~¤ô¦¦§¦¦ô¤~ بيتك جنتك و رضاء ربك مبتغاك 7 ~¤ô¦¦§¦¦ô¤~

[حياتي كلها امل]

شكرا اختي سرور على الروابط الي حطيتيهم وانشاء الله نستفادو كامل منهم

[Abirbibira]

Jazakom Allah khayran

[سيرين 5]

صباح الخير لبنات صباح الربح و الهنا واش راكم ان شاء الله لباس ؟

حياتي كلها أمل : شكرا بارك الله فيك على الأفكار للتجهيز لرمضان عجبوني بزاف ذكرتيني بلاشابلوغ تاني عندي شويا خبز بايت درك نخدم بيه
أم البنين نظن حطيتي صورة للأسف ما بانتليش ؟ كي تجربيها صوريهالنا نشوفوها والله غير تجي بنينة ، و موضوعك أكيد يحتاج اهتمام بصح أنا ما قدرتش نعرف على واش راكي تهدري لأني اليوتوب ما نقدرش نحلو في الخدمة
أم آدم : ألف مبروووووك عليك بالربح ان شاء الله الخدمة الجديدة ان شاء الله تربحي عليها
سرور : مرحبااااا بيك هنا طل القمر و ديرولي بلاصة معاكم راني جاية بقوة ههههههه و يعطيك الصحة على المساعدة و الروابط
سمورة: شكرا على الأدعية آآآآآآميـــــــــــن يا ربي أجمعين ان شاء الله ربي يقدرني باش نساعد بالحاجة لي نقدر عليها ، سمورة علابالك كي قريت ردك 2 يحياو بنات بلادي بلا ما فقت قريتها باللحن تاع رابح درياسة ههههههههههههه و يعطيك الصحة على التدابير طرق هايلة و مفيدة نجرب منهم ان شاء الله و نحط التطبيقات ، و يعطيك الصحة على تطبيقاتك روعة بارك الله فيك ، خسارة فاتني موضوع الخبز مممممم و طريقة الشاي سمعت بها من قبل لكن ما جربتها اليوم العشيا ان شاء الله نجربها، حقا البطاطا من قبل كن حطيتها طيب بهاذ الطريقة و ما نشفتهاش لصقتلي كامل رميتها
حبيبة: حبيبة شكرا بارك الله فيك الفكرة وصلت ممكن صح كان عندي اصرار دائما أني نغير عادات أكلي...يعطيك الصحة على برنامج التنظيفات الربيعية عجبني و على التطبيقات

[سرور2]

صباح النور لبنات

العفو اختي وكشماتحتاجي سقسي راني هنا انت ولا اي اخت

نضت صباح صليت الفجر وقريت صفحتين قران ورجعت رقدت ل6 درت سبور وبديت في الملابس غسلتها

التنضيفات الخاصةبرمضان كنت كملت الشنبرة والصالة لكن هدون اليومين لفاتو جات وحد الغبار ردمت كلش املا قلت الاسبوع الجاي اذا صحة الحال نعودهم يعني الحيطانوالسقف والارضية لانو الخزانة كملتعا وبقات نضيفى ومفروزة

اما الزورمزال حتان يصحة الحال ملييح لانو مزال عدنا البرد ونتغطاو بيهم

المطبخ كل مرة نضف جهة وكيبقى يومين على رمضان اذا حيانا ربي ندير تنضيف عميق ليها مع الاواني والحيطان

[نسمة صبح]

السلام عليكم

اهلا ام ابراهيم الخليل عسى الامور بخير

فكرة مليحة نحكيو على التوابل ..في دارنا نستعملو قصبر و فلفل اسود و كمون لبعض لحوايج ..

و في دار شيخي يجيبو راس الحانوت مخلط و يحطوه في كلشي و نا عندهم نضطر نخدم بيه

بصح في داري نشري توابل فلفل احمر حار و حلو كمون زعفران زنجبيل فلفل اسود كمون ...
نعطيك فكرة صغيرة على الاستعمالات
القصبر للشربة
فلفل اكحل ف لي قراتان و اي حاجة تحبيها تجي شوي حارة
الزعفران او الكركم نحطو في بزاف حوايج لفايدتو متلا ارز جلبانة دجاج محمر ..
زنجبيل ف الدجاااج كي ندير صوص غدويت و ممكن نزيدو ف لماكلة على حساب الذوق
الفلفل الاحمر الحلو نحطو ف الدرسات تاع الشوفلور و الزعلوكة و اي حاجة نحبها حمرا بزيادة و يمد طعم خياااال ..نحطو حتى ف الارز كي ندخلو للفور
الكمون ف الحوت. و اللوبيا و احيانا الدجاج كي نحبو يجي طري و فيه ذوق الحوت

القرفة كاين اللي يستعملوها ف الشوربات البيضا..انا احيانا نستعملها بكمية قلييييلة

كاين الكروية و زريعة البسباس نقرا يستعملوهم لكن للامانة مزال مدخلتهمش

هااه بنات لي تدخل تحكيلنا استعمالات التوابل

و قولونا اليوم الجانب الاجتماعي...واش رايكم نحكيو على جانب من الشخصية و نتفقو عليه مثلا الاستقلالية ؟؟ و نحطو نقاط عملية للتحلي بالصفة

[آسيا 25]

المشاركة الأصلية كتبت بواسطة ام آدم

مساؤكن مبارك ومليئ بلخير والاحلام المحققة
صديقاتي اليوم جاني أمر قلب حياتي رأسا على عقب والله لحد الآن ماني ممنة يا جمعة الخير
راني نجحت في كونكور مخبري من الدرجة2
والخدمة قدام داري عيطوولي قالولي غدوة تسنيي بيفي نتاعك راني راح نموت من الفرح
هاذ الكونكور عندي 5 اشهر من عقبتو ونسيتو اصلا
لعقوبة ليكم كل وحدة واش تتمنى يحققهولها ربي ان شاء الله

مبروك أختي ربي يكملك إن شاء الله

[آسيا 25]

المشاركة الأصلية كتبت بواسطة سيرين 5

يعطيك الصحة على الوصفة تبان هاااايلة
ما شبعناش هاذ العام التشينة غالية ما رخستش كامل

سيرين هاهي وصفة إلهام بالتفصيل:
https://www.djelfa.info/vb/showthread.php?t=1779728

[آسيا 25]

صباح الخير عليكم حبيباتي يوم موفق ليكم كامل إن شاء الله

[سيرين 5]

سرور يعطيك الصحة على التطبيقات ربي يقدرك و يقدرنا ان شاء الله
نسمة صبح يعطيك الصحة على الاقتراحات و بالنسبة للموضوع الاجتماعي حبيت حاجة مبسطة و من واقعنا باش كل الموجودات يقدرو يشاركو أنا كنت نخمم في موضوع آخر الصراحة هو كيفية التعامل مع أهل الزوج لأنو علابالي 99 بالمئة من المتزوجات صراولهم مشاكل مع ناس دارها فقلت نتطرقو لهاذ الموضوع باش ننصحو بعضانا في كيفية التعامل مع أهل الزوج حتى نتجنب الوقوع المشاكل حتى المقبلات على الزواج ممكن يستفادو و يتجنبو الكثير من الأول ؟؟؟

ما هو رأيكم في هاذ الموضوع هل نتطرق إليه ؟ و ما هي اقتراحاتكم ؟؟؟

[سيرين 5]

المشاركة الأصلية كتبت بواسطة آسيا 25

سيرين هاهي وصفة إلهام بالتفصيل:
https://www.djelfa.info/vb/showthread.php?t=1779728

صباح النور آسيا يعطيك الصحة على الوصفة

[امّ اياد]

صباح الخير موضوعكم جميل ومنوع راكم تحكو على تحضيرات رمضان يدخل علينا بالصحة نسمة التوابل كل واحد وذوقو وكل منطقة وكفاه انا فلفل اسود منستغناش عليه نستعملو في كلش تقريبا وراس الحانوت نخلطوه ندرو قصبر الجاف وشوي بسباس وشوي حبة حلاوة وحبيات فقط حلبة وكمون نتعملو فالحبوب مثل العدس والحمص والوبيا ومرات في بعض طواجن البيضاء نستعمل قليل من القرفة تعطي ذوق مميز وكروية نديرها فالحريرة تاع الغرب وراهم كل مرة بخرجولنا بتابل

[حياتي كلها امل]

السلام عليكم راني جيت هذا وين كملت شغلي حبيبتي سرين بلامزية وران هنا باه نتبادلو الافكار ونذكرو بعضانا في اي جانب
نبدا تقريري تاع اليوم الحمد لله الصلاة في الوقت +الاذكار شربت الماء الدافىء مع الليمون وجدت القهوة وشربت كي لحق وقت الاولاد نوضتهم باه يوجدو نفسهم عندي وليدي ثلاثة او اربع مرات وانا نوض فيه راحو الاولاد
والزوج للعمل
الاعمال اليومية نغسل الاواني +نمسح الفرن الطابلة البطاجي الكل بماء جافيل+الخل+اسيس ثم نروح للغرفة والصالون نخملهم ونمسح الغبرة مع هذه الايام راهم يخدملنا في الطريق راهي الغبرة عاملة حالة نكنسهم ونسيقهم ثم المطبخ والكلوار تم نروح للحمام والمرحاض نسيقهم ونغسل لفابوات تاعهم وكيما اليوم سرجت مرفع تاع السبابط وغسلت الاحذية تاع الشتاء ونشرتهم باه انخبيهم صبح طيبت براس اتاي تاع سمراء جاني مليح بصح الي يحب اتاي ثقيل هذا يجيه خفيف طيبة الفطور تشكشوكة وحبيت نجرب بطاطا مقلية تاع الفور هذا وين طفيت عليها جات روعة خلاص من اليوم لاللبطاطا المقلية في الزيت درت شوية سبور كيما قاتلي سرينو فيما يخص موضوع النقاش تاع اليوم جيت راح نطرح نفس موضوع سرين لكن هل يتدخل اهل زوجك في حياتك الخاصة وماذا يكون تصرفكي عند تدخلهم

[سيرين 5]

بالنسبة لتطبيقاتي للبارحة لما رجعت من العمل كاتالي :
- عشيت بنتي و بدلتلها و رقدتها
- طويت الغسيل و مازال ما رتبتوش و في نفس الوقت عندي مسلسل نشوفو لعبة القدر حكم عليا مام راجلي عاد يشوفو معايا ههههههه و كي نكون مشغولة و نراطيه يحكيلي واش صرا فيه هههههههه
- غلفت لي قوبلي تاع الطماطم بالسيلوفان شدولي بزاف الوقت بصح لازم ؟ المرة الجاية نفضل نزيد شويا دراهم و نجيب لي قوبلي لي بالغطاء أحسن ؟

- كملت ترتيب الثلاجة و فرغت الثانية لي فسدت (خسرلي كلش 8 كلغ قارص معصورين رميتهم للأسف ؟ كان عندي مسفوف فسد أيضا رميتو غير الخسارة ؟...)
هاي الثلاجة قبل تفريغها و غسلها كانت مدودة ههههههه و غير مرتبة


هنا فرغتها كامل

و هنا بعد غسلها و ترتيبها الحمد لله على النتيجة ان شاء الله منا و روح كل أسبوع مسحة خفيفة و أنا حافظت عليها نقية



- شويت الباذنجال و عملتو زعلوكة للعشاء حاجة خفيفة و حضرت لي مدي معي للعمل


- شويت الطرشي و الحار باش نحطهم بالمجمد ان شاء الله
- غسلت كومة الأواني

- مسحت الفرن
- جمعت المبلاس المتسخة
- نشرت دروات و كوفيرطا تاع بنتي و لاكوات تاعها
مازالت دنيتي مخروبة الصراحة ما كنتش رايحة للعمل اليوم قلت نقي دنيتي لأني تقلقت نشوفها كل يوم مخروبة و ما لحقتش نرتبها كامل خطرة وحدة ؟ من بعد دورت رايي قلت غدوى الخميس و ما نخدمش نزيد نصبر نهار ؟

[آسيا 25]

المشاركة الأصلية كتبت بواسطة سيرين 5

سرور يعطيك الصحة على التطبيقات ربي يقدرك و يقدرنا ان شاء الله
نسمة صبح يعطيك الصحة على الاقتراحات و بالنسبة للموضوع الاجتماعي حبيت حاجة مبسطة و من واقعنا باش كل الموجودات يقدرو يشاركو أنا كنت نخمم في موضوع آخر الصراحة هو كيفية التعامل مع أهل الزوج لأنو علابالي 99 بالمئة من المتزوجات صراولهم مشاكل مع ناس دارها فقلت نتطرقو لهاذ الموضوع باش ننصحو بعضانا في كيفية التعامل مع أهل الزوج حتى نتجنب الوقوع المشاكل حتى المقبلات على الزواج ممكن يستفادو و يتجنبو الكثير من الأول ؟؟؟

ما هو رأيكم في هاذ الموضوع هل نتطرق إليه ؟ و ما هي اقتراحاتكم ؟؟؟

صباح الخير سيرين و الله موضوع في الصميم أنا عن نفسي راني نعاني خصوصا أني من النوع الساكت حتى زوجي ما نشكيلوش و هوما ربي يغفرلهم ما يرحمونيش خلاص بالرغم من أنهم ماشافو مني غير كل خير حسبي الله و نعم الوكيل.

[سيرين 5]

حياتي كلها أمل يعطيك الصحة على البطاطا نجربها ان شاء الله

راح نحكي على كل الموضوع بالتفصيل ان شاء الله