يوميات عضوة - الصفحة 45

ام ايمان1 · 2014-04-09, 09:03

مشكورين اخواتي ام عبودة وياسمين على نصائحكم وفعلا عندكم الحق كامل قالولي نفس الكلام ربي يحفظكم انشاء الله

ام ايمان1 · 2014-04-09, 09:17

صباحكم منور وسعيد نعرفكم بنفسي انا ام ايمان من قسنطينة وام لخمسة اطفال عندي زوج في الابتدائى وثلاثة في الثانوي ربي يحفظهم امالا لازم نكون منظمة وقتي بين الدار وبين قرايتهم اللي تشيب وما ننساش الزوج لعزيز لازملو هو تاني التاويلفي الصباح نوض على 6.30 نصلي وندخل للكوزينة نبدا نوجد في لفطور ونوض لولاد مايجيو ينوضو بالسيف نبقى وراهم حتى ل7 باه ينوضو يفطرو ويروحو لمدارسهم ونزيد نفيق زوجي نحكيو شوية في برنامج اليوم من بعد يشرب قهوته ويروح للعمل ونبقى انا نحارب مع شغل الدارنحل نوافد ونحط لعصفور تاعي في الطاقة باش نسمعو وهو فرحان بجو الربيع نكنس الزرابي برسبيراتور نمسح الغبرة اليوم ماعندش قش لغسيل غسلتو البارح وللغداء عندي التليتلي تاع البارح ومن بعد لغداء نصلي ونغيس شوية ولو 2 دقائق باش نقدر نكمل الفترة المسائية

amina nourhanne · 2014-04-09, 10:13

Sbah enour habibati

نخله. · 2014-04-09, 13:03

سلام عليكم

من قبيل ونا نقرا في حكاياتكم ونا كنت طامعه في كوزينه سكولتي كيما يقولو راكم حشيتولي فيها واصلا ما نلحقش على سومتها 120 تبنيلي اطاج و 60 ديرلي فينيسيون هههههههه

اليوووووووووم اليوووووووم اليوووووووووووم

نضت 7 ونعساااااانه توضيت وصليت وجدت القهوة ونوضت ولدي فطر وراح راني فرحانه من العطله راني نوض فيه فلليل 3 مرات يصبح فراشو ناشف

ناض الزوج وبنتي ستقهوسنا هو خرج ونا بنتي درنا فولارات والى العمل

عجنت للمحاجب و وجدتلها الصوص ورحت لحوش بالييت وسيقتو دخلت للدار فتحتها وشمستها وخرجت الفراشات

الى المطبخ سجيت محجوباتي ومسيمينات للعشيه جا ولدي على 11 وربع تغدينا لانو السبع رح يطول

الى الحماو والتواليت نقيتهم لاني بدلت الميناج تع الجمعه وليت نديرو بالخميس ومنه فالدوش والتواليت النهار للي قبل

كملت 12 دوشت وطلعت غلقت التواقي وفرشت وحليت الميكرو في انتظار الظهر

ام عبودة · 2014-04-09, 14:12

السلااام عليكم
نخلة تخلعتي هههههههه البني ساااهل حنا دارنا اللي بحذاكم عودناه بالحساب 400 مليون واااع تبني دار
واسعار المطابخ هذوك راهم ناااار والله كاين اللي يخدموهم عند النجار ما تسقامش حتى 20 مليون
من بعد ما خليتكم
حلبت التواقي للشمس ورحت سيقت غرف العايلة راهم ماهمش هنا
وغسلت حويجات كملت دخلت للكوزينة غسلت المواعن وسيقتها ومن بعد درت الفطور شكشوكة اشتهيتها كي عدت وحدي الغاشي ما يحبهاش
فطرت انا واولادي لحقت وقتهم بعثتهم للمدرسة صليت الظهر وراني نستنى يرجعو باش نرقد شوي
هيا الى الملتقى
اه بلا ما ننسى نورهاااااااان مرحبا بيك حتى حنا توحشناك

ام ياسمين10 · 2014-04-09, 17:58

مساء الخير حبيباتى وشراكم

ام ايمان1 · 2014-04-09, 19:27

مساء الانوار حبيباتي من فضلكم اللي تعرف اطيب لاتاي كيما تاع الصحاروا تعطيلي المقادير

ام عبودة · 2014-04-09, 22:00

لاتاي راه حساب الورقة يعني ماركة اللي تشريها تكون من النوع الغالي ويلحق الى120 الف
ولازم تمصمصيه يعني تشليه او تغسليه بالماء المغلي والسخون ثلاث مرات ومن بعد على نار هااااادئة تخليه يطيب في حين تحطي نعناع يابس من الافضل
في ابريق اخر وتغسلي بالماء السخون مرة واحدة
وكي يطيب التاي تصفي في البراد ومن بعد تلقمي يعني ديري السكر في كاس وابقي تسربي وترجعي الى الابريق باش تجيك الرغوة
والتاي اهله يشربو الطبخة الاولى بصح تجي قاطعة حنا نديرو الطبخة الثانية والى يحبو خفيف شوي يزيدلو الطبخة الثالثة
يعني كل مرة تصفي عاودي عمري ابريق اللي طبختي فيه التاي بالماء السخون ورجعؤه الى النار

ام عبودة · 2014-04-09, 22:05

من بعد ما رجعو الاولاد رقدت شوي
نظت صليت العصر ودرت العشاء
وقعدت مع الاولاد نتفرجو
رجع الزوج من السفر وخرج مزروب معروض للعشاء شخشوخة بسكرية
كي رجع من العرضة خرجنا درنا شو وشرينا صوالح
تعشينا ورقدو الاولاد وانا نقولكم تصبحووون على الف خير

ام ياسمين10 · 2014-04-09, 22:27

ام ايمان سامحينى منيش معلمة فى التاى .راها ام عبودة كفت ووفت .تصبحون على الف خير الى الغد ان شاء الله

anais lily · 2014-04-10, 06:25

صباح الخير والنشاط
يوم جديد من يوميات عضوة الي تعطينا النشاط و الحيوية
أنا من المتتبعات

عندي طلب صغير من المتميزة أم عبودة طريقتك في تعطير المنزل و الملابس و الخزانة وشكرا مسبقا

ام عبودة · 2014-04-10, 07:49

صبااااحكم سعيد
اليوم نظت على 5:45 الزوج عندو عمل توضيت وصليت واستغفرت ربي
رحت للمطبخ وجدت القهوة راوية ناظت بكري شربت معنا حليبها
وجدت ملابس الزوج ورجعت تكيت شوي لحقت ال 7:20
نوظتني راوية رحت وجدت حليب عبودة ولبستهم حوايجهم
وذرك يروحو للمدرسة
الصوالح ما عنديش بزاااف غير مواعن القهوة والعشاء نغسلهم الفطور عندي بزاف البواقي
ممكن ندير للزوج حاجة خفيفة ما يحبش البواقي
هيا بااااي الى الملتقى

ام عبودة · 2014-04-10, 07:55

اقتباس:

المشاركة الأصلية كتبت بواسطة anais lily

صباح الخير والنشاط
يوم جديد من يوميات عضوة الي تعطينا النشاط و الحيوية
أنا من المتتبعات

عندي طلب صغير من المتميزة أم عبودة طريقتك في تعطير المنزل و الملابس و الخزانة وشكرا مسبقا

صبااااح النور
واش راكي خيتي ومرحبا بيك معنا نورتينا
على تعطير الخزانة راني درت موضوع في هذا القسم ظرك نحطك الرابط
تعطير النزل انا نستعمل البخور والملابس نستعمل soupline غالي شوي بصح رووووووعة
وهذه الفوتو تاعو

ام عبودة · 2014-04-10, 08:08

انيس ليلي راهو الرابط
https://www.djelfa.info/vb/showthread.php?t=1494332

ام عبودة · 2014-04-10, 11:03

من بعد ماخليتكم
درت شوي رياضة لشد العضلات ههههههه الحمد لله ماعنديش مشكلة السمنة
فتحت التواقي نظمت غرفتي وغرفة الاولاد. وطبقت خزانة الاولاد
كملت رحت للمطبخ غسلت المواعن ودرت البطاطا في الكوكوت باش نديرها بوري
وتبلت الدجاج كي يرجع الزوج نحمرو
درت التواليت والدوش وسيقت معاهم المطبخ
وراني في غرفتي نستنى في الاولاد يرجعو