلة و عدد الأحباب لي عرضتوهم تقدري تعرفي و تزيدي طبعا لربما كاين الزيادة لي يجيب صاحبه لي تجيب حبيبتها الخ
المهم إذا عندك 200 نفر عند الرجال و 100 عند النساء تولي 300 معناه نشمخو 30 غرفية طعام يابس ونزيدو 2 أو 3 عسة نحرزو رواحنا بهم .

بصيرة2 · 2014-10-08, 14:23

السلام عليكم اخواتي يعطيكم الصحة وخصوصا الااخت روح مراد يعطيك الصحة راكي فور وانا يبان لي ما عندك وين تزيدي
انا عندي مشكل نتاع النصيب لعدد قليل فما بالك لعرس
بكري قبل ما نزوج كنت في دارنا عندنا ديمة الضياف كنت نسلك راسي وتجي ماكلتي بنينة تسخف
وكي زوجت طحت في عايلة ماعندهمش المناسبات نهائيا ضرك حوالي 17 سنة نسيت ننصب ونداوى وكي نروح لدارنا نتهرب من الطبيخ وكاين الى يستكلف بالقزانات
المهم اليوم لوكان نحصل مانلقاش كيفاش ندير

حبيت لوكان تقوليلي لعشا نتاع 10 او 15 شخص فقط واش يلزملو من كل شيى
جاري فريك ومرقة نتاع البربوشة وكي نمرق شحال ندير الماء ساعات ندير بزاف الماء وتجي الماكلة صامطة حاشى النعمة ويعطيك 1000 صحة

روح مراد · 2014-10-08, 15:33

أختي بصيرة
الطبخ راهو ممارسة مثل أي نشاط آخر أو موهبة أخرى تزيد تطور مع الوقت و الممارسة و الوسائل و كذلك خبرات الآخرين كالرياضة تماما لازم تحتكي بناس أخري و تشاركي باش تتعلمي
أنا في دارنا و في العايلة الكبيرة ككل في كل مناسبة مكاني المطبخ ديما نتعلم و نشارك و نستفاد و الله يبارك في دارنا العايلة كبيرة و ماكاش عام وين ماكاش مناسبة أو 2 و الضياف و النساب و الصحاب ....... ميدان هايل للممارسة و التعب
أما في داري كيما راكي تقولي 4 عباد ماكان ضيف ماكان مناسبة ماكان اي شيء لوكان نتبع عجوزتي رايحة ننسى كل شيء تعلمته من قبل
أما بالنسبة للمقادير نتاع 10-15 شخص هاذي راهي عايلتنا يوم الجمعة كاين وين يكون عندنا 20
فيما يخص شربة
أنا نمدلك طريقة اللي تعرفي بيها العبر و من بعد تعودي ديري عينك ميزانك
عندك مثلا 10 عباد
كي تكوني قاعدة حكمي قدرة ديري فيها 10 بول شربة معمرين ماء و فرغي في القدرة رايحة تعرفي شحال يجيك الكمية في القدرة و زيدي ديما غضافة 2 أو 3
هاذ القيس رايح يكون يعبر على كمية الشربة الطايبة في القدرة و انت بالتأكيد رايحة تمرقي أكثر من هاذاك الكيل و لكا الطيب حافظي على الكيل
بالنسبة للحم كل واحد و مقدورو طبعا و لكن أنت تشري مثلا رطل لحم أو كلغ تقطعي منه قطع صغيرة للشربة و ديري حساب مثلا كل بول شربة ديري فيه 2 أو 3 قطع و حسبي رايحة تشوفي الكمية المناسبة
من هاذي تبداي الخطوات الأولى في التعلم بالطبع كي يكون عندك ضياف تزيدي كمية اللحم إذا عندك و إلا راكي ديري بالحساب
نصيحة قبل مايجوك الضياف أنت باش تتحكمي في المقادير و الطريقة لازم تجربي من قبل
مثلا تحكمي كينتاع 5 عباد كيلي اللحم و الماء و بالباقي عينك ميزانك كي تلحقي للفريك كيلي بالكاس مثلا 5 عباد تقريبا نصف كاس و شوفي كي يكون يغلي المرق إذا فيه الفريك يبان راهي الكمية مناسبة و إذا فيه قليل زيدي شوية و رايحة تتحكمي في كمية الحشيش و الملح و التوابل و من بعد ضاعفي المقادير بالنسبة ل10 أو 15
بالنسبة للبربوشة هاذي ما فهمتش واش قاصدة بيها الكسكس أم البركوكس
بالنسبة للبركوكس ما نعرفش مانطيبوهش في المناسبات
بالنسبة للكسكس كاين مناطق يمرقو بزاف الكسكس يكون جاري بالمرقة و كاين اللي ياكلوه ناشف شوية مرقة فقط
نفس الفكرة نتاع الشربة باش تتعلمي و كاين اللي عمرو ما يكيل مثلي أنا كل شيء عيني ميزاني عندي مرت خالي تكيل كل شيء عندها ميزان من الزيت للملح للماء .... ميزان واحد ديما
أنت كي تكوني مرتاحة و نفسيتك مليحة طيبي بالكيل و حكمي المقادير من بعد ضاعفيها و اللا نهار ديري ماكلة مليحة و كل شيء قيس اكتبي المقادير
الطبخخ راهو تقنيات و كل مرة تخرج تقنية أسهل و ألذ باش الواحد يعتمدها هاذ الأمور اللي راني نحوس عليها
إن شاء الله نستفادو كامل